L-EWWEL TQARBINA TAT-TFAL F’SAN PIETRU
OMELIJA TAL-QDUSIJA TIEGĦU ĠWANNI PAWLU II
Il-Ħamis, 14 ta’ Ġunju 1979
Għeżież Tfal!
Kbir huwa l-ferħ tiegħi
narakom hawn, hekk numerużi u hekk mimlijin żelu, biex tiċċelebraw flimkien
mal-Papa is-Sollennità liturġika tal-Ġisem u d-Demm tal-Mulej!
Insellmilkom ilkoll u lil
kull wieħed u waħda b’mod speċjali bil-ħlewwa l-iktar profonda, u niżżikom ħajr
bil-qalb talli ġejtu biex iġġeddu it-Tqarbina Mqaddsa mal-Papa u għall-Papa; u
hekk ukoll niżżi ħajr lill-parroċċi tagħkom, dejjem dinamiċi u żelanti, u l-ġenituri
u qraba tagħkom, li ħejjewkom u akkumpanjawkom.
Għad għandi quddiem
għajnejja l-ispettaklu mpressjonanti tal-moltitudnijiet immensi li ltqajt
magħhom fil-vjaġġ tiegħi fil-Polonja; u hawn hu issa l-ispettaklu tat-tfal ta’
Ruma, hawn hi l-innoċenza meraviljuża tagħkom, l-għajnejn jibbru tagħkom, it-tbissim
imqarqaċ tagħkom!
Intom l-iktar għeżież ta’
Ġesù: “Ħallu lit-tfal jiġu għandi! – kien jgħid l-Imgħallem Divin - la
żżommuhomx” (Lq 18,16).
Intom ukoll l-iktar
għeżież tiegħi!
Għeżież tfal! Intom
ħejjejtu lilkom infuskom għall-Ewwel Tqarbina tagħkom b’tant impenn u diliġenza,
u l-ewwel laqgħa tagħkom ma’ Ġesù kien waqt ta’ kommozzjoni qawwija u ta’ ferħ
profond. Ftakru dejjem dan il-jum imbierek tal-Ewwel Tqarbina! Ftakru dejjem
iż-żelu tagħkom u l-ferħ purissmu tagħkom!
Issa wara ġejtu hawn, biex
iġġeddu il-laqgħa tagħkom ma’ Ġesù. Ma tistgħux tagħmluli rigal isbaħ u iktar
prezzjuż!
Ħafna tfal esprimew ix-xewqa
li jirċievu l-Ewwel Tqarbina minn idejn il-Papa. Bla dubju din kienet tkun
għalija konsolazzjoni pastorali kbira tirregala lil Ġesù għall-ewwel darba
lis-subien u lill-bniet ta’ Ruma. Imma dan mhux possibbli, u mbagħad huwa aħjar
li kull tifel u tifla jirċievu l-Ewwel Tqarbina fil-Parroċċa tagħhom mingħand
il-kappillan tagħhom. Imma talinqas illum huwa possibbli għalija li nagħti t-Tqarbin
imqaddes lil rappreżentanza tagħkom waqt li nżomm f’imħabbti lill-oħrajn kollha,
f’dan iċ-Ċenaklu vast u tal-għaġeb! U din hija għalija u għalikom kuntentizza
immensa, li qatt iktar ma ninsew! Fl-istess ħin nixtieq inħallilkom xi ħsibijiet,
li jistgħu jservukom biex iżżommu dejjem ċara l-fidi tagħkom, żeluża mħabbitkom
lejn Ġesù Ewkaristiku, innoċenti ħajjitkom.
1. Ġesù huwa preżenti
magħna. Hawn hu l-ewwel ħsieb.
Ġesù qam mill-Imwiet, huwa
telà s-sema, imma ried jibqà magħna u għalina, fil-postijiet kollha tad-dinja.
L-Ewkaristija hija tassew invenzjoni divina!
Qabel ma miet fuq
is-Salib, waqt li offra ħajtu b’sagrifiċċju ta’ adorazzjoni u ta’ mħabba
lill-Missier, Ġesù waqqaf l-Ewkaristija, waqt li bidel il-ħobż u l-inbid
fil-Persuna tiegħu nnifsu u waqt li ta lill-Appostli u lis-suċċessuri tagħhom,
l-Isqfijiet u s-Saċerdoti, is-setgħa li jirrenduh preżenti fil-Quddiesa Mqaddsa.
Ġesù mela ried jibqà
magħna għal dejjem! Ġesù ried jingħaqad magħna b’mod intimu fit-Tqarbin
Imqaddes, biex jurina imħabbtu b’mod dirett u personali. Kull wieħed u kull
waħda nistgħu ngħidu: “Ġesù jħobbni! Jien inħobb lil Ġesù”.
Santa Teresa tal-Bambin
Ġesù, waqt li tiftakar il-jum tal-Ewwel Tqarbina tagħha, kitbet: “O kemm kienet
sbejħa l-ewwel bewsa li Ġesù ta lil ruħi!... kienet bewsa ta’ mħabba, u jien
ħassejtni maħbuba u min-naħa tiegħi għidt: “Inħobbok, nirregala lili nnifsi
lilek għal dejjem!”… Teresa kienet għabet bħall-qatra tal-ilma li tintilef fi
ħdan l-oċean. Baqgħet ma’ Ġesù biss: l-imgħallem, ir-Re” (Teresa di Lisieux, Storia
di un’anima, Queriniana 1974, Man. A, cap. IV, p. 75). U nfexxet tibki
bil-ferħ u bil-konsolazzjoni, fost l-istagħġib ta’ sħabha.
Ġesù huwa preżenti
fl-Ewkaristija biex inkunu nistgħu niltaqgħu miegħu, biex inħobbuh, biex
nirċevuh, biex nikkunslawh. Kulfejn hemm is-saċerdot, hemm hemm preżenti Ġesù,
għaliex il-missjoni u l-kobor tas-Saċerdot hija propju ċ-ċelebrazzjoni
tal-Quddiesa Mqaddsa.
Ġesù huwa preżenti
fil-bliet il-kbar u fil-pajjiżi ż-żgħar, fil-knejjes tal-muntanji u fl-għerejjex
imbegħda tal-Afrika u tal-Asja, fl-isptarijiet u fil-ħabsijiet; saħansitra
fil-kampijiet tal-konċentrament kien preżenti Ġesù Ewkaristiku!
Għeżież Tfal! Irċevuh
spiss lil Ġesù! Ibqgħu fih; ħallu likom infuskom tiġu mibdula minnu!
2. Ġesù huwa l-ikbar Ħabib
tagħkom. Hawn hu t-tieni ħsieb.
La tinsewh qatt! Ġesù jrid
ikun il-ħabib l-iktar intimu tagħna, seħibna tat-triq.
Bla dubju għandkom bosta
ħbieb, imma ma tistgħux tibqgħu dejjem magħhom u mhux dejjem huma jistgħu
jgħinukom, jisimgħukom, jikkunslawkom. Ġesù iżda huwa l-ħabib li ma jitlaqkom
qatt; Ġesù jafkom wieħed wieħed, personalment; jaf isimkom, isegwikom,
jakkumpanjakom, jimxi magħkom kuljum; jieħu sehem fil-ferħ tagħkom u
jikkunslakom fil-waqtiet tan-niket u tad-dwejjaq. Ġesù huwa l-ħabib li mingħajru
ma nistgħux ngħaddu, ladarba niltaqgħu miegħu u nifhmu li huwa jħobbna u jrid
imħabbitna.
Miegħu tistgħu titkellmu,
tiftħu qalbkom; lejh tistgħu dduru b’imħabba u fiduċja. Ġesù miet saħansitra fuq
is-Salib għal imħabbitna! Agħmlu patt ta’ ħbiberija ma’ Ġesù u tiksruh qatt!
Fis-sitwazzjonijiet kollha ta’ ħajjitkom, duru lejn il-Ħabib Divin, preżenti
fina bil-“grazzja” tiegħu, preżenti magħna u fina fl-Ewkaristija..
U kunu wkoll
il-messaġġiera u x-xhieda ferħana tal-Ħabib Ġesù fil-familji tagħkom, fost
sħabkom, fil-postijiet tal-logħob tagħkom u tal-vaganzi tagħkom, f’din is-soċjetà
moderna, tant drabi mdejqa u mhux sodisfatta.
3. Ġesù jistenniena. Ħawn
hu l-aħħar ħsieb.
Il-ħajja twila jew qasira,
hija vjaġġ lejn il-ġenna: hemm tinsab Art Twelidna, hemm hija l-vera dar tagħna;
hemm jinsab l-appuntament tagħna!
Ġesù jistenniena fil-ġenna!
La tinsew qatt din il-verità suprema u konfortanti. U x’inhu t-Tqarbin Imqaddes
jekk mhux ġenna antiċipata? Infatti l-Ewkaristija hija l-istess Ġesù li
jistenniena li jum wieħed miegħu niltaqgħu b’mod miftuħ fis-sema.
Irċievu spiss lil Ġesù
biex ma tinsew qatt il-ġenna, biex timxu dejjem lejn dar il-Missier Ċelesti,
biex tiggustaw diġa naqra mill-ġenna!
Dan kien fehmu Duminku
Savio, li ta’ sebà snin kellu l-permess li jirċievi l-Ewwel Tqarbina, u f’dak
il-jum kiteb il-proponimenti tiegħu: “L-ewwel: inqerr ta’ spiss ħafna u
nitqarben id-drabi kollha li jippermettili l-konfessur. It-tieni irrid inqaddes
il-jiem festivi. It-tielet: il-ħbieb tiegħi jkunu Ġesù u Marijas. Ir-raba: Il-mewt
imma mhux id-dnub”.
Dak li ċ-ċkejken Duminku
kiteb tant snin ilu (fl-1849) jgħodd u jiswa wkoll għal dejjem.
Għeżież, nikkonkludi billi
ngħidilkom, tfal sibien u bniet, żommu lilkom infuskom denji ta’ Ġesù li qegħdin
tirċievu! Kunu nnoċenti u ġenerużi! Impenjaw ruħkom biex tirrendu sabiħa l-ħajja
għal kulħadd bl-ubbidjenza, bil-ġentilezza, bl-edukazzjoni tajbsa! Is-sigriet
tal-ferħ huwa t-tjubija!
U lilkom ġenituri u qraba,
ngħidolkom b’inkwiet u fiduċja: ħobbu lil uliedkom, irrispettawhom, edifikawhom!
Kunu denji tal-innoċenza tagħhom u tal-misteru miġbur f’ruħhom, maħluqha
direttament minn Alla! Huma jinħtieġu l-imħabba, il-ħlewwa u l-eżempju tajjeb
tal-maturità! La tittraskurawhomx! La tittraduhomx!
Nafdakom ilkoll lil Marija
Santissma, Ommna tas-sema, il-Kewkba tal-baħar ta’ ħajjitna: itolbuha kuljum
intom, tfal! Agħtuha, lil Marija Santissma, idejkom sabiex twassalkom biex
tirċievu b’mod qaddis lil Ġesù.
U nindirizzaw ukoll ħsieb
ta’ mħabba u ta’ solidarjetà lit-tfal kollha batuti, lit-tfal kollha li ma
jistgħux jirċievu lil Ġesù għax ma jafuhx, lill-ġenituri kollha li b’niket kbir
tilfu lil uliedhom jew huma delużi u mdejqa fl-aspettattivi tagħhom.
Fil-laqgħa tagħkom ma’
Ġesù itolbu għal kulħadd, itolbu grazzi u għajnuniet għal kulħadd!
U itlobu wkoll għalija,
intom li intom l-għeżież tiegħi!
Miġjub mit-Taljan għall-Malti minn Emanuel Zarb
|