Aktar mill-Papa Ġwanni Pawlu II
...
|
RIT TAT-TEĦID TAL-PUSSESS TAL-LATERAN
OMELIJA TA’ ĠWANNI PAWLU II
Il-Ħadd, 12 ta’ Novembru 1978
Għeżież Ħuti.
1.Wasal il-jum li fih il-Papa Ġwanni Pawlu II jiġi fil-Bażilika ta’
San Ġwann fil-Lateran biex jieħu
pussess tal-Katedra ta’ Isqof ta’
Ruma. Nixtieqni ninżel
għarkubbtejja f’dan il-post u
nbus l-għatba ta’ dan it-tempju,
li ilu għal tant sekli “għamara
ta’ Alla mal-bnedmin” (Ap 21,3):
Alla-Salvatur mal-poplu tal-Belt
Eterna, Ruma. Flimkien ma’ dawk
kollha hawn preżenti ntenni l-kliem
tas-Salm: “Kemm fraħt, meta
qaluli: / “Se nmorru f’Dar
il-Mulej”. / U issa riġlejna
jieqfu / fil-bieb tiegħek,
Ġerusalem! / Ġerusalem hija
mibnija / bħala belt soda u
magħquda. / jitilgħuha flimkien
it-tribujiet, / it-tribujiet
tal-Mulej, / skont il-liġi ta’
Iżrael, / biex ifaħħru isem
il-Mulej” (Sal 122).
Mhijiex forsi din xbiha tal-ġrajja tal-lum? Il-ġenerazzjonijiet
antiki kienu jitilgħu f’dan il-post:
ġenerazzjonijiet ta’ Rumani,
ġenerazzjonijiet ta’ Isqfijiet
ta’ Ruma, suċcessuri ta’ Pietru,
u kienu jkantaw dan l-innu ta’
ferħ, li illum qiegħed intenni
flimkien magħkom. Jiena
ningħaqad ma’ dawn
il-ġenerazzjonijiet, jien, Isqof
ta’ Ruma, Ġwanni Pawlu II, ta’
oriġni Pollakka. Nieqaf fuq l-għatba
ta’ dan it-tempju u nitlobkom
tilqgħuni f’isem il-Mulej.
Nilobkom tilqgħuni, bħal ma
lqajtu matul is-sekli kollha,
lill-Antenati tiegħi, hekk bħal
ma lqajtu ftit ġimghat ilu, lil
Ġwanni Pawlu I, tant maħbub mid-dinja
kollha! Nitlobkom biex tilqgħu
lili wkoll.
Il-Mulej jgħid: “Mhux intom għażiltu lili, imma jien għażilt
lilkom” (Ġw 15,16). Dan
huwa dak kollu li jiena nistà
ngħid; miniex hawn għax irrid
jien. Il-Mulej għażilni. F’isem
il-Mulej allura nitlobkom:
Ilqgħuni!
2.Fl-istess ħin,
nesprimi t-tislima kordjali
tiegħi lil kulħadd. Insellem
lis-Sinjuri Kardinali u lil Ħuti
fl-Episkopat li riedu jieħdu
sehem f’din iċ-ċerimonja u,
b’mod partikolari, nixtieq
insellem lilek, għażiż Ħija
Kardinali Vigarju, Monsinjur
Viciġerenti u l-Isqfijiet
Awżiljarji ta’ Ruma, lilkom
għeżież Saċerdoti ta’ din
id-dijoċesi tiegħi; lilkom
għeżież ħuti, irġiel u nisa ta’
tant Ordnijiet u
Kongregazzjonijiet reliġjużi.
Nindirizza tislima rispettuża
lill-Awtoritajiet Governattivi u
Civili bi ħsieb rikonoxxenti
għad-delegazzjonijiet li jinsabu
preżenti hawn. Insellem lilkom
ilkoll! U din “ilkoll” tfisser
“lil kull wieħed u waħda
partikolari”. Ukoll jekk ma
nsejħilkomx b’isimkom wieħed
wieħed u waħda waħda, nixtieq
insellem lil kull wieħed u
waħda, billi nsejjaħ isimkom!
Lilkom Rumani! Għal kemm sekli tmur lura din it-tislima? Din
teħodkom lura għall-bidu
diffiċli tal-fidi u tal-Knisja,
li propju hawn, fil-kapitali
tal-Imperu antik, issuperat,
matul tliet sekli, il-prova
tagħha tan-nar: prova ta’ ħajja.
U minnha ħarget rebbieħa. Glorja
lill-Martri u lill-Konfessuri!
Glorja lil Ruma Qaddisa! Glorja
lill-Appostli tal-Mulej! Glorja
lill-katakombi u lill-Bażiliki
tal-Belt Eterna!
3.Waqt li nidħol illum fil-Bażilika ta’ San Ġwann fil-Lateran,
jitfaċċa quddiem għajnejja
il-waqt li fih Marija tirfes
l-għatba tad-dar ta’ Żakkarija
biex issellem lil Eliżabbetta,
omm Ġwanni. Jikteb l-Evanġelista
li għal din it-tislima
“it-tarbija… qbżet fil-ġuf” (Lq 1,41),
U tant Santi Padri u kittieba
jżidu, sa minn żminijiet remoti,
li minn dak il-waqt Ġwanni
rċieva l-grazzja tal-Feddej. U
minħabba f’dan huwa nnifsu, kien
l-ewwel wieħed li Ħabbru. Hu
l-ewwel wieħed, mal-poplu kollu
ta’ Iżrael. Stennieh fuq ix-xtut
tal-Ġordan. U kien muri
lill-poplu bil-kliem: “Hawn hu
l-Ħaruf ta’ Alla, hawn hu dak li
jneħħi d-dnubiet tad-dinja” (Ġw 1,29),
Ħaruf ta’ Alla tfisser
il-Feddej, tfisser is-Salvatur
tad-dinja!
Ġustament, din
il-Bażilika, iddedikata lil San
Ġwann il-Battista minbarra lil
San Ġwann l-Evanġelista, hija
kkonsagrata lill-Feddej
Imqaddees, Donnu, li wkoll
illum, hekk kif tul-is-sekli,
smajna din il-vuċi tirbombja fuq
ix-xtut tal-Ġordan. Il-vuċi
tal-prekursur, il-vuċi
tal-profeta, il-vuci tal-ħabib
tal-Għarus. Hekk jgħid Ġwanni:
“Huwa jikber u jien
għall-kuntrarju niċċekken” (Ġw 3,30).
Din l-ewwel stqarrija tal-fidi
fi Kristu Salvatur kienet
bħaċ-ċavetta li għalqet l-patt
il-qadim, żmien ta’ stennija, u
fetħet il-patt il-ġdid, żmien
ta’ twettiq. Din l-ewwel
stqarrija fundamentali tal-fidi
fil-Ħaruf ta’ Alla li jneħħi
d-dnubiet tad-dinja, kienu
semgħuha diġa fuq ix-xtut
tal-Ġordan l-Appostli futuri ta’
Kristu. Probabilment kien
semagħha wkoll Xmun Pietru. Din
għenitu biex iktar tard ixandar,
fil-bidu tal-Patt il-ġdid: “Inti
l-Kristu, Bin Alla l-Ħaj” (Mt 16,16).
Huwa ġust għalhekk li s-Suċċessuri ta’ Pietru jitilgħu f’dan
il-post biex jirċievu, kif darba
irċeviha Pietru, l-istqarrija
ta’ Ġwanni: “Hawn hu l-Ħaruf ta’
Alla”, u jittrasferiha fl-era
l-ġdida tal-Knisja billi
jxandar: “Inti l-Kristu Bin Alla
l-Ħaj”.
4. Fil-kwadru ta’ din il-laqgħa meraviljuża tal-qadim mal-ġdid,
nixtieq illum, bħala l-Isqof
il-ġdid ta’ Ruma, nibda
l-ministeru tiegħi lejn il-Poplu
ta’ Alla ta’ din il-Belt u ta’
din id-dijoċesi, li saret
għall-missjoni ta’ Pietru,
l-ewwel fil-familja l-kbira
tal-Knisja, fil-familja
tad-dijoċesijiet-aħwa.
Il-kontenut essenzjali ta’ dan
il-ministeru huwa l-kmandament
tal-karità: dan il-kmandament li
jagħmel minna, bnedmin, ħbieb
ta’ Kristu: “Intom ħbiebi, jekk
tagħmlu dak li nikkmandakom” (Ġw 15,14).
“Bħal ma l-Missier ħabbni, hekk
ukoll ħabbejtkom jien. Ibqgħu
fl-imħabba tiegħi” (Ġw 15,9).
O Belt Eterna, o Huti Rġiel u Nisa, o ċittadini Rumani! L-Isqof
il-ġdid tagħkom jixtieq b’mod
speċjali li nibqgħu fl-imħabba
ta’ Kristu, u li din l-imħabba
tkun dejjem iktar qawwija
mid-dgħufijiet tagħna. Huwa
jgħinna biex nimmudellaw il-wiċċ
spiritwali tal-Komunità tagħna,
għaliex quddiem din l-imħabba
jgħibu l-mibegħda, l-għira, kull
malizzja u perversità,
fl-affarijiet il-kbar kif ukoll
fiż-żgħar, fil-kwistjonijiet
soċjali kif ukoll f’dawk
interpersonali. Jalla l-imħabba
tkun iktar qawwija! B’liema
ferħ, u fl-istess ħin b’liema
rikonoxxenza segwejt f’dawn
l-aħħar jiem l-episodji numerużi
(it-televiżjoni ġabithomli qrib)
li fihom, minħabba n-nuqqas ta’
ħaddiema fl-isptarijiet, tant
nies joffru lilhom infushom
bħala volontarji, kbar u b’mod
partikolari żgħażagħ, biex bi
premura jaqdu lill-morda. Jekk
inhi valida r-riċerka
tal-ġustizzja fil-ħajja
professjonali, daqstant u iktar
għandha tkun ħajja l-imħabba
soċjali. Nixtieq għalhekk,
għad-dijoċesi ġdida tiegħi, għal
Ruma, din l-imħabba li l-Kristu
ried għad-dixxipli tiegħu.
L-imħabba tibni; l-imħabba biss
tibni!
Il-mibegħda teqred. Il-mibegħda ma tibni xejn. Tistà biss
tiddisintegra. Tistà
tiddiżorganizza l-ħajja soċjali;
tistà l-iktar l-iktar, tagħmel
pressjoni fuq d-dgħajfa,
mingħajr iżda ma tibni xejn.
Għal Ruma, għad-dijoċesi l-ġdida tiegħi, u fl-istess ħin
għall-Knisja kollha u għad-dinja,
nixtieq imħabba u ġustizzja.
Ġustizzja u mħabba, sabiex
inkunu nistgħu nibnu.
Fir-rigward ta’ dan il-bini, illum jgħallimna (fit-tieni qari) San
Pawl, l-istess bħal ma għallem
żmien ilu lill-insara ta’ Efesu,
meta kien kiteb: “[Kristu] ħatar
uħud bħala appostli, oħrajn
bħala profeti, oħrajn bħala
evanġelisti, oħrajn bħala
rgħajja u għalliema…sabiex
jinbena l-Ġisem ta’ Kristu” (Ef 4,11.12).
U jien, waqt li nkompli dan
il-ħsieb fid-dawl tal-Konċilju
Vatikan II u waqt li nirreferi
b’mod partikolari għad-Digriet
dwar l-Apostolat tal-Lajċi,
inżid li Kristu qiegħed
isejħilna, sabiex insiru
missirijiet, ommijiet ta’
familja, ulied subien u bniet,
tobba, inġiniera, avukati,
tekniċi, xjenzjati, edukaturi,
studenti, tfal tal-iskola, u l-bqija!
Kull wieħed għandu postu u
dmiru fil-bini tal-ġid komuni
tal-bnedmin. Wieħed jistà jibni
bi bnedmin ħajjin. Fil-bidu
tas-servizz veskovili tiegħi,
nitlob lil kull wieħed u waħda
minnkom biex issibu u
tiddefenixxu postkom fl-opra ta’
dan il-bini.
Nerġà nitlob lilkom cittadini kollha Rumani, mingħajr eċċezzjoni,
lilkom li llum tinsabu hawn
preżenti u lil dawk kollha li
lilhom tasal il-vuċi tal-Isqof
il-ġdid tagħkom: Morru
bl-ispirtu fuq ix-xtajta
tal-Ġordan, hemm fejn kien
jgħallem Ġwanni Battista: Gwanni,
patrun appuntu ta’ din
il-Bażilika, kattidral ta’ Ruma.
Erġgħu isimgħu għal darb’oħra
dak li huwa kien qal, waqt li
indika lil Kristu:”Hawn hu l-Ħaruf
ta’ Alla. Hawn hu dak li jneħħi
d-dnubiet tad-dinja”.
Hawn hu s-Salvatur!
Emmnu fih b’fidi mġedda, b’fidi hekk ferventi bħal dik tal-ewwel
insara Rumani, li hawn
ippreservaw tul tliet sekli ta’
provi u persekuzzjonijiet.
Emmnu b’fidi mġedda, hekk bħal ma hija meħtieġa għalina, insara
tat-tieni millenju li wasal biex
jintemm, fi Kristu, Salvatur tad
dinja! Amen.
Miġjub mit-Taljan għall-Malti
minn Emanuel Zarb
|