|
VJAĠĠ APOSTOLIKU Fl-ISTATI
UNITI TAL-AMERIKA
QUDDIESA FL-INĦAWI
TAL-LIVING HISTORY FARMS
OMELIJ TAL-QDUSIJA
TIEGĦU ĠWANNI PAWLU II
Des Moines – IL-Ħamis,
4 ta’ Ottubru 1979
Għeżież Ħuti fi
Kristu.
Hawn, fil-qalba
tal-Amerka rurali, f’nofs l-għelieqi fertili u ġenerużi fi żmien il-ħsad, jiena
niġi biex niċċelebra l-Ewkaristija.
Ladarba ninsab
f’nofskom f’dan il-perijodu tal-ħsad awtunnali dak il-kliem li hu mtenni kull
darba li jinġabru l-fidili għall-Quddiesa jidhruli partikularment f’posthom:
“Imbierek int, Mulej, Alla tal-univers; mit-tjubija tiegħek irċivejna dan
il-ħobż. Frott tal-art u xogħol il-bniedem”.
Ladarba kont dejjem
qrib in-natura, ippermettuli li llum inkellimkom dwar l-agrikoltura, l-art u
dwar dak li l-art u x-xogħol tal-bniedem ipproduċew.
1. L-art hija don li
Alla għamel għall-umanità sa mill-bidu taż-żminijiet, Dan huwa don ta’ Alla,
mogħti mill-imħabba tal-ħallieq bħala mezz ta’ sosten għall-ħajja li huwa kien
ħalaq. Imma l-art mhijiex biss don ta’ Alla; hija hi wkoll responsabiltà
għall-bniedem. Il-bniedem maħluq huwa stess mit-trab tal-art (Ġen 3,7),
kien iddisenjat padrun (Ġen 1,26).
Bi skop li tagħti
frott l-art kellha tiddependi mill-ġenjalità u l-ħila, mill-għaraq u mit-tbatija
tal-bniedem li lilu Alla kien fdaha. Hekk l-ikel li kellu jsostni l-ħajja fuq
l-art riedu Alla b’mod li jirriżulta l-għaqda ta’ dak li Alla ta u x-xogħol uman
għamel.
Lill-propjetarji
kollha tal-ażjenda u lill-ħaddiema tal-art jien nixtieq ngħid: il-Knisja għandha
stima mmensa tax-xogħol tagħkom. L-istess Ġesù Kristu wera l-konsiderazzjoni
tiegħu għax-xogħol agrikolu meta ddeskriva lil Alla, Missieru, bħala “sid
il-mergħa” biex isostni u jitma l-ħajja. Intom twettqu l-kmandament mogħti minn
Alla sa mill-bidu: “Imlew l-art u aħkmuha” A (Ġen 1,28) Hawn fil-qalb
agrikola tal-Amerka, il-widien u l-għoljiet kienu miksija bil-qamħ, l-imrieħel u
l-ifrat immultiplikaw bosta drabi. Permezz ta’ xogħol iebes intom sirtu sidien
tal-art u l-art baxxiet rasha quddiemkom.
Minħabba l-abbundanza
u l-fertilità li l-attrezzaturi agrikoli moderni pprovdew, intom tagħtu ikel
lill-miljuni ta’ persuni li b’mod dirett ma jaħdmux l-art, imma li jgħixu grazzi
għall-prodotti tagħkom. Waqt li niftakar dan, nagħmel tiegħi l-kliem
tal-Predeċessur meqjum tiegħi Pawlu VI: “Id-dinjità ta’ dawk li jaħdmu l-art u
ta’ dawk kollha li huma mpenjati, f’livelli differenti, fir-riċerka u fl-azzjoni
fil-kamp tal-iżvilupp agrikolu, għandha tkun magħrufa u promossa bla mistrieħ”
(Pawlu VI, Nuntius
ad “World Food Conference”,
9 ta’ Novembru 1974, 4).
Liema huma
l-atteġġjamenti tal-bniedem fil-konfront tal-art? Bħal dejjem ninħtieġu nwieġbu
billi nispiraw ruħna minn Ġesù, għaliex, kif jgħidilna San Pawl, “għandu
jkollkom fikom l-istess sentimenti li kienu ta’ Ġesù Kristu” (Fil 2,5).
Fil-ħajja ta’ Ġesù
nsibu fehim tassew lejn dak li jirrigwarda l-art. Fit-tagħlim tiegħu huwa
rrifera għall-“għasafar tal-arja” (Mt 6,26), għall-“ġilji tal-għelieqi” (Mt 7,17).
Imbagħad tkellem dwar iż-żerriegħ li mar jiżrà (Mt 13,4) u rrifera
għall-Missier tiegħu Ċelesti bħala “sid il-mergħa” (Ġw 15,1)u dwaru qal
li hu r-Ragħaj it-Tajjeb (Ġw 10,14). Din il-viċinanza lejn in-natura,
dawn ir-riferimenti spontanji għall-ħolqien bħala rigal ta’ Alla, hekk bħal
barka tax-xogħol domestiku, element karatteristiku, ukoll fi żmienna, ta’ kull
razzett, kienu waqtiet li għamlu parti mill-ħajja ta’ Ġesù. Għalhekk nistedinkom
biex tagħmlu iva li l-azzjonijiet tagħkom ikunu jixbħu lil dawk ta’ Ġesù Kristu.
2. Tliet burdati b’mod
partikolari jiġu l-ewwel fil-ħajja rurali: fl-ewwel post il-gratitudni. Niftakru
l-ewwel kliem ta’ Ġesù fil-Vanġelu li għadna kemm smajna: kliem ta’ gratitudni
lil Missieru Divin: “Missier, Mulej tas-sema u l-art, lilek noffru it-tifħir”.
Jalla jkun dan is-sentiment tagħkom. Kuljum il-bidwi jiġi mwassal biex jiftakar
li hu jiddependi minn Alla. Mis-sema tiġi x-xita, ir-riħ, il-glorja tax-xemx.
Dawn jiġu mingħajr ma l-bidwi jordnahom jew jikkontrollahom. Il-bidwi jħejji
l-art, iqiegħed iż-żerriegħa, jikkultiva l-ħsad. Imma huwa Alla li jkabbar
kollox. Huwa biss hu s-sors tal-ħajja. Ukoll id-diżastri naturali, bħas-silġ u
n-nixfa, l-uragani jew id-dilluvji jfakkru lill-bniedem tal-għelieqi dwar
id-dipendenza tiegħu fuq Alla. Kien dan l-għarfien bla ebda dubju li ta bidu
għall-oriġni tal-ewwel pellegrinaġġi fl-era sa ma ġiet stabbilita l-festa li
intom issejħu t- “Thanksgiving” (ringrazzjament). Wara kull ħsad, u jistà jkun
li dan seħħ hawn ukoll din is-sena, il-bidwi jgħolli t-talb tiegħu waqt li
jagħmel tiegħu l-kliem ta’ Ġesù waqt li jgħid: “Missier, Mulej tas-sema u l-art,
noffrilek it-tifħir tiegħi”.
Fit-tieni post l-art
għandha tkun ittrattata bil-galbu għaliex għandha tkun fruttuża għal
ġenerazzjonijiet sħaħ. Intom li tgħixu f’dan iċ-ċentru tal-Amerika tafu
l-elementi ta’din l-art: il-wiċċ hekk għani bil-minerali, il-klima favorevoli,
il-ħsad tajjeb, l-ilma frisk u l-arja mimlija saħħa li ddawwarkom. Intom
id-diżpożituri ta’ wħud mill-ikbar riżorsi li Alla ta lid-dinja. Għalhekk
ikkonservawha sewwa din l-art sabiex ulied uliedkom u l-ġenerazzjonijiet li għad
jiġu jkunu jistgħu jirtuha hekk għanja kif intom sibtuha. Imma ftakru wkoll li
l-vokazzjoni tagħkom hija l-art. Waqt li huwa minnu li l-agrikoltura llum tistà
tagħti biss mezzi ta’ sustinenza lill-ħaddiem, il-kalma u l-kwiet li hawn
isaltnu jkunu dejjem ġid ikbar li mhumiex dawk miksuba minn impriża li tinsab
hemm biss għas-sempliċi profit. Permezz tal-agrikoltura intom tikkollaboraw
flimkien mal-Ħallieq għas-sosten tal-ħajja fid-dinja.
Fit-tielet post
nixtieq inkellimkom rigward il-ġenerożità, ġenerożità li titnissel mill-fatt li
Alla ddestina l-art u dak kollu li hemm fiha għall-użu tal-bnedmin u l-popli
kollha, u għaldaqstant il-ġid maħluq għandu skont kriterju ekwu jiċċirkola fost
kulħadd, billi tkun gwida l-ġustizzja u billi tkun issekondata l-karità (Gaudium
et Spes,
69).
Intom li intom bdiewa
intom dispożituri ta’ rigal li ġej minn Alla u għandu jinfirex ma’ l-umanità
kollha. Intom tinsabu fil-kondizzjoni potenzjali li tipprovdu l-ikel lil miljuni
ta’ persuni li m’għandhomx x’jieklu u allura tistgħu tgħinu biex teħilsu
lid-dinja mill-ġuħ.
Nindirizzalkom l-istess
mistoqsija magħmula ħames snin ilu minn Pawlu VI: …jekk il-potenzjal tan-natura
huwa mmens, jekk dak li huwa d-dominju tal-ġenju uman fuq l-univers donnu
llimitat, x’inhu dak li spiss jintilef?... għajr dik il-ġenerożità, dik l-ansjetà
li hija stimolata mill-viżjoni tat-tbatijiet u tal-miżerji tal-foqra, mhijiex
forsi l-konvinzjoni profonda li l-familja kollha kemm hi tbati meta wieħed mill-membri
tagħha jinsab fil-faqar estrem? (Pawlu VI, Nuntius
ad “World Food Conference”,
9 ta’ Novembru 1974, 9).
Tiftakru meta Ġesù ra
l-folla mġewħa miġbura madwar l-għolja: X’kienet it-tweġiba? Huwa ma llimitax
ruħu għall-espressjoni tiegħu tal-ħniena. Amar lid-dixxipli tiegħu: “Agħtuhom
intom stess x’jieklu” (Mt 14,16). Jewwilla mhux illum ukoll bl-istess
kliem idur fuqna, fuqna li ngħixu fis-seklu għoxrin, fuqna li għandna l-mezzi
kollha meħtieġa biex nitimgħu lil dawk li jbatu l-ġuħ fid-dinja?
Ejjew inwieġbu b’mod
ġeneruż għal dak il-kmandament ta’ Alla, billi naqsmu l-frott tax-xogħol tagħna,
billi naqsmu mal-oħrajn l-esperjenzi li ksibna, billi nagħmlu lilna nfusna
promuturi ta’ żvilupp agrikolu kullimkien u billi niddefendu d-dritt għax-xogħol
tal-popolazzjonijiet rurali sabiex kull persuna jkun jistà jkollha d-dritt għal
impjieg utli.
Il-bdiewa jipprovdu l-ħobż
għall-umanità kollha, imma huwa biss Kristu l-ħobż tal-ħajja. Huwa biss jistà
jissodisfa l-ġuħ profond tad-dinja. Bħal ma jgħid Santu Wistin (S. Wistin, Confessiones,
1): “Qlubna m’għandhomx kwiet sakemm ma jistriħux fik”. Waqt li niftakru l-ġuħ
fiżiku ta’ miljuni ta’ ħutna tal-kontinenti kollha, f’din l-Azzjoni Ewkaristika
niftakru li l-agħar ġuħ huwa dak li jbejjet fl-iktar profond tar-ruħ umana. Lil
dawk kollha li jagħrfu dan il-ġuħ Ġesù jgħid: Ejjew għandi intom ilkoll li intom
għajjenin u li ssibu l-ħajja tqila u jiena nserraħkom.
Ħuti fi Kristu: ejjew
nisimgħu dan il-kliem b’qalbna kollha. Dan huwa ndirizzat lil kull wieħed u
waħda minna. Lil dawk li jaħdmu l-art, lil dawk li jiksbu benefiċċji minn
xogħlhom, lil kull raġel u mara Ġesù jgħid: “Ejja għandi… u jiena nserrħek”.
Ukoll jekk il-ġuħ fiżiku tad-dinja jkun imxebbà, ukoll jekk kull min għandu l-ġuħ
jistà jkun imxebbà kemm permezz ta’ xogħlu kif ukoll permezz tal-ġenerożità
tal-oħrajn, il-ġuħ l-iktar profond tal-bniedem ikompli jeżisti.
Ftakarna fl-ittra ta’
San Pawl lill-Galatin: “Dak li jgħodd huwa dak li wieħed maħluq mill-ġdid”.
Kristu biss jistà joħloq mill-ġdid u dan il-ħolqien ġdid isib il-bidu tiegħu
biss fis-Salib u fil-Qawmien mill-Imwiet, Fi Kristu biss kull ħolqien hija
restawrata l-ordni tiegħu. Għalhekk jiena ngħid: ejjew ilkoll għand Kristu. Huwa
hu l-ħobż tal-ħajja. Ejjew għand Kristu u qatt ma jkollkom iktar ġuħ.
Ġibu magħkom għand
Kristu il-prodotti ta’ jdejkom, il-frott tal-art. Fuq dan l-altar dawn ir-rigali
jinbidlu fl-Ewkaristija tal-Mulej.
Ġibu magħkom l-impenn
tagħkom li jirrendi l-art fruttuża, ix-xogħol u t-tbatijiet tagħkom. Fuq dan
l-altar, bis-saħħa tal-ħajja, tal-mewt u tal-Qawmien mill-Imwiet ta’ Kristu,
kull attività umana tiġi mqaddsa, innobilitata u imprezzjożità. Ġibu magħkom
il-foqra, il-morda, l-emarġinti u dawk bil-ġuħ; dawk li huma għajjiena u li
jsibu l-ħajja tqila. Fuq dan l-altar huma jsibu rinfreskar u l-madmad jidher
ħafif għalihom u t-toqol ħafif.
U fuq kollox ġibu
l-familji tagħkom u ddedikawhom lil Kristu,sabiex ikunu jistgħu jkomplu jkunu
komunità li taħdem, tgħix u tħobb, fejn in-natura hija rrispettata, fejn
il-piżijiet huma maqsumin u fejn Alla huwa mfaħħar bi gratitudni.
Miġjub
mit-Taljan għall-Malti minn Emanuel Zarb
|
