|
PAWLU VI UDJENZA ĠENERALI L-Erbgħa, 18 ta’ Mejju, 1977 Il-Fidi u l-Għid
Aħna ċċelebrajna l-Għid. Jiġifieri l-ġrajja kbira tal-mewt u l-qawmien ta’ Kristu. Din hi ġrajja kbira, kapitali nistgħu ngħidu, minn żewġ aspetti: l-aspett li jolqot lil Ġesù nnifsu; Hu wera ruħu hekk, Hu temm l-opra li għaliha kien ġie fid-dinja, Hu daħal fid-dinja, fl-istorja bħala dawl għall-umanità (cfr Ġw 1, 9; 8, 12), qiesu li fid-dlam li jiksi l-art, iddiet xrara li biha nkixef kollox, tat sens lil kollox, lill-ispazju, liż-żmien. Hu il-veru Mgħallem tad-dinja (Mt 23, 8), Hu l-bidu u t-tmiem (Ap 1,8), eċċ. Ġesù Kristu waħdu jagħmel mill-univers spettaklu meraviljuz u terribbli. Imma mbagħad, il-preżenza ta’ Ġesù fiż-żmien tikseb importanza oħra, dik tar-relazzjoni li Hu għandu mal-bnedmin: magħna, ma’ kull wieħed u waħda minna. Hu s-Salvatur tagħna; aħna ma nistgħu nagħmlu xejn mingħajru (cfr Ġw. 15, 5). Hemm bżonn nirriflettu fuq dan il-prinċipju. Aħna neħtieġu lil Kristu. Kif nagħmlu biex nidħlu f’komunikazzjoni miegħu? U anki kieku kellna x-xorti li għexna fi żmienu, u li nersqu lejh personalment, kien ikollna ħila nagħrfuh għal dak li kien, li nifhmuh, li nidħlu fil-fond tas-sigriet tad-divinità tiegħu? Kien ikun verament possibbli niskopru lil Kristu, in-natura doppja tiegħu umana u divina, il-Persuna divina tiegħu, veru Iben ta’ Alla, il-Verb ta’ Alla, infinit u etern? Imbagħad għalina, bogħod minnu fiż-żmien u mgħaddsin fl-oċean tal-umanità, kif jista’ jkun possibbli nersqu lejh u jkollna x-xorti beata li nkunu maħbubin u magħrufin distintament minnu, li nkunu salvati minnu? Għaliex din hi l-problema li teħtieġ soluzzjoni, is-salvazzjoni tagħna, li nkunu salvati minn Kristu; kif inhu possibbli? X’fejda tkun għalina li niċċelelbraw l-Għid tal-Mulej ladarba dan ma seħħx illum, la mhuwiex attwali u operattiv għalina? Il-problema li għalina hi bla soluzzjoni, il-Mulej solvieha b’mod mirabbli. Isimgħu l-aħħar kelmiet li jtemmu l-Evanġelju ta’ San Mark: “Min jemmen fija u jitgħammed, isalva”(Mk 16, 16). Il-fidi u l-azzjoni sagramentali tal-Magħmudija huma ż-żewġ kundizzjonijiet fundamentali biex nidħlu fl-isfera mdawla u reali tas-salvazzjoni nisranija li mhix ħaġa ta’ ftit valur ladarba tgħaqqadna saħansitra mal-ħajja immortali u divina ta’ Kristu. Ladarba hu hekk, u hekk hu, l-interess tagħna jdur l-ewwel lejn il-fidi: x’nifhmu biha l-fidi? U kif naslu għaliha, kif nistqarruha? Il-kwistjoni ssir gravi mil-ġdid: “mingħajr il-fidi impossibli nogħġbu ‘l Alla” (Lhud 11, 6). Ninsabu fuq l-għatba tar-reliġjon ta’ Kristu: jidħol min jemmen! X’volum kbir ta’ problemi reliġjużi jinsab quddiemna! Aħna issa se nieqfu fuq fuq dwar l-ewwel paġni ta’ dal-ktieb tal-fidi, li jistgħu jinġabru fi kliem sempliċi: imbagħad wara jesiġu studju twil għal min irid ikompli jesplora l-ktieb misterjuz. U l-ewwel paġna, dik li teħel fiha d-dinja profana, minnufih hi iebsa u inflessibbli: il-fidi hi saltna ta’ misteru; għalina tul dil-ħajja tagħna, li għadha biss taħriġ, bidu, hija xjenza oskura; ma tistrieħx fuq argumenti ta’ evidenza razzjonali; veru li mwieżna minn raġunijiet eċċellenti ta’ kredibbiltà kemm intrinsika u wkoll estrinsika, imma mwaqqfa fuq l-awtorità ta’ rivelazzjoni, fuq il-Kelma t’Alla. Dan l-aspett ta’ fidi waħdu huwa diffikultà għalina li aħna studenti tar-raġuni tagħna, u aħna ribelli tant illi niddikjaraw ruħna ħassieba hielsa biex nammettu l-veritàjiet li ma nistgħux nagħtu tifsira diretta tagħhom, bla ma naħsbu li quddiem il-Verità, meta din timmanifesta ruħha realment, aħna dejjem, jekk nafu nirraġunaw, għandna nkunu doċli. Il-fidi hi misterjuża u oskura għal moħħna, madankollu meta dan jidħol fl-iskola tagħha, jibda’ jara, sa ma’ jibqa’ mistagħġeb u hieni, irqajja ta’ sbuħija u dawl stupendi u profondi. Madankollu hekk hu: il-fidi hi sema li tisboq dak li aħna nifhmu b’mod naturali. Il-fidi timpenjana, iva, tintrabat mal-inteliġenza imma mhux nieqsa mir-rieda. Biex nemmnu irid ikollna r-rieda. Li jfisser li l-fidi hi ħielsa. Diskors importanti ħafna, speċjalment illum li l-Konċilju afferma din il-prerogattiva tal-bniedem ħassieb, fil-qasam reliġjuż ukoll; propju l-Konċilju jafferma mill-ġdid li “l-bnedmin kollha mistennija jfittxu l-verità, speċjalment f’dak li għandu x’jaqsam ma’ Alla u l-Knisja tiegħu (Dignitatis Humanae, 1). Irridu nikkunsidraw ukoll it-tielet punt aħna u neżaminaw dawn l-aspetti li jħejjuna għall-fidi, jiġifieri l-beatitudni taċ-ċertezza li din tiġġenera fl-ispirtu ta’ min jilqagħha b’umiltà mdehena. Imma dwar dal-punt forsi jkollna nerġgħu nitkellmu f’xi okkażjoni oħra. Għalissa biżżejjed għalina niftakru li d-dawl tal-misteru paskwali jibqa’ fina u nerġgħu ngħejxuh mil-ġdid permezz tal-fidi. Nawgurawlkom dan bil-Barka Appostolika Tagħna.
Miġjub mit-Taljan għall-Malti minn Joe Huber
|