OMELIJA TA' MONS. ARĊISQOF PAWLU CREMONA OP

Konkatidral ta’ S. Ġwann, Valletta: 4 ta’ Marzu 2012:

Ħuti aħna ġejna hawnhekk prinċipalment biex niċċelebraw il-quddiesa ta’ dan it-tieni Ħadd tar-Randan imma li llum għandha togħma speċjali għaliex illum qegħdin nilqgħu fostna il-fjakkola ta’ S. Benedittu.  U din il-fjakkola tfakkarna f’diversi realtajiet.  L-ewwelnett tfakkarna fis-simbolu; hija fjakkola ta’ dawl, fjakkola li minnha joħroġ in-nar.

U tafu li n-nar fl’Iskrittura mqaddsa huwa sinjal tal-preżenza divina.  In-nar huwa dak li mexxa l-poplu Lhudi fid-deżert meta kien qed jaħrab mill-Eġġizzjani, f’kolonna tan-nar.  In-nar huwa x-xbieha li permezz tiegħu l-Ispirtu s-Santu daħal u qiegħed fuq l-appostli f’jum il-Pentekoste.  Dan in-nar li se jiġi mixgħul minn hawn u ftit ieħor se jerġa jitlaq minn hawnhekk u jmur Monte Cassino, minn fejn telaq ħalli jkun sinjal ta dak kollu li huwa divin fostna.  Illum ukoll f’din il-quddiesa aħna se niftakru f’persuna u din il-persuna  hija San Benedittu.  San Benedittu  twieled fil-ħames seklu, u fiż-żminijiet li aħna nafuhom bħala ż-żminijiet tad-dlam,  Dark Ages,  S. Benedittu xegħel propju f’dan il-poplu.  U aħna llum, qegħdin nagħtu wkoll qima lil dan il-qaddis li permezz ta’ dawk li kienu segwaċi tiegħu, dak iż-żmien ta’ dlam, sar żmien ta’ dawl. Għax mis-seklu sitta sas-seklu tnax, is-segwaċi tiegħu kienu jmorru kullimkien jagħmlu monasteru u mal-monasteru iġibu wkoll dik li hija l-kultura Kristjana.

U llum qed niftakru propju f’S. Benedittu.  Kien diġa l-Papa Piju XII li kien qal li S. Benedittu huwa l-missier ta’ l-Ewropa.  Imbagħad fis-sena 1964 il-Papa Pawlu VI qal li S. Benedittu huwa l-patrun ta’ l-Ewropa u minn dak iż-żmien din il-fjakkola baqgħet iddur ma’ l-Ewropa biex tfakkar, b’mod simboliku , dak li kien għamel S. Benedittu u s-segwaċi tiegħu.  F’din iċ-ċeremonja aħna qegħdin niftakru wkoll f’kontinent għax dan id-dawl irid idawwal il-kontinent ta’ l-Ewropa.  U llum iktar minn qabel, dan id-dawl irid iżur kullimkien għaliex bħalma tafu, sfortunatament, l-Ewropa qed tipprova tinsa l-għeruq Kristjani tagħha.  U allura din il-fjakkola, għalina lkoll, hija simbolu ta’ l-għeruq insara li hawn fl’Ewropa biex nerġgħu nagħtuhom il-ħajja.

Din il-fjakkola trid tfakkarna ukoll li hija fjakkola li fostna trid iġġib il-fraternita, trid iġġib it-tama, l-isperanza, u trid iġġib il-paċi.  U meta ngħidu li din il-fjakkola trid iġġib il-paċi jiġifieri qegħdin ngħidu li din il-fjakkola tfisser dak kollu li Alla l-Imbierek xtaq u ried li jkun hawn fid-dinja meta ħalaq id-dinja.  Timpressjonanhiex, ħuti, meta fil-bidu kif għandna fil-ktieb tal-Ġenesi, kollox kien kaos u Alla l-Imbierek bagħat l-Ispirtu tiegħu biex ma jibqax iktar kaos imma kollox jiġi ekwilibrat ma’ xulxin hekk li tibda l-paċi.  Timpressjonanhiex ħuti, meta Sidna Ġesu Kristu ġie fostna hawnhekk bħala tarbija u l-anġli fis-sema kantaw: il-paċi lil bnedmin kollha ta rieda tajba.  Hija din il-paċi li din il-fjakkola trid tfakkarna fiha u tagħtina impenn  biex  verament din il-fjakkola tkun għalina ta’ impenn personali u komunitarju biex il-pjan t’Alla għall-paċi fid-dinja jkun jista’ jseħħ. 

Imma jiena xtaqt, ħuti, li dan kollu, dak li aħna qegħdin niċċelebraw flimkien aħna niċċelebraw fil-kuntest tat-tlett lezzjonijiet ta’ dan it-tieni Ħadd tar-Randan li Alla l-Imbierek ipprovdilna llum.  U xtaqt li nagħmel daqsxejn ta’ ħsibijiet fuq dawn il-lezzjonijiet. L-ewwel lezzjoni kienet mill-ktieb tal-Ġenesi u hemmhekk rajna lil Abraham joffri lil Alla l-Imbierek lil ibnu stess.  U Alla l-Imbierek mhux talli lil Abraham ma ħadlux lil ibnu talli reġa tah lil ibnu u tah din id-darba bil-possibilta li permezz ta’ ibnu Iżakk ikun hemm poplu li jibqa’ li huwa l-poplu t’Alla li baqa’ anke saż-żmienna u sar il-poplu ġdid permezz ta’ Sidna Ġesu Kristu.  U fid-dawl ta’ dan kollu jiena ngħid, ejjew illum noffru din il-fjakkola bħalma għamel Abraham lil Alla l-imbierek biex il-fjakkola ma tkunx tagħna; il-fjakkola tkun tiegħu.  U bħalma meta noffruhielu jerġa jagħtihielna lura, jagħtihielna b’ħafna grazzji ħalli l-fjakkola tkun verament, mhux biss simbolu imma tkun dik li tħeġġeġ lil ħafna nsara biex huma jerġgħu il-fidi tagħhom jiskopruha u permezz tagħhom isiru dwal.   

Fit-tieni lezzjoni tal-lum aħna rajna lil S. Pawl jikteb lir-Rumani  (8,31-34) u jagħmlilhom il-kuraġġ.  Immaġinaw f’mument fejn kien hemm persekuzzjoni, S. Pawl, imnebbah mill-Mulej, jibagħtilhom dan il-kliem ta’ ħafna tama, ta’ ħafna speranza.  U jgħidilhom dak il-kliem li kien tant qawwi: “Jekk Alla hu magħna, min jista’ jkun kontra  tagħna?”  U jekk aħna ġejna mifdijin mill-qawwa ta’ Kristu rxoxt, min jista’ jirbah din il-vittorja kbira li għamel Sidna Ġesu Kristu permezz tas-salib għal ħajja ta’ dejjem għalina lkoll?  Allura aħna ejjew napplikaw anke din it-tieni lezzjoni għall-fjakkola.  Ejjew ngħaqqduha ma’ dan il-kliem ta’ S. Pawl.  Ħafna drabi, ħuti, aħna għaliex naraw id-dinja ta’ madwarna li mhux dejjem tagħti każ, kultant aħna nibdew naqtgħu qalbna;  ejjew ngħaqqduha propju din il-fjakkola mar-rebħa tal-Mulej Ġesu!  Din il-fjakkola trid tfakkarna li Ġesu diġa rebaħ u trid tfakkarna li aħna rridu nkunu parti minn din ir-rebħa tal-Mulej Ġesu u naħdmu għaliha. 

L-aħħar riflessjoni li xtaqt li naqsam magħkom hija dak li rajna fil-Vanġelu tal-lum (Mk 9, 2-10). Kellna t-trasfigurazzzjoni tal-Mulej Ġesu.  Tafu xi tfisser it-trasfigurazzjoni?  F’mument raw lil Ġesu bħala bniedem kif is-soltu jarawh,  mument ieħor, ftit wara, huma fuq il-muntanja jarawh mibdul biex jiġi u jidher  bħala dak li huwa fil-ġisem glorjuż tiegħu.  U dan, Sidna Ġesu Kristu tafu għalfejn għamlu?  Għaliex dawn l-appostli tiegħu ftit wara kellhom jarawh imsallab.  U ried li l-esperjenza tiegħu propju fil-glorja tiegħu, tkun għalihom ta’ kuraġġ biex huma, meta jarawh fuq is-salib, jiftakru fil-glorja tiegħu u jibqgħu mexjin.  U allura anke din il-fjakkola aħna rridu narawha f’dan il-kuntest.  Ejjew inħallu lil Mulej Ġesu l-ewwel jagħtina l-esperjenza tiegħu, ħuti. Ftakru li kull quddiesa għalina hija l-esperjenza tat-trasfigurazzjoni, mhux fis-sens litterali tagħha għaliex aħna naraw lil Sidna Ġesu Kristu l-ewwel ikun ostja imbagħad ikun hemm il-preżenza reali tiegħu.  Ma nistgħux, ħuti, aħna verament nieħdu impenn sod jekk mhux fil-kuntest ta’ esperjenza personali tal-Mulej Ġesu.  Il-fjakkola Benedittina għandha sens biss jekk aħna lkoll ngħaqqduha llum ma’ din l-esperjenza tal-glorja tal-Mulej Ġesu u nħarsu lejha bħala l-fjakkola li tfisser ukoll il-glorja tagħna li għad trid tidher. 

Ħuti, nixtieq nagħlaq minn daqsxejn ta’ kliem mill-Prologu ta’ S. Benedittu.  Araw x’jikteb lil dawk li kienu se jidħlu miegħu u araw huwiex kliem li għandu jħeġġeġ lil kull wieħed u waħda minna biex aħna ngħixu. U jgħid hekk fil-Prologu, siltiet mill-Iskrittura Mqaddsa. “Waslet is-siegħa li fiha intom tqumu min-nagħas”.  “Mhux li kontu llum tisimgħu leħnu; la twebbsux qalbkom”.  “Ibqħu miexja sakemm għandkom id-dawl biex id-dlam tal-mewt ma jilħaqkomx”.  Ħuti, din hija l-kelma ta’ S. Benedittu takkompanja l-fjakkola li ġiet fostna f’Malta. Ejjew inħalluha tħeġġiġna biex dejjem iktar ngħaqdu lil Mulej b’mod speċjali bi fjakkola ta’ evanġelizzazzjoni ġdida li aħna noffru lil Alla l-Imbierek.

Ara t-test bit-Taljan ...>

Ara aktar tagħrif dwar il-Fjakkola Benedittina ...>