|
Ara t-test oriġinali bit-Taljan
...
PAPA FRANĠiISKU
Motu Proprio
STATUT
TAD-DIKASTERU GĦAL LAJĊI,
FAMILJA U ĦAJJA
Art 1
Id-Dikasteru għal Lajċi, Familja
u Ħajja għandu jkun kompetenti
f’materja tas-Sede Appostolika
li tirrigwarda l-promozzjoni
tal-ħajja u tal-appostolat
tal-fidili lajċi, il-kura
pastorali tal-familja u
l-missjoni tagħha skont il-pjan
t’Alla u l-ħarsien u s-sostenn
tal-ħajja umana.
Art 2
§ 1. Id-Dikasteru
għandu jkun ippresedut minn
Prefett, megħjun minn
Segretarju, li jista’ jkun lajk
u tlett Sotto-segretarji lajċi.
Jagħtu sehemhom fih numru xieraq
ta’ Uffiċjali, saċerdoti u
lajċi, magħżula kemm jista’ jkun
minn partijiet differenti
tad-dinja, skont in-normi
attwali tal-Kurja Rumana.
§ 2.
Id-Dikasteru għandu jkun maqsum
fi tlett Sezzjonijiet: il-fidili
lajċi, il-familja u l-ħajja.
Kull sezzjoni għandha tkun
ippreseduta minn
Sotto-segretarju.
Art 3
1.
Id-Dikasteru għandu jkollu
l-membri tiegħu; fost dawn
għandu jkun hemm fidili lajċi,
rġiel u nisa, ċelibi u
miżżewġin, impenjati f’diversi
oqsma ta’
attività
u ġejjien minn partijiet
differenti tad-dinja biex b’hekk
jidher il-karattru universali
tal-Knisja.
§ 2.
Id-Dikasteru jaħseb biex ikollu
l-Konsulturi tiegħu.
§ 3.
Fil-ħidma kollha tiegħu,
id-Dikasteru jsegwi n-normi
stabbiliti għall-Kurja Rumana.
Art 4
Id-Dikasteru jippromwovi u
jorganizza laqgħat
internazzjonali u inizjattivi
oħra; kemm dawk li fil-qasam
ekkleżjali huma marbuta
mal-appostolat tal-lajċi,
mal-istituzzjoni taż-żwieġ u r-realtà
tal-familja u mal-ħajjai, kif
ukoll dawk fil-qasam tas-soċjetà
għandhom
x’jaqsmu mal-kundizzjonijiet
umani u soċjali tal-lajkat,
mal-istituzzjoni tal-familja u
tal-ħajja umana.
Sezzjoni għall-fidili lajċi
Art. 5
Din is-sezzjoni tad-Dikasteru
trid tanima u tinkuraġġa
l-promozzjoni għas-sejħa u
l-missjoni tal-fidili lajċi
fil-Knisja u fid-dinja, kemm
bħala individwi, miżżewġin jew
mhumiex, kif ukoll bħala membri
ta’ assoċjazzjonijiet, movimenti
u komunitajiet.Barra minn hekk,
għandha tippromwovi studji biex
isir approfondiment duttrinali
dwar temi u argumenti li
għandhom x’jaqsmu mal-fidili
lajċi.
Art. 6
§ 1.
Din is-sezzjoni trid tgħin
lill-fidili lajċi jagħrfu dejjem
aktar li l-Magħmudija tagħmilhom
korresponsabbli fil-ħajja u
l-missjoni tal-Knisja, skont
id-diversi kariżmi li rċevew
biex tinbena il-Knisja,
b’attenzjoni partikulari
għall-missjoni li għandhom
il-fidili lajċi biex janimaw u
jipperfezzjonaw l-ordni tar-realtà
temporali (ara LG,
31).
§ 2.
Fl-ispirtu tal-kostituzzjoni
pastorali
Gaudium et spes,
li tistieden lill-Knisja biex
tagħmel tagħha “l-hena u t-tama,
in-niket u t-tħassib tal-bnedmin
tal-lum”, din is-Sezzjoni
tippromwovi l-inizjattivi kollha
li għandhom x’jaqsmu mal-ħidma
ta’ evanġelizzazzjoni li
l-fidili lajċi jwettqu f’setturi
differenti tar-realtajiet
temporali. Filwaqt li tagħmel
dan, trid tirrispetta
l-kompetenzi li organiżmi oħra
tal-Kurja Rumana għandhom f’dawn
l-istess materji.
§ 3.
Trid tara li l-fidili lajċi
jagħtu sehemhom fit-tagħlim
kateketiku, fil-ħajja liturġika
u sagramentali, fil-ħidma
missjunarja, fl-opri tal-ħniena,
tal-karità
u tal-promozzjoni umana u
soċjali. Trid issaħħaħ u
tinkuraġġa dan kollu anki billi
jkun hemm preżenza attiva u
responsabbli fl-organi
konsultattivi ta’ tmexxija
fil-Knisja, fuq livell
universali u partikulari.
§ 4.
Din is-Sezzjoni tivvalorizza
l-inizjattivi tal-Konferenzi
Episkopali meta dawn jitolbu
lis-Santa Sede biex jitwaqqfu
ministeri u uffiċċji
ekkleżjastiċi ġodda, skont
il-ħtiġijiet tal-Knejjes
partikulari.
Art. 7
§ 1.
Din is-Sezzjoni tieħu ħsieb
it-twaqqif ta’ għaqdiet u
movimenti lajkali li għandhom
karattru internazzjonali u
tapprova jew tirrikonoxxi
l-istatuti tagħhom, filwaqt li
tibqa’ tagħraf il-kompetenza
tas-Segreterija tal-Istat;
tittratta wkoll rikorsi
amministrattivi li jkunu
relatati mal-kompetenza
tad-Dikasteru.
§
2.
Fejn jidħlu t-Terz Ordnijiet
sekulari u l-assoċjazzjonijiet
tal-ħajja ikkonsagrata,
is-Sezzjoni tidħol biss f’dak
li għandu x’jaqsam mal-attività
appostolika tagħhom.
Sezzjoni
għall-Familja
Art. 8
§ 1.
Fid-dawl tal-maġisteru
pontifiċju, din is-Sezzjoni trid
tippromwovi l-kura pastorali
tal-familja, tħares id-dinjità
u l-ġid tagħha li għandhom
l-għeruq tagħhom fis-Sagrament
taż-żwieġ, tissapportja
d-drittijiet u
r-responsabbiltajiet tal-familja
fil-Knisja u fis-soċjetà
ċivili, sabiex l-istituzzjoni
tal-familja tkun tista’ twettaq
dejjem b’mod aħjar il-funzjoni
tagħha kemm fil-qasam ekkleżjali
kif ukoll f’dak soċjali.
§ 2.
Trid tiddixxerni s-sinjali
taż-żminijiet biex tagħraf
il-valur tal-opportunitajiet li
huma ta’ ġid għall-familja,
filwaqt li tiffaċċa b’fiduċja u
b’għerf evanġeliku l-isfidi li
għandhom x’jaqsmu magħha, u biex
tapplika l-pjan t’Alla fuq
iż-żwieġ u l-familja f’dan
il-mument tal-istorja u
fis-soċjetà
tal-lum.
§ 3.
Trid issegwi l-istituti,
l-assoċjazzjonijiet,
il-movimenti u
l-organizzazzjonijiet kattoliċi,
nazzjonali u internazzjonali, li
l-għan tagħhom hu l-qadi
għall-ġid tal-familja.
Art. 9
§ 1.
Trid tieħu ħsieb
l-approfondiment tad-duttrina
dwar il-familja u t-tixrid
tagħha permezz ta’ katekeżi
xierqa; tagħti attenzjoni
partikulari lill-istudji fuq
l-ispiritwalità
taż-żwieġ u l-familja u
l-implikazzjonijiet tagħhom
fil-formazzjoni.
§ 2.
Toffri linji-gwida dwar
programmi formattivi
għall-għarajjes li jkunu qed
iħejju ruħhom għaż-żwieġ u
għall-koppji żgħażagħ.
§ 3.
Toffri linji-gwida anki
għall-programmi pastorali li
jgħinu lill-familji
fil-formazzjoni taż-żgħażagħ
biex dawn jgħixu l-fidi tagħhom
u jkunu mhejjija għall-ħajja
ekkleżjali u ċivili,
b’attenzjoni speċjali lejn
il-fqar u l-imwarrbin.
§ 4.
Tgħin lill-familji jkunu miftuħa
għall-adozzjoni u fostering
tat-tfal u biex jieħdu
ħsieb l-anzjani, filwaqt li
bil-preżenza tagħhom
f’istituzzjonijiet ċivili huma
jkunu jistgħu jissapportjaw dawn
ix-xorta ta’ inizjattivi.
Art 10
Din is-Sezzjoni għandha rabta
diretta mal -“Istitut Pontifiċju
Ġwann Pawlu II għall-Istudji fuq
iż-Żwieġ u l-Familja”, kemm
mas-sede ċentrali kif ukoll
mal-istituti affiljati. B’hekk
l-istudji dwar iż-żwieġ,
il-familja u l-ħajja jkunu
indirizzati b’mod komuni.
Sezzjoni
għall-Ħajja
Art 11
§ 1.
Din is-Sezzjoni ssostni u
tikkordina inizjattivi favur
il-prokreazzjoni responsabbli,
kif ukoll il-ħarsien tal-ħajja
umana mill-konċepiment sat-tmiem
naturali tagħha, filwaqt li
żżomm dejjem quddiem għajnejha
l-ħtiġijiet tal-persuna
fid-diversi fażijiet
tal-iżvilupp tagħha.
§ 2.
Tippromwovi u tinkuraġġa
l-organizzazzjonijiet u
l-assoċjazzjonijiet li jgħinu
lill-mara u lill-familja jilqgħu
d-don tal-ħajja u jgħożżuh,
l-aktar fil-każijiet ta’ tqala
diffiċli, biex wieħed ma
jirrikkorix għall-abort. Trid
ukoll tgħin fi programmi u
inizjattivi biex tingħata
għajnuna lil nisa li jkunu ġa
għamlu abort.
Art 12
Din is-Sezzjoni trid tistudja u
tippromwovu formazzjoni, mibnija
fuq id-duttrina morali kattolika
u l-Maġisteru tal-Knisja, dwar
il-problemi prinċipali
biomediċi u legali fil-ħajja
umana u dwar l-ideoloġiji li qed
jinbtu u jiżviluppaw dwar
il-ħajja stess tal-bniedem u
r-realtà
tal-ġeneru uman.
Art 13
L-Akkademja Pontifiċja
għall-Ħajja hi konnessa ma’ dan
id-Dikasteru. Il-kompetenza
tagħha tiswa għall-problematika
u t-tematika msemmija f’Art.11.
L-Istatut preżenti hu approvat ad
experimentum.
Nordna li jkun promulgat permezz
ta’ pubblikazzjoni fuq
L’Osservatore Romano
u li jkun ippubblikat ukoll fuq
Acta Apostolicae Sedis.
Jibda jkun attwat mill-1 ta’
Settembru 2016. Minn din
d-data, il-Kunsill Pontifiċju
għal-Lajċi u l-Kunsill
Pontifiċju għall-Familja ser
jiefqu jiffunzjonaw għax ser
ikunu ssoprimati bl-abrogazzjoni
tal-artikli
131-134
u
139-141
tal-Kostituzjoni Appostolika Pastor
Bonus
Mogħti f’Ruma,
4
ta’ Ġunju
2016.
FRANĠISKU
Miġjub mit-Taljan għall-Malti
minn Vivienne Attard.
|
