MIS-SINODU TAL-ISQFIJIET
OTTUBRU 2012
QUDDIESA TAL-FTUĦ
TAS-SINODU TA’ L-ISQFIJIET
U L-PROKLAMAZZJONI
TA’ SAN ĠWANN TA’ AVILA U
SANTA ILDEGARDA TA’ BINGEN
BĦALA “DUTTURI TAL-KNISJA”
OMELIJA
TAL-QDUSIJA TIEGĦU L-PAPA BENEDITTU XVI
Pjazza San Pietru
Il-Ħadd 7 ta’ Ottubru
2012
Għeżież Ħuti
fl-Episkopat,
Għeżież Ħuti,
B’din
il-Konċelebrazzjoni Solenni qed niftħu t-tlettax-il Assemblea
Ġenerali Ordinarja tas-Sinodu ta’ l-Isqfijiet bit-tema
L-Evanġelizzazzjoni Ġdida għat-Trasmissjoni tal-Fidi Nisranija.
It-tema tirrifletti direzzjoni programmatika għall-ħajja tal-Knisja,
u għall-membri, il-familji, il-komunitajiet u l-istituzzjonijiet
tagħha. U dan il-pjan hu msaħħaħ mill-fatt li dan is-Sinodu qed
jaħbat mal-bidu tas-Sena tal-Fidi, li tiftaħ fil-11 ta’ Ottubru,
fil-ħamsin anniversarju mill-ftuħ tal-Konċilju Ekumeniku Vatikan
II. Nagħti merħba kordjali u mimlija gratitudni lilkom li ġejtu
hawn biex tkunu parti minn din l-Assemblea Sinodali, b’mod
partikulari lis-Segretarju Ġenerali tas-Sinodu ta’ l-Isqfijiet, u
lill-kollegi tiegħu. Insellem lil ħutna d-delegati mill-Knejjes u
l-komunitajiet ekkleżjali l-oħra, kif ukoll lil dawk kollha
preżenti, u nistedinhom isieħbu bit-talb ta’ kuljum tagħhom
id-deliberazzjonijiet li sa jsiru tul it-tliet ġimgħat li ġejjin.
Il-qari tal-Liturġija
tal-Kelma ta’ dan il-Ħadd jipproponilna żewġ punti prinċipali
għar-riflessjoni: l-ewwel wieħed dwar iż-żwieġ, li sa nitkellem fuqu
dalwaqt; u t-tieni dwar Ġesù Kristu, li sa nittratta issa.
M’għandniex ħin biex nikkummentaw fuq is-silta mill-Ittra lil-Lhud,
imma, fil-ftuħ ta’ din l-Assemblea Sinodali, għandna nilqgħu
l-istedina biex niffissaw ħarsitna fuq il-Mulej Ġesù, “imżejjen
fil-glorja u l-ġieħ minħabba fil-mewt li hu bata”
(2:9). Il-Kelma ta’ Alla tqiegħdna f’riġlejn il-Glorjuż li ġie
msallab, biex ħajjitna kollha, u b’mod partikulari l-impenn ta’ din
is-sessjoni Sinodali, jiżvolġu taħt il-ħarsa tiegħu u fid-dawl
tal-misteru tiegħu. F’kull żmien u post, l-evanġelizzazzjoni dejjem
għandha bħala l-bidu u t-tmiem tagħha lil Ġesù Kristu, l-Iben ta’
Alla (ara Mk 1:1); u l-Mislub hu s-sinjal l-aktar għoli u distintiv
ta’ dak li jħabbar il-Vanġelu: sinjal ta’ mħabba u sliem, sejħa
għall-konverżjoni u r-rikonċiljazzjoni. Għeżież Ħuti fl-Episkopat,
ejjew nibdew minna stess u niffissaw ħarsitna fuqu, u hekk inħallu
l-grazzja tiegħu ssaffina.
Issa nixtieq neżamina
fil-qosor l-evanġelizzazzjoni ġdida, u r-rabta tagħha ma’
l-evanġelizzazzjoni ordinarja u l-missjoni ad Gentes.
Il-Knisja teżisti biex tevanġelizza. Fidili lejn il-kmand tal-Mulej
Ġesù Kristu, id-dixxipli tiegħu marru mad-dinja kollha jħabbru
l-Bxara t-Tajba, u xerrdu ma’ kullimkien il-komunitajiet Insara.
Maż-żmien, dawn kibru fi Knejjes organizzati tajjeb, b’bosta
fidili. F’diversi mumenti ta’ l-istorja, il-providenza divina
qajmet dinamiżmu ġdid fi ħdan l-attività evanġelizzatriċi
tal-Knisja. Biżżejjed naħsbu fl-evanġelizzazzjoni tal-popli
Anglo-Sassoni jew tas-Slavi, inkella t-trasmissjoni tal-fidi
fil-kontinent ta’ l-Amerika, jew il-ħidma missjunarja fost il-popli
ta’ l-Afrika, l-Asja u l-Oċeanja. Hu f’dan l-isfond
dinamiku li rrid inħares lejn iż-żewġ figuri
radjanti li għadni kemm ipproklamajt
Dutturi
tal-Knisja, San Ġwann
ta’ Avila u Santa Ildegarda ta’ Bingen. Anki fi żminijietna,
l-Ispirtu s-Santu rawwem fil-Knisja qawmien ġdid għat-tħabbir
tal-Bxara t-Tajba, dinamiżmu pastorali u spiritwali li sab
espressjoni iktar universali u spinta iktar awtoritattiva
fil-Konċilju Ekumeniku Vatikan II. Dan id-dinamiżmu evanġeliku ġdid
iħalli influwenza tajba fuq iż-żewġ “friegħi” speċifiċi li
jiżviluppaw minnu, jiġifieri, fuq naħa l-Missio ad Gentes,
jew it-tħabbira tal-Vanġelu lil dawk li għadhom ma jafux lil Ġesù
Kristu u l-messaġġ tiegħu ta’ salvazzjoni, u fuq in-naħa l-oħra l-Evanġelizzazzjoni
Ġdida, immirata prinċipalment lejn dawk li, għalkemm mgħammda,
tbiegħdu mill-Knisja u jgħixu mingħajr ebda riferenza għall-ħajja
Nisranija. L-Assemblea Sinodali li qed tiftaħ il-lum qed timpenja
ruħha b’riżq din l-evanġelizzazzjoni ġdida, biex tgħin lil dawn
il-persuni jiltaqgħu mal-Mulej, li waħdu jista’ jimla l-eżistenza
tagħna b’sens u paċi profonda; u biex tgħinna niskopru mill-ġdid
il-fidi, dik l-għajn tal-grazzja li ġġib il-ferħ u t-tama lill-ħajja
personali, familjari u soċjali. Ovvjament, din il-mira speċjali
m’għandhiex tnaqqas la mill-isforzi missjunarji fis-sens strett
tal-kelma u lanqas mill-attività ordinarja ta’ evanġelizzazzjoni
fil-komunitajiet Insara tagħna, għax dawn huma tliet aspetti
tar-realtà waħda ta’ l-evanġelizzazzjoni, li jikkumplimentaw u
jagħnu lil xulxin.
It-tema taż-żwieġ, li
nsibu fil-Vanġelu u fl-ewwel qari, jixirqilha attenzjoni speċjali.
Il-messaġġ tal-Kelma ta’ Alla nistgħu niġbruh fl-espressjoni li
nsibu fil-Ktieb tal-Ġenesi u li Ġesù nnifsu kkwota: “Għalhekk
ir-raġel iħalli
lil missieru u lil ommu u jingħaqad
ma’ martu u jsiru ġisem
wieħed”
(Ġen 2:24; Mk 10:7-8). X’qed tgħidilna din il-kelma l-lum?
Jidhirli li qed tistedinna biex insiru iktar konxji minn din
ir-realtà, diġà magħrufa sew imma mhux apprezzata għal kollox: li
ż-żwieġ hu Vanġelu fih innifsu, Bxara Tajba għad-dinja tal-lum,
speċjalment fid-dinja dekristjanizzata. L-għaqda ta’ bejn raġel u
mara, il-fatt li huma jsiru “ġisem wieħed” fl-imħabba, waħda li
tħalli l-frott u hi indissolubbli, hu sinjal li jitkellem b’qawwa
dwar Alla u b’elokwenza li fi żminijietna saret ikbar għax
sfortunatament, għal bosta raġunijiet, iż-żwieġ, sewwa sew fl-eqdem
reġjuni li ġew evanġelizzati, għaddej minn kriżi profonda. U dan
m’hux b’kumbinazzjoni. Iż-żwieġ hu marbut mal-fidi, imma mhux b’mod
ġenerali. Iż-żwieġ, bħala għaqda ta’ mħabba fidila u indissolubbli,
hu mibni fuq il-grazzja li ġejja minn Alla Trinità, li fi Kristu
ħabbna bi mħabba fidila, sa fuq is-Salib. Il-lum, f’kuntrast
mar-realtà qarsa ta’ tant żwiġijiet li sfortunatament jispiċċaw
ħażin, hemm bżonn nifhmu l-verità sħiħa ta’ din l-istqarrija. Hemm
rabta ċara bejn il-kriżi fil-fidi u l-kriżi fiż-żwieġ. U, kif
il-Knisja tenniet u xehdet għal żmien twil issa, iż-żwieġ hu msejjaħ
biex ma jkunx biss oġġett imma suġġett ta’ l-evanġelizzazzjoni
ġdida. Dan diġà qed narawh fid-diversi esperjenzi ta’ komunitajiet
u movimenti, imma bil-mod il-mod qed iseħħ ukoll fid-djoċesijiet u
l-parroċċi, kif deher riċentement fil-Laqgħa Dinjija tal-Familji.
Waħda mill-ideat
importanti ta’ l-ispinta ġdida li l-Konċilju Vatikan II ta
lill-evanġelizzazzjoni hi s-sejħa universali għall-qdusija, li fiha
nfisha tgħodd għall-Insara kollha (ara Lumen Gentium,
39-42). Il-qaddisin huma l-atturi veri ta’ l-evanġelizzazzjoni
fl-espressjonijiet kollha tagħha. B’mod speċjali huma wkoll
pjunieri u xandara ta’ l-evanġelizzazzjoni ġdida: bl-interċessjoni u
l-eżempju ta’ ħajjithom, attenti għat-tidwil ta’ l-Ispirtu s-Santu,
huma juru l-ġmiel tal-Vanġelu lil dawk li huma indifferenti jew anki
ostili, u jistiednu lil min hu biered fil-fidi biex jgħix il-ferħ
tal-fidi, it-tama u l-imħabba, biex jiskopri mill-ġdid l-għatx u
l-ġuħ għall-Kelma ta’ Alla u għas-sagramenti, speċjalment għall-ħobż
tal-ħajja, l-Ewkaristija. Nilmħu rġiel u nisa ta’ ħajja qaddisa
jwarrdu qalb il-missjunarji ġenerużi li jħabbru l-Bxara t-Tajba lil
dawk li m’humiex Insara, fl-imgħoddi fl-artijiet tal-missjoni u
l-lum f’kull post fejn jgħixu nies li m’humiex Insara. Il-qdusija
ma tafx b’konfini kulturali, soċjali, politiċi jew reliġjużi.
Il-lingwa tagħha, dik ta’ l-imħabba u l-verità, tinftiehem
mill-bnedmin kollha ta’ rieda tajba u tiġbidhom lejn Ġesù Kristu,
l-għajn ta’ ħajja ġdida li ma taqta’ qatt.
Hawnhekk, ejjew nieqfu
għal ftit biex napprezzaw iż-żewġ qaddisin li l-lum ġew miżjuda ma’
l-għadd magħżul tad-Dutturi tal-Knisja. San Ġwann ta’ Avila għex
fis-seklu sittax. Espert kbir ta’ l-Iskrittura Mqaddsa, kien
imżejjen bi spirtu missjunarju mħeġġeġ. Kien jaf kif jippenetra
b’mod unikament profond fil-misteri tal-fidwa li Kristu wettaq
għall-ġid ta’ l-umanità. Bniedem ta’ Alla, hu rnexxielu jgħaqqad
flimkien it-talb kostanti u l-azzjoni appostolika. Ta ruħu
għall-predikazzjoni u għall-prattika iktar frekwenti tas-sagramenti,
u kkonċentra l-impenn tiegħu fuq it-tisħiħ tal-formazzjoni
tal-kandidati għas-saċerdozju, tar-reliġjużi u tal-lajċi, b’viżjoni
ta’ riforma fil-Knisja li kienet kapaċi tħalli l-frott.
Santa Ildegarda ta’
Bingen, figura femminili importanti tas-seklu tnax, offriet
il-kontribut prezzjuż tagħha biex il-Knisja ta’ żmienha tkompli
tikber, u ħaddmet id-doni li rċiviet minn għand Alla, u wriet li
kienet mara ta’ intelliġenza brillanti, sensittività profonda u
awtorità spiritwali magħrufa minn ħafna. Il-Mulej żejjinha bi
spirtu profetiku u kapaċità ferventi li tagħraf is-sinjali
taż-żminijiet. Ildegarda rawmet fiha mħabba evidenti għall-ħolqien,
u kienet mgħallma fil-mediċina, il-poeżija u l-mużika. Fuq kollox,
żammet fiha mħabba kbira u fidila lejn Kristu u l-Knisja tiegħu.
Din il-ġabra fil-qosor
ta’ l-ideal tal-ħajja Nisranija, espressa fis-sejħa għall-qdusija,
iġġegħilina nħarsu b’umiltà lejn id-dgħufija, u anki d-dnub, ta’
bosta Nsara, kemm bħala individwi u kemm bħala komunitajiet, ħaġa li
hi xkiel kbir għall-evanġelizzazzjoni u għall-għarfien tal-qawwa ta’
Alla li, fil-fidi, jiġi jiltaqa’ mad-dgħufija umana. Għalhekk, ma
nistgħux nitkellmu dwar l-evanġelizzazzjoni ġdida mingħajr ma
jkollna xewqa sinċiera għall-konverżjoni. L-aqwa triq
għall-evanġelizzazzjoni ġdida hi li nħallu lil Alla jirrikonċiljana
miegħu u ma’ xulxin (ara 2 Kor 5:20). Solennement ippurifikati,
l-Insara jistgħu jiksbu mill-ġdid dik il-kburija leġittima
fid-dinjità tagħhom ta’ wlied Alla, maħluqa xbieha tiegħu u mifdija
mid-demm prezzjuż ta’ Ġesù Kristu, u jistgħu jduqu l-ferħ tiegħu
biex hekk jaqsmuh ma’ kulħadd, fil-qrib u fil-bogħod.
Għeżież ħuti, ejjew
nafdaw f’idejn Alla l-ħidma tas-Sinodu, imwieżen mix-xirka
tal-qaddisin, u nsejħu b’mod partikulari l-interċessjoni ta’
evanġelizzaturi kbar, li fosthom, b’tant għożża, għandna ngħoddu
lill-Beatu Papa Ġwanni Pawlu II, li l-pontifikat twil tiegħu kien
mudell ta’ l-evanġelizzazzjoni ġdida. Ejjew nintefgħu taħt
il-ħarsien tal-Verġni Mqaddsa Marija, Kewkba ta’ l-Evanġelizzazzjoni
Ġdida. Magħha ejjew nitolbu li l-Ispirtu s-Santu jinżel mill-ġdid
fuqna, u mill-għoli jdawwal lill-Assemblea Sinodali u jagħmel li
tħalli l-frott għall-vjaġġ tal-Knisja fid-dinja tal-lum, fi
żminijietna. Amen.
miġjuba mill-Ingliż
għall-Malti minn Francesco Pio Attard
|