|
ĦSIBIJIET MINN MONS. JOE
FARRUGIA
GĦAL MATUL
L-OTTAVA TAL-GĦID
IT-TNEJN -
Mt 28,8-15; Atti 2,14.22-32
Ta’ dan aħna lkoll xhieda
Waqt il-vġili tal-qawmien
tal-Mulej mill-imwiet, sbieħ l-Għid
il-Kbir, il-Knisja semmgħatilna
l-kelmiet tal-appostlu Pawlu,
missierna fil-fidi: “Kif Kristu
qam mill-imwiet bil-qawwa
glorjuża tal-Missier, hekk ukoll
aħna ngħixu ħajja ġdida” (Rum
6,4).
Din il-ħajja “ġdida”, li
rċivejna fil-Magħmudija, hija
d-don li ġeddidna fl-identita’
personali tagħna u anki fir-relazzjoni
tagħna ma’ bnedmin oħra. L-identita’
ġdida li rċivejna hija dik ta’
bnedmin trasformati f’xhieda ta’
Kristu mqajjem mill-imwiet,
filwaqt li r-relazzjoni ġdida ta’
bejnietna hi dik li tagħmilna,
fi Kristu, qaddejja tal-ħajja ta’
Kristu f’xulxin.
Il-qari mill-Ktieb tal-Atti
tal-Appostli jiddeskrivi għalina
t-trasformazzjoni li seħħet
f’Pietru meta dan, mimli
bl-Ispirtu ta’ Kristu, ħareġ
f’Ġerusalemm ixandar b’ferħ u
bla biża’li Ġesu’ hu tassew
il-milja tal-pjan li Alla, sa
mill-bidu, ħejja
għas-salvazzjoni tagħna.
Din it-trasformazzjoni fl-identita’
personali ta’ kull min jilqa’
lil Kristu u fir-responsabbilta’
tiegħu, fi Kristu, lejn l-oħrajn,
seħħet, infatti, fl-appostli
kollha, tant li Pietru, għal dak
li xandar, qal: “Ta’ dan aħna
lkoll xhieda.”
Il-qari minn San Mattew ukoll
jiddeskrivi t-trasformazzjoni li,
f’dal-każ, seħħet f’xi nisa li,
sbieħ l-ewwel jum tal-ġimgħa,
narawhom jgħaġġlu mnikkta lejn
il-qabar ta’ Ġesu’, u ftit wara,
nerġgħu narawhom, imma issa
f’ġirja ta’ ferħ biex
lill-appostli jwasslulhom l-aħbar
li Ġesu’ kien qam mill-imwiet.
Din it-trasformazzjoni li seħħet
fl-appostli u fin-nisa, flimkien
magħhom,
dixxipli ta’ Kristu, trid tidher
ukoll fina. L-aħbar tagħna hi
dik tagħhom. L-aħbar tagħhom hi
dik tal-Knisja: “Il-Mulej qam
mill-imwiet, kif kien qal;
nifirħu lkoll u nithennew, għax
qiegħed isaltan għal dejjem,
hallelujah.”
IT-TLIETA -
Ġw 20,11-18;
Atti 2,36-41
Indmu u tgħammdu
Is-sejħa ta’ l-appostlu Pawlu
f’Ħadd il-Għid, sejħa biex
ngħixu “ħajja ġdida”, tissoponi
li l-ħajja ta’ qabel, jiġifieri
l-ħajja mgħixa lil hemm
mill-fidi fi Kristu, hija “ħajja
qadima”. Għaddha żmienha u
m’għadhiex flokha.
Għalhekk
tagħmel sens is-sejħa li, kif
nisimgħu fl-ewwel qari tallum,
l-appostlu Pietru għamel
lin-nies tal-Lhudija meta
qalilhom: “Indmu, u kull wieħed
minnkom jitgħammed fl-isem ta’
Ġesu’ Kristu”. Indmu mill-ħajja
l-qadima u tgħammdu fil-ħajja l-ġdida.
Il-ħajja l-ġdida
li ngħatatilna, permezz
tal-magħmudija, fl-isem ta’ Ġesu’
Kristu, hija ħajja ta’ ndiema
għall-imgħoddi u ta’ ħeġġa għal
ġejjieni fi Kristu.
Għalhekk,
f’dawn il-jiem ejjew bħal ngħixu
mill-ġdid l-esperjenza
tal-magħmudija li rċivejna meta
konna żgħar, bħallilkieku qed
nirċevuha issa. Ejjew inġeddu l-indiema
għal dnubietna, bħallikienu qed
immutu għalihom issa. Ejjew
nilqgħu b’mod reali – u mhux
biss intellettwali – il-fidi ta’
Kristu li diġa’ għandna, u fuq
kollox ejjew nidħlu fir-realta’
ta’ dak Kristu li diġa’ qiegħed
realment jgħammar fina.
Biex
iseħħilna nagħmlu dan hemm bżonn
li lil Kristu infittxuh
bil-ħeġġa li biha fettxitu
Marija ta’ Magdala, imma mhux
bil-biki u n-niket tagħha.
Marija ta’
Magdala fettxet lil Kristu fost
il-mejtin għax ħasbet li kien
mejjet, u għalhekk ma setax
jonqos li dan tagħmlu b’qalb
imnikkta. Imma aħna nfittxu lil
Ġesu’ waqt li nafu li se
niltaqgħu miegħu ħaj, u għahekk
infittxuh bil-ferħ, għax nafu li
se nsibuh bi driegħu merfugħ
biex iseddaq l-indiema tagħna
bil-mafra tiegħu. Aħna meta
nfittxu lil Kristu nafu fejn
għandna nfittxuh u nafu wkoll li
jrid jiltaqa’ magħna biex
jisqina bid-don tal-Ispirtu
tiegħu.
Bir-raġun li tkanta l-Knisja
llum: “Sqiehom l-ilma tad-dehen
li wettaqhom, u ma jogħtrux,
isebbaħhom għal dejjem,
hallelujah.”
L-ERBGĦA -
Lq 24,13-13;
Atti 3,1-10
Fl-isem ta’ Ġesu’, imxi.
Nhar Ħadd
il-Għid lill-appostlu Pawlu
smajnih jgħidilna li bħalma
Kristu kiseb ħajja ġdida mill-Missier,
hekk ukoll aħna, permezz ta’
Kristu, ksibna ħajja ġdida (Rum
6,4). Illum, din il-verita’ qed
narawha sseħħ fil-magħtub tat-tempju.
L-appostlu Pietru qallu: “Fidda
u deheb m’għandix, imma se
nagħtik minn dak li għandi: fl-isem
ta’ Ġesu’ Kristu ta’ Nazaret,
imxi!”
Għall-kelma
li Pietru lissen “fl-isem” ta’
Ġesu’, il-magħtub ġie meħlus
mill-ħakma tal-mard u
rikostruwit fiżikament u
spiritwalment.
Hekk ukoll,
għall-kelma li, f’isem Kristu,
il-Knisja ttenni
fiċ-ċelebrazzjoni tal-magħmudija
u tas-sagramenti l-oħra, aħna
wkoll niġu meħlusa mill-ħajja l-qadima
u niġu mibnija mill-ġdid –
b’risq tagħna nfusna u b’risq
il-bnedmin l-oħra.
B’risq tagħna
nfusna għax bil-qawmien ta’ Ġesu’
mill-imwiet, Il-“jien” tagħna
nbidel, l-imgħoddi midneb tagħna
tħassar u u d-dgħufija tagħna
mtliet bis-setgħa li nimxu, li
nagħtu direzzjoni ġdida lil
ħajjitna, li nidħlu fit-tempju
ta’ Alla – mhux fit-tempju l-qadim
imma fil-preżenza ġdida ta’ Alla.
B’risq
tal-oħrajn għax, bħalma ġara
fil-kas tal-magħtub li tfejjaq,
in-nies li jaraw lilna wkoll
spiritwalment imfejqa,
jistagħġbu u jfaħħru lil Alla.
Hekku r-rispons
li rridu nfittxu għax-xhieda ta’
ħajja ġdida li nagħtu: bnedmin
li jaraw lil Alla, jistagħġbu
b’Alla u jfaħħru lil Alla.
U
bħad-dixxipli ta’ Għemmaws, li
ltaqgħu ma’ Kristu rxuxtat, ma
nehdewx nitħeġġu u nifirħu
għall-kelmiet tiegħu: “Ejjew,
imberkin minn Missieri, ħudu
b’wirt tagħkom is-Saltna li
tħejjiet għalikom sa mill-ħolqien
tad-dinja, hallelujah.”
IL-ĦAMIS -
Lq 24,35-48;
Atti 3,11-26
Lilu isimgħu f’kulma jgħidilkom
Il-ħajja ġdida li fuqha kellimna
l-appostlu Pawlu (Rum 6,4) nhar
Ħadd il-Għid, tiġbor fiha l-grazzji
kollha tal-istorja
tas-salvazzjoni.
Alla ta’
Abraham hu l-istess Alla li
wiegħdna l-ħajja ġdida permezz
tal-profeti u hu l-istess Alla
li sebbaħ lil Ġesu’ ta’ Nazaret
billi għamlu l-għajn għalina ta’
din il-ħajja ġdida. Hu għalhekk
li, fil-qari tallum mill-Atti
tal-Appostli, Pietru jsejħilna
biex nisimgħu lil Ġesu’ f’kulma
jgħidilna. Għax il-verita’ hi li
biss jekk aħna nisimgħu lil Ġesu’
f’kulma jgħidilna, aħna ngawdu
l-ħajja ġdida li rċivejna
fil-magħmudija.
B’dak li
jgħidilna, Ġesu’ jiftħilna
moħħna, kif fetaħ moħħ id-dixxipli
ta’ Għemmaws u moħħ l-appostli
miġbura fiċ-ċenaklu.
X’qed
jgħidilna llum Ġesu’? Qed
jgħidilna: Jiena tassew ħaj u
ninsab f’nofskom. Jiena hu!
Missuni! Qed jgħidilna: Indmu,
biex dnubietkom jinħafrulkom u
tkunu tistgħu tgawdu l-faraġ
tal-ħajja ġdida. Qed jgħidilna:
Għixu f’ismi u dan ikun ta’
saħħa għalikom bħalma kien
għall-magħtub. Intom – item
jgħidilna – xhieda ta’ dan.
Aħna xhieda
f’żewġ sensi. L-ewwelnett għax,
permezz tal-fidi fi Kristu, aħna
naraw u nagħrfu personalment
il-verita’ li Ġesu’ ma qamx
mill-mewt biss b’mod spiritwali,
u għahekk mhux fantażma imma hu
l-istess Ġesu’ li kien u baqa’
jiekol mal-appostli tiegħu.
Aħna xhieda
wkoll in kwantu nwettqu s-sejħa
li, bħal Pietru, b’fommna
nippridkaw lil Kristu,
b’ilsienna nxandu l-Bxara t-Tajba
tiegħu u b’ħajjitna nikkomunikaw
il-grazzja tiegħu ta’ ħajja
ġdida.
“Il-ġusti,
Mulej, faħħru għalenija l-id
tiegħek li ħarsithom, għax l-Għerf
fetaħ fomm l-imbikkmin u ħall l-ilsien
tat-trabi, hallelujah.”
IL-ĠIMGĦA -
Ġw 21,1-14;
Atti 4,1-12
Ma
felħux jisimgħuhom
Fl-Ottava
tal-Għid jidwi fina t-tagħlim
tal-appostlu San Pawl lir-Rumani
u lilna: “Bħalma Kristu … hekk
ukoll aħna…” (ara Rum 6,4).
Bħalma Kristu qam għal ħajja
ġdida, hekk ukoll aħna
fil-magħmudija dħalna f’ħajja
ġdida
Id-diskors
tal-appostlu Pietru quddiem is-Sinedriju,
kif ukoll l-istess arrest li
ġarrbu l-appostli, ifakkruna li
x-xebh ma’ Kristu fil-ħajja
ġdida jissoponi x-xebħ ma’
Kristu fil-persekiuzzjoni. Fid-dinja
l-ħajja ġdida li rċivejna
m’aħniex se nitħallew ingawduha
mingħajr tiġrib. Qabel sofra l-passjoni,
lill-appostli tiegħu Ġesu’ kien
wissihom li fid-dinja kien se
jkollhom ibatu.
Dak li llum
nisimgħu mill-ktieb tal-Atti
tal-Appostli hu dak li għadu
jiġri. Kristu, preżenti fid-dinja
permezz tal-Knisja tiegħu, huwa
l-“ġebla tax-xewka” li għadha
tiġi mwarrba, hu l-Mibgħut
t’Alla li għadu jiġi maqtul,
huwa s-Sid li għadu jsofri l-intolleranza;
id-dixxipli tiegħu għadhom jiġu
arrestati u l-kelma tiegħu fuq
fommhom għadha tiġi msikkta.
Dan ifisser
li aħna, kostitwiti xhieda ta’
Kristu u fdati minnu
bil-missjoni tiegħu, m’għandna
qatt naħsbu li l-ħajja l-ġdida
li rċivejna hija xi passaport
għat-trankwillita’. Dik tiġi,
imma fid-dinja l-oħra. Bħalissa,
dment li għadna hawn, irridu
nitħabtu biex nissaħħu f’din
il-ħajja ġdida.
Dan iseħħ
billi jkollna l-istess fiduċja
li kellhom l-appostli fuq id-dgħajsa,
dawk li għall-kmand ta’ Kristu
tefgħu x-xibka n-naħa tal-lemin
tad-dgħajsa minkejja l-esperjenza
tagħhom li fuq dik in-naħa ma
kienx hemm ħut. Imma obdew,
żguri kif kienu minn Kristu, u
l-obbedjenza itagħhom issarfet
f’qabda li ma felħux itellgħuha
“Il-Mulej qiegħed lill-poplu
tiegħu fiż-żgur imma l-għedewwa
tagħhom għattihom il-baħar,
hallelujah.”
IS-SIBT -
Mk 16,9-15;
Atti 4,13-21
Baqgħu mistagħġbin bihom
Hawn kważi
terz tal-popolozzjoni tad-dinja
li jemmnu li bil-mewt tiegħu
Ġesu’ qered il-mewt tagħna u
tana ħajja ġdida. L-Insara
mxerrdin mad-dinja jistgħu ma
jaqblux fuq xi dottrina u morali,
imma lkoll nilqgħu t-tagħlim ta’
l-appostlu Pawlu lir-Rumani:
“Kif Kristu qam mill-imwiet
bil-qawwa glorjuża tal-Missier,
hekk ukoll aħna ngħixu ħajja
ġdida” (Rum 6,4).
Dat-tagħlim
ta’ l-appostlu tal-ġnus, tagħlim
li jixxandar ta’ kull sena fl-Għid
il-Kbir, hu t-tagħlim ta’ l-appostli
kollha, ewlieni fosthom Pietru.
Kien infatti Pietru li ħareġ
miċ-ċenaklu bih. Pietru ta l-ewwel
prova tiegħu bil-fejqan
tal-magħtub tat-tempju. Pietru
sostnih bil-kelma tal-profeti u
flimkien ma’ Ġwanni ddefendih
quddiem is-Sanhedrin. U għal
dat-tagħlim Pietru u l-appostli
l-oħra, fi tmiem il-missjoni
tagħhom, ċarċru demmhom.
Mhux inqas
mill-appostli, aħna d-dixxipli
ta’ Kristu, imsejħin biex
inxandru dil-grazzja ta’ ħajja
ġdida li rċivejna fil-magħmudija.
Għax tabilħaqq jinvolvi lilna
wkoll il-mandat ta’ Kristu
lill-appostli tiegħu: “Morru
fid-dinja kollha, xandru l-Bxara
t-Tajba lill-ħolqien kollu” (Mk
16,15).
Xejn ma
jeħlisna minn dan l-obbligu u
xejn ma jiskużana mill-kont li
jkollna nħallsu jekk naħarbu
minnu. Lanqas l-iskuża li “ma
nafx nitkellem” jew li “hemm min
hu aħjar minni”. Naqraw fl-ewwel
qari tallum mill-Atti
tal-Appostli li Pietru u Ġwanni
“kienu nies bla skola u bla
tagħlim”, madankollu tant taw
xhieda konvinċenti li l-kapijiet
tal-Lhud “baqgħu mistagħġbin
bihom”.
Nifirħu għal
dan! U nifirħu wkoll li, f’kull
kas, ikun l-Ispirtu ta’ Ġesu’ li
jitkellem fina u li jaħdem
permezz tagħna ħalli l-bnedmin
joħorġu minn taħt il-ħakma
tal-ħajja “mejta” ta’ qabel u
jidħlu fil-“ħajja ġdida” ta’
Kristu Rxuxtat.
Għax, tassew
li: “Il-Mulej ħareġ bil-ferħ
lill-poplu tiegħu, b’għajat ta’
ferħ lill-magħżulin tiegħu,
hallelujah.”
|
