Messaġġ tal-Papa Franġisku
għall-Jum ta' Talb
għall-Vokazzjonijiet
3
ta' Mejju 2020
Il-Kelmiet tal-Vokazzjoni
|
MESSAĠĠ TAL-QDUSIJA TIEGĦU
FRANĠISKU
GĦAS-57 JUM DINJI TA’ TALB
GĦALL-VOKAZZJONIJIET
(3
ta’ Mejju
2020)
Il-kelmiet tal-vokazzjoni
Għeżież ħuti,
Fl-4 ta’ Awwissu tas-sena
l-oħra, fil-160 anniversarju
mill-mewt tal-Kurat qaddis ta’
Ars, offrejt
Ittra lis-saċerdoti, li qed
jiddedikaw ħajjithom ta’ kuljum
għas-sejħa li l-Mulej
għamlilhom, għall-qadi tal-Poplu
ta’ Alla.
F’dik l-okkażjoni, kont għażilt
erba’ kelmiet-muftieħ –
uġigħ, gratitudni, kuraġġ u
tifħir – biex irrodd ħajr
lis-saċerdoti u nwieżen
il-ministeru tagħhom. Inħoss li
llum, f’dan is-57 Jum Dinji ta’
Talb għall-Vokazzjonijiet,
nista’ nerġa’ naqbad dawk
il-kelmiet u ntennihom
lill-Poplu kollu ta’ Alla,
fl-isfond tas-silta tal-Vanġelu
li tirrakkontalna l-esperjenza
unika ta’ Ġesù u Pietru f’dak
il-lejl ta’ maltempata fuq
l-għadira ta’ Tiberija (ara Mt
14:22-33).
Wara t-tkattir tal-ħobż, li kien
ħeġġeġ tant lill-folla, Ġesù
jordna lid-dixxipli tiegħu biex
jitilgħu fuq id-dgħajsa u jaqsmu
qablu għax-xatt l-ieħor, waqt li
hu kellu jibgħat lin-nies.
Ix-xbieha ta’ dan il-qsim fuq
l-għadira tevoka b’xi mod
il-vjaġġ tal-ħajja tagħna.
Fil-fatt, id-dgħajsa ta’
ħajjitna miexja bil-mod, dejjem
bla kwiet għax qed tfittex port
hieni, lesta biex taffronta
r-riskji u l-opportunitajiet
tal-baħar, imma mixtieqa wkoll
li tilqa’ mingħand dak li
qiegħed fuq it-tmun bidla
fid-direzzjoni li saflaħħar
twassal għar-rotta t-tajba. Imma
xi drabi jista’ jiġrilha li
tintilef, li jgerfxuha
l-illużjonijiet flok timxi
mad-dawl tal-fanal li jwassalha
għal port żgur, jew li tħoss
kontriha l-irjieħ tas-saram,
tad-dubji u tal-biża’.
Hekk ukoll jiġri fil-qalb
tad-dixxipli, li, imsejħin biex
jimxu wara r-Rabbi ta’ Nazaret,
iridu jiddeċiedu li jaqsmu
għax-xatt l-ieħor, jagħżlu
bil-kuraġġ li jħallu warajhom
iċ-ċertezzi tagħhom u jibdew
mexjin wara l-Mulej. Din
l-avventura mhijiex xi waħda
paċifika: jasal il-lejl, jonfoħ
ir-riħ kontrihom, id-dgħajsa
tispiċċa titqalleb fil-mewġ, u
hemm ir-riskju li jintrebħu
mill-biża’ li mhux ħa jaslu
qawwijin u sħaħ u li mhumiex
kapaċi jwieġbu għas-sejħa kif
imiss.
Imma l-Vanġelu jgħidilna li
fl-avventura ta’ dan il-vjaġġ
xejn faċli m’aħniex waħidna.
Il-Mulej, donnu kważi kważi jrid
jisforza ż-żerniq fil-qalba
tal-lejl, jimxi fuq l-ilmijiet
imħarrka u jilħaq lid-dixxipli,
jistieden lil Pietru biex jiġi
jiltaqa’ miegħu fuq il-mewġ,
isalvah meta jarah ħa jegħreq, u
fl-aħħar jirkeb id-dgħajsa u
jsikket ir-riħ.
Allura l-ewwel kelma
tal-vokazzjoni hi gratitudni.
Li nsalpaw lejn ir-rotta t-tajba
mhix xi biċċa xogħol fdata biss
lill-isforzi tagħna, lanqas
tiddependi biss mit-toroq li
aħna nagħżlu li naqbdu.
Ir-realizzazzjoni tagħna nfusna
u tal-pjanijiet ta’ ħajjitna
mhijiex ir-riżultat matematiku
ta’ dak li niddeċiedu aħna
f’“jien” iżolat; bil-maqlub,
hija qabelxejn it-tweġiba għal
sejħa li taslilna mill-Għoli.
Huwa l-Mulej li qed jurina
x-xatt li fuqu jeħtieġ naslu u
li, qabel dan, jagħtina l-kuraġġ
li nitilgħu fuq id-dgħajsa; huwa
hu li, waqt li jsejħilna, isir
ukoll it-tmunier tagħna biex
iseħibna, jurina d-direzzjoni,
ma jħallix li ninkaljaw fuq xi
skoll tad-dubji tagħna u
jagħtina l-ħila saħansitra li
nimxu fuq l-ilmijiet imqallba.
Kull vokazzjoni tinbet
mill-ħarsa kollha mħabba li biha
l-Mulej ġie jiltaqa’ magħna,
forsi sewwasew waqt li d-dgħajsa
tagħna kienet f’ħalq
it-tempesta. “Aktar milli għażla
tagħna, hija risposta għal sejħa
gratwita tal-Mulej” (Ittra
lis-saċerdoti, 4 ta’ Awwissu
2019); għalhekk, jirnexxilna
niskopruha u nħaddnuha meta
l-qalb tagħna tinfetaħ
għall-gratitudni u tagħraf
tifhem kif Alla jgħaddi minn
ħajjitna.
Meta d-dixxipli lemħu lil Ġesù
riesaq lejhom fuq l-ilma,
għall-bidu ħasbu li kien xi
fantażma u twerwru. Imma
minnufih Ġesù għamlilhom il-qalb
b’kelma li dejjem għandna
nżommuha magħna fil-ħajja tagħna
u tul il-mixja vokazzjonali
tagħna: “Agħmlu l-qalb, jiena
hu, tibżgħu xejn!” (v. 27).
Proprju din hija t-tieni kelma
li nixtieq ngħaddilkom:
kuraġġ.
Dawk li spiss iżommuna milli
nimxu, nikbru, nagħżlu t-triq li
l-Mulej ħejja għalina, huma
l-fantażmi li hemm jitqallbu
fil-qalb tagħna. Meta aħna
msejħin inħallu x-xatt żgur
tagħna u nħaddnu stat ta’ ħajja
– bħaż-żwieġ, is-saċerdozju
ordnat, il-ħajja kkonsagrata –,
l-ewwel reazzjoni spiss tkun
irrappreżentata mill-“fantażma
tan-nuqqas ta’ fidi”: Ma jistax
ikun li din il-vokazzjoni hi
għalija; imma din hi tassew
it-triq it-tajba? Proprju dan
qed jitlob il-Mulej minni?
U, ftit ftit, joktru ġo qalbna
dawk il-ħsibijiet kollha, dawk
il-ġustifikazzjonijiet u dawk
il-kalkoli li jtellfulna
l-entużjażmu kollu, iħawduna u
jħalluna mwaħħlin fejn aħna fuq
ix-xatt mnejn suppost tlaqna:
nibdew nemmnu li ħadna xi żball,
li m’aħniex kapaċi biżżejjed, li
sempliċiment rajna fantażma li
għandna nkeċċuha minn quddiemna.
Il-Mulej jaf li għażla
fundamentali fil-ħajja – bħalma
hi dik li niżżewġu jew
nikkonsagraw ruħna b’mod
speċjali għall-qadi tiegħu –
titlob il-kuraġġ. Hu jaf
x’inhuma l-mistoqsijiet,
id-dubji u d-diffikultajiet li
jċaqilqu d-dgħajsa ta’ qalbna, u
għalhekk jiżgurana: “La tibżax,
jiena miegħek!”. Il-fidi
fil-preżenza tiegħu li jiġi
jiltaqa’ magħna u jimxi magħna,
anki meta l-baħar ikun imqalleb,
teħlisna minn dik it-telqa li
jien diġà sejjaħtilha “dwejjaq
ħelu” (Ittra lis-saċerdoti,
4 ta’ Awwissu 2019), jiġifieri
dak il-qtigħ ta’ qalb ġewwa fina
li jimblukkana u ma jħalliniex
niggustaw il-ġmiel
tal-vokazzjoni.
Fl-Ittra lis-saċerdoti
tkellimt anki fuq l-uġigħ, imma
hawnhekk nixtieq nittraduċi din
il-kelma b’mod differenti u
nirriferi għat-taħbit.
Kull vokazzjoni ġġib magħha
impenn. Il-Mulej isejħilna għax
irid jagħmilna bħal Pietru,
kapaċi “nimxu fuq l-ilma”,
jiġifieri nieħdu l-ħajja tagħna
f’idejna biex inqegħduha
għas-servizz tal-Vanġelu, b’modi
konkreti u ta’ kuljum kif jurina
hu, u speċjalment fid-diversi
għamliet ta’ vokazzjonijiet
lajkali, presbiterali u ta’
ħajja kkonsagrata. Imma aħna
iktar qisna l-Appostlu: għandna
x-xewqa u l-ħeġġa, imma,
fl-istess waqt, aħna mimlijin
dgħufijiet u biżgħat.
Jekk nitkaxkru mill-ħsieb
tar-responsabbiltajiet li hemm
jistennewna – fil-ħajja
taż-żwieġ jew fil-ministeru
saċerdotali – jew
mid-diffikultajiet li se
niltaqgħu magħhom, allura ma
ndumux ma nwarrbu għall-ġenb
ħarsitna minn fuq Ġesù u, bħal
Pietru, nirriskjaw li negħrqu.
Bil-maqlub, imqar fid-dgħufija u
fil-faqar tagħna, il-fidi
tippermettilna nimxu biex
niltaqgħu mal-Mulej Irxoxt u
negħlbu mqar it-tempesti.
Fil-fatt hu jnewlilna idu meta
minħabba l-għeja jew il-biża’
nirriskjaw li negħrqu, u
jagħtina l-ħeġġa meħtieġa biex
ngħixu l-vokazzjoni tagħna
bil-ferħ u l-entużjażmu.
Fl-aħħar, meta Ġesù jitla’ fuq
id-dgħajsa, ir-riħ jieqaf u
l-imwieġ jikkalmaw. Hija xbieha
sabiħa ta’ dak li l-Mulej
jagħmel fil-ħajja tagħna u
fit-taqlib tal-istorja,
speċjalment meta nkunu f’nofs
it-tempesta: hu jordna
lill-irjieħ biex jisktu, u
l-qawwiet tal-ħażen, tal-biża’,
tar-rassenjazzjoni ma
jibqgħalhomx setgħa fuqna.
Fil-vokazzjoni speċifika li aħna
msejħin ngħixu, dawn l-irjieħ
kapaċi jċeduna. Jiġuni f’moħħi
dawk li jassumu ħidmiet
importanti fis-soċjetà ċivili,
il-miżżewġin li mhux ta’ b’xejn
nieħu pjaċir insejħilhom
“il-kuraġġjużi”, u speċjalment
dawk li jħaddnu l-ħajja
kkonsagrata u s-saċerdozju.
Nista’ nifhem it-taħbit tagħkom,
is-solitudni li xi drabi ttaqqal
il-qalb, ir-riskju tad-drawwa li
naqra naqra jitfi n-nar jaqbad
tas-sejħa, it-toqol
tal-inċertezza u tal-prekarjetà
ta’ żminijietna, il-biża’
mill-futur. Kuraġġ, la tibżgħux!
Ġesù jinsab magħna u, jekk
nagħrfuh bħala s-Sid waħdieni
ta’ ħajjitna, hu jnewlilna idu u
jaqbadna biex isalvana.
U hemm, imqar qalb l-imwieġ,
ħajjitna tinfetaħ għat-tifħir.
Din hija l-aħħar kelma
tal-vokazzjoni, u trid tkun
ukoll l-istedina biex inxettlu
fina l-atteġġjament interjuri
ta’ Marija Santissma: grata
għall-ħarsa ta’ Alla li straħet
fuqha, bl-offerta fil-fidi
tal-biżgħat u d-dubji tagħha,
waqt li ħaddnet b’kuraġġ
is-sejħa, hija għamlet minn
ħajjitha għanja eterna ta’
tifħir lill-Mulej.
L-iktar għeżież, speċjalment
f’dan il-Jum, imma anki
fl-azzjoni pastorali ordinarja
tal-komunitajiet tagħna, nixtieq
li l-Knisja tterraq din il-mixja
għall-qadi tal-vokazzjonijiet,
billi tiftaħ xquq fil-qalb ta’
kull fidil, biex kulħadd jista’
jiskopri bi gratitudni s-sejħa
li qed jagħmillu Alla, isib
il-kuraġġ li jlissen “iva”,
jegħleb l-għeja tat-taħbit
bil-fidi fi Kristu u, fl-aħħar,
joffri ħajtu bħala għanja ta’
tifħir lil Alla, għall-aħwa u
għad-dinja kollha. Il-Verġni
Marija sseħibna u tidħol
għalina.
Ruma,
San Ġwann Lateran,
8
ta’ Marzu
2020,
it-II
Ħadd tar-Randan
Franġisku
miġjuba mit-Taljan għall-Malti
minn Francesco Pio Attard
|