It-Tlieta 31 ta’ Mejju 2016
In-Nisrani jaqdi mill-ewwel
u bil-ferħ mingħajr ma
joqgħod iqarras wiċċu - il-Papa
Franġisku
Kif tinbidel id-dinja kieku
nitgħallmu naqdu u nersqu
lejn l-oħrajn! B’dal-ħsieb
il-Papa Franġisku temm l-omelija
li għamel dalgħodu
fil-kappella tad-Dar Santa
Marta.
Il-Papa għamel riflessjoni
dwar il-Madonna fil-jum li
fih jintemm ix-xahar dedikat
lilHa. Is-servizz u l-laqgħa,
qal il-Papa, jnisslu fina
ferħ li jimlielna ħajjitna.
Il-kuraġġ tan-nisa, il-ħila
li nersqu lejn l-oħrajn
b’idejna maħruġa bħala
sinjal li rridu ngħinu,
minnufih. U, fuq kollox,
il-ferħ, dak il-ferħ li
jimla l-qalb u jagħti
lill-ħajja sens u direzzjoni
ġodda.
Il-Papa silet dawn il-punti
kollha mill-qari tal-Vanġelu
tal-lum li jirakkonta ż-żjara
ta’ Marija lil Santa
Eliżabetta. Din is-silta,
flimkien mal-kliem
tal-Profeta Sofonija fl-ewwel
qari u dak ta’ San Pawl fit-tieni
qari, fil-fehma tal-Papa,
jtina liturġija mimlija ferħ
li jasal bħal żiffa ħelwa li
timlielna ħajjitna.
Kemm huma koroħ l-insara li
dejjem wiċċhom imqarras, l-insara
bil-geddum. Ħaġa kerha,
kerħa, kerħa, tenna l-Papa.
Dawn mhumiex insara għal
kollox. Jemmnu li huma, imma
mhumiex insara sħaħ. Dan hu
l-messaġġ nisrani.
Huwa f’din l-atmosfera ta’
ferħ, li l-liturġija tal-lum
tirregalalna żewġ affarijiet
li rrid nitkellem dwarhom:
l-ewwel l-atteġġjament u t-tieni,
il-fatt. L-atteġġjament u l-qadi.
Dak ta’ Marija kien servizz
li Hi tat mingħajr tlajjar,
osserva l-Papa. Il-Vanġelu
jgħidilna li Marija marret
tħaffef. Dan minkejja li
kienet tqila u bir-riskju li
mat-triq tiltaqa’ mal-ħallelin.
Dit-tfajla ta’ sittax-il
sena, sbatax, mhux aktar,
kienet kuraġġuża, osserva
l-Papa. Qamet u telqet
mingħajr ma qagħdet tfittex
skużi.
Il-kuraġġ ta’ mara.
Fil-Knisja hemm ħafna nisa
kuraġġużi: huma bħall-Madonna.
In-nisa li jrabbu l-familja,
li jedukaw lil uliedhom, li
jiffaċċjaw tant kuntrarju,
tant dulur, li jieħdu ħsieb
il-morda......
Huma kuraġġużi, għax jaqbu u
jibdew iservu, u jibqgħu
jservu. Is-servizz hu sinjal
nisrani. Min ma jgħixx biex
jaqdi, ma jaqdix biex jgħix.
Il-qadi bil-ferħ, dan hu l-atteġġjament
li rrid nipproponi llum.
Hemm il-ferħ anki fil-qadi.
It-tieni punt li rrifletta
dwaru l-Papa kien il-laqgħa
bejn Marija u kuġinitha.
Dawn iż-żewġ nisa jiltaqgħu
bil-ferħ, osserva Franġisku,
dak il-waqt kien festa sħiħa.
Kieku aħna nitgħallmu
nagħmlu dan it-tip ta’ qadi
u nersqu lejn l-oħrajn,
kieku kif tinbidel id-dinja!
Il-laqgħa hi sinjal nisrani
ieħor. Persuna li tgħid li
hi nisranija u m’għandhiex
ħila tersaq lejn ħaddieħor,
mhix nisranija sħiħa. Kemm
il-qadi kif ukoll il-laqgħa
jitolbu minna li noħorġu
minna nfusna: noħorġu biex
naqdu u biex niltaqgħu, biex
inħaddnu persuna oħra. B’dan
il-qadi ta’ Marija, b’din
il-laqgħa, tiġġedded
il-wegħda tal-Mulej,
titwettaq fil-preżent, f’dak
il-preżent. U propju l-Mulej,
kif smajna fl-ewwel qari:
“Il-Mulej Alla tiegħek li
jinsab f’nofskom” – Il-Mulej
insibuh fil-qadi, il-Mulej
insibuh fil-laqgħa tagħna
mal-oħrajn.