It-Tnejn 23 ta’ Mejju 2016
Il-veru ferħ itihulna Ġesù
mhux il-ġid materjali
In-nisrani ma jistax ma
jkunx bniedem hieni, afferma
l-Papa Franġisku waqt
il-quddiesa lbieraħ it-Tnejn
fil-kappella tad-Dar Santa
Marta. Anki fit-tbatija
tal-ħajja n-nisrani jaf
jafda f’Ġesù u jgħix
bit-tama.
Mill-ġdid il-Papa wissa biex
nħallux il-ġid materjali
jikkmandana għax dan iġib
miegħu biss dwejjaq.
In-nisrani jgħix bil-ferħ u
bl-istgħaġib, bis-saħħa
tal-qawmien mill-mewt ta’
Ġesù Kristu, qal il-Papa hu
u jikkummenta l-ewwel qari
tal-liturġija tal-lum meħud
mill-ittra ta’ San Pietru
Appostlu.
Franġiku żied li anki jekk
inkunu mikdudin mill-provi
tal-ħajja qatt ma jista’
jonqsilna l-ferħ ta’ dak li
Alla għamel magħna, li
wellidna mill-ġdid fi Kristu
u tana t-tama.
Aħna, osserva l-Papa,
nistgħu nimxu lejn dik
it-tama li l-ewwel insara
kienu jqisuha ankra fis-sema.
Aħna nitilgħu ma’ dik il—katina
u nimxu lejn dik it-tama li
ttina l-ferħ. In-nisarani hu
bniedem ferħan, bil-ferħ
f’qalbu. Ma hemm ebda
nisrani li ma jħossx il-ferħ
f’qalbu.
Tgħiduli, imma padre, rajt
tant li huma mdejjqin! Dawk
mhumiex insara, saħaq il-Papa
Franġisku, jgħidu li huma
nsara imma mhumiex!
Jonqoshom xi ħaġa.
Il-karta tal-identità tan-nisrani
hu l-ferħ, il-ferħ li jiġi
mill-Vanġelu; il-ferħ li
konna magħżulin minn Ġesù,
salvati minnu, imġeddin biH;
il-ferħ li jiġi mit-tama li
Ġesù qed jistenniena,
il-ferħ li anki fis-slaleb
tal-ħajja, jitfisser mod
ieħor: jiġifieri l-paċi
fiċ-ċertezza li Ġesù qiegħed
magħna, jakkumpanjana.
In-nisrani, żied il-Papa,
ikattar dan il-ferħ aktar ma
jkollu fiduċja f’Alla, Alla
li dejjem jiftakar fil-patt
li għamel. Min-naħa tiegħu,
in-nisrani jaf li Alla
jiftakar fih, iħobbu u
jakkumpanjah, li Alla
jistennih. Dan hu l-veru
ferħ.
Il-Papa Franġisku għadda
biex jikkummenta l-Vanġelu
tal-ġurnata, il-laqgħa ta’
Ġesù maż-żgħażugħ għani.
Kien bniedem li ma kellux
ħila jiftaħ qalbu għall-ferħ
u għażel id-dwejjaq għax
kien għani ħafna. Kien
marbut ma’ ġidu!
Ġesù kien qalilna li ma
nistgħux naqdu żewġ sidien:
jew taqdi lill-Mulej jew
lill-flus. Il-ġid fih
innifsu mhux xi ħaġa ħażina
imma li naqdu l-flus hu
ħażin. L-imsejken żgħażugħ
telaq qalbu sewda. Qarras
wiċċu u telaq imtaqqal. Meta
fil-parroċċi tagħna,
fil-komunitajiet tagħna, fl-istituzzjonijiet
tagħna nsibu nies li jgħidu
li huma nsara u jriduha ta’
nsara imma wiċċhom dejjem
imqarras, ikun hemm xi ħaġa
fihom li mhix sew. Għandna
ngħinuhom biex isibu lil
Ġesù, biex ineħħu dak id-dwejjaq
ħalli jkunu jistgħu jsibu l-ferħ
tal-Vanġelu, ħalli jkollhom
dan il-ferħ li jiġi biss
mill-Vanġelu.
Franġisku kompla jikkummenta
dwar il-ferħ u l-istgħaġib.
L-istgħaġib it-tajjeb
quddiem ir-rivelazzjoni,
quddiem l-imħabba ta’ Alla,
quddiem l-emozzjoni
tal-Ispirtu s-Santu. In-nisrani
hu bniedem mistgħaġeb, kelma
li nsibuha meta Ġesù
jispjega lill-Appostli li
dak iż-żgħażugħ twajjeb ma
rnexxilux jimxi warajH għax
kien marbut ma’ ġidu.
Allura min jista’ jsalva,
staqsew l-Appostli? U l-Mulej
weġibhom: hu impossibbli
għall-bniedem, imma mhux
għal Alla!
Il-ferħ nisrani, għalhekk,
l-istgħaġib li jġib miegħu
l-ferħ, il-ħelsien mill-irbit
mal-ħwejjeġ tad-dinja, mill-mondanità...il-mondanità
li tifridna minn Ġesù,
insibuh biss bil-qawwa
t’Alla, fil-qawwa li jtina
l-Ispirtu s-Santu.
Nitolbu llum lill-Mulej biex
itina dan l-istgħaġib meta
nintrefgħu lejH, meta naraw
l-għana spiritwali li tana.
U ma’ dan l-istgħaġib itina
wkoll il-ferħ, il-ferħ
tal-ħajja li ngħixu bil-paċi
tal-qalb minkejja d-diffikultajiet;
u nitolbuh iħarisna milli
nfittxu l-hena f’tant
affarijiet li jnisssulna d-dwejjaq,
iwiegħdu ħafna imma ma jtuna
xejn lura!
Ftakru tajjeb, temm il-Papa,
in-nisrani hu bniedem
tal-ferħ, ferħ fil-Mulej;
bniedem mistgħaġeb.