Il-Ħamis 19 ta’ Mejju 2016
L-għonja li jisfruttaw
il-ħaddiema huma sangisugi u
qed jagħmlu dnub mejjet
Hu dnub mejjet li tisfrutta
lill-ħaddiema biex tistgħana.
Hekk afferma l-Papa waqt l-omelija
fid-Dar Santa Marta ilbieraħ
filgħodu.
L-ewwel qari tal-lum, meħud
mill-ittra ta’ San Ġakbu, hi
twissija serja lill-għonja
li jiġimgħu il-flus
bl-isfruttament tal-ħaddiema.
L-għana fih innifsu hu
tajjeb, spjega l-Papa, imma
hi ħaġa relattiva, mhix
assoluta. Infatti, dawk li
jimxu fuq dik li nsejħulha
“teoloġija tal-prosperità”
li żżomm li “Alla jurik li
int ġust għax itik tant ġid”,
huma fl-iżball.
Il-problema hi li wieħed ma
jorbotx qalbu mal-ġid għax
ma nistgħux naqdu ‘l Alla u
l-flus. Dawn jistgħu jsiru
ktajjen li jisirqulna l-libertà
li nimxu wara Ġesù.
Allura San Ġakbu jgħidilna:
il-paga tal-ħaddiema li
għamlu l-ħsad fl-artijiet
tagħkom u li intom ma
ħallastuhomx flimkien mal-protesti
tal-ħassada waslu f’widnejn
Il-Mulej li jista’ kollox.
Meta wieħed jistgħana għax
jisfrutta n-nies, l-għonja
li jisfruttaw, ikunu qed
jisfruttaw ix-xogħol tan-nies
u dawn l-imsejkna jsiru
skjavi.
Imma ejjew naħsbu f’illum u
naraw li qed isir l-istess
fid-dinja kollha. “Irrid
naħdem”. “Tajjeb, ejja
nagħmlu kuntratt, minn
Settembru sa Ġunju, mingħajr
assikurazzjoni fuq is-saħħa...”..
U wara li jieqaf, f’Lulju u
Awwissu dak li jkun jiekol
l-arja. F’Settembru mbagħad
nagħmlu kuntratt ieħor........
Min jagħmel dan hu veru
sangisug u jgħix minn fuq
demm in-nies li jkunu saru
lsira tax-xogħol.
Il-Papa Franġisku fakkar dak
li kienet qaltlu tfajla li
sabet ix-xogħol, taħdem
11-il siegħa kuljum għal 650
Ewro, mingħajr bolla: “jekk
trid aċċetta, inkella dabbar
rasek. Warajk hemm ħaddieħor,
kju sħiħ”.
Dawn l-għonja, osserva
l-Papa, iħaxxnu bwiethom u
l-Appostlu jgħid: Ħxintu
għal-jum il-ġudizzju. Id-demm
ta’ dawn in-nies kollha li
intom erdajtu u li għextu
minn fuq darhom huwa għajta
lill-Mulej, huwa sejħa
għall-ġustizzja.
L-isfruttament tan-nies –
afferma mill-ġdid il-Papa –
illum hu veru skjavitù. Aħna
konna naħsbu li l-iskjavi ma
jeżistux aktar. Minnu li ma
jmorrux iġibuhom mill-Afrika
jew mill-Amerika. Imma
jinsabu fi blietna. Hemm it-traffikanti,
dawk li jbiegħu n-nies għax
xogħol mingħajr ebda ħniena.
Waqt l-udjenza tal-bieraħ
irriflettejna fuq l-għani
Epulun u Lażżru. Imma dan l-għani
kien jgħix fid-dinja tiegħu
u ma kienx jinduna li
quddiem biebu kien hemm xi
ħadd bil-ġuħ. Għallanqas dak
l-għani ma kienx jinduna u
ħalla lil Lażżru jmut
bil-ġuħ.
Li qed isir hu agħar minn
hekk: qed noqtlu n-nies
bix-xogħol biex ingawdu aħna!
Ngħixu minn fuq demm in-nies.
Dan hu dnub mejjet, dnub
mejjet. Jeħtieġ ħafna
penitenza, tant radd lura
biex nikkonvertu minn dan
id-dnub.
B’umoriżmu l-Papa qal li
meta miet bniedem xħiħ in-nies
bdew jgħidu: il-funeral kien
irvinat għax ma setgħux
jagħlqu t-tebut peress li
ried jieħu miegħu kull ma
kellu! Ħadd ma jista’ jieħu
miegħu il-ġid li jkollu!
Naħsbu ftit f’dan id-dramm
tal-lum: l-isfruttament tan-nies,
demmhom li jsir skjav. U dan
ma jolqotx biss lil min
jittraffika
għall-prostituzzjoni u lit-tfal
għax-xogħol, imma wkoll dak
it-traffikar hekk imsejjaħ “ċiviliżżat”:
Jien inħallsek daqshekk,
mingħajr ma ntik benefiċċji,
vaganzi, assikurazzjoni fuq
is-saħħa,,, xejn.. bla ebda
kopertura.... basta
nistgħana jien!
Jalla l-Mulej ifehemna llum
dik is-sempliċità li
jgħallimna Ġesù fil-Vanġelu
tal-lum: aktar importanti
tagħti tazza ilma f’isem
Ġesù mir-rikkezzi kollha
mrekknin bl-isfruttament
tan-nies.