lt-Tlieta 10 ta’ Mejju 2016
Il-missjunarju hu dak li
“jaħli” ħajtu għal-Ġesù
Kull bniedem li jagħżel li
jmur il-missjoni biex
iħabbar il-Vanġelu
fil-postijiet l-aktar
imwarrbin, hu doċli
għal-leħen tal-Ispirtu s-Santu
li jimbuttana biex “naħarqu”
ħajjitna għall-Kelma t’Alla.
Waqt l-omelija fid-Dar Santa
Marta lbieraħ, it-Tlieta,
filgħodu, il-Papa Franġsiku
qal li s-sejħa li jagħmlilna
l-Ispirtu s-Santu hi
mbuttatura biex ħajjitna
ntuha kollha lil Kristu,
anzi “naħrquha” għalih.
Dan hemm fil-qalb ta’ kull
appostlu. Kien in-nar li
ħeġġeġ f’qalb San Pawl, hu
l-istess nar li jaqbad
fil-qlub ta’ tant żgħażagħ
li ħallew pajjiżhom,
lill-familji u telqu ‘l
bogħod, f’kontinenti oħra
biex iħabbru lil Ġesù Kristu.
Ir-riflessjoni tal-Papa
kienet imnebbħa lilu
mis-silta meħuda mill-Atti
tal-Appostli li
tirrakkuntalna l-firda ta’
Pawlu mill-komunità ta’
Miletu. Xena li tqanqek:
Pawlu jaf u jgħid li ma
kienx se jarahom aktaar.
Kellu jmur Ġerusalemm għax
hemm bagħtu l-Ispirtu, u
Pawlu jagħraf li l-Ispirtu
jikkmandalu ħajtu u jnebbħu
biex iħabbar il-Vanġelu
minkejja l-problemi u l-weġgħat
li kellu jħabbat wiċċu
magħhom.
Dan il-qari jfakkarni
fil-ħajja tal-missjunarji ta’
kull żmien, qal il-Papa.
Huma obdew il-kmand
tal-Ispirtu s-Santu:
il-vokazzjoni! Meta mmorru
f’dawk il-postijiet
tal-missjoni u nżuru ċ-ċimiterji
naraw il-lapidi tagħhom:
ħafna mietu żgħar, f’età ta’
anqas minn 40 sena minħabba
l-mard ta’ dak il-post.
Ħajjiet żgħażugħa mogħtijin,
“maħruqin” għal Alla.
Jiena naħseb li huma, fl-aħħar
mumenti, bogħod minn
pajjiżhom, mill-familji
tagħhom, mill-għeżież
tagħhom aktarx qalu: Kien ta’
siwi dak li għamilt.
Il-missjunarju jitlaq bla ma
jaf x’hemm jistennih, qal il-Papa
li kkwota l-ħajja ta’ San
Franġisku Saverju kif
ħallihielna miktuba l-kottieb
u poeta Spanjol tas-seklu
għosrin José María Pemàn.
Hija paġna li tfakkarna
fil-ħajja ta’ San Pawl: Naf
biss, qal l-Appostlu hu u
jsellem, li minn belt għal
oħra l-Ispirtu s-Santu
jurini li hemm jistennewni
ktajjen u nkwiet.
Il-missjunarju jaf li l-ħajja
mhix se tkun faċli, imma
xorta jibqa’ għaddej,
ikkummenta Franġisku li
stqarr li jħossu mqanqal
meta jiftakar
fil-missjunarji tal-lum.
Il-misjunarji tagħna, kompla
jgħid, huma l-eroj
tal-evanġeliżżazzjoni ta’
żmienna. Kienet l-Ewropa li
mliet lill-kontinenti l-oħra
bil-missjunarji li kienu
jitilqu u ma jiġux lura.
Jidhirli li hu ġust li
nirringrazzjaw lill-Mulej
għax-xhieda tagħhom. Hi
ġustizzja li aħna nifirħu li
għandna dawn il-missjunarji
li huma xhieda ta’ veru.
Jien nimmaġina kif kienu l-aħħar
mumenti tagħhom, kif setgħet
kienet il-firda mill-ħajja
tagħhom. Bħal Franġisku
Saverju: Ħallejt kollox imma
kien ta’ siwi! Telqu
bis-satra, huma martri għax
offrew ħajjithom
għall-Vanġelu. Huma l-glorja
tagħna dawn il-missjunarji!
Il-glorja tal-Knisja tagħna!
Waħda mill-kwalitajiet
tal-missjunarju hi d-doċilità
għal-leħen tal-Ispirtu s-Santu,
qal Franġisku, li temm l-omelija
b’talba. Franġisku talab li
ż-żgħażagħ tagħna aktar
milli jintrikbu mis-sens
ta’nuqqas ta’ sodisfazzjoni,
jisimgħu leħen l-Ispirtu li
jġegħelhom imorru ‘l hinn
minnhom infushom u ħajjithom
“jaħarquha” għall-kawżi
aktar nobbli.
Liż-żgħażagħ tal-lum, li qed
iħossuhom mifxulin, li mhux
qed isibu sodisfazzjon
fil-ħajja tal-konsumiżmu u
narċisista, irrid ngħidilhom:
ħarsu lejn ix-xefaq u araw
lil dawn il-missjunarji!
Itolbu lill-Ispirtu s-Santu
biex jgħinkom tmorru aktar
‘l hinn u “taħarqu”
ħajjitkom. Hija kelma iebsa
imma l-ħajja għandha valur
jekk tkun mgħexja tajjeb.
Imma biex ngħejxuha tajjeb
irridu “naħarquha” billi
ningħatw għall-qadi,
għat-tħabbir. Dan hu l-ferħ
tat-tħabbira tal-Vanġelu,
temmil-Papa Franġisku.