It-Tlieta 3 ta’ Mejju 2016

Ġesù huwa t-triq imma ħafna Nsara jgħixu qishom mummji jew vagabondi

Ġesù huwa l-veru triq tal-ħajja Nisranija u huwa importanti li ‘l ħin kollu niċċekkjaw aħniex mexjin warajh bil-koerenza jew jekk l-esperjenza tal-fidi tagħna tilfitx it-triq jew weħlet xi mkien. Dan il-ħsieb hu s-sustanza tal-omelija li għamel il-Papa Franġisku fil-kappella tad-Dar Santa Marta dalgħodu.

Il-ħajja tal-fidi hija mixja u mat-triq niltaqgħu ma ħafna tipi ta’ nsara. Il-Papa Franġsiku għamel katalgu qasir ta’ dawn: insara mummji, insara vagabondi, insara rashom iebsa, insara bin-nofs – dawk li jibqgħu miblugħin quddiem xi panorama ta’ ġmiel imma jibqgħu imwaħħlin hemm. Nies li għal raġuni jew oħra insew li l-unika triq ġusta – ifakkarna dan il-Vanġelu tal-lum – hija Ġesù, li lil Tumas jikkonfermalu : “Jiena hu t-triq, min ra lili ra lill-Missier”.
Il-Papa Franġsiku mbagħad beda jispjega waħda waħda, dawn il-kategoriji ta’nsara konfużi u beda b’dawk li ma jimxux, li jagħtu l-idea li huma ftit jew wisq ibbalzmati.

Nisrani li mhux f’mixja, li ma jaqtax għal għonq it-triq, hu nisrani li mhux nisrani, qal Franġisku. Ma nistgħux ngħidu x’inhu. Hu nisrani xi ftit pagan; qiegħed hemm, wieqaf, ma jimxix ‘il quddiem fil-ħajja nisranija, f’ħajtu ma jwarrdux il-Beatitudnijiet, ma jagħmilx opri tal-ħniena.

Hu wieqaf u skużawni l-kelma, qiesu mummja, mummja spiritwali. U hemm insara li huma mummji spiritwali, weqfin. Ma jagħmlux deni, imma lanqas jagħmlu l-ġid.

Hemm imbagħad in-nisrani ta’ ras iebsa. Meta nimxu, qal il-Papa, jiġri li xi kultant niżbaljaw it-triq, imma dik mhix l-agħar ħaġa. It-traġedja hi li tkun rasek iebsa u tgħid li dik hi t-triq bla ma tħalli leħen il-Mulej jgħidlek li mhix dik, jgħidlek: Erġa’ lura u ibda miexi mill-ġdid fit-triq it-tajba. Hemm kategorija oħra: l-insara li jimxu mingħajr ma jafu fejn sejrin. Huma l-vagabondi tal-ħajja nisranija. Ħajjithom iduru min-naħa għal-oħra u b’hekk jitilfu s-sbuħija tal-qrubija ma’ Ġesù, mal-ħajja ta’ Ġesù.

Jitilfu t-triq għax jiġru minn post għal ieħor bla direzzjoni u dil-ħajja twassalhom għal ħajja mingħajr sbokk. Il-vagabondaġġ hu labirint, u mbagħad ma jkunux jafu mnejn se joħorġu! Dawn tilfu s-sejħa ta’ Ġesù. M’għandhomx boxxla biex joħorġu mill-labirint u jibqgħu jagħqdu hemm ġew, ifittxu.

Hemm insara oħra li jissaħħru wara s-sbuħija ta’ xi ħaġa u jieqfu nofs triq, mistgħaġbin b’dak li jkunu qed jaraw, b’dak il-pajsaġġ. U jieqfu! Il-ħajja nisranija mhix attrazzjoni, hija verità! Hija Kristu Ġesù!

Meta naraw dan, kompla jirrifletti l-Papa Franġisku, jiġu f’moħħna ċerti mistoqsijiet. Il-mixja li bdejt bil-Magħmudija kif sejra? Wieqfa? Żbaljajt it-triq? Indur dejjem bla ma naf fejn sejjer spiritwalment? Nieqaf quddiem dak li jogħġobni: il-mondanità, il-vanità, jew dejjem miexi ‘l quddiem u l-Beatitudnijiet u l-opri tal-ħniena nagħmilhom ħaġa konkreta?

Għax it-triq ta’ Ġesù, kompla l-Papa, hi mimlija faraġ, glorja, imma slaleb ukoll. Imma dejjem bil-paċi tal-qalb.

Illum nieqfu b’din il-mistoqsija, imma nagħmluha lilna nfusna, ħames minuti kollox. Kif jien sejjer fil-mixja nisranija? Wieqaf, żbaljat, indur, wieqaf mistgħaġeb bis-sbuħija ta’ dak li jogħġobni jew fit-triq ta’ Ġesù li qal “Jien t-triq?

Nitolbu lill-Ispirtu s-Santu jgħallimna nimxu tajjeb, dejjem! U meta ngħejjew, ftit tan-nifs, u nerġgħu nibdew mexjin. Nitolbu din il-grazzja, temm il-Papa.