It-Tnejn 2 ta’ Mejju 2016
Il-persekuzzjonijiet, kbar
jew żgħar, huma l-prezz tax-xhieda
Nisranija
L-Ispirtu s-Santu jtina l-qawwa
biex inkunu xhieda ta’ Ġesù,
fil-persekuzzjonijiet
il-kbar li fihom wieħed
jasal biex jagħti ħajtu kif
ukoll fiż-żgħar li jiġu
mit-tqassis u l-kritika.
Waqt l-omelija fid-dar Santa
Marta dalgħodu, il-Papa
Franġisku qal li qed noqorbu
lejn il-Pentekoste u l-qari
qed ikellimna dejjem aktar
dwar l-Ispirtu s-Santu. L-Atti
tal-Appostli jgħidulna li l-Mulej
miss il-qalb ta’ mara jisima’
Lidia, bejjiegħa tal-porpra
fil-belt ta’ Tiàtira, hi u
tisma kliem Pawlu.
Din il-mara, kompla l-Papa,
ħasset xi ħaġa ġo fiha li
mbuttata biex tgħid: ‘Dan
veru! Jien naqbel ma dak li
qed jgħid dar-raġel, dan
ir-raġel li qed jagħti xheda
ta’ Ġesù Kristu. Hu minnu
dak li qed jgħid!’
Imma min miss il-qalb ta’
din il-mara? Min qalilha:
Isma’, għax din hi l-verità?
Hu l-Ispirtu s-Santu, li
ġiegħel lil dil-mara tħoss
li Ġesù hu l-Mulej; li
ġagħalha tħoss li fi kliem
Pawlu kien hemm is-salvazzjoni;
li ġagħalha tħoss din ix-xhieda.
L-Ispirtu jagħti xhieda ta’
Ġesù. U kull darba li aħna
f’qalbna nħossu xi ħaġa li
tqarribna lejn Ġesù, ikun l-Ispirtu
li qed jaħdem fina.
Il-Vanġelu jkellimna dwar
xhieda doppja: dik
tal-Ispirtu li jtina x-xhieda
ta’ Ġesù u x-xhieda tagħna.
Aħna xhieda tal-Mulej
bil-qawwa tal-Ispirtu. Ġesù
jistieden lid-dixxipli biex
ma jeħdux skandlu, għax ix-xhieda
ġġorr magħha l-persekuzzjonijiet.
Ibda mill-persekuzzjonijiet
iż-żgħar tat-tqassis,
tal-kritika, sal-kbar li
bihom hi mimlija l-istorja
tal-Knisja, li twassal
lill-Insara saħansitra biex
jagħtu ħajjithom.
Ġesù jgħidilna, kompla
Franġisku, li dan hu l-prezz
tax-xhieda Kristjana.
“Ikeċċukom mis-sinagogi;
anzi tasal is-siegħa li kull
min jolqtolkom jaħseb li qed
jagħti qima lil Alla”.
Bil-qawwa tal-Ispirtu, in-Nisrani
jagħti xhieda li l-Mulej hu
ħaj, li l-Mulej qam, li l-Mulej
jinsab fostna, li l-Mulej
jiċċelebra magħna l-mewt
tiegħu, il-qawmien, kull
darba li nersqu lejn
l-altar.
In-Nisrani jagħti xhieda,
bl-għajnuna tal-Ispirtu,
fil-ħajja ta’ kuljum bil-mod
kif iġib ruħu. Din hi x-xhieda
kontinwa tan-Nisrani. Imma
ħafna drabi din ix-xhieda
tipprovoka attakki,
persekuzzjonijiet.
L-Ispirtu s-Santu li
għarrafna lil Ġesù, hu l-istess
wieħed li jimbuttana biex
insiru nafuh, mhux tant
bil-kliem daqskemm
bix-xhieda ta’ ħajjitna.
Tajjeb nitolbu lill-Ispirtu
s-Santu, temm il-Papa, biex
jinżel f’qalbna, ħalli nkunu
xhieda ta’ Ġesù; ngħidulu:
Mulej, jalla ma nitbiegħedx
minn Ġesù.
Għallimni dak li għallem
Ġesù. Fakkarni dak li qal u
għamel Ġesù u għinni wkoll
biex inkun xhud ta’ dawn l-affarijiet.
Biex il-mondanità, l-affarijiet
faċli, il-ħwejjeġ li jiġu
propju minn missier il-gideb,
mill-prinċep tad-dinja, id-dnub,
ma jbegħdunix mix-xhieda.