|
MESSAĠĠ TAL-QDUSIJA
TIEGĦU
FRANĠISKU
GĦAR-RANDAN 2018
“Joktor
il-ħażen, u għalhekk
l-imħabba tibred f’ħafna”
(Mt 24:12)
Għeżież ħuti,
Għal darb’oħra
riesaq lejna l-Għid
tal-Mulej! Biex
nitħejjew għalih,
il-Providenza ta’
Alla toffrilna ta’
kull sena ż-żmien
tar-Randan, “sinjal
sagramentali
tal-konverżjoni
tagħna”,[1]
li jħabbar u jwettaq
il-possibbiltà li
nerġgħu lura lejn
il-Mulej b’qalbna u
b’ħajjitna kollha.
Din is-sena wkoll,
b’dan il-messaġġ,
nixtieq ngħin
lill-Knisja kollha
tgħix bil-ferħ u
l-verità dan
iż-żmien ta’
grazzja; u dan
nagħmlu billi nħalli
tnebbaħni
espressjoni ta’ Ġesù
fil-Vanġelu ta’
Mattew: “Joktor
il-ħażen, u għalhekk
l-imħabba tibred
f’ħafna” (24:12).
Din il-frażi nsibuha
fid-diskors dwar
l-aħħar
taż-żminijiet u li
hu ambjentat
f’Ġerusalemm, fuq
l-Għolja taż-Żebbuġ,
proprju fejn tibda
l-passjoni
tal-Mulej. Huwa u
jwieġeb għal
mistoqsija
tad-dixxipli, Ġesù
jħabbar tiġrib kbir
u jfisser
is-sitwazzjoni li
taf issib ruħha fiha
l-komunità ta’ dawk
li jemmnu: quddiem
ġrajjiet ta’ swied
il-qalb, xi profeti
foloz għad iqarrqu
b’bosta, hekk li
jheddu li jitfu
fil-qlub l-imħabba
li hi l-qalba
tal-Vanġelu kollu.
Il-profeti foloz
Meta nisimgħu din
is-silta, nistaqsu
lilna nfusna:
x’xejriet jieħdu
dawn il-profeti
foloz?
Huma bħal “saħħara
tas-sriep”, jew
aħjar, japprofittaw
mill-emozzjonijiet
umani biex ijassru
l-persuni u
jwassluhom fejn
iridu huma. Kemm
ulied ta’ Alla
jinġibdu
mill-ħajriet
tal-pjaċir ta’ ftit
mumenti, li jaħsbuh
se jagħtihom l-hena!
Kemm bnedmin jgħixu
bħal imsaħħrin
mill-illużjoni
tal-flus, li
fir-realtà
jagħmluhom ilsiera
tal-profitt jew ta’
interessi msejkna!
Kemm persuni jgħixu
jaħsbu li biżżejjed
huma għalihom
infushom u jaqgħu
priża tas-solitudni!
Profeti foloz oħra
huma dawk
iċ-“ċarlatani” li
joffru
soluzzjonijiet
sempliċi u immedjati
għat-tbatijiet,
rimedji, imma, li
nafu li huma
kompletament
ineffikaċi: kemm
żgħażagħ jiġu
offruti r-rimedju
falz tad-droga, ta’
relazzjonijiet “uża
u armi”, ta’
gwadanni faċli imma
diżonesti! Kemm
oħrajn jinġibdu minn
ħajja kompletament
virtwali, fejn
ir-relazzjonijiet
jidhru iżjed
sempliċi u mgħaġġla
biex imbagħad
jirriżulta li jkunu
traġikament nieqsa
minn kull sens! Dawn
il-qarrieqa, li
joffru ħwejjeġ bla
valur, minflok,
ikunu jqaċċtu dak li
hu l-iżjed prezzjuż,
bħalma huma
d-dinjità,
il-libertà u l-ħila
li wieħed iħobb. Hu
l-qerq tal-vanità li
jwassalna biex
naqtgħu figura ta’
paguni… biex
imbagħad naqgħu
fir-redikolu; u
mir-redikolu ma
terġax tqum lura.
M’għandniex għax
nistagħġbu: minn
dejjem ix-xitan, li
hu “giddieb u
missier il-gideb”
(Ġw 8:44),
ippreżenta l-ħażen
bħala ġid u l-falz
bħala veru, biex
iħawwad il-qalb
tal-bniedem.
Għalhekk, kull
wieħed u waħda minna
hu msejjaħ
jiddixxerni fil-qalb
tiegħu u jgħarbel
jekk hux qed jiġi
mhedded mill-gideb
ta’ dawn il-profeti
foloz. Jeħtieġ
nitgħallmu ma niqfux
fuq il-livell
immedjat,
superfiċjali, imma
nagħrfu dak li
jista’ jħalli ġo
fina marka tajba u
li ttul iżjed, għax
ġej minn Alla u
jiswa tabilħaqq
għall-ġid tagħna.
Qalb kiesħa
Dante Alighieri,
fid-deskrizzjoni
tiegħu tal-infern,
jistħajjel lix-xitan
bilqiegħda fuq tron
tas-silġ;[2]
hu jgħix fil-kesħa
tal-imħabba fgata.
Mela ejjew nistaqsu
lilna nfusna: kif
tista’ tibred fina
l-imħabba? Liema
huma s-sinjali li
juruna li fina
l-imħabba qed
tirriskja li
tintefa?
Dak li jitfi
l-imħabba hu
qabelxejn ir-regħba
għall-flus, “l-għerq
ta’ kull ħażen” (1
Tim 6:10); warajha
tiġi ċ-ċaħda ta’
Alla u għalhekk li
ma nibqgħux infittxu
l-faraġ fih, waqt li
nippreferu
d-deżolazzjoni
tagħna flok il-Kelma
tiegħu u
s-Sagramenti.[3]
Dan kollu jinbidel
fi vjolenza li
teħodha kontra dawk
kollha li narawhom
bħala theddida
għaċ-“ċertezzi”
tagħna: it-tarbija
li għadha ma
twelditx, l-anzjan
marid, dak li
jgħaddi jżurna,
il-barrani, imma
anki l-proxxmu li ma
jikkorrispondix
max-xewqat tagħna.
Anki l-ħolqien hu
xhud sieket ta’ kif
din l-imħabba
qiegħda tibred:
l-art hi avvelenata
miż-żibel mormi
b’għażż jew
għall-gwadann;
l-ibħra, anki huma
mniġġsa, ikollhom
jgħattu l-fdalijiet
ta’ tant nawfraġji
tal-migrazzjonijiet
sfurzati;
is-smewwiet – li
fil-pjan ta’ Alla
jgħannu l-glorja
tiegħu – huma
mċarrta minn magni
li jwaddbu xita ta’
għodod tal-mewt.
L-imħabba tibred
ukoll
fil-komunitajiet
tagħna:
fl-Eżortazzjoni
appostolika
Evangelii gaudium
ippruvajt infisser
is-sinjali l-iżjed
ċari ta’ dan
in-nuqqas ta’
mħabba. Dawn huma:
l-għażż egoista,
il-pessimiżmu
sterili,
it-tentazzjoni li
niżolaw ruħna u li
nimpenjaw ruħna fi
gwerer kontinwi li
joqtlu l-aħwa,
il-mentalità mondana
li twassalna biex
nagħtu kas biss ta’
dak li jidher minn
barra, u hekk iġġib
fix-xejn il-ħeġġa
missjunarja.[4]
X’għandna nagħmlu?
Jekk ġewwa fina u
madwarna naraw dawn
is-sinjali li għadni
kif fissirt, araw
kif il-Knisja, omm u
għalliema tagħna,
flimkien
mal-mediċina,
kultant morra,
tal-verità,
toffrilna f’dan
iż-żmien tar-Randan
ir-rimedju ħelu
tat-talb, tal-karità
u tas-sawm.
Jekk niddedikaw
iktar ħin għat-talb,
inħallu l-qalb
tagħna tiskopri
l-gideb sigriet li
bih inqarrqu bina
nfusna,[5]
biex nistgħu
saflaħħar infittxu
l-faraġ ta’ Alla. Hu
Missierna u għalina
jixtieq il-ħajja.
It-tħaddim tal-karità
jeħlisna mir-regħba
u jgħinna niskopru
li l-persuna l-oħra
hi ħuna u oħtna: dak
li għandi qatt ma
huwa tiegħi waħdi.
Kemm nixtieq li
l-karità tinbidel
għal kulħadd f’veru
stil ta’ ħajja! Kemm
nixtieq li, bħala
Nsara, nimxu fuq
l-eżempju
tal-Appostli u,
fil-possibbiltà li
naqsmu mal-oħrajn
il-ġid tagħna, naraw
xhieda konkreta
tal-komunjoni li
ngħixu fil-Knisja! U
hawn nagħmel tiegħi
l-eżortazzjoni ta’
San Pawl, meta
stieden
lill-Korintin jiġbru
għall-komunità ta’
Ġerusalemm: “għax
dan ikun jaqblilkom”
(2 Kor 8:10). Dan
jgħodd b’mod
speċjali fir-Randan,
li tulu ħafna
organizzazzjonijiet
jagħmlu ġbir b’risq
il-Knejjes u l-popli
f’diffikultà. Imma
kemm nixiteq li anki
fir-relazzjonijiet
tagħna ta’ kuljum,
quddiem kull wieħed
u waħda minn ħutna
li jitlobna xi
għajnuna, naraw
f’dan sejħa
tal-Providenza
divina: kull karità
hi okkażjoni biex
nieħdu sehem
fil-Providenza ta’
Alla ma’ wliedu; u
jekk hu llum qed
jinqeda bija biex
nieħu ħsieb ta’
ħija, għada kif ma
jipprovdix ukoll
għall-ħtiġijiet
tiegħi, hu li ma
jħalli lil ħadd
jgħaddih
fil-ġenerożità?[6]
Is-sawm,
fl-aħħar nett,
idgħajjef
il-vjolenza tagħna,
iżarmana, u hu
okkażjoni importanti
biex nistgħu nikbru.
Minn naħa,
jippermettilna nduqu
dak li għaddejjin
minnu dawk li
jonqoshom imqar
l-iktar meħtieġ u
jafu x’inhu l-qrid
ta’ kuljum minħabba
l-ġuħ; min-naħa
l-oħra, jesprimi
l-qagħda tar-ruħ
tagħna, imġewħa
għat-tajjeb u
għatxana għall-ħajja
ta’ Alla. Is-sawm
iġibna f’sensina,
jagħmilna iżjed
attenti għal Alla u
għall-proxxmu,
jerġa’ jqajjimna
għar-rieda li nobdu
lil Alla li, waħdu,
jista’ jaqta’ l-ġuħ
tagħna.
Nixtieq li l-leħen
tiegħi jasal lil
hemm mill-konfini
tal-Knisja
Kattolika, biex
jilħaq lilkom
ilkoll, bnedmin ta’
rieda tajba, miftuħa
biex tisimgħu lil
Alla. Jekk bħalna
intom imnikkta
minħabba l-mod kif
f’qasir żmien qed
titniġġes id-dinja,
u tħassibkom
il-kesħa li qed
tipparalizza l-qlub
u l-azzjonijiet,
jekk qed taraw
jonqos is-sens ta’
umanità komuni,
ingħaqdu magħna biex
flimkien insejħu lil
Alla, biex flimkien
insumu, u flimkien
magħna tagħtu dak li
tistgħu biex ngħinu
lill-aħwa!
In-nar tal-Għid
Fuq kollox,
nistieden
lill-membri
tal-Knisja biex
b’żelu jaqbdu din
il-mixja tar-Randan,
imwieżna
mill-karità,
mis-sawm u mit-talb.
Jekk xi drabi
l-imħabba donnha qed
tintefa f’ħafna
qlub, żgur li mhux
jiġri hekk fil-qalb
ta’ Alla! Hu
jagħtina dejjem
okkażjonijiet ġodda
biex nistgħu nibdew
inħobbu mill-ġdid.
Din is-sena
okkażjoni tajba se
jkun ukoll
l-inizjattiva “24
siegħa għall-Mulej”,
li tistedinna
niċċelebraw
is-Sagrament
tar-Rikonċiljazzjoni
f’kuntest ta’
adorazzjoni
Ewkaristika. Fl-2018
din sa tinżamm
il-Ġimgħa 9 u s-Sibt
10 ta’ Marzu,
imnebbħa
mill-kelmiet
tas-Salm 130:4:
“Għandek hemm
il-maħfra”. F’kull
djoċesi, almenu
knisja waħda tibqa’
miftuħa għal erbgħa
u għoxrin siegħa
konsekuttiva, biex
toffri l-possibbiltà
tat-talb ta’
adorazzjoni u
tal-Qrar
sagramentali.
Fil-lejl tal-Għid
ngħixu mill-ġdid
ir-rit suġġestiv
tal-mixegħla
tal-blandun: mixgħul
min-“nar il-ġdid”,
id-dawl naqra naqra
jibda jkeċċi d-dlam
u jdawwal
lill-ġemgħa
liturġika. “Id-dawl
ta’ Kristu, li qam
glorjuż mill-imwiet,
mill-qalb u l-fehma
tagħna jkeċċi
d-dlamijiet”,[7]
biex ilkoll nistgħu
ngħixu mill-ġdid
l-esperjenza
tad-dixxipli ta’
Għemmaws: jekk
nisimgħu l-kelma ta’
Alla u nitrejqu
bil-Ħobż
tal-Ewkaristija,
il-qalb tagħna tkun
tista’ terġa’ lura
għall-ħeġġa
tal-fidi, it-tama u
l-imħabba.
Minn qalbi nberikkom
u nitlob għalikom.
Tinsewx titolbu
għalija.
Mill-Vatikan,
1
ta’ Novembru
2017
Solennità
tal-Qaddisin Kollha
Franġisku
miġjub mit-Taljan
għall-Malti minn
Francesco Pio Attard
[1]
Missal
Ruman,
L-I Ħadd
tar-Randan,
Talba
tal-Kolletta.
[2]
“Lo
’mperador
del doloroso
regno / da
mezzo ’l
petto uscia
fuor de la
ghiaccia”
(Inferno XXXIV,
28-29).
[3]
“Hija ħaġa
kurjuża,
imma spiss
nibżgħu
mill-faraġ,
milli nkunu
mfarrġa minn
Alla. Anzi,
aktar
inħossuna
nafu fejn
qegħdin
fid-dwejjaq
u fin-niket.
Tafu
għalfejn?
Għax
fid-dwejjaq
inħossuna
l-protagonisti!
Iżda
fil-faraġ
il-protagonista
huwa
l-Ispirtu
s-Santu!” (Angelus,
7 ta’
Diċembru
2014).
[5]
Ara
Benedittu
XVI, Ittra
enċiklika
Spe salvi,
33.
[6]
Ara Piju
XII, Ittra
enċiklika
Fidei donum,
III.
[7]
Missal Ruman,
Velja
tal-Għid,
Mixegħla
tad-dwal.
|