SINODU
TAl-ISQFIJIET
XIII
ASSEMBLEA ĠENERALI ORDINARJA
L-EVANĠELIZZAZZJONI
ĠDIDA
GĦAT-TIXRID TAL-FIDI NISRANIJA
MISTOQSIJIET LI JIPPROPONU
IL-LINEAMENTA
Aqra d-dokument kollu tal-Lineamenta...
>
“Dawn il-Lineamenta,
li tfasslu bl-għajnuna tal-Kunsill Ordinarju
tas-Segretarjat Ġenerali tas-Sinodu tal-Isqfijiet, huma
pass importanti fit-tħejjija għas-Assemblea sinodali.
Fl-aħħar ta’ kull kapitlu hemm mistoqsijiet li l-għan
tagħhom hu li jiġġenera diskussjoni f’kull livell
tal-Knisja”.
Mistoqsijiet wara l-Introduzzjoni
Min-natura tiegħu stess,
id-dixxerniment li ser isir huwa kundizzjonat mill-istorja
u mill-għan li wieħed jimmira lejh. Fi kliem ieħor,
il-proċess jibda b’elementi mill-ħajja reali ta’ kuljum
u jfassal tweġiba għal sitwazzjoni speċifika. Ġeneralment,
għalkemm il-Knejjes lokali tagħna kollha għandhom l-istess
kultura kattolika, imma, f’dawn l-aħħar snin għamlu
esperjenza ta’ ġrajjiet u stejġes fil-proċess tad-dixxerniment
li huma uniċi u li ġew determinati mill-ħajja u
miċ-ċirkustanzi storiċi li għexu.
1. Hemm
xi esperjenzi tal-passat f’dan ir-rigward li tħoss li
għandek taqsamhom ma’ Knejjes lokali oħra?
2.
Fil-proċess ta’ dixxerniment dwar ġrajjiet fl-istorja,
x’taħseb li għandna naqsmu bejnietna fil-Knisja
universali, biex filwaqt li nisimgħu lil xulxin dwar dak
li ġara, il-Knisja universali tkun tista’ tagħraf fejn
l-Ispirtu qed imexxiha fil-ħidma tagħha ta’
evanġelizzazzjoni?
3. Issa,
is-suġġett “evanġelizzazzjoni ġdida” hu magħruf sew
fil-Knejjes lokali tagħna. X’sar dwar l-evanġelizzazzjoni
ġdida, xi tfassal dwarha? X’forma ħadet?
4. Liema
attività pastorali speċifika ibbenefikat mill-“evanġelizzazzjoni
ġdida”? Ikkummenta dwar xi bidliet li saru
fil-programmi pastorali jew xi tiġdid ieħor li seħħ?
Min-naħa l-oħra, liema tfixkil jew tensjoni nħolqu f’dan
ir-rigward?
Mistoqsijiet wara Kap 1
- Iż-Żmien
għal Evanġeliżazzjoni Ġdida
Il-Komunitajiet insara
qed jagħmlu esperjenza ta’ bidliet sinifikanti
fil-Knisja u fis-soċjetà.
1. Liema huma l-karatteristiċi ewlenin
ta’ dawn il-bidliet fil-Knejjes lokali tagħna?
2. Kif qiegħda l-Knisja twettaq ir-rwol
missjunarju tagħha li tidħol fil-ħajja ta’ kuljum
tal-poplu, “fil-ħajja li jgħixu wliedha”?
3. Kif għenet l-evanġelizzazzjoni ġdida
biex l-ewwel evanġelizzazzjoni jew il-programmi
pastorali li ġa kienu hemm jissaħħu jew inkella
tingħatalhom ħajja ġdida?
Kif għenet biex tingħeleb l-għeja u t-tbatija
li l-ħajja ta’ kuljum ġġib magħha fil-Knejjes lokali
tagħna?
4. X’kien
id-dixxerniment li ħareġ fid-dawl tal-evanġelizzazzjoni
ġdida meta saret evalwazzjoni dwar is-sitwazzjoni
preżenti tal-Knejjes lokali differenti?
Id-dinja għaddejja minn
bidliet sinifikanti li qed iwasslu għal sitwazzjonijiet
u sfidi ġodda fil-ħajja nisranija. Ġew ittrattati sitt
oqsma effettwati minn din il-bidla: kultura (sekularizzazzjoni),
soċjetà (it-taħlit tal-popli), mass media, ekonomija,
xjenza u ħajja ċivika. Kien propju għalhekk li tkellimna
dwar dawn l-oqsma b’mod ġenerali.
5. Liema
kienu l-effetti speċifiċi li din il-bidla ġabet fid-diversi
Knejjes lokali?
6.
X’effett ħallew fuq xulxin dawn l-oqsma fil-ħajja
tal-Knejjes lokali? X’effett kien hemm fuq il-ħajja
tagħhom?
7. X’mistoqsijiet
u xi sfidi ġabu magħhom? X’reazzjonijiet kien hemm?
8. Liema
huma l-ostakli prinċipali u l-akbar sfidi biex Alla
jkollu post fid-diskussjoni tallum? X’ qed ikun
ir-riżultat?
Tingħata attenzjoni
speċjali lill-qasam reliġjuż.
9.
X’bidliet saru fl-esperjenzi reliġjużi tal-poplu?
10. Liema
aspetti ġodda qed joħorġu fil-bżonn spiritwali u
reliġjuż? Qed jinbtu tradizzjonijiet reliġjużi ġodda?
11. Kif
ġew effettwati l-komunitajiet insara fil-qasam reliġjuż?
Liema hi l-ħidma prinċipali? Liema huma l-opportunitajiet
ġodda?
L-evanġelizzazzjoni ġdida
titlob bidla fil-Knisja ħalli hi tkun tista’ tkompli l-missjoni
tagħha li xxandar il-Kelma f’dawn l-oqsma ġodda.
12.
Iddeskrivi l-modi differenti kif il-Knejjes lokali qed
jaħdmu għall-evanġelizzazzjoni ġdida?
13. Il-kuraġġ
hu karatteristika tal-evanġelizzazzjoni ġdida; kif ġie
muri dan il-kuraġġ? X’qanqal fil-ħajja ekkleżjali u
pastorali?
14. Liema
aspetti fil-ħajja u fl-attività tal-Knisja jeħtieġu
dan il-kuraġġ?
15. Kif
wieġbu l-Knejjes lokali għall-appell li għamel
Ġwanni Pawlu II għall-evanġelizzazzjoni ġdida: ġdida
fil-ħeġġa, fil-metodi u fl-espressjonijiet tagħha?
16. Kif
għenu l-assembleji sinodali kontinentali jew reġjonali
biex il-komunitajiet insara jfasslu pjan
għall-evanġelizzazzjoni ġdida?
Mistoqsijiet wara Kap 2 -
Nipproklamaw l-Evanġelju
ta’
Ġesù
Kristu.
L-għan li nittrażmettu
fidi li jista’ jieħu sehem fiha kulħadd hu biex oħrajn
ikunu jistgħu jagħmlu esperjenza ta’ Kristu. Dan
il-għan iqanqal missjoni.
1. Il-komunitajiet
insara tagħna qegħdin ikunu l-post li jipprovdi
esperjenza spiritwali fil-Knisja?
2. Meta
nfasslu l-programmi ta’ fidi qed nimmiraw biss lejn
li wieħed jaderixxi għall-verità nisranija b’mod
intellettwali, jew inkella qed nippruvaw noħolqu wkoll
esperjenza ta’ laqgħa personali ma’ Kristu u ta’
“għixien” tal-misteru tiegħu?
3. Liema
huma s-soluzzjonijiet u r-reazzjonijiet ta’ Knejjes
individwali li għamlu dawn l-esperjenzi spiritwali, li
huma mfittxa anki mill-ġenerazzjoni żagħżugħa?
Il-Kelma t’ Alla u l-Ewkaristija
huma l-mezzi ewlenin u l-għodda privileġġata li
jipprovdu esperjenza spiritwali tal-fidi nisranija
lill-poplu.
4. Kif
għenu ż-żewġ assembleji ġenerali ordinarji tas-Sinodu
tal-Isqfijiet li ġa saru biex il-komunitajiet insara
jisimgħu b’mod aħjar il-Kelma t’Alla fil-Knejjes
tagħna? Kif għenu biex iċ-ċelebrazzjonijiet Ewkaristiċi
jkunu aħjar?
5. Liema
elementi ġew l-aktar aċċettati? Liema riflessjonijet
u suġġerimenti għadhom ma ġewx aċċettati?
6. Għid
kif il-gruppi li jisimgħu u jiddiskutu l-Kelma t’Alla
qed isiru għodda komuni fil-ħajja nisranija
tal-Komunitajiet tagħna? X’qed jagħmlu l-Komunitajiet
tagħna biex juru li l-Ewkaristija hi ċ-ċentru ta’
ħajjithom? U kif qed juru li l-programmi u l-attivitajiet
tagħhom huma bbażati fuq dan?
Wara snin ta’ ħidma
kbira, qed jidhru sinjali ta’ għeja fil-katekeżi, l-aktar
f’dawk il-persuni msejħa biex jippjanaw u jsostnu l-attività
tal-Knisja f’dan il-qasam.
7. Liema
hi l-esperjenza prattika fil-Knejjes tagħna?
8. Xi
sforzi qed isiru biex tissaħħaħ il-katekezi fil-komunitajiet
insara tagħna? Xi sforzi qed isiru biex nagħrfu b’mod
konkret u effettiv ir-rwol ta’ dawk l-oħrajn (ġenituri,
parrinijiet, il-komunità nisranija) li huma
responsabbli li jittrażmettu l-fidi?
9. X’
inizjattivi ippjanajna biex nissapportjaw lill-ġenituri
u ninkuraġġuhom fil-ħidma iebsa tagħhom ( li
jittrażmettu, u allura li jittrażmettu anki l-fidi) meta
l-kultura qiegħda dejjem tnaqqas minn dan ir-rwol
tagħhom?
Bħala tweġiba
għall-Konċilju Vatikan II, f’dawn l-aħħar snin, ħafna
konferenzi episkopali ħadmu biex jorganizzaw mill-ġdid
il-programmazzjoni tal-katekeżi u għamlu reviżjoni tat-testi
kateketiċi.
10. Xinhi s-sitwazzjoni dwar dan?
11. X’kienu l-benefiċċi fil-proċess
tat-trażmissjoni tal-fidi? X’ħidma twettqet u x’kien
it-tfixkil li ltqajtu miegħu?
12. Il-“Katekiżmu tal-Knisja Kattolika”
kien użat meta sar dan il-planning ġdid?
13. Kif jaħdmu l-Komunitajiet insara
(il-parroċċi) u l-gruppi u l-movimenti biex
jiggarantixxu li, kemm jista’ jkun, il-katekeżi tkun
ekkleżjali u biex jikkordinaw u jaqsmu l-ħidma tagħhom
ma’ oħrajn fil-Knisja?
14. Meta qed jinbtu tant bidliet
kulturali sinifikanti, liema ‟mumenti ta’ tagħlim” huma
nieqsa jew qed jitħallew barra fl-attività kateketika
tal-Knisja?
15.Il-Komunitajiet insara tagħna qed
jagħmlu użu mill-katekumenat bħala bażi biex jippjanaw
il-programmi ta’ katekeżi u ta’ istruzzjoni fil-fidi?
Kif?
Żmenijietna qed jitolbu
lill-Knisja biex tiġġedded fil-mod kif tevanġelizza u
biex tkun lesta tagħti kont tal-fidi u tat-tama.
16. X’ għamlu l-Knejjes lokali biex ikunu
jistgħu jikkomunikaw dawn it-talbiet ġodda
lill-Komunitajiet insara? Xinhu
r-riżultat? X’kienet il-ħidma meħtieġa u x’kien it-tfixkil
?
17.
Qegħdin inħossu l-bżonn li din il-proklamazzjoni
missjunarja ġdida ssir parti mill-attività pastorali
tal-komunitajiet? Jew inkella naqset il-konvinzjoni li
din il-missjoni għandha ssir ukoll fil-komunitajiet
insara tal-lokal u fis-sitwazzjonijiet tal-ħajja ta’
kuljum?
18.
Barra mill-komunitajiet, hemm individwi li qed iwasslu
d-don tal-ħajja lis-soċjetà billi jxandru l-Evanġelju?
X’metodi qed jużaw u x’attivitajiet qed jagħmlu? Xi
frott qed iħalli dan?
19. L-imgħammdin
qed isiru dejjem aktar konxji li huma msejħin in
prima persona biex ixandru l-Evanġelju?
Hemm xi esperjenzi dwar dan?
Il-proklamazzjoni u t-trażmissjoni
tal-fidi jagħtu ħajja ġdida lill-Komunità Nisranija.
20. Liema
kien l-frott l-aktar importanti li t-tixrid tal-fidi
(it-trażmissjoni tal-fidi) ġab fil-Knejjes tagħna?
21. Il-Komunitajiet
insara huma lesti li jagħrfu dan il-frott, isostnuh u
jmantnuh? Liema frott hu nieqes?
22. Liema
huma l-ostakli, il-provi u l-iskandli li jfixklu din
il-proklamazzjoni? Il-Komunitajiet, tgħallmu jgħixu
dawn il-mumenti billi jaraw fihom opportunitajiet għal
tiġdid spiritwali u missjunarju?
Mistoqsijiet wara Kap 3 -
Inizjazzjoni fl-Esperjenza Nisranija.
Permezz
tal-evanġelizzazzjoni l-ġdida tista’ ssir evalwazzjoni
ta’ kull qasam u attività fil-Knisja ħalli l-Evanġelju
jkun jista’ jixxandar lid-dinja.
1.Il-komunitajiet insara jafu li tista’
ssir “il-proklamazzjoni tal-bidu”?
Din qed
issir fil-Komunitajiet insara?
2. Meta
l-Komunitajiet insara jippjanaw attività pastorali
jkollhom l-għan speċifiku li jwasslu l-Evanġelju u l-konverżjoni
għall-Kristjaneżmu?
3. Kif
qed jagħmlu l-komunitajiet insara individwali biex
iwieġbu għall-ħtieġa ta’ forom ġodda dwar il-kwestjoni
t’Alla fis-soċjeta u fil-komunitajiet stess? Hemm xi
esperjenzi li ta’ min jaqsamhom ma’ Knejjes partikulari
oħra?
4. Kif
ġiet milqugħa l-idea tal-“bitħa tal-Ġentili” u kif
żviluppat ruħha fil-Knejjes lokali differenti?
5. Xi
prijorità ngħatat mill-Komunitajiet insara individwali
fl-impenn li wieħed jipprova modi ġodda ta’
evanġelizzazzjoni li jeħtieġu kuraġġ? Liema kienu dawk
l-inizjattivi li rnexxew biex il-Komunitajiet insara
jinfetħu għall-ħidma missjunarja?
6. Liema
kienu l-esperjenzi, l-istituzzjonijiet u l-assoċjazzjonijiet
jew gruppi ġodda li ġew iffurmati jew żviluppati biex
ixandru l-Evanġelju b’mod mimli ferħ u li jwassal l-messaġġ?
7.
X’ħareġ meta kien hemm kollaborazzjoni bejn dawn
il-gruppi u l-komunitajiet parrokkjali?
Il-Knisja ddedikat ħafna
enerġija biex tfassal il-programmi ta’ inizjazzjoni u ta’
istruzzjoni fil-fidi.
8. Meta
reġgħet saret evalwazzjoni tal-programm ta’ inizjazzjoni
fil-fidi, ir-Rit ta’ Inizjazzjoni Nisranija għall-Adulti
kien ta’ mudell?
9. Nistgħu
ngħidu li kien użat fl-Inizjazzjoni Nisranija? Kif għen
biex saret re-evalwazzjoni tal-programm pastorali
għall-Magħmudija u biex sħaqna fuq ir-rabta li hemm
bejn is-sagrament tal-Magħmudija, tal-Konfermazzjoni u
tal-Ewkaristija?
10. Il-Knejjes
Kattoliċi tal-Lvant jagħtu lit-tfal it-tliet Sagramenti
tal-Inizjazzjoni Nisranija. Għid għaliex din hi
esperjenza għanja u hu differenti fl-istess ħin? Għid
kif din id-drawwa effettwat il-ħsieb u l-bidliet li qed
isiru fl-inizjazzjoni Nisranija fil-Knejjes Kattoliċi?
11. Għid
kif “il-Katekumenat batteżimali” kien ta’ ispirazzjoni
għall-evalwazzjoni mill-ġdid tal-programm ta’ thejjija
għas-sagramenti fil-waqt li bidilhom fi vjaġġ
spiritwali ta’ inizjazzjoni nisranija u involva mhux
biss lil min jirċeviehom imma lil diversi membri
tal-Komunità (l-aktar lill-adulti)? X’qed jagħmlu l-Komunitajiet
insara biex jissapportjaw lill-ġenituri fil-ħidma iebsa
li jittrażmettu l-fidi, li aktar ma jgħaddi ż-żmien
aktar qed issir diffiċli?
12 Xi
żviluppi saru minn meta s-Sagrament tal-Konfermazzjoni
ġie meqjus bħala parti minn dan il-vjaġġ spiritwali?
X’inhuma r-raġunijiet?
13. L-elementi tal-mistagoġija huma
inkorporati f’dan il-proċess?
14.Il-Komunitajiet insara rnexxilhom
jaddottaw il-proċess ta’ istruzzjoni fil-fidi
għall-adulti biex b’hekk jevitaw il-periklu li dan
ikun limitat għat-tfal biss?
15. Kif
iħarsu l-Knejjes lokali lejn ir-rwol tal-proklamazzjoni
u lejn il-ħtieġa li tingħata importanza akbar lill-bidu
tal-fidu u lill-programm pastorali għall-Magħmudija?
16. Kif
irnexxilhom il-komunitajiet parrokkjali jevitaw it-tentazzjoni
li ħallu l-ħidma ta’ istruzzjoni ( ta’ tagħlim) f’idejn
aġenti oħra tal-edukazzjoni reliġjuża (per eżempju, li
jħallu din ir-responsabbiltà f’idejn l-iskejjel, u
allura b’hekk isir taħwid bejn istruzzjoni fil-fidi u
forom kulturali oħra ta’ edukazzjoni li huma orjentati
lejn ir-reliġjon)?
Fil-Knejjes tagħna
tinħass ħafna r-realtà tal-isfida tal-edukazzjoni.
17. Kemm
indunajna b’din l-isfida u kemm indirizzajnieha? X’mezzi
għandna f’dan ir-rigward?
18. Qed
tgħin il-preżenza ta’ istituzzjonijiet Kattoliċi fid-dinja
akkademika biex ikun hemm tweġiba għal din l-isfida?
Liema bidliet f’dawn l-istituzzjonijiet huma ta’
interess? X’riżorsi għandna biex inwieġbu għal din l-isfida?
19. Liema
rabta teżisti bejn dawn l-istituzzjonijiet u
istituzzjonijiet ekkleżjali oħra? Bejn dawn l-istituzzjonijiet
u l-ħajja tal-parroċċa?
20.
B’liema mod jistgħu dawn l-istituzzjonijiet
jipparteċipaw fil-kultura u fis-soċjetà fil-waqt li
jikkontribwixxu l-esperjenza ta’ fidi nisranija fid-diskussjoni
pubblika u f’sitwazzjonijiet fejn ħafna drabi l-mentalità
hi determinata mill-kultura tallum?
21.
X’relazzjoni hemm bejn l-istituzzjonijiet Kattoliċi u
istituzzjonijiet oħra tal-edukazzjoni. X’ r-relazzjoni
hemm bejniethom u s-soċjetà in ġenerali?
22. Kif jistgħu l-istituzzjonijiet
kulturali ( l-Universitajiet Kattoliċi, iċ-ċentri
kulturali, iċ-ċentri ta’ tiftix) li huma wirt storiku,
jsemmgħu leħinhom fid-diskussjonijiet li jsiru llum dwar
il-valuri bażiċi tal- persuna umana (id-difiża
tal-ħajja, il-familja, il-paċi, il-ġustizzja, is-solidarjeta,
il-ħolqien)?
23. Kif
jistgħu jgħinu biex in-nies jiftħu aktar moħħhom u
jfittxu l-verità ħalli jagħrfu l-pjan ta’ Alla li
jagħti tifsira lill-istorja? U kif jgħinu jgħinu
lill-komunitajiet Insara biex jiddixxernu u jkunu aktar
lesti li jisimgħu dak li qed titlob u tistenna l-kultura
tallum?
24. Liema
huma dawk l-istituzzjonijiet tal-Knisja fejn tista’
tgħid li qed issir l-esperjenza “tal-bitħa tal-Ġentili”?
Liema huma l-postijiet fejn l-Insara jkunu jistgħu juru
li huma lesti għal djalogu li jwieġeb għal dak li qed
tistenna l-umanità u għall-għatx li għandha għal Alla?
Liema huma l-postijiet fejn l-Insara jistgħu jaqsmu
b’kuraġġ l-esperjenza li għamlu biex sabu lil Alla u
jgħidu kif iltaqgħu miegħu b’mod personali fl-Evanġelju
ta’ Ġesù Kristu?
Il-proġett ta’
evanġelizzazzjoni ġdida jitlob proklamazzjoni u xhieda,
u allura dan jurina l-ħtieġa ta’ formazzjoni.
25.
X’urġenza qed tinħass fil-komunitajiet insara biex isibu
nies, jiffurmawhom u jissapportjawhom biex
jevanġelizzaw u jedukaw permezz tax-xhieda li jagħtu
b’ħajjithom?
26. Liema
servizzi – ministeri istituzzjonalizzati jew oħrajn –
twaqqfu (jew ġew iħeġġa jkomplu l-ħidma tagħhom)
fil-Knisja lokali biex iwettqu ħidma ta’
evanġelizzazzjoni?
27. Kif
qed juru l-parroċċi li huma miftuħa għall-ħajja vitali
tal-movimenti u l-gruppi kariżmatiċi ?
28.
F’dawn l-aħħar snin, il-konferenzi episkopali taw post
ċentrali lill-ħidma missjunarja u l-evanġelizzazzjoni u
għamluha prijorità fil-pjani pastorali tagħhom. Xinhu
r-riżultat? Kif għamlu biex il-Komunitajiet insara
jkunu aktar konxji tal-aspett “spiritwali” ta’ din l-isfida
missjunarja?
29. Kif
għenet l-enfasi fuq l-evanġelizzazzjoni ġdida fl-evalwazzjoni
u l-organizzazzjoni mill-ġdid tal-programmi ta’
formazzjoni għas-saċerdozju? Kif għamlu l-istituzzjonijiet
responsabbli għal din l-formazzjoni, (is-seminarji
djoċesani, reġjonali jew dawk ta’ ordnijiet reliġjużi)
biex jevalwaw mill-ġdid u jaddattaw ir-regoli tal-ħajja
tagħhom skont din il-prijorità?
30. Il-ministeru
tad-djakonat permanenti kien inkuż fil-mandat
tal-Knisja biex tevanġelizza? |