|
Mis-Sinodu tal-Isqfijiet dwar
iż-Żgħażagħ. Ottubru 2018.
Huma u jisimgħu dwar “Kristu
żagħżugħ għal dejjem ta’ dejjem”
il-padri sinodali kitbu ittra
liż-żgħażagħ tad-dinja kollha:
“Tħallux id-dgħufijiet tagħna
jaqtgħulkom qalbkom”. “Il-Knisja
u d-dinja għandhom bżonn urġenti
tal-entużjażmu tagħkom”.
|
XV Assembleja Ġenerali Ordinarja
tas-Sinodu tal-Isqfijiet
Ittra tal-padri sinodali
liż-żgħażagħ
Lilkom żgħażagħ
tad-dinja, aħna l-padri sinodali
qed nindirizzawkom b’kelma ta’
tama, fiduċja u konsolazzjoni.
F’dawn il-ġranet inġbarna
flimkien biex nisimgħu il-leħen
ta’ Ġesù, “Kristu żagħżugħ għal
dejjem ta’ dejjem”, u nagħrfu
FIH il-bosta ilħna tagħkom,
l-għajjat tagħkom ta’ eżultanza,
il-biki tagħkom, il-mumenti ta’
skiet.
Aħna familjari mat-tiftix
interjuri tagħkom, il-ferħ u
t-tamiet, il-weġgħat u d-dwejjaq
li ma jħallukomx bi kwietkom.
Issa nixtiequ nsemmgħulkom kelma
minn għandna: aħna nixtiequ
naqsmu magħkom il-ferħ tagħkom
sabiex dak kollu li qed
tistennew isir ideal. Aħna ċerti
li bl-entużjażmu li għandkom
għall-ħajja intom lesti li
timpenjaw rwieħkom ħalli l-ħolm
tagħkom jitwettaq fil-ħajja
tagħkom u fl-istorja
tal-bniedem.
In-nuqqasijiet
tagħna m'għandhomx jaqtgħulkom
qalbkom; il-fraġilità
u d-dnubiet tagħna m’għandhomx
ikunu ta’ ostaklu għall-fiduċja
tagħkom. Il-Knisja hija ommkom;
ma tħallikomx weħidkom, lesta
biex timxi magħkom f’toroq
ġodda, f’ mogħdijiet fil-għoli
fejn ir-riħ tal-Ispirtu qed
jonfoħ bil-qawwa, u jiknes minn
quddiemu ċ-ċpar
tal-indifferenza,
superfiċjalità u
qtigħ il-qalb.
Meta d-dinja, li
Alla tant ħabb li wasal biex
taha lil Ibnu Ġesù, hija ffukata
fuq affarijiet materjali, fuq
is-suċċess immedjat, fuq
il-pjaċir li jfarrak l-aktar
dgħajfa, intom tgħinuha biex
terġa’ tqum u mill-ġdid iddawwar
ħarsitha lejn l-imħabba,
is-sbuħija, il-verità u
l-ġustizzja.
Għal xahar, aħna
mxejna flimkien ma’ xi wħud
fostkom u ma’ ħafna oħrajn
marbutin magħna permezz tat-talb
u l-affett. Aħna nixtiequ
nkomplu l-vjaġġ issa f'kull
parti tad-dinja fejn il-Mulej
Ġesù jibgħat lilna bħala
dixxipli missjunarji.
Il-Knisja u
d-dinja għandhom bżonn urġenti
tal-entużjażmu tagħkom. Imxu
fit-triq bħala l-imseħbin ta’
min hu l-iżjed fraġli, tal-fqar
u ta’ dawk li l-ħajja
weġġgħethom.
Intom
il-preżent, kunu futur iktar
imdawwal.
Miġjub mit-Taljan għall-Maltin
minn Louis Spiteri
https://www.vaticannews.va/it/vaticano/news/2018-10/sinodo-giovani-2018-lettera-padri-sinodali.html
|
