Is-Salmi li hawn f’kull taqsima jistgħu jitħallew barra, skont it-tul ta’ ħin li jkun disponibbli għaċ-ċelebrazzjoni. Anke l-Innijiet tal-Milied, jistgħu jsiru biss skont kemm il-ħin ikun jippermetti.

DAĦLA

Kull sena f’dan il-lejl, il-Knisja tfakkarna fl-akbar ġrajja li qatt seħħet fl-umanità. Wara li disa’ xhur qabel, tfajla fqajra mir-raħal ta’ Nazaret kienet wieġbet “iva” għall-istedina ta’ Alla, wara sensiela ta’ ġrajjiet oħra li seħħew wara dakinhar u li tant drabi qrajna dwarhom fl-evanġelju, b’mod speċjali f’dak skont San Luqa, illum qegħdin nerġgħu nfakkru dan it-twelid waħdieni, minn Omm Verġni, twelid li kien imwiegħed minn Alla nnifsu sa mill-bidunett tal-ġrajja umana.

Illum ukoll, fil-belt ta’ Ruma, sewwasew fuq l-artal li taħtu hemm midfun Xmun Pietru, il-Prinċep tal-Appostli, l-istess suċċessur tiegħu, il-Papa Franġisku qed jagħti bidu għal grajja ta’importanza kbira, spiritwali, ekkleżjali u soċjali. Huwa l-bidu ta’ sena ta’ grazzja speċjali, ikkaratterizzata mill-maħfra tad-dnubiet u, b’mod partikulari, mill-indulġenza, li hija espressjoni sħiħa tal-ħniena ta’ Alla.

Bħalissa, il-Papa Franġisku, qed jiftaħ il-Bieb Imqaddes, u hekk jagħti bidu għall-Ġublew tas-Sena 2025, bit-tema “Pellegrini tat-Tama”. Minn meta l-Papa Bonifaċju VIII, fl-1300, waqqaf l-ewwel Sena Mqaddsa, il-Ġublew baqa’ jitfakkar l-ewwel kull mitt sena, imbagħad, fuq il-mudell bibliku – kull ħamsin, sakemm illum fi żmienna, il-Knisja tiċċelebrah kull ħamsa u għoxrin sena. Minkejja dan, il-papa jista’ wkoll isejjaħ Ġublew Straordinarju, għax ikun barra minn żmienu. Dan eżatt kif kien għamel il-Papa Franġisku fl-2015-2016, bil-Ġublew Straordinarju tal-Ħniena.

Minħabba li huwa ċelebrazzjoni speċjali tal-miġja ta’ Kristu fostna, kull ġublew ikun imniedi uffiċjalment fil-Vatikan propju bħal-lum, il-lejl tal-Milied Imqaddes. Imbagħad, f’kull djoċesi oħra madwar id-dinja, iċ-ċelebrazzjoni tal-bidu ta’ din is-Sena Mqaddsa, ser issir mill-Isqof tal-post innifsu nhar il-Ħadd 29 ta’ Diċembru.

Iċ-ċelebrazzjonijiet kollha li ser isiru matul din is-sena ta’ ġublew, bħal kull ċelebrazzjoni liturġika fi ħdan il-Knisja, huma mimlija simboliżmu. Huma sinjali, kif wara kollox huma s-Sagramenti nfushom.  Imma minkejja d-diversità tagħhom, huma kollha jindirizzawna lejl Kristu. Huwa fih li tgħammar il-milja sħiħa tad-divinità. Huwa meta nkunu magħqudin miegħu li jista’ jkollna sehem mill-milja tiegħu. Hu li hu r-Ras. (ara Kolossin 2:9)

Ħa ningħaqdu issa, aħna wkoll, mal-Missier tagħna l-Papa Franġisku u mal-Knisja universali kollha, billi nħejju ruħna spitwalment, biex nhar il-Ħadd li ġej, flimkien mal-Arċisqof tagħna, nidħlu f’din is-sena ta’ grazzja speċjali.

(Innu tal-Milied)
 

† Fl-isem tal-Missier, u tal-Iben, u tal-Ispirtu s-Santu. Ammen.

Tkellem, Mulej, għax il-qaddej tiegħek qiegħed jisma’.  (1Samwel 3:9)

L-EWWEL TAQSIMA

Kristu huwa l-Verb jew il-Kelma tal-Missier

 Qari mill-Evanġelju skont San Ġwann

(Ġwanni 1:1-4, 14)

Fil-bidu kien il-Verb, u l-Verb kien ma' Alla, u l-Verb kien Alla. Hu kien fil-bidu ma' Alla. Kollox bih sar, u xejn ma sar mingħajru; kull ma sar kellu l-ħajja fih … U l-Verb sar bniedem u għammar fostna, u aħna rajna l-glorja tiegħu, il-glorja li għandu mill-Missier bħala Ibnu l-waħdieni, mimli bil-grazzja u l-verità.

Ftit mumenti ta’ skiet

Meditazzjoni

Kristu huwa l-Kelma tal-Missier. Hu l-Kelma mlissna minn Alla fil-bidu tal-ħolqien. Jum wara jum, kien lissen fl-eżisentza lill-ħolqien kollu, inkluż lill-bniedem.  Bil-Kelma tiegħu sar kollox mix-xejn; il-ħxejjex, l-annimali, il-bniedem, l-univers kollu.

Kull ma sar kellu l-ħajja fih, anke jiena u inti. Kull waħda u kull wieħed minna sar permezz tiegħu. Kristu huwa l-bidu u t-tmiem ta’ kull eżistenza.  Huwa l-Alfa u l-Omega. Huwa ċ-ċentru ta’ ħajjitna, kemm bħala individwi, kif ukoll bħala Knisja, bħala soċjetà, u bħala umanità.

Nista’ jiena llum nistqarr tassew li naf l-eżistenza kollha tiegħi lil Ġesù Kristu? Nista’ onestament ngħid li ħajti hija ċċentarta fuqu? Li huwa l-bidu u t-tmiem tiegħi?

Fit-twelid ta’ Ġesù, Alla ried li l-Anġli tiegħu jkunu messaġgiera tal-paċi lir-rgħajja. Illum Huwa qed jistieden lilna biex inwasslu l-istess messaġġ lill-bnedmin kollha u naħdmu favur dik il-paċi vera li l-umanità tant għandha bżonn.

Ftit mumenti ta’ skiet

(Salmi 33:1-6)

Għannu, ġusti, bil-ferħ lill-Mulej;
jixirqilhom ifaħħruh in-nies sewwa.

 

Faħħru l-Mulej bid-daqq taċ-ċetra;
għannulu fuq l-arpa b'għaxar kordi.

 

Għannulu għanja ġdida;
doqqulu bis-sengħa u b'leħen qawwi.

 

Għax sewwa hi l-kelma tal-Mulej,
kollox bil-fedeltà huwa għamel.

 

Hu jħobb id-dritt u s-sewwa;
bit-tjieba tal-Mulej mimlija l-art.

 

Bil-kelma tal-Mulej saru s-smewwiet,
u b'nifs fommu t-tiżjin kollu tagħhom.

Talb mill-Komunità

Il-Kelma ta’ Alla saret bniedem bħalna, tfajjel dgħajjef, imfittex għall-mewt sa minn twelidu. Huwa ġie fostna biex ikun għalina l-Kelma tat-Tama tal-Missier. Nitolbuh ħerqana u ngħidulu flimkien: Kristu Ġesù, kun int għalina t-Tama tagħna.   

R/. Kristu Ġesù, kun int għalina t-Tama tagħna.

Missier Qaddis, bil-Kelma tiegħek inti ħlaqt lil bniedem, raġel u mara, u hekk għamilthom xbieha tiegħek u seħibthom miegħek fl-opra tal-ħolqien. Għinna nitolbuk, sabiex permezz tal-Kelma tiegħek, aħna nkomplu niskopru xbihatek fina nfusna, u nħarsuha. Nitolbu.

R/. Kristu Ġesù, kun int għalina t-Tama tagħna.

Missier Qaddis, permezz tal-Anġli, inti wassalt il-kelma tiegħek lir-rgħajja ta’ Betlehem.  Għinna nitolbuk sabiex aħna wkoll insiru bħal anġli fost ħutna u biex bil-kliem ta’ kuraġġ u faraġ li nlissnu, inkunu strumenti tal-paċi tiegħek fid-dinja. Nitolbu.

(Innu tal-Milied)

IT-TIENI TAQSIMA

Kristu huwa d-Dawl

Qari mill-Ktieb tal-Ġenesi.  

(Ġenesi 1:1-5)

Fil-bidu Alla ħalaq is-sema u l-art: u kienet l-art taħwid u baħħ; u d-dlam kien fuq wiċċ l-abbissi u fuq wiċċ l-ibħra kien jittajjar l-ispirtu ta' Alla. U qal Alla: “Ħa jkun id-dawl!” U d-dawl sar. U ra Alla d-dawl li kien tajjeb. U Alla fired id-dawl mid-dlam. U d-dawl Alla semmieh jum, u d-dlam sejjaħlu lejl. U dalam u sebaħ - L-ewwel jum.

Ftit mumenti ta’ skiet

Meditazzjoni

Forsi nistħajjel li d-dawl li ħalaq Alla fl-ewwel jum tal-ħolqien kien dak tax-xemx. Imma jekk inkompli insegwi r-rakkont tal-Ġenesi, mill-ewwel nintebaħ li x-xemx, Alla ħalaqha fir-raba’ jum (ara Ġenesi 1:14-19) Mela dwar liema dawl, maħluq minn Alla fil-bidu nett tal-ħolqien, tkellem l-awtur sagru?

It-tweġiba jagħtihilna Kristu nnisfu, “Jiena d-dawl tad-dinja. Min jiġi warajja ma jimxix fid-dlam, iżda jkollu d-dawl tal-ħajja."  (Ġwanni 8:12)  

Aktar qabel, fejn l-awtur bibliku kiteb dwar il-prekursur ta’ Ġesù, naqraw li Ġwanni ma kienx id-dawl, imma ġie biex jixhed għad-dawl, dak id-dawl veru, li jdawwal kull bniedem, huwa u ġej fid-dinja.”  (Ġwanni 1:8-9)

Imbagħad ikompli l-evanġelista, “Kien fid-dinja, u d-dinja saret bih, imma d-dinja ma għarfitux. Ġie f’daru, u niesu ma laqgħuhx. Imma lil dawk li laqgħuh tahom is-setgħa li jsiru wlied Alla.”  (Ġwanni 1:10-12)

Il-Kelma jew il-Verb li kollox sar bih, u d-Dawl li jsemmi l-istess awtur fl-istess kapitlu, huma referenza għall-istess persuna.  Huma l-istess Kristu nnifsu, il-Kelma ta’ Alla u d-Dawl tad-dinja.

Nista’ onestament ngħid li Kristu huwa l-uniku Dawl li lili jdawwalli ħajti?

Fit-twelid ta’ Ġesù, il-Maġi għarfu fid-dawl tal-kewkba, sinjal li jurihom it-triq għal għandu. Lesti llum niftħu għajnejna u qalbna għal tant sinjali li s-Sema kontinwament tagħtina biex juruna t-triq għal Kristu, id-Dawl veru tagħna.

Ftit mumenti ta’ skiet

(Salmi 27:1-4)

Il-Mulej hu d-dawl u s-salvazzjoni tiegħi;
minn min għandi nibża'?
Il-Mulej hu l-kenn tiegħi;
quddiem min għandi nitwerwer?

 

Meta jqumu għalija l-ħżiena,
biex jaħtfuni u jikluni,
dawk li għandhom għalija, l-għedewwa tiegħi,
huma jitfixklu u jaqgħu.

 

Mqar jekk eżerċtu jqum għalija,
xejn ma tibża' qalbi;
mqar jekk gwerra tqum kontrija,
jiena nibqa' qalbi qawwija.

Kristu li huwa d-Dawl tal-Missier li ġie fostna biex idawwlilna ħajjitna. Imma spiss, aħna ħabbejna aktar id-dlam.  Ħa nitolbuh flimkien u ngħudulu: Kristu Ġesù, kun int għalina t-Tama tagħna.

R/. Kristu Ġesù, kun int għalina t-Tama tagħna.

Sabiex bid-dawl tal-Kristu, il-Knisja tkun xhud għall mexxejja kollha tal-ġnus, ħalli huma jagħrfu jużaw ir-riżorsi ta' pajjiżhom għall-paċi u mhux għall-qerda li ġġib magħha l-gwerra. Nitolbu.

R/. Kristu Ġesù, kun int għalina t-Tama tagħna.

Sabiex kif il-kewkba kienet għall-Maġi dawl li uriethom it-triq għal għand il-Messija, hekk ukoll aħna naslu li fil-ħolqien ta’ madwarna nilmħu dawl li jurina wiċċ il-Ħallieq. Nitolbu.

R/. Kristu Ġesù, kun int għalina t-Tama tagħna.

Missier Tajjeb, għinna biex qatt ma ndawru ħarsitna minn fuq Ibnek, li tajtulna biex ikun id-dawl li jurina wiċċek. Nitolbu dan permezz tal-Ispirtu s-Santu li miegħek jgħix u jsaltan għal dejjem ta' dejjem. Ammen.

(Innu tal-Milied)
 

IT-TIELET TAQSIMA

Kristu huwa l-Bieb

Qari mill-Evanġelju skont San Ġwann.  

(Ġwanni 10:9-10)

Dakinhar qalilhom Ġesù, “Jiena hu l-bieb; jekk xi ħadd jidħol ġewwa permezz tiegħi jsalva, u jidħol u joħroġ u jsib fejn jirgħa. Il-ħalliel ma jidħolx jekk mhux biex jisraq u joqtol u jeqred. Jiena ġejt biex ikollkom il-ħajja, u ħajja bil-kotra.”

Ftit mumenti ta’ skiet

Meditazzjoni

Wieħed mis-simboli l-aktar prominenti matul kull Ġublew huwa l-Bieb Imqaddes, jew kif nafuh ukoll, il-Porta Santa. Huwa bieb li normalment jinżamm magħluq, u jinfetaħ biss matul is-snin ta’ ġublew.

Il-Bieb Imqaddes huwa xbieha ta’ Kristu. Kien Ġesù stess li qal, “Jiena l-Bieb”. Imma bħal kull sinjal ieħor, anke l-Bieb tal-Ġublew, huwa limitat fis-simboliżmu tiegħu.  Il-Porta Santa, tinfetaħ biss matul il-ġublew, imma l-Bieb tagħna li huwa Kristu, huwa dejjem miftuħ beraħ għal kull min irid jidħol jew joħroġ. 

Il-Bieb tal-Ġublew, qiegħed biss Ruma u f’xi bażiliċi jew santwarji oħra, imma Kristu jinsab kullimkien. Għalhekk, kull bieb li jwassalni għand Kristu, huwa għalija Bieb Imqaddes. Jekk nilmaħ lil Kristu fil-persuna tal-ġâr tiegħi, tal-marid, tal-fqir u l-batut, tal-ħabsi, tar-refuġjat, allura l-bieb ta’ darhom huwa wkoll għalija, bieb imqaddes.

Imbagħad, għal dawk li lanqas bieb ma’ għandhom, għax m’għandhomx kenn ta’ saqaf fejn jgħixu, allura għalihom u għalija, il-bieb imqaddes jista’ jsir il-bieb ta’ dari stess.  Meta nilqa’ lilhom, inkun qed nilqa’ lil Kristu nnifsu.

Ħa nidħlu lkoll minn dan il-Bieb Imqaddes li huwa Kristu għaliex huwa stess wegħedna, “Ejjew għandi, intom ilkoll li tinsabu mħabbtin u mtaqqlin, u jiena nserraħkom.  (Mattew 11:28)

Fost tant personaġġi li llum inpoġġu fil-presepji u f’xeni oħra tal-Milied, wieħed li forsi qatt ma jidher huwa sid l-istalla tal-annimali, li mill-ftit li kellu offra kenn lill-Familja Mqaddsa.  Illum ukoll, fostna hawn min, li bil-moħbi u bla daqq ta’ trombi jgħin mill-aħjar li jista’ lil persuni u lill-familji li tant għandhom bżonn. Hemm xi mod, kif jiena wkoll nibda nagħmel l-istess?

Ftit mumenti ta’ skiet

(Salmi 118:19-27)

Iftħuli l-bibien tal-ġustizzja;
ħa nidħol minnhom u nrodd ħajr lill-Mulej.
Dan hu bieb il-Mulej;
il-ġusti jidħlu minnu.

Niżżik ħajr talli weġibtni
u kont għalija s-salvazzjoni tiegħi.
Il-ġebla li warrbu l-bennejja
saret il-ġebla tax-xewka.

Bis-saħħa tal-Mulej seħħ dan:
ħaġa tal-għaġeb f'għajnejna.
Dan hu l-jum li għamel il-Mulej;
ħa nifirħu u nithennew fih!

Ejja, nitolbuk, Mulej, salvana!
Ejja, nitolbuk, Mulej, agħtina r-riżq!
Mbierek minn ġej f'isem il-Mulej!

Inberkukom minn dar il-Mulej.
Jaħweh hu Alla; hu d-dawl tagħna.
Tqassmu f'purċissjoni bil-friegħi f'idejkom sa ħdejn l-artal.

Talb mill-Komunità

Bid-dnub ta' kull wieħed u kull waħda minna, aħna tlaqna minn dar il-Missier u sabbatna f'wiċċna stess il-bieb li ħriġna minnu. Imma Ħuna l-kbir, Kristu Ġesù, infetaħ huwa stess għalina bħala Bieb Qaddis, biex minnu nistgħu  nidħlu lura minn fejn konna tlaqna. Ħa nitolbuh flimkien u ngħidulu: Kristu Ġesù, kun int għalina t-Tama tagħna.

R/. Kristu Ġesù, kun int għalina t-Tama tagħna.

Sabiex hekk kif sid l-istalla ta’ Betlehem offra mill-faqar tiegħu kenn lill-Familja Mqaddsa, ħa noffru, aħna wkoll, kenn lil dawk li jfixxuh f’pajjiżna u ma nagħlqulhomx il-bieb f’wiċċhom kif kien għamel sid il-lukanda f’wiċċ Marija u Ġużeppi. Nitolbu.

R/. Kristu Ġesù, kun int għalina t-Tama tagħna.

Missier Ħanin, fl-imħabba kbira tiegħek għalina, inti bgħattilna lil Ibnek bħala l-Bieb tassew, sabiex kull min jagħzel lilu, jista’ jidħol u joħroġ u jsib il-mergħa. Kompli għatina nitolbok l-Ispirtu Qaddis tiegħek biex jgħinna fl-għażliet li nagħmlu. Ammen.

(Innu tal-Milied)
 

IR-RABA’ TAQSIMA

Kristu huwa t-Triq

Qari mill-Evanġelju skont San Ġwann.

(Ġwanni 14:1-7)

Darba, Ġesù qal lid-dixxipli tiegħu, “Tħallux qalbkom titħawwad! Emmnu f'Alla, u emmnu fija wkoll. Fid-dar ta' Missieri hemm ħafna postijiet; li ma kienx hekk, kont ngħidilkom. Sejjer inħejjilkom fejn toqogħdu. U meta mmur u nħejjilkom post, nerġa' niġi biex neħodkom miegħi biex, fejn inkun jien, tkunu intom ukoll. U t-triq għall-post fejn sejjer tafuha.”

Tumas qallu: “Mulej, aħna ma nafux fejn inti sejjer. Kif nistgħu nafu t-triq?” Wieġbu Ġesù: “Jiena hu t-Triq, il-Verità u l-Ħajja. Ħadd ma jmur għand il-Missier jekk mhux permezz tiegħi. Kieku għaraftu lili, kontu tagħrfu wkoll lil Missieri. Minn issa 'l quddiem tagħrfuh, anzi diġà rajtuh.”

Ftit mumenti ta’ skiet

Meditazzjoni

Sa mit-Testment il-Qadim, kull ġublew kien dejjem marbut ukoll ma’ pellegrinaġġ fiżiku. Anke fl-istorja tal-Knisja, matul il-ġublew bosta jmorru pellegrinaġġ lejn xi knisja ġubilari jew xi lok imqaddes ieħor. Il-Ġublew tas-Sena 2025, għandu t-tema tal-pellegrinaġġ imsemmija bħala parti integrali tal-motto magħżul mill-Papa Franġisku, Pellegrini tat-Tama.

Madankollu rridu nkomplu nżommu f’moħħna u f’qalbna, li la Kristu huwa t-Triq, allura l-pellegrinaġġ tassew mhuwiex xi mixja fiżika jew mawra lejn xi lok ta’ qima, imma nkunu tassew pellegrini tat-tama, jekk il-mixja tal-ħajja tagħna, nimxuha permezz tiegħu, u miegħu u fih. 

Il-pellegrinaġġ tat-tama veru, ma jsirx biss matul is-sena tal-ġublew, imma tul ħajjitna kollha.  Il-pellegrinaġġ tat-tama veru ma’ nistgħux nagħmluh aħna l-insara waħedna, imma mal-umanità kollha.  Kristu huwa t-Triq għalina lkoll.

Għaliex huwa t-Triq, allura Kristu huwa wkoll l-ewwel Pellegrin tat-Tama tagħna. Meta aħna, l-istess bħall-iben iż-żgħir tal-parabbola, tlaqna mid-dar tal-Missier u minħabba d-dnub tagħna komplejna nitbiegħdu minnu u tlifna triqitna lura,  kien Kristu, ħuna l-kbir, li bil-maqlub ta’ dak li kien għamel l-iben il-kbir fl-istess parabbola ta’ Ġesù, ħalla dar Missieru, ġie fostna, sar wieħed minna, biex lilna jurina triqitna lura.

Qal lill-Appostli, u lilna, “Sejjer inħejjilkom fejn toqogħdu. U meta mmur u nħejjilkom post, nerġa' niġi biex neħodkom miegħi biex, fejn inkun jien, tkunu intom ukoll.”

Fiċ-ċentru tal-ġrajja tal-Milied, nilmħu l-Familja ta’ Nazaret. Elfejn sena ta’ kristjaneżmu ssawru fuq il-ġrajja ta’ dik il-familja.  Anke l-Ġublew innifsu li mal-Knisja kollha ser nibdew niċċelbraw, huwa tifkira solenni ta’ kull ma għexet dakinhar dik il-familja.  Anke fil-bidu nett tal-istorja umana, Alla sawwar ġrajjiet il-bniedem fuq familja ta’ raġel u mara u uliedhom.

Illum, jiena qatt ħsibt li Alla għandu pjanijiet kbar ta’ mħabba anke għall-familja tiegħi?  Lest li minn issa stess nafdalu familti f’idejh?

Ftit mumenti ta’ skiet

Talb mill-Komunità

Kristu Ġesù mhux biss huwa l-Kelma li tiggwida ħajjitna, mhux biss huwa d-Dawl li jdawwlilna mixjietna, mhux biss huwa l-Bieb li minnu rridu nidħlu lura fid-dar ta’ Missierna, imma huwa wkoll għalina, it-Triq li fiha rridu nimxu.  Ejjew flimkien, nitolbuh u ngħidulu: Kristu Ġesù, kun int għalina t-Tama tagħna.

R/. Kristu Ġesù, kun int għalina t-Tama tagħna.

Nitolbu għall-mexxejja tal-Knisja, biex bl-għajnuna tal-Ispirtu s-Santu jkomplu jmexxuna dejjem fit-Triq tas-Salvazzjoni, li hu Kristu Ġesù nnifsu. Nitolbu.

R/. Kristu Ġesù, kun int għalina t-Tama tagħna.

Nitolbu għall-mexxejja tal-Ġnus sabiex ilkoll jagħrfu li t-Triq vera għall-umanità hija dik tal-paċi, kif ħabbru l-Anġli fil-lejl tal-Milied lill-bnedmin kollha ta’ rieda tajba. Nitolbu.

R/. Kristu Ġesù, kun int għalina t-Tama tagħna.

Missier Qaddis, Marija u Ġużeppi, imxew minn Nazaret sa Betlehem biex jagħtu lil Binhom bħala t-tama tal-bniedem. Għinna nitolbuk, sabiex inwieġbu għas-sejħa li inti qed tagħmlilna llum permezz tal-Knisja, ħalli bħalhom, insiru aħna wkoll Pellegrini tat-Tama, mhux biss għalina nfusna, imma għall-umanità kollha.

Nitolbu dan permezz ta’ Ibnek u Ħuna, Kristu Sidna li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

(Innu tal-Milied)
 

GĦELUQ

Kristu huwa l-Kelma tal-Missier.

Kristu huwa d-Dawl li jurina t-triq.

Kristu huwa l-Bieb li minnu rridu ngħaddu.

Kristu huwa t-Triq li fih, u miegħu, u bih, irridu nimxu.

Kristu huwa l-ewwel Pellegrin tat-Tama tagħna.

Kristu huwa l-Ġublew tat-Tama tagħna.

Dan huwa l-programm tal-Ġublew għalina. Madankollu dan mhux biss għal matul din is-Sena Mqaddsa li qed tibda llum, imma għal matul ħajjitna kollha.

Ejjew lkoll flimkien, fi tmiem din iċ-ċelebrazzjoni, ningħaqdu ma’ Ommna Marija, f’innu ta’ tifħir lil Alla u magħha nroddulu ħajr tal-ħwejjeġ kbar li għamel magħna permezz ta’ Ibnu Kristu Sidna u permezz tal-Ispirtu s-Santu.

Magnificat

(Luqa 1:46-55)

Ruħi tfaħħar il-kobor tal-Mulej,

Iva, minn issa ’l quddiem kull nisel jibda jsejjaħli hienja.

Għax is-Setgħani għamel miegħi ħwejjeġ kbar;

u għolla ċ-ċkejknin.

Mela b’kull ġid lil min hu bil-ġuħ,