IL-MAGĦMUDIJA TAL-MULEJ ĠESÙ

IL-PAPA FRANĠISKU

ANGELUS

Pjazza San Pietru
Il-Ħadd, 12 ta’ Jannar, 2025

Għeżież ħuti, il-Ħadd it-tajjeb!

Il-festa tal-Magħmudija ta’ Ġesù li qed niċċelebraw illum tfakkarna f’ħafna affarijiet, fil-Magħmudija tagħna wkoll.  Ġesù jingħaqad mal-poplu tiegħu li jmur jitgħammed biex jinħafrulu dnubietu.  Inħobb infakkar il-kliem tal-innu tal-liturġija tal-lum: Ġesù jmur biex jitgħammed minn Ġwanni “għalkemm safi minn kull ħtija”.

Waqt li Ġesù jitgħammed jidher l-Ispirtu u sseħħ l-Epifanija ta’ Alla, li juri wiċċu f’Ibnu, isamma’ leħnu li jgħid: “Int Ibni l-maħbub: fik sibt l-għaxqa tiegħi” (v. 22).  Il-wiċċ u l-leħen.

L-ewwel ħaġa: il-wiċċ.  Meta juri ruħu bħala Missier permezz ta’ Ibnu, Alla joħloq spazju privileġġjat biex jidħol fi djalogu u f’komunjoni mal-umanità.  Hu l-wiċċ ta’ Ibnu l-maħbub.

It-tieni, il-leħen: “Int Ibni l-maħbub” (v. 22).  Dan hu sinjal ieħor li jakkumpanja r-rivelazzjoni ta’ Ġesù.

Għeżież ħuti, il-festa tal-lum iġġagħalna nikkuntemplaw il-wiċċ u l-leħen ta’ Alla li jimmanifestaw ruħhom fl-umanità ta’ Ġesù.  Allura nsaqsu: inħossuna maħbubin?  Jien inħossni maħbub u akkumpanjat minn Alla jew naħseb li Alla mbiegħed minni?  Għandna ħila nagħrfu l-wiċċ ta’ Ġesù f’ħutna?  Indorrijin nisimgħu leħnu?

Nagħmlilkom mistoqsija: kull wieħed u waħda minna niftakruha d-data tal-Magħmudija tagħna?  Dan importanti ħafna!  Aħseb ftit: f’liema ġurnata kont imgħammed, imgħammda?  U jekk ma niftakrux, malli naslu d-dar insaqsu lill-ġenituri, lill-parrini, id-data tal-Magħmudija.  U nagħmlu festa f’dik id-data daqslikieku kien għeluq sninna ieħor: dak li fih twelidna fl-Ispirtu ta’ Alla.  Tinsewx!  Din biċċa xogħol li għandha ssir meta taslu d-dar: id-data tal-Magħmudija.

Nintelqu f’idejn Marija u ninvokaw l-għajnuna tagħha.  U tinsewx id-data tal-Magħmudija.

Wara l-Angelus

Jien qrib l-abitanti tal-Kontea ta’ Los Angeles, California, fejn fil-jiem li għaddew faqqgħu nirien qerrieda.  Qed nitlob għalikom ilkoll.

Dalgħodu, b’ferħ, għammidt xi trabi, ulied dipendenti tas-Santa Sede u tal-Gwardja Svizzera.  Nitolbu għalihom u għall-familji tagħhom.  U nixtieq nitlob lill-Mulej, f’isem il-koppji żgħażagħ kollha, biex ikollhom il-ferħ li jilqgħu id-don tal-ulied u li jgħammduhom.

Fil-Bażilika ta’ San Giovanni in Laterano dalgħodu kien beatifikat Don Giovanni Merlini, saċerdot tal-Missjunarji tad-Demm l-Aktar Prezzjuż.  Kien mogħti għall-missjoni fost il-poplu, kien jagħti pariri prudenti lil tant erwieħ u messaġġier tal-paċi.  Ninvokaw l-interċessjoni tiegħu ukoll filwaqt li nitolbu għall-paċi fl-Ukrajna, fil-Lvant Nofsani u fid-dinja kollha.  Applaws lill-Beatu l-ġdid!

Insellem lilkom ilkoll, rumani u pellegrini, partikolarment lill-istudenti minn Olivenza, fi Spanja, u lill-membri tal-Familja tad-Dixxipli flimkien mal-lajċi li jaħdmu fid-djar tal-Opra ta’ Padre Semeria u Padre Minozzi.  U ma ninsewx nitolbu għall-paċi.  Ma ninsewx li l-gwerra dejjem hi telfa.  Nawgura lil kulħadd il-Ħadd it-tajjeb.  Jekk jogħġobkom tinsewx titolbu għalija.  L-ikla t-tajba u arrivederci!

Miġjub għall-Malti minn Joe Huber