IL-PAPA FRANĠISKU
ANGELUS
Pjazza San Pietru
Il-Ħadd 1 ta’ Diċembru, 2024
Għeżież ħuti, il-Ħadd it-tajjeb!
L-Evanġelju tal-liturġija tal-lum (Lq 21,25-28.34-36), l-ewwel Ħadd tal-Avvent, ikellimna dwar it-taqlib kożmiku kbir u l-ansjetà u l-biża’ tal-umanità. F’dal-kuntest Ġesù jgħaddi kelma ta’ tama lid-dixxipli tiegħu: “qawwu qalbkom u erfgħu raskom, għax il-fidwa tagħkom hi fil-qrib” (v. 28). L-Imgħallem preokkupat biex id-dixxipli ma jtaqqlux qalbhom (cfr v. 34) u biex jishru huma u jistennew il-miġja ta’ Bin il-bniedem.
L-istedina ta’Ġesù hi din: erfgħu raskom lejn l-għoli u żommu qlubkom ħfief u dejjem lesti.
Fil-fatt ħafna nies ta’ żmien Ġesù, quddiem ġrajjiet katastrofiċi li jaraw iseħħu madwarhom – persekuzzjonijiet, kunflitti, diżastri naturali -, kienu maħkumin mill-ansjetà u jaħsbu li tmiem id-dinja kien qrib. Qalbhom tqila bil-biża’. Iżda Ġesù jrid jeħlishom mit-tħassib żejjed li kellhom u mill-konvinzjonijiet foloz billi jurihom kif jibqgħu jishru fi qlubhom, kif jaqraw il-ġrajjiet billi jibdew mill-proġett ta’ Alla, li jopera s-salvazzjoni anki fl-aktar ġrajjiet drammatiċi tal-istorja. Għalhekk jissuġġerilhom biex jerfgħu ħarsithom lejn is-Sema biex jifhmu dak li jiġri fl-art: “Qawwu qalbkom u erfgħu raskom” (v. 28). Sabiħa: “Qawwu qalbkom u erfgħu raskom”.
Ħuti, ir-rakkomandazzjoni ta’ Ġesù hija importanti għalina wkoll: “Tħallux qlubkom jittaqqlu” (v. 34). Ilkoll kemm aħna, f’ħafna ċirkostanzi tal-ħajja, nsaqsu lilna nfusna: x’nista’ nagħmel biex qalbi tkun “ħafifa”, tishar, tkun qalb ħielsa? Qalb li ma tħallix is-swied il-qalb jgħakkisha? Dan is-swied il-qalb hu ikraħ, ikraħ ħafna! Infatti jista’ jiġri li l-ansjetajiet, il-biżgħat u l-qtigħ il-qalb minħabba l-ħajja personali tagħna inkella minħabba dak li qed jiġri fid-dinja, jiskoraġġuna għax jgħafsu fuqna qieshom blata żonqrija. Meta l-preokkupazzjonijiet itaqqlulna qlubna nibdew ningħalqu fina nfusna. Għall-kuntrarju Ġesù jistedinna nerfgħu rasna, nafdaw f’imħabbtu li trid issalvana u li tkun qribna f’kull sitwazzjoni tal-eżistenza tagħna, jitlobna nagħmlulu l-wisa’ biex mill-ġdid insibu t-tama.
Allura nsaqsu: qalbi tqila bil-biża’, bil-preokkupazzjonijiet, bl-ansjetà dwar il-futur? Naf inħares lejn il-ġrajjiet tal-ħajja ta’ kuljum u dawk tal-istorja mill-għajnejn ta’ Alla, bit-talb, fuq xefaq aktar wiesa’? Jew inħalli l
-iskoraġġiment jaħkimni? Daż-żmien tal-Avvent għandu jkun okkażjoni prezzjuża biex nerfgħu rasna lejh, għax Hu jħaffef qlubna u jweżinna fil-mixja tagħna.
Ninvokaw issa lill-Verġni Marija, li anki waqt il-mumenti tal-prova dejjem baqgħet lesta biex tilqa’ l-proġett ta’ Alla.
Wara Angelus
Għeżież ħuti!
Fil-jiem li għaddew tfakkar l-40 anniversarju tat-Trattat ta’ Paċi u Ħbiberija bejn l-Arġentina u ċ-Ċili. Bil-medjazzjoni tas-Santa Sede, dan kien temm il-kwistjoni territorjali li kienet għodda wasslet lill-Arġentina u liċ-Ċili f’xifer il-gwerra. Dan juri li meta nirrinunzjaw għall-armi u minflok nużaw id-djalogu, nimxu aħjar.
Bi pjaċir nilqa’ l-ftehim tal-waqfien mill-ġlied li ntlaħaq dal-ġranet fil-Libanu u nawgura li jkun rispettat miż-żewġ naħat, ħalli hekk, il-popolazzjonijiet tar-reġjuni milqutin mill-kunflitt - kemm mil-Libanu u wkoll minn Iżrael – jerġgħu lura lejn djarhom fiż-żgur, bl-għajnuna prezzjuża wkoll tal-eżerċtu lebaniz u l-forzi tal-paċi tal-Ġnus Magħquda. F’dis-sitwazzjoni, nagħmel appell pressanti lill-politiċi lebaniżi kollha sabiex minnufih jaħtru l-President tar-Repubblika ħalli l-istituzzjonijiet jerġgħu jibdew jiffunzjonaw normalment, u biex isiru r-riformi meħtieġa sabiex il-pajjiż jerġa jkun eżempju ta’ konvivenza paċifika bejn ir-reliġjonijiet differenti. Hi tama tiegħi li x-xaqq dawl ta’ paċi li nfetaħ, iwassal għall-waqfien mill-ġlied fuq il-fruntieri kollha, speċjalment f’Gaża. Għandi ħafna għal qalbi l-ħelsien tal-iżraeljani li għadhom maqbudin ostaġġi u li l-popolazzjoni palestinjana mifnija għall-aħħar ikollha aċċess għall-għajnuna umanitarja. U nitolbu għas-Sirja fejn, sfortunatament, reġgħet tkebbset il-gwerra li qed tħalli bosta vittmi. Jien qrib ħafna tal-Knisja tas-Sirja. Nitolbu!
Nesprimi l-preokkupazzjoni tiegħi, u n-niket tiegħi, minħabba l-kunflitt li għadu għaddej u qed idemmi l-Ukrajna martirizzata. Ilna kważi sentejn nassistu għal sensiela ta’ mwiet, feruti, vjolenza, distruzzjoni. It-tfal, in-nisa, l-anzjani, il-persuni dgħajfin huma l-ewwel vittmi. Il-gwerra hi orrur, il-gwerra toffendi lil Alla u lill-umanità, il-gwerra ma taħfirha lil ħadd, il-gwerra hi dejjem telfa, telfa għall-umanità kollha kemm hi! Niftakru li x-xitwa tinsab wara l-bieb u hemm ir-riskju li l-kundizzjonijiet ta’ miljuni ta’ evakwati se jeħżienu għall-aħħar. Għalihom se jkunu xhur iebsin ħafna. Il-gwerra u l-kesħa flimkien huma traġedja. Mill-ġdid nagħmel appell lill-komunità internazzjonali u lil kull persuna ta’ rieda tajba, biex jagħmlu ħilithom kollha biex iwaqqfu dil-gwerra u minflok, joħorġu minn fuq, id-djalogu, il-fraternità, ir-rikonċiljazzjoni. F’kull livell għandu jkun intensifikat l-impenn u waqt li qed inħejju għall-Milied, aħna u nistennew it-twelid tar-Re tal-paċi, lil dawn il-popolazzjonijiet ejjew intuhom tama konkreta. It-tfittxija għall-paċi mhix responsabbiltà tal-ftit, iżda ta’ kulħadd. Jekk nidraw u nibqgħu indifferenti għall-orruri tal-gwerra, il-familja umana kollha kemm hi, kollha kemm hi, toħroġ telliefa. Il-familja umana kollha titlef!
Għeżież ħuti, ma nehdew qatt nitolbu għal dik il-popolazzjoni daqstant mifnija u nitolbu lil Alla d-don tal-paċi.
Insellem b’għożża lilkom ilkoll fidili minn Ruma u pellegrini li ġejtu mill-Italja u minn bosta pajjiżi oħra. Insellem partikolarment lill-gruppi minn Barcellona, Murcia u Valencia – niftakru f’Valencia, kemm qed issofri -! – u minn Gerovo fil-Korazja. Insellem lill-fidili minn Arco di Trento u lil dawk minn Sciacca, u lill-grupp minn Ruma tal-Gioventù Ardente Mariana. U nsellem lill membri tal-Immacolata.
Nawgura lil kulħadd il-Ħadd it-tajjeb u l-bidu tal-Avvent it-tajjeb. Jekk jogħġobkom tinsewx titolbu għalija. L-ikla t-tajba u arrivederci!
Miġjub għall-Malti minn Joe Huber