It-Tielet Ġimgħa taż-Żmien ta’ Matul is-Sena
L-Erbgħa
Qari I
Għamel perfetti
għal dejjem lil dawk li huwa
jqaddes.
Lhud 10, 11-18
Qari mill-Ittra
lil-Lhud
Ħuti, kull
qassis ieħor imur kuljum biex
jaqdi l-ministeru tiegħu, u joffri u jerġa’ joffri l-istess sagrifiċċju, bla ma jistgħu qatt ineħħu d-dnubiet. Imma Kristu,
wara li offra sagrifiċċju wieħed
għad-dnubiet, qagħad
għal dejjem fuq in-naħa tal-lemin ta’ Alla, fejn qiegħed jistenna sa mal-għedewwa tiegħu jitqiegħdu mirfes taħt riġlejh. Għax hu b’offerta waħda għamel perfetti għal dejjem lil dawk
li huwa jqaddes.
Dan jixhdulna
l-Ispirtu s-Santu nnifsu, għax wara li qal:
“Dan hu l-patt li jien għad
nagħmel magħhom
wara dawk
il-jiem, jgħid il-Mulej:
Inqiegħed il-liġijiet
tiegħi f’qalbhom
u f’moħħom
niktibhom”.
Qal ukoll:
“Dnubiethom u ħtijiethom
ma niftakarhomx aktar”.
Issa, fejn
hemm il-maħfra tad-dnubiet, ma hemmx għalfejn issir aktar l-offerta għad-dnubiet.
Il-Kelma tal-Mulej
R/. Irroddu ħajr
lil Alla
Salm Responsorjali
Salm 109
(110), 1.2.3.4
R/. (4bċ): Inti qassis għal dejjem bħal Melkisedek
Il-kelma
tal-Mulej lil Sidi:
“Oqgħod
fuq leminti,
sa ma nqiegħed
l-għedewwa tiegħek
mirfes taħt
riġlejk”. R/.
Ix-xettru tal-qawwa
tiegħek
jibgħat il-Mulej
minn Sijon:
aħkem f’nofs
l-għedewwa tiegħek!
R/.
Tiegħek is-setgħa
sa minn twelidek
fuq l-għoljiet
imqaddsa,
sa minn
qabel is-sebħ bħan-nida jien nissiltek. R/.
Ħalef il-Mulej,
u ma jisgħobx
bih:
“Inti qassis
għal dejjem bħal Melkisedek”. R/.
Akklamazzjoni qabel l-Evanġelju
ara Mk 9, 7
Hallelujah. R/. Hallelujah
Iż-żerriegħa hi l-kelma
ta’ Alla,
il-bidwi
hu Kristu:
min isib
lilu, għandu l-ħajja ta’ dejjem.
R/. Hallelujah
Evanġelju
Il-bidwi ħareġ jiżra’.
Mk 4, 1-20
Qari mill-Evanġelju
skont San Mark
F’dak iż-żmien,
Ġesù raġa’ beda jgħallem ħdejn il-baħar, u nġabret madwaru kotra kbira, hekk
li kellu jitla’ bilqiegħda f’dgħajsa fuq il-baħar, u n-nies kollha l-art matul ix-xatt. U qagħad jgħallimhom ħafna ħwejjeġ bil-parabboli, u fit-tagħlim
tiegħu qalilhom: “Isimgħu. Darba kien hemm bidwi
u ħareġ jiżra’.
Ġara li hu u jiżra’,
xi żerrigħat waqgħu
fil-mogħdija; ġew
l-għasafar u naqqruhom
kollha. Oħrajn waqgħu f’art kollha blat fejn
ma kienx hemm wisq ħamrija, u malajr nibtu, għax
il-ħamrija ma kinitx fonda; meta mbagħad telgħet ix-xemx, inħarqu u nixfu, billi ma kellhomx għeruq. Oħrajn waqgħu qalb ix-xewk u x-xewk kiber
u ħanaqhom, u frott ma
għamlux. Oħrajn waqgħu f’art tajba, u għamlu l-frott; u l-frott kiber u tkattar, u min għamel tletin, min sittin, u min mija”. U qal: “Min għandu widnejn biex jisma’,
ħa jisma’!”.
Meta kien
waħdu, dawk ta’ madwaru flimkien mat-Tnax resqu jitolbuh
ifissrilhom il-parabboli. U
hu qalilhom: “Lilkom ingħata l-misteru tas-Saltna ta’ Alla, imma l-oħrajn, li huma barra, ikollhom kollox bil-parabboli, ħalli jħarsu kemm iħarsu ma jarawx, u jisimgħu kemm jisimgħu ma jifhmux, li ma jbiddlux ħajjithom u jaqilgħu l-maħfra”.
U qalilhom:
“Din il-parabbola m’intomx tifhmuha? Mela kif se tifhmu l-parabboli l-oħra kollha? Dak li l-bidwi jiżra’ hija l-Kelma. Dawk ta’ matul il-mogħdija, fejn inżergħet il-Kelma, huma dawk li malli jisimgħuha, jersaq ix-Xitan u jaħtfilhom il-Kelma li nżergħet f’qalbhom. Dawk li jinżergħu f’art kollha blat
huma dawk li meta jisimgħu
l-Kelma, minnufih jilqgħuha bil-ferħ, imma għeruq ma jkollhomx, u għalhekk ftit idumu; meta mbagħad jiġi fuqhom l-għawġ, jew isibu min iħabbathom
minħabba l-Kelma, malajr jitfixklu. L-oħrajn li jinżergħu
qalb ix-xewk huma dawk li jisimgħu l-Kelma, iżda l-inkwiet żejjed għall-ħwejjeġ tad-dinja,
ir-rabta mal-ġid tal-art, u l-ġibda għal ħwejjeġ oħra, jidħlu fihom u joħonqulhom il-Kelma, li għalhekk ma tagħmilx frott. Dawk imbagħad li jinżergħu f’art tajba huma dawk li jisimgħu l-Kelma, jilqgħuha, u jagħmlu l-frott, min tletin, min sittin u min mija”.
Il-Kelma tal-Mulej
R/. Tifħir lilek
Kristu