L-Erbgħa u Tletin Ġimgħa taż-Żmien
ta’ Matul is-Sena
Il-Ġimgħa
Qari I
Qiegħed nara bħal
iben ta’ bniedem, ġej mis-sħab tas-sema.
Dan 7, 2-14
Qari mill-Ktieb tal-Profeta Danjel
Jien, Danjel, kont qiegħed inħares f’dehra li kelli billejl,
u ara, l-erbat irjieħ tas-sema bdew iqanqlu l-baħar il-kbir; u mill-baħar ħarġu erba’ bhejjem kbar, waħda mhijiex bħall-oħra. L-ewwel waħda kienet qisha ljun bil-ġwienaħ ta’ ajkla. Jiena u nħares, ġwenħajha nqalgħulha; intrefgħet
mill-art, waqqfuha fuq riġlejha bħal bniedem, u tawha
qalb ta’ bniedem. U ara, kien
hemm bhima oħra, it-tieni waħda, qisha ors, u waqqfuha fuq ġenb wieħed; f’ħalqha, bejn snienha, kellha
tliet kustilji, u qalulha: “Qum, kul laħam kemm trid”.
Imbagħad ħarist, u ara, kien
hemm oħra, qisha ljupard b’erba’ ġwienaħ ta’ tajra fuq dahru; din il-bhima kellha erbat irjus, u tawha setgħa kbira. Wara dan ħarist
fl-istess dehriet li kelli billejl,
u ara, kien hemm ir-raba’
waħda, bhima tal-biża’ u twerwrek, ta’ saħħa tal-għaġeb, bi snien kbar tal-ħadid; bdiet tiekol u tfarrak, u tgħaffeġ il-fdal taħt saqajha. Din kellha għaxart iqrun, u ma kinitx bħall-bhejjem l-oħra ta’ qabilha.
Qgħadt inħares sewwa lejn il-qrun,
u ara f’nofshom
nibet qarn ieħor żgħir; tlieta mill-qrun l-oħra nqalgħu minn għeruqhom quddiem dan il-qarn li kellu għajnejn bħal ta’ bniedem u fommu jlablab ħafna kliem arroganti.
Kont għadni qiegħed inħares,
meta tqiegħdu xi tronijiet,
u wieħed Xiħ fl-għomor qagħad bilqiegħda;
ilbiesu abjad silġ, u xuxtu bajda suf;
ilsna tan-nar it-tron tiegħu,
nar iħeġġeġ
ir-roti tiegħu;
xmara ta’ nar kienet għaddejja,
ħierġa minn quddiemu;
eluf ta’ eluf kienu jaqduh,
u għaxart
elef ta’ għaxriet ta’ eluf wieqfa quddiemu.
Il-Qorti
qagħdet bilqiegħda,
u l-kotba nfetħu.
Jien bqajt inħares; imbagħad, minħabba l-għajjat u l-kliem arroganti li kien qiegħed jgħid il-qarn, waqt li kont inħares,
lill-bhima qatluha, u ġisimha qerduh u tawh għan-nar. Lill-bhejjem l-oħra neħħewlhom setgħethom, iżda lilhom ħallewhom ħajjin sa
ma jaslulhom il-ħin u l-waqt.
U billejl
deherli qiegħed nara bħal
iben ta’ bniedem,
ġej mis-sħab tas-sema,
li baqa’ sejjer sax-Xiħ fl-għomor u ressquh quddiemu.
U tawh
ħakma, ġieħ,
u saltna,
biex lilu jaqdi
kull ġens, u poplu, u lsien.
Ħakmietu ħakma għal dejjem li ma tgħaddix,
u saltnatu li ma tinqeridx.
Il-Kelma
tal-Mulej
R/. Irroddu ħajr lil Alla
Salm Responsorjali
Dan 3,
75.76.77.78.79.80.81
R/. (59b): Faħħruh u għolluh fuq kollox għal
dejjem
Bierku, muntanji u għoljiet, il-Mulej.
Bierku, kulma jinbet fl-art, il-Mulej. R/.
Bierku, għejun il-Mulej.
Bierku, ibħra u xmajjar, il-Mulej. R/.
Bierku, ħut kbir u kulma jżiġġ
fl-ilma, il-Mulej.
Bierku, tjur kollha tal-ajru, il-Mulej. R/.
Bierku, bhejjem selvaġġi u mansi kollha, il-Mulej,
faħħruh u għolluh fuq kollox għal
dejjem. R/.
Akklamazzjoni qabel l-Evanġelju
Lq 21, 28
Hallelujah. R/.
Hallelujah
Qawwu qalbkom u erfgħu raskom,
għax il-fidwa tagħkom hi fil-qrib.
R/. Hallelujah
Evanġelju
Meta taraw dan jiġri, kunu afu li s-Saltna ta’ Alla hi fil-qrib.
Lq 21, 29-33
Qari mill-Evanġelju skont San Luqa
F’dak iż-żmien, Ġesù qal lid-dixxipli tiegħu din il-parabbola: “Ħarsu lejn is-siġra tat-tin u s-siġar
l-oħra. Malli tarawhom jarmu, intom stess tintebħu li s-sajf diġà fil-qrib. Hekk ukoll meta
taraw dan jiġri, kunu afu li s-Saltna
ta’ Alla hi fil-qrib. Tassew ngħidilkom, li ma jgħaddix dan in-nisel sa
ma jiġri dan kollu. Is-sema u l-art jgħaddu, imma kliemi ma jgħaddix”.
Il-Kelma
tal-Mulej
R/. Tifħir lilek Kristu