22 ta’ Ġunju
Is-Sejħa tal-Madonna Ta’ Pinu
Festa
Kolletta
O Alla ħanin, ieqaf magħna, bnedmin dgħajfa,
biex aħna u nagħmlu l-festa
tal-Omm Qaddisa ta’ Alla Mtellgħa s-Sema,
meqjuma f’dan is-Santwarju Ta’ Pinu,
bl-għajnuna tat-talb tagħha
nintrefgħu minn ħżunitna
u ngħixu ħajja qaddisa.
B’Ibnek Ġesù Kristu Sidna, li hu Alla
u miegħek jgħix u jsaltan flimkien mal-Ispirtu s-Santu
għal dejjem ta’ dejjem.
Amen.
Talba fuq l-Offerti
Ferħanin bil-festa ta’ Omm Ibnek,
noffrulek, Mulej, is-sagrifiċċju ta’ tifħir,
biex, b’din il-qima qaddisa u l-grazzja tiegħek,
niksbu dejjem iżjed il-frott tal-fidwa tagħna.
Bi Kristu Sidna.
Amen.
Talba wara t-Tqarbin
Tqarbinna, Mulej, bis-sagramenti tas-sema
aħna u niċċelebraw il-festa
tal-Verġni Mqaddsa Marija Ta’ Pinu;
agħmel, fil-ħniena tiegħek,
li aħna nimxu fuq il-passi tagħha
u naqdu l-misteru tal-fidwa kif jixraq.
Bi Kristu Sidna.
Amen.
Qari I
Żak 2:14-17
Qari mill-Ktieb tal-Profeta Żakkarija.
Għajjat bil-ferħ u infexx fl-hena, bint Sijon.
Għaliex arani ġej
biex ngħammar f’nofsok,
oraklu tal-Mulej,
u kotra kbira ta’ ġnus
jingħaqdu dakinhar mal-Mulej;
u huma jkunu l-poplu tiegħi.
U jiena ngħammar f’nofsok;
imbagħad inti tagħraf
li l-Mulej tal-eżerċti bagħatni għandek.
U l-Mulej jieħu ’l Ġuda
bħala sehmu mill-wirt fl-Art Imqaddsa,
u jerġa’ jaħtar lil Ġerusalemm!
Żommu s-skiet quddiem il-Mulej,
intom il-ħajjin ilkoll,
għax stenbaħ mill-għamara mqaddsa tiegħu!
Il-Kelma tal-Mulej.
℟. Irroddu ħajr lil Alla.
Salm Responsorjali
℟. Is-Setgħani għamel miegħi ħwejjeġ kbar.
Ruħi tfaħħar il-kobor tal-Mulej,
u l-ispirtu tiegħi jifraħ f’Alla s-Salvatur tiegħi.
Għax hu xeħet għajnejh
fuq iċ-ċokon tal-qaddejja tiegħu. ℟.
Iva, minn issa ’l quddiem
kull nisel isejjaħli hienja.
Għax is-Setgħani għamel miegħi ħwejjeġ kbar;
qaddis hu l-isem tiegħu. ℟.
Il-ħniena tiegħu tinfirex f’kull żmien
fuq dawk li jibżgħu minnu.
Hu wera l-qawwa ta’ driegħu,
xerred lil dawk li huma mkabbra f’qalbhom. ℟.
Niżżel is-setgħana minn fuq it-tron tagħhom,
u għolla ċ-ċkejknin.
Mela b’kull ġid lil min hu bil-ġuħ,
u l-għonja bagħathom ’il barra b’xejn. ℟.
Ħa ħsieb Iżrael, qaddej tiegħu,
għax ftakar fil-ħniena tiegħu,
bħalma wiegħed lil missirijietna,
b’riżq Abraham u nislu għal dejjem. ℟.
Qari II
Atti 1:12-14; 2:1-4
Qari mill-Ktieb tal-Atti tal-Appostli.
Wara li Ġesù tela’ s-sema, l-Appostli reġgħu lura lejn Ġerusalemm mill-għolja msejħa taż-Żebbuġ, li hi ’l bogħod mill-belt daqs il-mixja tas-Sibt, jiġifieri xi nofs mil. Xħin daħlu l-belt, telgħu fil-kamra ta’ fuq tad-dar fejn kienu joqogħdu. Huma kienu: Pietru u Ġwanni, Ġakbu u Indrì, Filippu u Tumas, Bartilmew u Mattew, Ġakbu bin Alfew, u Xmun jgħidulu l-Imħeġġeġ, u Ġuda bin Ġakbu. U lkoll qalb waħda kienu jitolbu flimkien ma’ xi nisa u ma’ Marija omm Ġesù, u ma’ qrabatu.
Il-Kelma tal-Mulej.
℟. Irroddu ħajr lil Alla.
Akklamazzjoni qabel l-Evanġelju
Hallelujah. ℟. Hallelujah.
Hienja int, Verġni Marija, li emmint
li jseħħ kulma bagħat jgħidlek il-Mulej.
℟. Hallelujah.
Evanġelju
Ġw 2:1-11
Qari mill-Evanġelju skont San Ġwann.
F’dak iż-żmien, sar tieġ f’Kana tal-Galilija, u omm Ġesù kienet hemm. Ġesù kien mistieden għat-tieġ hu wkoll flimkien mad-dixxipli tiegħu. Billi ma kienx fadal iżjed inbid, omm Ġesù qaltlu: “Ma għandhomx inbid”. U Ġesù qalilha: “X’hemm bejni u bejnek, mara? Is-siegħa tiegħi għadha ma waslitx”. Omm Ġesù qalet lill-qaddejja: “Agħmlu kulma jgħidilkom hu”.
Issa kien hemm sitt ġarar tal-ħaġar, imqiegħda hemm għar-rit tal-purifikazzjoni tal-Lhud, kull waħda minnhom tasa’ xi mitt jew mija u għoxrin litru. Ġesù qal lill-qaddejja: “Imlew il-ġarar bl-ilma”. U dawk imlewhom sax-xifer. Imbagħad qalilhom: “Issa ħudu minnu u newluh lil dak li qiegħed jieħu ħsieb il-mejda”. U huma marru jagħtuhulu. Hu daq l-ilma mibdul fi nbid; u billi ma kienx jaf mnejn ġie, għalkemm il-qaddejja li ħadu mill-ilma kienu jafu, sejjaħ lill-għarus u qallu: “Kulħadd l-inbid it-tajjeb iservi l-ewwel; meta mbagħad ikun ħadhom, iġibu dak li jkun inqas tajjeb. Imma int l-inbid it-tajjeb erfajtu sa issa”.
Dan li għamel Ġesù f’Kana tal-Galilija kien l-ewwel wieħed fost is-sinjali tiegħu. Bih wera l-glorja tiegħu u d-dixxipli tiegħu emmnu fih.
Il-Kelma tal-Mulej.
℟. Tifħir lilek, Kristu.