Id-Dsatax-il Ġimgħa taż-Żmien ta’ Matul is-Sena
Il-Ħamis
Qari I
L-arka tal-patt tal-Mulej sejra tgħaddi quddiemkom fil-Ġordan.
Ġożwè 3, 7-10a.11.13-17
Qari mill-Ktieb ta’ Ġożwè
F’dak iż-żmien, il-Mulej qal lil Ġożwè:
“Illum nibda nkabbrek f’għajnejn Iżrael kollu biex ikunu
jafu li kif jien kont ma’ Mosè,
hekk inkun miegħek. Issa ordna lill-qassisin
li jġorru l-arka tal-patt u għidilhom: “Kif taslu sa xfar
l-ilma tal-Ġordan, ieqfu fil-Ġordan”.
U Ġożwè qal
lil ulied Iżrael: “Ersqu ’l hawn u isimgħu l-kliem tal-Mulej, Alla tagħkom”. U żied jgħidilhom Ġożwè: “B’dan tagħrfu li Alla l-ħaj qiegħed f’nofskom, u sejjer ikeċċi minn quddiemkom il-Kangħanin, il-Ħittin, il-Ħiwwin, il-Periżżin, il-Ġirgasin,
l-Amurrin u l-Ġebusin. Araw, l-arka tal-patt tal-Mulej,
Sid l-art kollha, sejra tgħaddi quddiemkom fil-Ġordan. Malli l-qassisin li jkunu jerfgħu l-arka tal-Mulej,
Sid l-art kollha, iniżżlu
riġlejhom fl-ilma tal-Ġordan, l-ilma tiegħu jofrogħ, waqt li l-ilma jkun nieżel”.
Xħin in-nies telqu mill-għerejjex tagħhom biex jaqsmu l-Ġordan, il-qassisin, li kienu jġorru l-arka tal-patt, marru quddiemhom. U meta r-reffiegħa tal-arka
waslu sal-Ġordan u riġlejn il-qassisin li kienu jġorru
l-arka messew ma’ xifer l-ilma - fi żmien il-ħsad kollu l-Ġordan ikun mimli sa
fuq ix-xtut tiegħu – l-ilma nieżel min-naħa ta’ fuq waqaf, u qam gozz wieħed,
’il bogħod ħafna ħdejn Adam, il-belt li qiegħda
ħdejn Saretan. L-ilma nieżel lejn il-Baħar tal-Għaraba, il-Baħar il-Mielaħ, ġie fix-xejn għalkollox; u l-poplu qasam biswit
Ġeriko.
Il-qassisin, li kienu
jġorru l-arka tal-patt tal-Mulej, waqfu fin-niexef f’nofs il-Ġordan,
u l-Iżraelin kollha baqgħu jaqsmu fin-niexef sa
ma l-poplu kollu għadda l-Ġordan.
Il-Kelma tal-Mulej
R/. Irroddu ħajr lil Alla
Salm Responsorjali
Salm 113A (114) , 1-2.3-4.5-6
R/. Hallelujah. Hallelujah
Meta ħareġ Iżrael
mill-Eġittu,
Ġakobb minn poplu
ta’ lsien barrani,
Ġuda sar is-santwarju
tiegħu,
Iżrael is-saltna tiegħu. R/.
Il-baħar rah u ħarab,
il-Ġordan raġa’ lura.
Qabżu bħal kbiex il-muntanji,
u bħal ħrief il-għoljiet. R/.
Xi ġralek, baħar,
biex taħrab?
Xi ġralek, Ġordan,
biex terġa’ lura?
Xi ġralkom, muntanji,
biex taqbżu bħal kbiex,
u intom, għoljiet, biex taqbżu bħal ħrief? R/.
Akklamazzjoni qabel l-Evanġelju
Salm 118 (119), 135
Hallelujah. R/. Hallelujah
Ħa jiddi wiċċek fuq il-qaddej tiegħek,
għallimni l-kmandamenti tiegħek.
R/. Hallelujah
Evanġelju
Ma ngħidlikx sa
seba’ darbiet imma sa sebgħa u sebgħin darba.
Mt 18, 21 – 19, 1
Qari mill-Evanġelju skont San Mattew
F’dak iż-żmien, Pietru resaq lejn Ġesù
u qallu: “Mulej, xi kemm-il darba jrid jonqosni
ħija biex jiena naħfirlu? Sa seba’ darbiet?”. U Ġesù wieġbu:
“Ma ngħidlikx sa seba’ darbiet, imma sa sebgħa
u sebgħin darba.
Għalhekk is-Saltna tas-Smewwiet nistgħu nxebbhuha ma’ wieħed sultan, li
ried jagħmel il-kontijiet mal-qaddejja tiegħu. Kif beda jagħmel dan, ħadulu quddiemu wieħed li kellu jagħtih għaxart elef talent. Billi ma kellux minn fejn
iroddhomlu, is-sinjur ordna li jinbiegħu hu, martu, uliedu u kulma kellu, ħalli
b’hekk jitħallas id-dejn. Imma l-qaddej inxteħet quddiemu jitolbu u jgħidlu: “Sinjur, stabar ftit
bija; kollox irroddlok”. Is-sinjur ġietu ħasra minn dak il-qaddej, bagħtu
u ħafirlu dejnu.
Mela dak il-qaddej joħroġ,
u jiltaqa’ ma’ wieħed minn sħabu,
li kellu jagħtih mitt dinar; qabdu minn għonqu u beda jagħfsu. “Ħallas dejnek”, qallu. Il-qaddej sieħbu nxteħet quddiemu jitolbu bil-ħniena u jgħidlu: “Stabar
ftit bija u rroddlok”. Imma dak ma riedx jaf,
mar u xeħtu
l-ħabs sa
ma jrodd kulma kellu jagħtih.
Sħabu l-qaddejja raw il-ġrajja kollha u sewdu qalbhom ħafna; marru għand is-sinjur tagħhom u tarrfulu kulma kien ġara. Imbagħad is-sinjur bagħat għalih u qallu: “Ja qaddej ħażin,
meta jiena ħfirtlek dak id-dejn
kollu wara li tlabtni bil-ħniena, ma kienx imissek int ukoll tħenn għal sieħbek kif ħennejt jien għalik?”. U saħan bl-aħrax is-sinjur għalih,
u tah f’idejn min jaħqru sa
ma jrodd kulma kellu jagħti. Hekk jagħmel
lilkom Missieri li hu fis-Smewwiet jekk ma taħfrux lil xulxin minn qalbkom”.
Kif temm dan id-diskors,
Ġesù telaq mill-Galilija u mar il-Lhudija, fl-inħawi ’l hemm mill-Ġordan.
Il-Kelma tal-Mulej
R/. Tifħir lilek Kristu