It-Tmintax-il Ġimgħa taż-Żmien ta’ Matul is-Sena
L-Erbgħa
Qari I
Irrifjutaw art tnixxi
ħalib u għasel.
Num 13, 1-3a.25 -14, 1.26-30.34-35
Qari mill-Ktieb tan-Numri
F’dak iż-żmien, il-Mulej kellem lil Mosè
fid-deżert ta’ Faran u
qallu: “Ibgħat xi rġiel jitkixxfu l-art ta’ Kangħan li jien se nagħti lil ulied Iżrael. Ibgħat wieħed minn kull
tribù ta’ missirijiethom. Ilkoll mill-kapijiet fosthom”. U Mosè bagħathom mid-deżert
ta’ Faran, skont ma qallu l-Mulej.
Reġgħu lura mit-tkixxif tal-art wara erbgħin
jum. Malli waslu marru għand
Mosè u Aron u l-ġemgħa
kollha ta’ Iżrael fid-deżert ta’ Faran f’Kades. U qalulhom b’kollox, lilhom u lill-ġemgħa kollha ta’ Iżrael, u wrewhom il-frott tal-art.
Irrakkuntawlu kulma raw, u qalu: “Morna fl-art li intom bgħattuna nitkixxfu, u tassew tnixxi ħalib u għasel; u dan hu l-frott tagħha;
iżda n-nies li joqogħdu fiha huma nies ta’ saħħa,
u l-ibliet magħluqa bis-swar u kbar ħafna. Hemm rajna ’l ulied Għanak; l-Għamalekin li
jgħammru fin-Negeb; il-Ħittin, il-Ġebusin,
l-Amurrin li jgħammru fuq l-għoljiet; u l-Kangħanin li jgħammru
n-naħa tal-baħar
u max-xtut tal-Ġordan”.
Kaleb sikket il-poplu
quddiem Mosè u qalilhom: “Infittxu nitilgħu, u neħduha f’idejna. Nistgħu nirbħuha għax nifilħu għaliha”. U l-irġiel li telgħu miegħu qalu: “Ma nistgħux naħbtu għal poplu jiflaħ aktar minna”. U xerrdu xniegħa ħażina fuq l-art li marru jitkixxfu lil ulied
Iżrael, u qalulhom:
“L-art, li dħalna fiha
biex nitkixxfuha, tibla’ lil kull
min imur jgħammar fiha, u l-popli kollha li rajna f’nofsha huma razza
ta’ nies twal. Hemm rajna l-ġganti
(ulied Għanak ġejjin mill-ġganti) u ħassejna ruħna bħal ġradijiet u hekk deherna aħna
f’għajnejhom”.
U l-ġemgħa kollha
ta’ Iżrael refgħet
leħinha u nfexxet tgħajjat; u l-poplu għadda dak il-lejl jibki.
U l-Mulej kellem lil Mosè u lil
Aron u qalilhom: “Kemm se ddum din il-ġemgħa ħażina tgemgem kontrija? Jien smajt it-tgemgim ta’ wlied Iżrael kontra tiegħi. Għidilhom: “Daqs kemm jien ħaj
– l-oraklu tal-Mulej – nagħmlilkom kif għedtuli f’widnejja. F’dan id-deżert jaqgħu l-katavri tagħkom, intom ilkoll li kontu magħdudin minn
għoxrin sena ’l fuq, li gemgimtu kontra tiegħi. Ma tidħlux fl-art li jien, b’idi merfugħa
’l fuq, ħlift li nserraħkom fiha, ħlief Kaleb bin Gefunni u Ġożwè bin Nun. Iġġorru
fuq spallejkom il-kastig ta’ ħtijietkom għal erbgħin sena, sena għal
kull jum li domtu titkixxfu l-art. Hekk tkunu tafu
li stmellejtkom”. Jiena, il-Mulej, tkellimt: hekk nagħmel lil din iċ-ċorma nies ħżiena li ftiehmu kontra tiegħi. Jintemmu fid-deżert, u hemm imutu”.
Il-Kelma tal-Mulej
R/. Irroddu ħajr lil Alla
Salm Responsorjali
Salm 105 (106), 6-7a.13-14.21-22.23
R/. (4a): Ftakar fija,
Mulej, fi mħabbtek għall-poplu tiegħek
Aħna dnibna, bħal missirijietna,
waqajna fil-ħtija, għamilna l-ħażen.
Missirijietna fl-Eġittu
ma għarfux l-għeġubijiet
tiegħek. R/.
Malajr insew għemilu;
mank stennew li jseħħ ħsiebu.
U qabdithom kilba bla lġiem fid-deżert,
u ġarrbu lil Alla fix-xagħri. R/.
U nsew ’l Alla, li salvahom,
li għamel ħwejjeġ kbar fl-Eġittu,
għeġubijiet fl-art ta’ Ħam,
ħwejjeġ tal-biża’ fil-Baħar tal-Qasab. R/.
Kien għamel il-ħsieb li jeqridhom,
li ma kienx għal Mosè, il-magħżul tiegħu,
li waqaf fis-selħa tas-sur quddiemu,
biex iberrdu u ma jeqridhomx. R/.
Akklamazzjoni qabel l-Evanġelju
Lq 7, 16
Hallelujah. R/. Hallelujah
Profeta kbir qam fostna,
u Alla żar il-poplu
tiegħu.
R/. Hallelujah
Evanġelju
Mara, il-fidi tiegħek
kbira!
Mt 15, 21-28
Qari mill-Evanġelju skont San Mattew
F’dak iż-żmien, Ġesù ħareġ minn
hemm u telaq lejn Tir u Sidon. U ħarġet waħda
mara Kangħanija minn dawk
l-inħawi, u qabdet tgħajjat u tgħid: “Ħenn għalija, Mulej, Bin David! Binti għandha fiha xitan, u magħdura ħafna”. Iżda hu ma weġibhiex kelma.
Resqu lejh id-dixxipli tiegħu, jitolbuh u jgħidulu: “Eħles minnha, għax ġejja tgħajjat warajna”. Imma hu qalilhom:
“Ma ġejtx mibgħut ħlief għan-nagħaġ li ntilfu
mid-dar ta’ Iżrael”.
Iżda hi resqet, inxteħtet quddiemu u qaltlu: “Għinni, Mulej!”. Hu weġibha: “Mhux sewwa tieħu
l-ħobż tal-ulied
u tixħtu lill-ġriewi”. “Hekk hu, Mulej”, qaltlu:
“iżda l-ġriewi wkoll jieklu l-frak li jaqa’ minn fuq il-mejda ta’ sidienhom”.
Imbagħad wieġeb Ġesù u qalilha: “Mara, il-fidi tiegħek kbira! Ħa jsirlek kif tixtieq”.
U minn dak
il-ħin stess bintha fieqet.
Il-Kelma tal-Mulej
R/. Tifħir lilek Kristu