Is-Sitta u Għoxrin Ġimgħa taż-Żmien ta’ Matul is-Sena
It-Tlieta
Qari I
Għaliex jingħata d-dawl lill-imsejken?
Ġob 3, 1-3.11-17.20-23
Qari mill-Ktieb ta’ Ġob
Ġob fetaħ fommu, seħet jum twelidu, 2u qabad jgħid:
“Qerda għal jum twelidi,
għal-lejl li qal: “Tnissel raġel”.
Għaliex ma mittx fi ħdan ommi?
Għaliex ma bqajtx fil-ġuf u mitt?
Għaliex laqgħuni l-irkupptejn?
Għaliex sidrejn biex nerda’?
Kieku issa jien mimdud u sieket,
kont inkun rieqed u mistrieħ mas-slaten u l-kunsillieri tal-art,
jew mal-kbarat li bnew mill-ġdid il-ħerbiet;
u mal-prinċpijiet li kellhom id-deheb, li mlew djarhom bil-fidda.
Għaliex ma kontx bħal rimi moħbi,
bħat-trabi li qatt ma raw id-dawl?
Hemm il-ħżiena jehdew mill-inkwiet,
u l-għajjenin isibu l-mistrieħ.
Għaliex jingħata d-dawl lill-imsejken,
u l-ħajja lil min qalbu kollha mrar?
Lil dawk li jixxennqu għall-mewt bla ma tiġihom,
u jħaffru għaliha aktar milli għal teżor;
li jifirħu u jaqbżu bil-ferħ, jogħxew meta jsibu l-qabar?
Għaliex il-ħajja lil min triqtu magħluqa,
li Alla għalaq minn kull naħa?”
Il-Kelma tal-Mulej
R/. Irroddu ħajr lil Alla
Salm Responsorjali
Salm 87 (88), 2-3.4-5.6.7-8
R/. (3a): Ħa tasal it-talba tiegħi għandek, Mulej
Mulej, Alla tiegħi, binhar jien ngħajjat,
billejl jien nitniehed quddiemek.
Ħa tasal it-talba tiegħi għandek,
agħti widen għat-talba tiegħi. R/.
Għax ruħi mimlija bil-hemm,
lejn il-qabar qed toqrob ħajti.
Jien magħdud ma’ min nieżel fil-ħofra,
sirt qisni bniedem bla saħħa. R/.
Fost il-mejtin hu friexi,
bħall-maqtulin mimduda fil-qabar,
li fihom ma tiftakarx iżjed
u mhumiex aktar taħt idejk. R/.
Inti xħettni f’qiegħ il-ħofra,
fid-dlamijiet, f’qiegħ l-art.
Fuqi tagħfas il-qilla tiegħek,
fuqi tfajt l-imwieġ kollha tiegħek. R/.
Akklamazzjoni qabel l-Evanġelju
Mk 10, 45
Hallelujah. R/. Hallelujah
Bin il-bniedem ġie biex jaqdi
u biex jagħti ħajtu b’fidwa għall-kotra.
R/. Hallelujah
Evanġelju
B’rieda sħiħa dar u telaq lejn Ġerusalemm.
Lq 9, 51-56
Qari mill-Evanġelju skont San Luqa
Meta qorob għalih iż-żmien li fih kellu jittieħed mid-dinja, Ġesů b’rieda sħiħa dar u telaq lejn Ġerusalemm. U bagħat xi messaġġiera qablu li, huma u sejrin, daħlu f’raħal tas-Samarija biex iħejjulu fejn joqgħod. Iżda hemmhekk ma laqgħuhx, billi hu kien sejjer Ġerusalemm. Meta raw dan, id-dixxipli Ġakbu u Ġwanni qalulu: “Mulej, tridx ngħidu lin-nar jinżel mis-sema u jeqridhom?”. Iżda hu dar fuqhom u ċanfarhom. U marru f’raħal ieħor.
Il-Kelma tal-Mulej
R/. Tifħir lilek Kristu