Għall-Quddies tas-Sibt filgħaxija fittex il-Qari tal-Ħadd minn hawn ...
It-Tieni Ġimgħa taż-Żmien ta’ Matul is-Sena
Is-Sibt
Qari I
Kif waqgħu l-qalbenin, waqgħu fil-ġlied!
2 Sam 1, 1-4.11-12.19.23-27
Qari mit-Tieni Ktieb ta’ Samwel
F’dak iż-żmien, David raġa’ lura mit-taqtigħa mal-Għamalekin, u kien ilu jumejn f’Siklag. Fit-tielet jum ġie raġel mill-kamp minn ħdejn Sawl bi ħwejġu mċarrta u t-trab fuq rasu. Kif wasal quddiem David, intafa’ wiċċu fl-art u sellimlu. U David staqsieh: “Mnejn ġej?” u dak wieġbu: “Ħrabt mill-kamp ta’ Iżrael”. U David qallu: “X’aħbarijiet għandek minn hemm? Għidli, isa!” U wieġbu: “Il-poplu ħarab mit-taqbida, ħafna minnhom waqgħu u mietu; u mietu wkoll Sawl u Ġonatan, ibnu”.
David qabad u ċarrat ħwejġu, u hekk għamlu wkoll in-nies li kellu miegħu. U bdew inewħu u jibku, u samu sa filgħaxija għal Sawl, u għal ibnu Ġonatan, u għall-poplu tal-Mulej, u għad-dar ta’ Iżrael, għax kienu nqerdu bix-xabla. U qal David:
“Kif intemm ġmielek, Iżrael, fuq l-għoljiet!
Kif waqgħu l-qalbenin!
Sawl u Ġonatan, dħulin u maħbubin,
ma nfirdux la f’ħajjithom, la f’mewthom.
Eħfef mill-ajkli, aqwa mill-iljuni!
Xbejbiet ta’ Iżrael, ibku lil Sawl;
libbiskom bil-kreżmi u l-brukkat,
żejnilkom ilbieskom bid-deheb!
Kif waqgħu l-qalbenin,
waqgħu fil-ġlied!
Ġonatan fuq għoljietek maqtul.
Jien imgħolli għalik, Ġonatan ħija,
l-għożża tiegħi u l-għaxqa għalija!
Imħabbtek għalija egħżeż minn imħabbet in-nisa!
Kif waqgħu l-qalbenin;
u ntilef tagħmir il-gwerra!”
Il-Kelma tal-Mulej
R/. Irroddu ħajr lil Alla
Salm Responsorjali
Salm 79 (80), 2-3.5-7
R/. (4b): Itfa’ fuqna d-dija ta’ wiċċek, Mulej, u nkunu salvi
O Ragħaj ta’ Iżrael, agħti widen,
int li tmexxi bħal merħla ’l Ġużeppi.
Int li qiegħed fuq il-kerubini,
iddi quddiem Efrajm, Benjamin u Manassi.
Qajjem il-qawwa tiegħek,
u ejja ħa ssalvana. R/.
Mulej, Alla tal-eżerċti,
kemm se ddum tinkorla
minkejja t-talb tal-poplu tiegħek?
Tmajthom il-ħobż magħġun bid-dmugħ,
sqejthom id-dmugħ bix-xaba’.
Għamilt minna t-tilwim tal-ġirien tagħna,
l-għedewwa tagħna jiddieħku bina. R/.
Akklamazzjoni qabel l-Evanġelju
ara Atti 16, 14b
Hallelujah. R/. Hallelujah
Iftħilna qalbna Mulej
biex nifhmu dak li jgħid Ibnek.
R/. Hallelujah
Evanġelju
Qrabatu qalu li tilef moħħu.
Mk 3, 20-21
Qari mill-Evanġelju skont San Mark
F’dak iż-żmien, Ġesů mar id-dar, u l-kotra reġgħet inġemgħet, hekk li anqas biss setgħu jieklu. Qrabatu, malli semgħu, ħarġu biex iżommuh, għax qalu li tilef moħħu.
Il-Kelma tal-Mulej
R/. Tifħir lilek Kristu