Għall-Quddies tas-Sibt filgħaxija fittex il-Qari tal-Ħadd minn hawn ...
It-Tlettax-il Ġimgħa taż-Żmien ta’ Matul is-Sena
Is-Sibt
Qari I
Ġakobb ħa post ħuh u seraqlu l-barka li kienet għalih.
Ġen 27, 1-5.15-29
Qari mill-Ktieb tal-Ġenesi
Meta Iżakk kien xjieħ u għajnejh kienu ċċajprulu tant li ma kienx baqa’ jara, sejjaħ lil ibnu l-kbir Għesaw u qallu: “Ibni”. U dan wieġbu: “Hawn jien”. U kompla jgħidlu: “Hawn jien, xjeħt, u ma nafx meta se mmut. Issa aqbad it-tagħmir tiegħek, il-ħorġa u l-qaws tiegħek, u mur fir-raba’ u aqbadli l-kaċċa; u mbagħad agħmilli ikla tajba kif inħobb jien, u ġibhieli ħalli nikolha u nbierkek qabel ma mmut”.
Rebekka kienet qiegħda tissamma’ meta Iżakk kien qiegħed ikellem lil Għesaw, ibnu. U Għesaw telaq lejn ir-raba’ għall-kaċċa, biex iġib xi ħaġa d-dar.
U Rebekka ħadet l-aħjar ilbies ta’ Għesaw binha l-kbir, li kienu għandha d-dar, u libbsithom lil Ġakobb, binha ż-żgħir. U ksietlu idejh u l-artab ta’ għonqu bil-ġlud tal-gidjien. U hi tat f’idejn Ġakobb, binha, l-ikel tajjeb u l-ħobż.
U hu mar ħdejn missieru u qallu: “Missier”. U dan wieġbu: “Hawn jien. Min inti, ibni?”. U Ġakobb wieġeb lil missieru: “Jiena Għesaw, il-kbir tiegħek. Għamilt kif għedtli. Qum, isa, u kul mill-kaċċa tiegħi, biex imbagħad int tberikni”. U Iżakk qal lil ibnu: “Kif inhi din li sibtha hekk malajr!” U hu wieġbu: “Għax il-Mulej ġabhieli quddiemi”. U Iżakk qal lil Ġakobb: “Ersaq ’l hawn, ħa mmissek, ibni, u nara jekk intix ibni Għesaw jew le”.
U Ġakobb resaq lejn missieru Iżakk u dan messu u qal: “Il-leħen, leħen Ġakobb, imma l-idejn, idejn Għesaw”. U ma għarfux, għax idejh kienu qishom l-idejn muswafa ta’ ħuh Għesaw; u bierku.
U staqsieh: “Inti tassew ibni Għesaw?”. U hu wieġbu: “Jien hu”. U qallu: “Newwilli, mela, ħalli niekol mill-kaċċa ta’ ibni, biex inbierkek”. U newwillu l-ikel, u kiel, u ġieblu l-inbid, u xorob.
U Iżakk missieru qallu: “Ersaq ’l hawn u busni, ibni”. U hu resaq u biesu. Iżakk xammem ir-riħa ta’ lbiesu, u bierku u qallu:
“Ara, riħet ibni,
bħar-riħa ta’ għalqa, imbierka mill-Mulej!
Jagħtik Alla min-nida tas-smewwiet,
u mill-frott tal-art,
kotra ta’ qamħ u nbid.
Lilek għad jaqdu l-ġnus,
u quddiemek imilu l-popli.
Int tkun l-aqwa fost ħutek,
u quddiemek imilu wlied ommok.
Misħut minn jisħtek,
imbierek min ibierkek”.
Il-Kelma tal-Mulej
R/. Irroddu ħajr lil Alla
Salm Responsorjali
Salm 134 (135), 1-2.3-4.5-6
R/. (3a): Faħħru l-Mulej, għax hu tajjeb!
Faħħru isem il-Mulej,
faħħruh, qaddejja tal-Mulej,
intom li qegħdin f’dar il-Mulej,
fil-wesgħat ta’ madwar it-tempju ta’ Alla tagħna. R/.
Faħħru l-Mulej, għax hu tajjeb,
għannu lil ismu, għax hu sabiħ.
Għax għażel il-Mulej ’il Ġakobb,
lil Iżrael, biex ikun il-poplu tiegħu. R/.
Naf tassew li kbir il-Mulej;
fuq l-allat kollha Alla Sidna.
Kulma jogħġbu l-Mulej jagħmlu fis-smewwiet u fuq l-art,
fil-baħar u f’qiegħ l-ibħra kollha. R/.
Akklamazzjoni qabel l-Evanġelju
Ġw 10, 27
Hallelujah. R/. Hallelujah
In-nagħaġ tiegħi jisimgħu leħni, jgħid il-Mulej
u jiena nagħrafhom, u huma jimxu warajja.
R/. Hallelujah
Evanġelju
Huwa l-mistednin tal-għarus se jsewdu qalbhom sakemm l-għarus ikun għadu magħhom?
Mt 9, 14-17
Qari mill-Evanġelju skont San Mattew
F’dak iż-żmien resqu lejn Ġesù id-dixxipli ta’ Ġwanni u qalulu: “Għaliex aħna u l-Fariżej insumu, u d-dixxipli tiegħek ma jsumux?”. Qalilhom Ġesù: “Huwa l-mistednin tal-għarus se jsewdu qalbhom sakemm l-għarus ikun għadu magħhom? Imma jasal il-jum meta l-għarus jeħduhulhom minn magħhom, u mbagħad isumu. Ħadd ma jraqqa’ libsa qadima b’biċċa drapp ġdida, għax inkella r-roqgħa ssellet il-libsa, u t-tiċrita tikber. Anqas ma jqiegħdu l-inbid il-ġdid f’damiġġani qodma tal-ġild, għax inkella d-damiġġani jinfaqgħu, l-inbid jixtered, u d-damiġġani jintilfu. Iżda nbid ġdid jitfgħuh f’damiġġani ġodda, u hekk iżommu t-tnejn”.
Il-Kelma tal-Mulej
R/. Tifħir lilek Kristu