It-Tlettax-il Ġimgħa taż-Żmien ta’ Matul is-Sena
Il-Ġimgħa
Qari I
Nibgħat il-ġuħ fl-art; mhux il-ġuħ tal-ħobż, iżda għas-smigħ tal-kelma tal-Mulej.
Għam 8, 4-6.9-12
Qari mill-Ktieb tal-Profeta Għamos
“Isimgħu dan,
intom li tikkalpestaw l-imsejken,
intom li ttemmu l-foqra tal-pajjiż,
u tgħidu: “Meta se jgħaddi l-qamar ġdid,
ħa nbigħu l-qamħ.
Meta se jgħaddi s-Sibt ħa nferrgħu x-xgħir?
Inċekknu l-efa, u nkabbru x-xekel,
u nqarrqu b’miżien falz.
Nixtru bil-flus il-foqra,
u b’żewġt iqrieq l-imsejken,
u nbigħu sal-karfa tal-qamħ”.
“Jiġri f’dak il-jum
– oraklu ta’ Sidi l-Mulej –
li jiena nniżżel ix-xemx f’nofsinhar,
u ndallam l-art binhar!
Għad inbiddel il-festi tagħkom f’jiem ta’ vistu,
u l-għana kollu tagħkom fi krib;
illibbes il-ġenbejn bl-ixkejjer,
u nqarweż l-irjus kollha.
Dak il-Jum nagħmlu bħal jum ta’ vistu għall-iben il-waħdieni,
u jibqa’ sal-aħħar bħal jum ta’ mrar.
Ara, għad jiġi żmien
– oraklu ta’ Sidi l-Mulej –
meta nibgħat il-ġuħ fl-art;
mhux il-ġuħ tal-ħobż, lanqas l-għatx għall-ilma,
iżda għas-smigħ tal-kelma tal-Mulej”.
Jibdew iduru minn baħar għal ieħor,
u jiġġerrew mit-Tramuntana għal-Lvant,
ifittxu l-kelma tal-Mulej,
u ma jsibuhiex.
Il-Kelma tal-Mulej
R/. Irroddu ħajr lil Alla
Salm Responsorjali
Salm 118 (119), 2.10.20.30.40.131
R/. (Mat 4, 4): Il-bniedem mhux bil-ħobż biss jgħix,
iżda b’kull kelma li toħroġ minn fomm Alla
Henjin dawk li jħarsu l-preċetti tiegħu,
u li jfittxuh b’qalbhom kollha.
B’qalbi kollha jiena nfittxek;
tħallinix nitbiegħed mill-kmandamenti tiegħek. R/.
Tinfena qalbi l-ħin kollu
bix-xewqa tad-digrieti tiegħek.
Jiena għażilt it-triq tas-sewwa;
ħtart għalija d-digrieti tiegħek. R/.
Ara kif jiena mxennaq għall-preċetti tiegħek;
fil-ġustizzja tiegħek agħtini l-ħajja.
Niftaħ fommi u nieħu r-ruħ,
għax nixxennaq għall-kmandamenti tiegħek. R/.
Akklamazzjoni qabel l-Evanġelju
Mt 11, 28
Hallelujah. R/. Hallelujah
Ejjew għandi, intom ilkoll li tinsabu mħabbtin u mtaqqlin,
u jiena nserraħkom, jgħid il-Mulej.
R/. Hallelujah
Evanġelju
It-tabib ma jeħtiġuhx dawk li huma f’saħħithom, iżda l-morda. Ħniena rrid, u mhux sagrifiċċju.
Mt 9, 9-13
Qari mill-Evanġelju skont San Mattew
F’dak iż-żmien, Ġesù ra wieħed bilqiegħda quddiem il-mejda tat-taxxi; kien jismu Mattew. “Ejja warajja!” qallu. Dak qam u mar warajh. U ġara li, kif qagħad għandu għall-mejda, ġew bosta pubblikani u midinbin u qagħdu madwar il-mejda ma’ Ġesù u d-dixxipli tiegħu. Meta raw dan il-Fariżej qalu lid-dixxipli: “Għaliex jiekol malpubblikani u l-midinbin l-Imgħallem tagħkom?”. Hu semagħhom, u qal: “It-tabib ma jeħtiġuhx dawk li huma f’saħħithom, iżda l-morda. Mela morru tgħallmu x’jiġifieri: “Ħniena rrid, u mhux sagrifiċċju”; għax mhux lill-ġusti ġejt insejjaħ, iżda lill-midinbin”.
Il-Kelma tal-Mulej
R/. Tifħir lilek Kristu