It-Tmien Ġimgħa taż-Żmien ta’ Matul is-Sena
It-Tnejn
Qari I
Dur lura lejn l-Għoli, u warrab mill-ħażen.
Sir 17, 20-28 (gr. 24-29)
Qari mill-Ktieb ta’ Bin Sirak
Lil dawk li jindmu Alla jħallihom jerġgħu lura,
u jsaħħaħ lil dawk li ma jkunux jifilħu jżommu aktar.
Erġa’ lura lejn il-Mulej, u d-dnub ħallih warajk,
u warrab dak li jfixklek.
Dur lura lejn l-Għoli, u warrab mill-ħażen,
u obgħod għall-aħħar dak li hu ta’ min jistmerru.
Lill-Għoli min se jfaħħru f’Art l-Imwiet
minflok il-ħajjin li jroddulu ħajr?
Għall-mejjet bħalkieku ma kien xejn, intemm radd il-ħajr;
min hu ħaj u f’sikktu jfaħħar il-Mulej.
Kemm hi kbira l-ħniena tal-Mulej,
u l-maħfra tiegħu għal dawk li jerġgħu lura lejh!
Il-Kelma tal-Mulej
R/. Irroddu ħajr lil Alla
Salm Responsorjali
Salm 31 (32), 1-2.5.6.7-8
R/. (11a): Ifirħu, twajbin, u thennew fil-Mulej
Hieni l-bniedem li ħtijietu maħfura,
li għandu d-dnub tiegħu mistur!
Hieni l-bniedem li ebda ħażen ma jgħoddlu l-Mulej,
u ma għandu ebda qerq f’qalbu! R/.
Id-dnub tiegħi jien stqarrejtlek,
u l-ħażen tiegħi ma ħbejthulekx.
Jien għedt: “Quddiem il-Mulej nistqarr ħtijieti”.
U int ħfirtli l-ħażen tad-dnub tiegħi. R/.
Għalhekk kull min hu twajjeb
lilek jitlob fi żmien in-niket.
Jekk ifuru ilmijiet kotrana,
lilu qatt ma jilħquh. R/.
Int kenn għalija, mit-taħbit tħarisni,
iddawwarni u tferraħni bil-ħelsien tiegħek.
“Ngħallmek u nurik it-triq li għandek tieħu;
inwissik, u nżomm għajnejja fuqek”. R/.
Akklamazzjoni qabel l-Evanġelju
2 Kor 8, 9
Hallelujah. R/. Hallelujah
Ġesù Kristu, li għad li kien għani, ftaqar minħabba fikom,
sabiex intom tistagħnu permezz tal-faqar tiegħu.
R/. Hallelujah
Evanġelju
Mur bigħ li għandek! Ejja u imxi warajja!
Mk 10, 17-27
Qari mill-Evanġelju skont San Mark
F’dak iż-żmien, waqt li Ġesù kien se jaqbad it-triq, mar fuqu wieħed jgħaġġel, niżel għarkupptejh quddiemu u qallu: “Mgħallem tajjeb, x’għandi nagħmel biex nikseb il-ħajja ta’ dejjem?”. Ġesù qallu: “Għaliex qiegħed issejjaħli tajjeb? Ħadd ma hu tajjeb ħlief Alla biss. Inti l-kmandamenti tafhom: la toqtolx, la tiżnix, la tisraqx, la tixhidx fil-falz, la tiħux bil-qerq dak li hu ta’ ħaddieħor; weġġaħ lil missierek u ’l ommok”.
U dak wieġbu u qallu: “Mgħallem, jiena dan kollu ili nħarsu minn żgħożiti”. Imbagħad Ġesù xeħet fuqu ħarsa ta’ mħabba u qallu: “Ħaġa waħda tonqsok: mur bigħ li għandek, agħtih lill-fqar, u jkollok teżor fis-sema; imbagħad ejja u imxi warajja”. Imma għal dan il-kliem ir-raġel qarras wiċċu u telaq b’qalbu sewda, għaliex kellu bosta ġid.
Ġesù mbagħad ħares ħarsa madwaru u qal lid-dixxipli tiegħu: “Kemm hi iebsa għall-għonja li jidħlu fis-Saltna ta’ Alla!”. Id-dixxipli stagħġbu għal din il-kelma, imma Ġesù raġa’ qalilhom: “Kemm hi iebsa, uliedi, li wieħed jidħol fis-Saltna ta’ Alla! Eħfef li ġemel jgħaddi minn għajn ta’ labra milli wieħed għani jidħol fis-Saltna ta’ Alla”. Huma stagħġbu wisq aktar, u bdew jgħidu wieħed lil ieħor: “Mela min jista’ jsalva?”. Ġesù ħares lejhom u qalilhom: “Għall-bnedmin dan ma jistax ikun, imma għal Alla iva; għax għal Alla kollox jista’ jkun”.
Il-Kelma tal-Mulej
R/. Tifħir lilek Kristu