ITTRA APPOSTOLIKA
F’GĦAMLA
TA’ “MOTU PROPRJU”
TAL-QDUSIJA TIEGĦU
FRANĠISKU
“VOS ESTIS LUX MUNDI”
“Intom id-dawl
tad-dinja. Belt li tkun qiegħda
fuq muntanja ma tistax tinħeba”
(Mt 5:14). Sidna Ġesù Kristu
jsejjaħ lil kull fidil biex ikun
eżempju mdawwal ta’ virtù,
integrità u qdusija. Ilkoll kemm
aħna, fil-fatt, aħna msejħin
biex nagħtu xhieda konkreta
tal-fidi fi Kristu fil-ħajja
tagħna u, b’mod partikulari,
fir-relazzjoni tagħna
mal-proxxmu.
L-atti kriminali ta’ abbuż
sesswali joffendu lis-Sinjur
Tagħna, jikkawżaw danni fiżiċi,
psikoloġiċi u spiritwali
lill-vittmi, u jagħmlu ħsara
lill-komunità tal-fidili. Biex
fenomeni bħal dawn, fl-għamliet
kollha tagħhom, ma jseħħux
iżjed, hi meħtieġa konverżjoni
kontinwa u profonda tal-qlub,
żgurata minn azzjonijiet
konkreti u effikaċi fil-Knisja
li jinvolvu lil kulħadd, biex
hekk il-qdusija personali u
l-impenn morali jistgħu jgħinu
biex jippromovu l-kredibbiltà
sħiħa tat-tħabbira tal-Vanġelu u
l-effikaċja tal-missjoni
tal-Knisja. Dan isir possibbli
biss bil-grazzja tal-Ispirtu
s-Santu msawwab fil-qlub, għax
irridu niftakru dejjem fi kliem
Ġesù: “Mingħajri ma tistgħu
tagħmlu xejn” (Ġw 5:15).
Imqar jekk diġà sar ħafna,
jeħtieġ nissoktaw nitgħallmu
mil-lezzjonijiet qarsa
tal-imgħoddi, biex inħarsu
bit-tama lejn il-ġejjieni.
Din ir-responsabbiltà taqa’,
qabelxejn, fuq is-suċċessuri
tal-Appostli, imqiegħda fuq
quddiem minn Alla għat-treġija
pastorali tal-Poplu tiegħu, u
tesiġi minnhom l-impenn li
jsegwu mill-qrib il-passi
tal-Imgħallem Divin. Fil-fatt,
minħabba fil-ministeru tagħhom,
huma jrieġu “l-Knejjes
partikolari fdati f’idejhom
bħala vigarji u delegati ta’
Kristu, bil-parir it-tajjeb,
bil-persważjoni u bl-eżempju,
iżda wkoll bl-awtorità u
bis-setgħa sagra tagħhom. Iżda
huma ma jużawx din l-awtorità u
din is-setgħa jekk mhux biex
iwettqu l-merħla tagħhom
fil-verità u fil-qdusija, għax
huma jiftakru sewwa li min hu
l-akbar irid isir bħall-iżgħar u
min jikkmanda bħal min iservi”
(Konċilju Ekumeniku Vatikan II,
Kostituzzjoni Lumen gentium,
27). Dak li b’mod iżjed urġenti
jirrigwarda lis-suċċessuri
tal-Appostli, jolqot lil dawk
kollha li b’diversi modi
għandhom xi ministeru
fil-Knisja, jistqarru l-kunsilli
evanġeliċi jew huma msejħa jaqdu
lill-Poplu Nisrani. Għalhekk,
tajjeb li jiġu adottati fuq
livell universali proċeduri dwar
il-prevenzjoni u li jeħduha
kontra dawn l-atti kriminali li
qed jittradixxu l-fiduċja
tal-fidili.
Nixtieq li dan l-impenn jiġi
attwat b’mod għalkollox
ekkleżjali, u għalhekk ikun
espressjoni tal-komunjoni li
żżommna magħquda, fis-smigħ
reċiproku u miftuħ għas-sehem
ta’ dawk kollha li għandhom għal
qalbhom dan il-proċess ta’
konverżjoni.
Għaldaqstant,
niddisponi dan li ġej:
TITLU
I
DISPOŻIZZJONIJIET ĠENERALI
Art. 1 –
Ambitu ta’
applikazzjoni
§1.
Dawn in-normi
jiġu applikati f’każ ta’
rapporti li jiġbdu l-attenzjoni
dwar kjeriċi jew membri ta’
Istituti ta’ ħajja kkonsagrata
jew ta’ Soċjetajiet ta’ ħajja
appostolika fejn jidħlu:
a)
delitti kontra
s-sitt kmandament tad-Dekalogu
li jikkonsistu f’dan li ġej:
i.
li jkunu ġiegħlu
lil xi ħadd, bi vjolenza jew
theddida jew b’abbuż ta’
awtorità, jagħmel jew joqgħod
għal atti sesswali;
ii. it-twettiq ta’ atti sesswali
ma’ minorenni jew ma’ persuna
vulnerabbli;
iii. il-produzzjoni,
l-esebizzjoni, il-pussess jew
it-tqassim, anki b’mod
elettroniku, ta’ materjal
pedopornografiku, kif ukoll min
ikun ħajjar jew wassal minorenni
jew persuna vulnerabbli biex
jieħu sehem f’esebizzjonijiet
pornografiċi;
b) kondotti mwettqa mis-suġġetti
msemmija f’artiklu 6, li
jikkonsistu f’azzjonijiet jew
omissjonijiet bil-ħsieb li
jxekklu jew jevitaw l-indaġni
ċivili jew l-indaġni kanonika,
amministrattiva jew penali,
fil-konfront ta’ kjeriku jew ta’
reliġjuż fejn jidħlu delitti
msemmija fl-ittra a) ta’ dan
il-paragrafu.
§2.
Għall-iskop ta’
dawn in-normi, dawn it-termini
jfissru kif ġej:
a)
“minorenni”:
kull persuna ta’
età inqas minn tmintax-il sena
jew li l-liġi tqisha ekwivalenti
għal dik l-età;
b)
“persuna
vulnerabbli”:
kull peruna fi stat ta’ mard,
ta’ defiċjenza fiżika jew
psikika, jew ċaħda tal-libertà
personali li fil-fatt, anki jekk
okkażjonalment, tillimitalha
l-kapaċità tal-ħsieb jew
tar-rieda jew ta’ reżistenza
għall-offiża;
ċ)
“materjal
pedopornografiku”:
kull rappreżentazzjoni ta’
minorenni, indipendentement
mill-mezz użat, involut
f’attivitajiet sesswali
espliċiti, reali jew simulati, u
kull rappreżentazzjoni ta’
organi sesswali ta’ minorenni
għal skopijiet prevalentement
sesswali.
Art. 2 –
Kif jiġu milqugħa
r-rapporti u l-protezzjoni
tal-informazzjoni
§1.
Waqt li jżommu
f’moħħhom l-indikazzjonijiet
eventwalment adottati
mill-Konferenzi Episkopali,
mis-Sinodi tal-Isqfijiet
tal-Knejjes Patrijarkali u
tal-Knejjes Arċiveskovili
Maġġuri rispettivi, jew
mill-Kunsilli tal-Ġerarki
tal-Knejjes Metropolitani sui
iuris, id-Djoċesijiet jew
l-Eparkiji, waħidhom jew
flimkien, għandhom
jistabbilixxu, fi żmien sena
minn meta jidħlu fis-seħħ dawn
in-normi, sistema waħda jew
iżjed, stabbli u faċilment
aċċessibbli għall-pubbliku biex
jista’ jagħmel rapporti, anki
permezz tat-twaqqif ta’ uffiċċju
ekkleżjastiku apposta.
Id-Djoċesijiet u l-Eparkiji
jgħarrfu lir-Rappreżentant
Pontifiċju bit-twaqqif
tas-sistemi msemmija f’dan
il-paragrafu.
§2.
L-informazzjoni
msemmija f’dan l-artiklu tiġi
mħarsa u ttrattata b’mod li
jiggarantixxi s-sigurtà,
l-integrità u r-riservatezza
tagħha, skont il-kanoni
471, 2° CIC
u
244 §2, 2° CCEO.
§3.
Ħlief għal dak
stabbilit mill-artiklu
3 §3,
l-Ordinarju li
rċieva r-rapport għandu jgħaddih
bla dewmien lill-Ordinarju
tal-post fejn seħħu l-fatti, kif
ukoll lill-Ordinarju proprju
tal-persuna rrappurtata, li
jipproċedu skont kif tipprevedi
l-liġi għall-każ speċifiku.
§4.
Għall-għanijiet
ta’ dan it-titlu,
għad-Djoċesijiet huma ekwiparati
l-Eparkiji u għall-Ordinarju hu
ekwiparat il-Ġerarka.
Art. 3 –
Rappurtar
§1.
Ħlief għall-każi
previsti fil-kanoni
1548 §2 CIC
u
1229 §2 CCEO,
kull darba li
kjeriku jew membru ta’ Istitut
ta’ ħajja kkonsagrata jew ta’
Soċjetà ta’ ħajja appostolika
jiġi mgħarraf jew ikollu
raġunijiet validi biex jemmen li
seħħ wieħed mill-fatti msemmija
fl-artiklu 1, hu għandu
l-obbligu li jirrapporta l-fatt
minnufih lill-Ordinarju tal-post
fejn seħħu l-fatti jew lil
Ordinarju ieħor fost dawk
imsemmija fil-kanoni
134 CIC
u
984 CCEO,
ħlief għal dak
stabbilit minn
§3
ta’ dan
l-artiklu.
§2.
Kulħadd jista’
jippreżenta rapport dwar
il-kondotti msemmija fl-artiklu
1, billi jinqeda
bil-modalitajiet imsemmija
fl-artiklu preċedenti jew b’kull
mod ieħor adegwat.
§3.
Meta r-rapport hu
dwar waħda mill-persuni indikati
fl-artiklu 6, dan għandu jiġi
indirizzat lill-Awtorità
indikata mill-artikli 8 u 9.
Ir-rapport dejjem jista’ jiġi
indirizzat lis-Santa Sede,
direttament jew permezz
tar-Rappreżentant Pontifiċju.
§4.
Ir-rapport għandu
jkollu fih id-dettalji kollha
possibbli, bħal indikazzjonijiet
tal-ħin u tal-post tal-fatti,
tal-persuni involuti jew
infurmati, kif ukoll ta’ kull
ċirkustanza oħra li tista’ tkun
ta’ siwi biex issir valutazzjoni
tajba tal-fatti.
§5.
L-informazzjoni
tista’ tinkiseb ukoll ex
officio.
Art. 4 –
Protezzjoni lil
min qed jirrapporta
§1.
Il-fatt li wieħed
jagħmel rapport skont in-norma
tal-artiklu 3 ma jikkostitwixxi
l-ebda vjolazzjoni
tal-kunfidenzjalità
tal-uffiċċju.
§2.
Ħlief għal dak
previst fil-kanoni
1390 CIC
u fil-kanoni
1452
u
1454 CCEO,
kull preġudizzju,
ritaljazzjoni jew
diskriminazzjoni minħabba l-fatt
li jkun ġie ppreżentat rapport
huma pprojbiti u jistgħu
jikkostitwixxi l-kondotta
msemmija fl-artiklu 1
§1,
ittra
b).
§3.
Min jagħmel
ir-rapport ma jista’ jiġi marbut
bl-ebda silenzju dwar
il-kontenut tiegħu.
Art. 5 –
Kura tal-persuni
§1.
L-Awtoritajiet
ekkleżjastiċi jħabirku biex dawk
li jaffermaw li ġew offiżi,
flimkien mal-familji tagħhom,
jiġu ttrattati b’dinjità u
rispett, u joffrulhom, b’mod
paritikulari:
a) akkoljenza, smigħ u appoġġ,
anki permezz ta’ servizzi
speċifiċi;
b) għajnuna spiritwali;
ċ) għajnuna medika, terapewtika
u psikoloġika, skont ma jitlob
il-każ partikulari.
§2.
Jiġu mħarsa
l-fama tajba u l-privatezza
tal-persuni involuti, kif ukoll
il-kunfidenzjalità
tal-informazzjoni personali.
TITLU
II
DISPOŻIZZJONIJIET KONKRETI
L-ISQFIJIET U L-EKWIVALENTI
TAGĦHOM
Art. 6 –
Ambitu suġġettiv
ta’ applikazzjoni
In-normi ta’ proċeduri msemmija
taħt dan it-titlu huma dwar
il-kondotti msemmija fl-artiklu
1, imwettqa minn:
a)
Kardinali,
Patrijarki, Isqfijiet u Legati
tal-Papa ta’ Ruma;
b)
kjeriċi li huma
jew kienu fit-treġija pastorali
ta’ Knisja partikulari jew ta’
entità integrata fiha, Latina
jew Orjentali, inklużi
l-Ordinarjati Personali,
għall-fatti mwettqa durante
munere;
ċ)
kjeriċi li huma
jew kienu fit-treġija pastorali
ta’ Prelatura Personali,
għall-fatti mwettqa durante
munere;
d)
dawk li huma jew
kienu Moderaturi supremi ta’
Istituti ta’ ħajja kkonsagrata
jew ta’ Soċjetajiet ta’ ħajja
appostolika ta’ dritt
pontifiċju, kif ukoll ta’
Monasteru sui iuris,
għall-fatti mwettqa durante
munere.
Art. 7 –
Dikasteru
kompetenti
§1.
Għall-fini ta’
dan it-titlu, b’“Dikasteru
kompetenti” nifhmu
l-Kongregazzjoni għad-Duttrina
tal-Fidi, dwar id-delitti
riservati għaliha min-normi
attwalment fis-seħħ, kif ukoll,
fil-każi l-oħra kollha u skont
il-kompetenza li tagħtihom
il-liġi proprja tal-Kurja
Rumana:
- il-Kongregazzjoni
għall-Knejjes Orjentali;
- il-Kongregazzjoni
għall-Isqfijiet;
- il-Kongregazzjoni
għall-Evanġelizzazzjoni
tal-Popli;
- il-Kongregazzjoni għall-Kleru;
- il-Kongregazzjoni
għall-Istituti ta’ ħajja
kkonsagrata u s-Soċjetajiet ta’
ħajja appostolika.
§2.
Bl-għan li jiġi
żgurat l-aħjar kordinament,
id-Dikasteru kompetenti jgħarraf
bir-rapport u bl-eżitu
tal-indaġni lis-Segreterija
tal-Istat u d-Dikasteri l-oħra
direttament interessati.
§3.
Il-komunikazzjonijiet imsemmija
taħt dan it-titlu bejn
il-Metropolita u s-Santa Sede
jseħħu permezz tar-Rappreżentant
Pontifiċju.
Art. 8 –
Proċedura
applikabbli f’każ ta’ rapport
dwar Isqof tal-Knisja Latina
§1.
L-Awtorità li
tirċievi rapport tgħaddih kemm
lis-Santa Sede u kemm
lill-Metropolita tal-Provinċja
ekkleżjastika li fiha jkollha
d-domiċilju l-persuna
rrappurtata.
§2.
Jekk ir-rapport
hu fuq il-Metropolita, jew
is-Sede Metropolitana hi
vakanti, dan jintbagħat
lis-Santa Sede, jew anki
lill-Isqof suffraganju l-iżjed
anzjan skont il-promozzjoni, li
għalih, f’dan il-każ, japplikaw
id-dispożizzjonijiet li ġejjin
dwar il-Metropolita.
§3.
Jekk ir-rapport
hu fuq Legat Pontifiċju, dan
jintbagħat direttament
lis-Segreterija tal-Istat.
Art. 9 –
Proċedura
applikabbli fil-każ ta’
Isqfijiet tal-Knejjes Orjentali
§1.
Fil-każ ta’
rapport fuq Isqof ta’ Knisja
Patrijarkali, Arċiveskovili
Maġġuri jew Metropolitana sui
iuris, dan jintbagħat
lill-Patrijarka, Arċisqof
Maġġuri jew Metropolita
tal-Knisja sui iuris
rispettiv.
§2.
Fil-każ ta’
rapport fuq Metropolita ta’
Knisja Patrijarkali jew
Arċiveskovili Maġġuri, li
jeżerċita l-uffiċċju tiegħu
fit-territorju ta’ dawn
il-Knejjes, dan jintbagħat
lill-Patrijarka jew Arċisqof
Maġġuri rispettiv.
§3.
Fil-każi ta’
qabel, l-Awtorità li rċiviet
ir-rapport tibagħtu wkoll
lis-Santa Sede.
§4.
F’każ li
l-persuna rrappurtata tkun Isqof
jew Metropolita barra
mit-territorju tal-Knisja
Patrijarkali, Arċiveskovili
Maġġuri jew Metropolitana sui
iuris, ir-rapport jintbagħat
lis-Santa Sede.
§5.
Fil-każ ta’
rapport fuq Patrijarka, Arċisqof
Maġġuri, Metropolita ta’ Knisja
sui iuris jew Isqof
tal-Knejjes Orjentali sui
iuris l-oħra, dan jintbagħat
lis-Santa Sede.
§6.
Id-dispożizzjonijiet li ġejjin
dwar il-Metropolita japplikaw
għall-Awtorità ekkleżjastika li
lilha jsir ir-rapport skont kif
imsemmi f’dan l-artiklu.
Art. 10 –
L-ewwel obbligi
tal-Metropolita
§1.
Sakemm ma jkunx
evidenti lir-rapport huwa bla
bażi, il-Metropolita jitlob
minnufih lid-Dikasteru
kompetenti l-inkarigu biex jibda
l-indaġni. F’każ li
l-Metropolita jżomm li r-rapport
huwa evidentement bla bażi,
għandu jgħarraf b’dan
lir-Rappreżentant Pontifiċju.
§2.
Id-Dikasteru
għandu jaġixxi bla dewmien, u
xorta waħda fi żmien tletin jum
mill-ewwel rapport min-naħa
tar-Rappreżentant Pontifiċju jew
mit-talba għall-inkarigu
mill-Metropolita, billi jforni
l-istruzzjonijiet opportuni dwar
kif għandu jipproċedi fil-każ
speċifiku.
Art. 11 –
Affidament
tal-indaġni lil persuna
differenti mill-Metropolita
§1.
F’każ li
d-Dikasteru kompetenti jżomm
opportun li jafda l-indaġni lil
persuna differenti
mill-Metropolita, dan tal-aħħar
jiġi mgħarraf b’dan.
Il-Metropolita jgħaddi
l-informazzjoni kollha u
d-dokumenti relevanti
lill-persuna inkarigata
mid-Dikasteru.
§2.
Fil-każ
tal-paragrafu preċedenti,
id-dispożizzjonijiet li ġejjin
għall-Metropolita japplikaw
għall-persuna inkarigata biex
twettaq l-indaġni.
Art. 12 –
Żvolġiment
tal-indaġni
§1.
Il-Metropolita,
meta jkun irċieva l-inkarigu
mid-Dikasteru kompetenti u
f’rispett lejn l-istruzzjonijiet
li rċieva, personalment jew
permezz ta’ persuna idonja jew
iżjed:
a)
jiġbor
l-informazzjoni relevanti dwar
il-fatti;
b) jikseb aċċess
għall-informazzjoni u
għad-dokumenti meħtieġa
għall-fini tal-indaġni miżmuma
fl-arkivji tal-uffiċċji
ekkleżjastiċi;
ċ) jikseb il-kollaborazzjoni
tal-Ordinarji jew Ġerarki
l-oħra, fejn hu meħtieġ;
d) jitlob informazzjoni
lill-persuni u
lill-istituzzjonijiet, anki
ċivili, li jkunu jistgħu jfornu
elementi siewja għall-indaġni.
§2.
F’każ li jkun
meħtieġ jisma’ lil minorenni jew
persuna vulnerabbli,
il-Metropolita jadotta proċeduri
xierqa, li jirrispettaw l-istat
attwali tagħhom.
§3.
Fil-każ li jkollu
raġunijiet validi biex iżomm li
informazzjoni jew dokumenti dwar
l-indaġni jistgħu jiġu misruqa
jew meqruda, il-Metropolita
jadotta l-miżuri meħtieġa
għall-konservazzjoni tagħhom.
§4.
Anki meta jinqeda
b’persuni oħra, il-Metropolita
xorta jibqa’ responsabbli
għad-direzzjoni u
għall-iżvolġiment tal-indaġni,
kif ukoll għat-twettiq fil-ħin
tal-istruzzjonijiet imsemmija
fl-artiklu
10 §2.
§5.
Il-Metropolita
hu megħjun minn
nutar magħżul liberament skont
il-kanoni
483 §2 CIC
u
253 §2 CCEO.
§6.
Il-Metropolita
hu marbut jaġixxi
b’imparzjalità u mingħajr ebda
kunflitt ta’ interess. F’każ li
jsib ruħu f’kunflitt ta’
interess jew li ma jistax iżomm
l-imparzjalità meħtieġa biex
tiggarantixxi l-integrità
tal-indaġni, hu obbligat
jirrikuża lilu
nnifsu
u jgħarraf
biċ-ċirkustanza lid-Dikasteru
kompetenti.
§7.
Il-persuna
indagata tgawdi l-preżunzjoni
tal-innoċenza.
§8.
Il-Metropolita,
jekk mitlub mid-Dikasteru
kompetenti, jinforma
lill-persuna bl-indaġni li qed
issir dwarha, jisma’ x’għandha
x’tgħid fuq il-fatti u
jistedinha tippreżenta d-difiża
tagħha. F’dawn il-każi,
il-persuna indagata tista’
tagħmel użu minn assistenza
legali.
§9.
Kull tletin jum
il-Metropolita jibgħat
lid-Dikasteru kompetenti rapport
dwar fejn waslet l-indaġni.
Art. 13 –
Sehem ta’ persuni
kkwalifikati
§1.
Fi qbil
mad-direttivi eventwalment
maħruġa mill-Konferenza
Episkopali, mis-Sinodu
tal-Isqfijiet jew mill-Kunsill
tal-Ġerarki fuq l-għajnuna li
tista’ tingħata fl-indaġni,
il-Metropolita, l-Isqfijiet
tal-Provinċja rispettiva,
waħidhom jew flimkien, jistgħu
jistabbilixxu listi ta’ persuni
kwalifikati li minn fosthom
il-Metropolita jista’ jagħżel
dawk l-iżjed idonji biex
jassistuh fl-indaġni, skont
il-ħtieġa tal-każ u, b’mod
partikulari, waqt li jżomm
f’moħħu l-koperazzjoni li tista’
tiġi offruta mil-lajċi skont
il-kanoni
228 CIC
u
408 CCEO.
§2. Il-Metropolita
xorta hu liberu
li jagħżel persuni oħra daqstant
ieħor ikkwalifikati.
§3.
Kull min jgħin
lill-Metropolita fl-indaġni
għandu jaġixxi b’imparzjalità u
mingħajr ebda kunflitt ta’
interess. F’każ li jsib ruħu
f’kunflitt ta’ interess jew li
ma jistax iżomm l-imparzjalità
meħtieġa biex tiggarantixxi
l-integrità tal-indaġni, hu
obbligat jirrikuża lilu nnifsu u
jgħarraf lill-Metropolita
biċ-ċirkustanzi.
§4.
Il-persuni li
jgħinu lill-Metropolita jieħdu
ġurament li jwettqu l-inkarigu
tagħhom kif imiss u fedelment.
Art. 14 –
Tul tal-indaġni
§1.
L-indaġni għandha
tiġi konkluża fi żmien disgħin
jum jew f’dak indikat
fl-istruzzjonijiet imsemmija
fl-artiklu
10 §2.
§2.
Jekk ikun hemm
raġunijiet validi,
il-Metropolita jista’ jitlob
il-proroga tat-terminu
lid-Dikasteru kompetenti.
Art. 15 –
Miżuri ta’
prekawzjoni
Jekk il-fatti u ċ-ċirkustanzi
jkunu jitolbu hekk,
il-Metropolita jipproponi
lid-Dikasteru kompetenti
l-adozzjoni ta’ provedimenti u
ta’ miżuri xierqa ta’
prekawzjoni fil-konfront
tal-indagat.
Art. 16 –
Twaqqif ta’ fond
§1.
Il-Provinċji
ekkleżjastiċi, il-Konferenzi
Episkopali, is-Sinodi
tal-Isqfijiet u l-Kunsilli
tal-Ġerarki jistgħu
jistabbilixxu fond maħsub biex
jagħmel tajjeb għall-ispejjeż
tal-indaġni, imwaqqaf skont
in-normi tal-kanoni
116
u
1303 §1, 1° CIC
u
1047 CCEO,
u amministrat
skont in-normi tal-liġi
kanonika.
§2.
Fuq talba
tal-Metropolita inkarigat,
il-fondi meħtieġa għall-fini
tal-indaġni jitqiegħdu
għad-dispożizzjoni tiegħu
mill-amministratur tal-fond,
flimkien mad-dmir li jippreżenta
lil dan tal-aħħar rendikont fi
tmiem l-indaġni.
Art. 17 –
Trażmissjoni
tal-atti u tal-votum
§1.
Meta tkun lesta
l-indaġni, il-Metropolita
jgħaddi l-atti lid-Dikasteru
kompetenti flimkien mal-votum
tiegħu fuq ir-riżultati
tal-indaġni u bi tweġiba għal
mistoqsijiet li jista’ jkun hemm
fl-istruzzjonijiet maħruġa skont
l-artiklu
10 §2.
§2.
Sakemm ma
jinħarġux istruzzjonijiet oħra
mid-Dikasteru kompetenti,
il-fakultajiet tal-Metropolita
jintemmu ladarba titlesta
l-indaġni.
§3.
F’rispett lejn
l-istruzzjonijiet tad-Dikasteru
kompetenti, il-Metropolita, fuq
talba li ssirlu, jgħarraf
bl-eżitu tal-indaġni
lill-persuna li qed tafferma li
ġiet offiża jew
lir-rappreżentanti legali
tagħha.
Art. 18 –
Provedimenti
oħrajn
Sakemm ma jiddeċidix li jiftaħ
indaġni oħra, id-Dikasteru
kompetenti jipproċedi skont dak
li l-liġi tipprevedi għall-każ
speċifiku.
Art. 19 –
Osservanza
tal-liġijiet tal-Istat
Dawn in-normi japplikaw bla
preġudizzju tad-drittijiet u
tal-obbligi stabbiliti f’kull
post mil-liġijiet tal-Istat,
partikularment dawk li jistgħu
jeżistu dwar obbligi li jsiru
rapporti lill-awtoritajiet
ċivili kompetenti.
Dawn in-normi
huma approvati
ad experimentum għal
tliet snin.
Nistabbilixxi li
din l-Ittra Appostolika f’għamla
ta’ Motu Proprju tiġi
ppromulgata permezz
tal-pubblikazzjoni fuq
L’Osservatore
Romano, u tidħol fis-seħħ
fl-1 ta’ Ġunju 2019, u li
mbagħad tiġi ppubblikata fl-Acta
Apostolicæ Sedis.
Mogħtija Ruma,
f’San
Pietru,
fis-7
ta’ Mejju
2019,
is-seba’ waħda
tal-Pontifikat.
FRANĠISKU
Miġjub mit-Taljan għall-Malti
minn Francesco Pio Attard
Ħajr ukoll lil Fr Brendan Gatt
|