Santità, merħba fostna.  Ninsabu mill-ġdid fuq titjira għall-bidu ta’ vjaġġ appostoliku kbir.  Kien hemm stennija kbira għal dan il-vjaġġ, kif int taf sewwa.  Diġà fl-aħħar jiem, anzi, fl-aħħar ġimgħat id-dinja ġurnalistika tkellmet ħafna dwaru: ħa ngħidu iżjed mis-soltu, meta tqabbel anki mal-vjaġġi l-oħra.  U fuq l-art hemm jistennewk eluf ta’ ġurnalisti akkreditati fid-diversi lokalitajiet fejn int se tivvjaġġa.  Hawn qegħdin 76: daħlitilna iżjed minn 140 talba biex ikunu preżenti fuq din it-titjira, imma kellna nżommu ftit ir-riedni.  Imma l-kollegi l-oħra qed isegwuna b’attenzjoni kbira, naturalment mid-diversi punti fejn se jiżvolġi l-vjaġġ.  Il-komunità li tinsab preżenti hawn, bħas-soltu, tirrappreżenta d-diversi lingwi u diversi pajjiżi.  Imma wieħed jifhem li din id-darba hawn rappreżentanza partikularment qawwija ta’ ġurnalisti u ta’ l-istampa ta’ l-Istati Uniti.  Fil-fatt, madwar terz tal-kollegi hawn preżenti huma rappreżentanti ta’ televiżjonijiet, ġurnali, aġenziji ta’ l-Istati Uniti: fuq 20 minn 76.  Imma, għandna wkoll Kubana magħna, li jisimha Rosa Miriam Elizalde: hemm hi.  Tista’ ssellmilha int u għaddej.  U allura, aħna nilqgħuk fostna, niżgurawk li se nsegwu dan il-vjaġġ b’attenzjoni kbira għax nafu li hu ta’ importanza kbira għad-dinja kollha: int sa tkun tista’ twassal messaġġi ta’ paċi għall-pajjiżi kollha f’ċirkustanzi assolutament eċċezzjonali.  Jekk tixtieq tgħaddi kelmtejn qosra ta’ introduzzjoni int ukoll, qabel tgħaddi ssellem lill-kollegi…  Grazzi ħafna!

Grazzi tal-kelmtejn tiegħek ta’ merħba!  Il-jum it-tajjeb.  Nawguralkom vjaġġ tajjeb u ħidma tajba.  Jekk m’iniex sejjer żball, naħseb li dan hu l-itwal [vjaġġ] li qed nagħmel, ġurnata iżjed minn dak tal-Brażil…  Sa jkollkom x’tagħmlu!  Nirringrazzjakom ħafna, ħafna għax-xogħol li qed tagħmlu u li ħa tagħmlu.  Padre Lombardi qal kelma: paċi.  Nemmen li l-lum id-dinja hi għatxana għall-paċi.  Hemm il-gwerer, l-immigranti li qed jaħarbu, din il-mewġa migratorja li ġejja mill-gwerer, biex jaħarbu mill-mewt, biex ifittxu l-ħajja…  Il-lum emozzjonajt ruħi ħafna għax isellmuli quddiem id-Dar ta’ Santa Marta kien hemm waħda miż-żewġ familji li qed joqogħdu fil-parroċċa ta’ Sant’Anna, fil-Vatikan, milqugħin hemm, Sirjani, refuġjati…  Stajt tara f’wiċċhom it-tbatija tagħhom!  Dik il-kelma: “paċi”…  Nirringrazzjakom ta’ dak kollu li se tagħmlu fix-xogħol tagħkom biex tibnu l-pontijiet: pontijiet żgħar, żgħar, imma pont żgħir u ieħor u ieħor u ieħor, jagħmlu l-pont il-kbir tal-paċi.

Il-vjaġġ it-tajjeb, il-ħidma t-tajba.  Itolbu għalija.  Grazzi.

L-aħħar ħaġa, li dwarha tkellem Padre Lombardi, imma li wieħed minnkom saħaqli fuqha, hi din: xieraq li jien ngħid u nibgħat tislima kbira lil ħafna mill-kollegi tagħkom li bħalissa qed jaħdmu u se jaħdmu mill-uffiċċji.

miġjuba mit-Taljan għall-Malti minn Francesco Pio Attard