|
 |
MESSAĠĠ
TAL-QDUSIJA TIEGĦU L-PAPA
FRANĠISKU
GĦAS-XXVII JUM DINJI TAL-MARID
2019
“B’xejn
ħadtu, b’xejn agħtu”
(Mt 10:8)
Għeżież ħuti,
“B’xejn ħadtu, b’xejn agħtu”
(Mt 10:8).
Dawn huma l-kelmiet li qal Ġesù
meta bagħat lill-Appostli biex
ixandru l-Evanġelju, sabiex
is-Saltna tiegħu tinfirex
b’ġesti ta’ mħabba gratuwita.
Fl-okkażjoni tas-XXVII
Jum Dinji tal-Marid,
li ser jiġi ċċelebrat b’mod
solenni f’Kalkutta, fl-Indja,
fil-11 ta’ Frar 2019, il-Knisja,
Omm tal-ulied kollha tagħha, fuq
kollox ta’ dawk morda, tfakkarna
li l-ġesti ta’ għotja gratuwita,
bħal dak tas-Samaritan
it-Tajjeb, huma t-triq kredibbli
tal-evanġelizzazzjoni. Il-ħsieb
tal-morda għandu bżonn ta’
professjonalità u tal-ħlewwa,
ta’ ġesti gratuwiti, immedjati u
sempliċi bħalma hija żegħila, li
bihom wieħed jgħin lill-ieħor
iħossu “għażiż”.
Il-ħajja hija għotja ta’ Alla, u
kif iwissina San Pawl:
“X’għandek
li ma ngħatalikx?”
(1 Kor 4:7).
Proprju għaliex hija għotja,
l-eżistenza ma tistax tiġi
meqjusa sempliċiment xi ħaġa li
għandek jew xi proprjetà
privata, b’mod speċjali quddiem
il-konkwisti tal-mediċina u
tat-teknoloġija bijoloġika li
jistgħu jwasslu lill-bniedem
biex jaqa’ fit-tentazzjoni li
jimmanipula s-“siġra tal-ħajja”
(ara Ġen 3:24).
Quddiem il-kultura tar-rimi u
tal-indifferenza, irrid nafferma
b’insistenza li l-għotja għandha
tiġi mqiegħda bħala mudell li
kapaċi jisfida l-individwaliżmu
u l-frammentazzjoni soċjali ta’
żmienna, biex iġġib ’il quddiem
relazzjonijiet u forom oħra ta’
koperazzjoni umana bejn popli u
kulturi. Id-djalogu, li minnu
nnifsu jitqiegħed bħala
presuppost tal-għotja, jiftaħ
spazji ta’ relazzjoni li jgħinu
lill-bniedem jikber u
jiżviluppa, li kapaċi jkissru
skemi tal-eżerċizzju tal-poter
tas-soċjetà li ilhom imwaqqfin.
Li tagħti mhux l-istess
bħall-azzjoni li fiha wieħed
jagħti rigal, dan għaliex tista’
tissejjaħ għotja dik l-azzjoni
li fiha wieħed jagħti lilu
nnifsu. Għalhekk ma tistax tiġi
ridotta għal sempliċi
trasferiment ta’ xi proprjetà
jew ta’ xi oġġett. Hija
tingħażel mir-rigal proprju
għaliex hija tħaddan l-għotja
tal-persuna nfisha u tissupponi
x-xewqa li twaqqaf rabta ta’
relazzjoni. L-għotja, għalhekk,
hija l-ewwel u qabel kollox
għarfien reċiproku, li huwa
l-karattru indispensabbli
tar-rabta soċjali. Fl-għotja
hemm rifless tal-imħabba ta’
Alla, li tilħaq il-quċċata
fl-inkarnazzjoni tal-Iben Ġesù u
l-għotja tal-Ispirtu s-Santu.
Kull bniedem huwa fqir,
fil-bżonn u fil-ħtieġa. Meta
nitwieldu, biex ngħixu għandna
bżonn il-ħarsien tal-ġenituri
tagħna, u hekk ukoll f’kull fażi
u tappa tal-ħajja kull wieħed
minna ma jirnexxielu qatt
jinħeles kompletament mill-bżonn
u l-għajnuna ta’ xi ħadd ieħor,
ma jirnexxielu qatt iwarrab
minnu nnifsu l-limiti
tal-impotenza quddiem xi ħadd
jew quddiem xi ħaġa. Anki din
hija kundizzjoni li
tikkaratterizza lilna li aħna
“ħlejjaq”. Li wieħed jagħraf
b’sinċerità din il-verità
twasslu biex jibqa’ umli u biex
b’kuraġġ jipprattika
s-solidarjetà bħala virtù
indispensabbli għall-eżistenza.
Li nkunu konxji minn dan
jimbuttana biex l-imġiba tagħna
tkun responsabbli u li
tirresponsabilizza, bl-għan
tal-ġid li huwa inseparabbilment
kemm personali u kemm komuni.
Huwa biss meta l-bniedem jasal
biex jara lilu nnifsu mhux bħala
dinja fih innifsu, iżda bħala
wieħed li min-natura tiegħu
stess huwa marbut mal-oħrajn
kollha, li oriġinarjament
iħossuhom bħala “aħwa”, li ssir
possibbli mġiba soċjali ta’
solidarjetà msejsa fuq il-ġid
komuni. M’għandniex nibżgħu
nagħrfu lilna nfusna fil-bżonn u
li mhux dejjem aħna kapaċi li
nagħtu lilna nfusna dak kollu li
neħtieġu, għaliex weħidna u
bil-qawwa tagħna biss ma
jirnexxilniex nirbħu kull
limitu. M’għandniex nibżgħu
nagħrfu dan, għaliex Alla
nnifsu, f’Ġesù, iċċekken
(ara Fil 2:8)
u tbaxxa fuqna u
fuq il-faqar tagħna biex jgħinna
u jagħtina dak il-ġid li weħidna
ma nistgħux nakkwistaw.
F’din iċ-ċirkustanza
taċ-ċelebrazzjoni solenni
fl-Indja, nixtieq infakkar
b’ferħ u ammirazzjoni l-figura
ta’ Santa Madre Tereża ta’
Kalkutta, mudell ta’ karità li
għamlet viżibbli l-imħabba ta’
Alla għall-foqra u għall-morda.
Kif affermajt dakinhar
tal-kanonizzazzjoni tagħha,
“Madre
Tereża qassmet b’ġenerożità
l-ħniena divina, u għal kulħadd
kienet disponibbli bl-akkoljenza
u l-ħarsien tal-ħajja umana, dik
li għadha ma twelditx u dik
mitluqa u mormija.
[…]
Mielet lejn il-persuni mifnija,
mitluqa jmutu fuq il-ġnub
tat-toroq, u għarfet
fihom
dik id-dinjità li Alla
żejjinhom biha;
semmgħet leħinha quddiem
is-setgħanin ta’ din l-art, biex
jintebħu bil-ħtijiet tagħhom
quddiem il-krimini
[…]
tal-faqar maħluq minnhom stess.
Il-ħniena kienet għaliha
l-‘melħ’ li jagħti togħma lil
kull ħidma, u d-‘dawl’ li jimla
d-dlamijiet ta’ dawk li bilkemm
dmugħ ma kien fadlilhom biex
setgħu jibku l-faqar u t-tbatija
tagħhom. Il-missjoni tagħha
fit-truf tal-bliet u
fil-periferiji eżistenzjali
tibqa’ fi żmienna xhieda
tgħajjat ta’ kemm Alla hu qrib
tal-iżjed foqra fost il-foqra”
(Omelija,
4 Settembru 2016).
Santa Madre Tereża tgħinna
nifhmu li l-uniku kriterju ta’
azzjoni għandha tkun l-imħabba
gratuwita lejn kulħadd mingħajr
distinzjoni ta’ lsien, kultura,
etnija u reliġjon. L-eżempju
tagħha jkompli jmexxina biex
niftħu orizzonti ta’ ferħ u ta’
tama għall-umanità li teħtieġ
min jifhimha u għandha bżonn
il-ħlewwa, fuq kollox għal dawk
li jbatu.
Il-gratuwità tal-bniedem hija
l-ħmira tal-azzjoni
tal-voluntiera li huma ta’
importanza kbira fis-settur
soċjo-sanitarju u li jgħixu
b’mod ċar l-ispiritwalità
tas-Samaritan it-Tajjeb.
Nirringrazzja u ninkuraġġixxi
l-assoċjazzjonijiet ta’
volontarjat li jieħdu ħsieb
it-trasport u l-għajnuna
tal-morda, dawk li jagħmlu
d-donazzjoni tad-demm,
tat-tessuti u tal-organi. Qasam
speċjali li fih il-preżenza
tagħkom tesprimi l-attenzjoni
tal-Knisja huwa dak tal-ħarsien
tad-drittijiet tal-morda, fuq
kollox ta’ dawk li jbatu minn
patoloġiji li jitolbu kura
speċjali, mingħajr ma ninsa
l-qasam tas-sensibilizzazzjoni u
tal-prevenzjoni. Huma ta’
importanza fundamentali
s-servizzi tagħkom ta’
volontarjat fl-istrutturi
sanitarji u fid-djar, li jmorru
mill-għajnuna sanitarja
sas-sostenn spiritwali. Igawdu
minn din il-ħidma ħafna persuni
morda, weħidhom, anzjani, dawk
bi fraġilità psikika u
b’diżabbiltajiet oħra.
Inħeġġiġkom biex tkomplu tkunu
sinjal tal-preżenza tal-Knisja
fid-dinja sekularizzata.
Il-voluntier huwa ħabib
dizinteressat, li miegħu wieħed
jista’ jaqsam ħsibijietu u
l-emozzjonijiet tiegħu; permezz
tas-smigħ huwa joħloq
il-kundizzjonijiet li bihom
il-marid, minn oġġett passiv ta’
kura, isir suġġett attiv u
protagonist ta’ relazzjonijiet
reċiproċi, kapaċi li jirkupra
t-tama u jkun iktar dispost li
jaċċetta t-terapiji.
Il-volontarjat jikkomunika
l-valuri, imġibiet u stili ta’
ħajja li għandhom fil-qalba
tagħhom il-ħmira tal-għotja.
Id-dimensjoni tal-gratuwità
għandha tanima fuq kollox
l-istrutturi Kattoliċi
tas-saħħa, għaliex hija l-loġika
tal-Vanġelu li tikkwalifika
l-ħidma tagħhom,
kemm f’dawk il-postijiet li huma
avvanzati u kemm f’dawk li huma
l-iktar foqra fid-dinja.
L-istrutturi Kattoliċi huma
msejħa biex jesprimu s-sens
tal-għotja, tal-gratuwità u
tas-solidarjetà, bi tweġiba
għal-loġika tal-profitt akkost
ta’ kollox, li tagħti biex
tieħu, tal-isfruttament li ma
jħarisx lejn il-persuni.
Inħeġġeġ lil kulħadd, fuq
diversi livelli, biex iġġibu ’l
quddiem il-kultura tal-gratuwità
u tal-għotja, li huma
indispensabbli biex tiġi
ssuperata l-kultura tal-profitt
u tar-rimi. L-istituzzjonijiet
sanitarji Kattoliċi m’għandhomx
jispiċċaw ikkummerċjalizzati,
imma jħarsu l-kura tal-persuna
iktar milli l-qligħ. Nafu li
s-saħħa hija waħda ta’
relazzjoni, tiddependi
mill-interazzjoni mal-oħrajn u
għandha bżonn ta’ tama,
ħbiberija u solidarjetà, hija
ġid li jista’ jitgawda biss
“bis-sħiħ” jekk maqsum ma’
oħrajn. Il-ferħ tal-għotja
gratuwita huwa dak li juri
s-saħħa tan-Nisrani.
Nafdakom ilkoll lil Marija,
Salus infirmorum.
Hija tgħinna biex naqsmu
l-għotjiet li rċivejna fi spirtu
ta’ djalogu u li nilqgħu lil
xulxin, li ngħixu bħal aħwa
attenti għall-ħtiġijiet ta’
xulxin, inkunu nafu nagħtu
b’qalb ġeneruża, u nitgħallmu
l-ferħ tas-servizz
diżinteressat. Lil kulħadd
b’affett niżgura li nkun qrib
tagħkom bit-talb u nagħtikom
minn qalbi l-Barka Appostolika.
Mill-Vatikan,
25 ta’
Novembru
2018
Solennità
ta’ Sidna Ġesù Sultan
tal-univers.
Franġisku
miġjub mit-Taljan għall-Malti
minn Mons. Renato Borg
|
