SOLENNITÀ TAL-IMMAKULATA KUNĊIZZJONI TAL-VERĠNI MQADDSA MARIJA
ATT TA’ QIMA LILL-IMMAKULATA FI PIAZZA DI SPAGNA
TALBA TAL-QDUSIJA TIEGĦU FRANĠISKU
LIL MARIJA IMMAKULATA
Piazza di Spagna
Is-Sibt 8 ta’ Diċembru 2018
Omm Immakulata,
fil-jum tal-festa tiegħek, hekk għażiża għall-poplu Nisrani,
ġejt nagħtik qima fil-qalba ta’ Ruma.
Ġewwa qalbi nġorr lill-fidili ta’ din il-Knisja
u lil dawk kollha li jgħixu f’din il-belt, speċjalment il-morda
u dawk li minħabba diversi sitwazzjonijiet iktar qed isibuha bi tqila biex ifendu.
Qabelxejn irridu nirringrazzjawk
għall-għożża tiegħek ta’ omm li biha ssieħeb il-mixja tagħna:
kemm drabi nisimgħu jirrakkonta bid-dmugħ f’għajnejh
lil min daq l-interċessjoni tiegħek,
il-grazzji li titlob għalina lil Ibnek Ġesù!
Tiġini f’moħħi grazzja ordinarja li int tagħti lin-nies li tgħix Ruma:
dik li jaffrontaw bis-sabar it-taħbit tal-ħajja ta’ kuljum.
Imma għal dan nitolbuk il-qawwa li ma nirrassenjawx ruħna, anzi,
li ta’ kuljum kull wieħed u waħda minna jagħmel il-parti tiegħu biex itejjeb l-affarijiet,
biex l-għożża għal kull persuna tagħmel lil Ruma iżjed sabiħa u post fejn jista’ jgħix kulħadd;
biex id-dmir imwettaq tajjeb minn kull persuna jiżgura l-jeddijiet ta’ kulħadd.
U aħna u naħsbu fil-ġid komuni ta’ din il-belt,
nitolbuk għal dawk li għandhom rwoli ta’ responsabbiltà ikbar:
aqlgħalhom l-għerf, viżjoni għall-ġejjieni, spirtu ta’ qadi u ta’ kollaborazzjoni.
Verġni Mqaddsa,
nixtieq nafdalek b’mod partikulari s-saċerdoti ta’ din id-Djoċesi:
il-kappillani, il-viċijiet, il-qassisin anzjani li bil-qalb ta’ ragħajja
jissoktaw jaħdmu għall-qadi tal-poplu ta’ Alla,
il-ħafna saċerdoti studenti minn kull naħa tad-dinja li jikkollaboraw fil-parroċċi.
Għalihom kollha nitolbok il-ferħ ħelu tal-evanġelizzazzjoni
u d-don li jkunu missirijiet, qrib tan-nies, ħanina.
Lilek, Mara kollok kemm int ikkonsagrata lil Alla, nafdalek in-nisa kkonsagrati fil-ħajja reliġjuża u f’dik sekulari,
li għall-grazzja ta’ Alla f’Ruma huma ħafna, iżjed milli f’kull belt oħra tad-dinja,
u jsawru mużajk stupend ta’ nazzjonalitajiet u kulturi.
Għalihom nitolbok il-ferħ li, bħalek, ikunu għarajjes u ommijiet,
għammiela fit-talb, fl-imħabba, fil-ħniena.
Omm ta’ Ġesù,
ħaġa tal-aħħar nitolbok, f’dan iż-żmien tal-Avvent,
jiena u naħseb fil-jiem li fihom int u Ġużeppi kontu ħerqana
tistennew it-twelid issa fil-qrib tat-tarbija tagħkom,
imħassbin għax kien hemm iċ-ċensiment u anki intom kellkom tħallu r-raħal tagħkom,
Nazaret, u tmorru Betlehem…
Int taf, ja Omm, xi jfisser iġġorr il-ħajja f’ġufek
u sadattant tħoss madwarek l-indifferenza, ir-rifjut, xi kultant l-istmerrija.
Għalhekk nitolbok tkun qrib tal-familji li llum
f’Ruma, fl-Italja, fid-dinja kollha qed jgħixu sitwazzjonijiet simili,
biex ma jisfawx abbandunati, imma jiġu mħarsin fid-drittijiet tagħhom,
drittijiet umani li jiġu qabel kull ħtieġa oħra, leġittima kemm hi leġittima.
O Marija Immakulata,
żerniq ta’ tama fuq ix-xefaq tal-umanità,
ħares fuq din il-belt,
fuq id-djar, fuq l-iskejjel, fuq l-uffiċji, fuq il-ħwienet,
fuq il-fabbriki, fuq l-isptarijiet, fuq il-ħabsijiet;
biex imkien ma jonqos dak li għal Ruma hu l-iżjed prezzjuż,
u li tgħożż għall-ġid tad-dinja kollha, it-testment ta’ Ġesù:
“Ħobbu lil xulxin, kif ħabbejtkom jien” (ara Ġw 13:34).
Amen.
miġjub mit-Taljan għall-Malti minn Francesco Pio Attard