Nirringrazzja lill-Kardinal President għal dak li qal, nirringrazzja lilkom tal-kumpanija, tal-istedina, tax-xogħol. Dak li qed tagħmlu hu importanti ħafna: tirriflettu fuq ir-realtà, imma tirriflettu mingħajr biża’, tirriflettu bl-intelliġenza. Mingħajr biża’ u bl-intelliġenza. U dan hu servizz.
Wieħed minnkom kien qed ikellimni dwar it-tliet “riduzzjoniżmi”, imma jien se nkellimkom dwar l-ewwel waħda biss: ir-riduzzjoniżmu antropoloġiku. Jiena naħseb li dan il-waqt hu l-aktar żmien qawwi tar-riduzzjoniżmu antropoloġiku. Qed jiġri lill-bniedem dak li jiġri lill-inbid meta jsir “grappa”: jgħaddi mil-lampik organiżżattiv. Ma jibqgħax inbid, hu xi ħaġa oħra: forsi aktar utli, aktar kwalifikat, imma mhux inbid! L-istess għall-bniedem: il-bniedem jgħaddi minn dal-lampik u jispiċċa – u dan qed ngħidu b’serjetà kbira! – biex jitlef l-umanità u jsir strument f’sistema, sistema soċjali, ekonomiku, sistema fejn jiddomina l-iskwilibriju. Meta l-bniedem jitlef l-umanità tiegħu, x’nistennew? Jiġri dak li nħoss li għandi ngħid b’lingwaġġ komuni: politika, soċjoloġija, atteġġjament “tal-iskart”: jitwarrab dak li mhux meħtieġ, għax il-bniedem mhux fiċ-ċentru. U meta l-bniedem ma jkunx fiċ-ċentru, meta fiċ-ċentru jkun hemm xi ħaġa oħra, il-bniedem jispiċċa seftur ta’ din ix-xi ħaġa oħra.
Għalhekk l-idea hi li nsalvaw lill-bniedem, fis-sens li jirritorna fiċ-ċentru: fiċ-ċentru tas-soċjetà, fiċ-ċentru tal-ħsieb, fiċ-ċentru tar-riflessjoni. Inġibu lill-bniedem mill-ġdid fiċ-ċentru. U din hi biċċa xogħol kbira, u intom qed tagħmluha. Nirringrazzjakom ta’ dil-ħidma. Hu għalhekk li intom tistudjaw, tirriflettu, tiltaqgħu f’dawn il-laqgħat: biex il-bniedem ma jibqgħax ikun skartat. Qed niskartaw lit-tfal għax il-livell tat-twelid – għall-anqas hawn fl-Ewropa – nafuh ilkoll; jitwarrbu l-anzjani għax ma jservux aktar. U issa? Qed tkun imwarrba ġenerazzjoni sħiħa ta’ żgħażagħ u dan hu gravissimu! Rajt ċifra: 75 miljun żgħażagħ ta’ taħt il-25 sena, li m’għandhomx xogħol. Iż-żgħażagħ “la dik u lanqas l-oħra” la jistudjaw u lanqas jaħdmu. Ma jistudjawx għax m’għandhomx il-possibiltà, ma jaħdmux għax mhemmx xogħol x’jagħmlu. Huwa skart ieħor! X’se jkun l-iskart li jmiss? Ejjew nieqfu la għadna fiż-żmien, jekk jogħġobkom!
Nirringrazzjakom tal-għajnuna li tagħtu bix-xogħol tagħkom, bir-riflessjoni tagħkom biex issewwu din is-sitwazzjoni skwilibrata u biex tirkupraw lill-bniedem u treġġgħuh lura fiċ-ċentru tar-riflessjoni u fiċ-ċentru tal-ħajja. Huwa r-re tal-univers! U din mhix teoloġija, mhix filosofija – hija realtà umana. B’hekk nimxu ‘l quddiem. Grazzi, grazzi bis-serjetà. Grazzi!
Miġjub għall-Malti mit-Taljan minn Joe Huber