NEMMEN F’ĠESÙ KRISTU IBNU WIEĦED SIDNA
Wara li fl-ewwel artiklu tal-Kredu stqarrejna t-twemmin tagħna f’Alla l-Missier, imbagħad ngħaddu biex nistqarru wkoll it-twemmin tagħna fit-Tieni Persuna tat-Trinità Qaddisa.
“NEMMEN F’ĠESÙ KRISTU IBNU WIEĦED SIDNA”
“Meta fil-pjan ta’ Alla kienet waslet il-milja taż-żminijiet, Alla bagħat lill Ibnu, imwieled minn mara, u imwieled taħt il-liġi, biex jifdi lil dawk li kienu taħt il-liġi, u hekk aħna nkunu addottati bħala ulied Alla.”
Tant huwa tremend dan il-kliem, illi kieku ma kitbux San Pawl ma konniex nissugraw ngħiduh aħna. Meta Bin Alla sar bniedem, aħna sirna ulied Alla. Din hija l-Aħbar it-Tajba li kull nisrani huwa msejjaħ li jxandar. Fil-qalba ta’ din l-aħbar hemm Ġesù Kristu nnifsu. Fil-persuna ta’ Ġesù Kristu, Alla żar lill-poplu tiegħu. Fih Alla wettaq il-wegħdiet li kien għamel lil Abraham u lil nislu. U dan għamlu b’mod li ħadd ma kien jistenna, bagħtilna lil Ibnu l-għażiż.
Ġesù li kif ifisser l-istess isem huwa s-Salvatur. Mhux biss salvana mill-mewt tad-dnub li l-umanità kienet ġibdet fuqha, imma fdiena mill-jasar dejjiemi tal-Ħażin, ix-Xitan, l-Għadu tagħna sa mill-qedem.
Kristu, li kif tfisser l-istess kelma huwa l-Midluk ta’ Alla. Midluk bħala l-Profeta għax wasslilna il-Kelma ta’ Alla. Anzi huwa stess huwa l-istess Kelma. Midluk bħala s-Saċerdot, fejn mhux biss huwa dak li joffri s-sagriffiċju, iżda huwa nnifsu hu l-istess offerta. Midluk bħala Sultan, Mexxej jew Ragħaj tal-Poplu ta’ Alla.
Ġesu huwa l-Iben waħdieni ta’ Alla. Huwa l-Mulej, li għall-isem tiegħu kull irkoppa tmil fis-sema, fl-art u taħt l-art. U kull ilsien jistqarr li Ġesù Kristu hu l-Mulej għall-glorja ta’ Alla l-Missier.