JIENA NEMMEN
Fl-Ittra Appostolika, Porta Fidei, dwar is-Sena tal-Fidi, il-Papa Benedittu XVI jgħid li l-Kredu huwa kliem li fuqu hi mibnija l-fidi ta’ Ommna l-Knisja fuq il-pedament sod li hu Kristu l-Mulej.
Il-Kredu huwa l-istqarrija tal-Fidi tagħna. Is-Simbolu tat-twemmin li nħaddnu. Il-Kredu huwa l-istqarrija bil-fomm ta’ dak li hemm fil-qalb u fl-intellet. Dak li rrid ngħix.
Min jgħid “Jiena nemmen” ikun jgħid, “Jien nintrabat ma’ dak li aħna nemmnu. Din l-għaqda tagħna fil-fidi titlob minna diskors komuni dwar il-fidi tagħna, lingwaġġ li jkun regola għal kulħadd u jgħaqqad lil kulħadd fl-istess stqarrija tal-fidi.
L-ewwel stqarrija tagħna ssir fil-Magħmudija għaliex l-ewwel simbolu tal-fidi huwa dak li jingħata lilna bit-tiswib tal-ilma fuq rasna, fl-isem tal-Missier u tal-Iben u tal-Ispirtu s-Santu.
Dakinhar min jitgħammed, jew inkella l-ġenituri u l-parriniet f’ismu jistqarru t-twemmin komuni tal-insara waqt li jiċħdu lix-xitan u l-egħmil kollu tiegħu.
Temmen f’Alla l-Missier li jista’ kollox li ħalaq is-sema u l-art? - Iva nemmen.
Temmen f’Ġesù Kristu, Sidna, l-Iben Waħdieni tiegħu, li twieled minn Marija Verġni,u bata u miet u difnuh, qam minn bejn l-imwiet u qiegħed fil-lemin tal-Missier? - Iva nemmen.
Temmen fl-Ispirtu s-Santu, il-Knisja Mqaddsa Kattolika, ix-Xirka tal-Qaddisin, il-maħfra tad-dnubiet, il-qawma ta’ l-Imwiet, u fil-ħajja ta’ dejjem? - Iva nemmen.
Din hija l-fidi tagħna. Il-fidi li matul din is-sena ta’ grazzja qed inkunu mistiedna biex nerġgħu niskopru mill-ġdid.