Il-Miraklu Skoċċiż ta’ Newman
Darba waħda, Ethel, mart Alexander James Grant, pastor Kalvinista fi ħdan il-Presbyterian Scottish Church, ħalliet kopja tal-gazzetta fl-uffiċju ta’ żewġha. Kienet kopja tal-Catholic Herald u hi kienet fetħet, bi skop, il-gazzetta b’tali mod li titfaċċa paġna b’artiklu dwar il-ħajja ta’ soru Franċiża mhux daqstant magħrufa. Ethel kienet ħalliet il-Komunjoni Anglikana u daħlet fil-Knisja Kattolika fis-sena 1908 u kienet qed tittama li żewġha jagħmel l-istess. Imma dan ma tantx kien jidher li jseħħ; żewġha kien pastor fi ħdan il-United Free Church of Scotland, denominazzjoni magħrufa għan-nuqqas ta’ simpatija tagħha lejn il-Knisja Kattolika.
Alexander James Grant kien bniedem intelliġenti, u kien jaf tmien lingwi. Kien iservi l-komunita’ ta’ Lochranza, raħal fuq il-gżira ta’ Arran, waħda mill-gżejjer Hebrides tal-Iskozja. Ma tantx kien ġie espost għall-Knisja Kattolika; kien iltaqa’ biss ma’ żewġ saċerdoti li offrewlu ‘ftit tagħrif dwar ir-Reliġjon Rumana’. Hu stess stqarr li tgħidx kemm kien iħossu mbuttat mir-reliġjon tagħhom; fil-fatt kiteb li ‘I was absolutely refractory to their insinuations’.
Darba minnhom, Grant qara artiklu miktub minn ċertu Fr Taylor, li rrakkonta l-istorja ta’ Marie Francoise-Thérèse Martin li kienet ingħaqdet mal-ordni Karmelitan qabel ma mietet fl-eta’ ta’ 24 sena, wara li għexet ħajja mingħajr ftit li xejn avvenimenti. L-artiklu kien semma li kienet se toħroġ traduzzjoni bl-Ingliż tal-awtobijografija tagħha. Grant qata’ l-artiklu mill-gazzetta u żammha fil-kartiera. Xi ħbieb ta’ martu kisbu kopja tal-ktieb Storja ta’ Ruħ. Fil-Milied tas-sena 1909, Grant irritorna mill-predikazzjoni tiegħu lejn id-dar bl-influwenza. Sab il-ktieb maġenb is-sodda u qrah. Aktar tard kiteb: ‘Il-ktieb li ġie f’idejja kien ċertament xogħol ta’ xi ħadd ġenju’. Imbagħad ġranet xi ħaġa interessanti li se nikkwotha kif inhi, maqluba għall-Malti
‘Darba minnhom filgħaxija, meta kont imqajjem, ħassejt sensazzjoin straordinarja u għidt lil marti hekk kif daħlet fil-kamra tas-sodda: ‘it-tifla ċ-ċkejkna tinsab hawn’ –
‘Min’ staqsiet hi.
‘Il-Fjura ċ-ċkejkna...żgur li tinsab f’din il-kamra’.
Xejn ma kien ħejjieni għal din is-sensazzjoni. Ħassejtni hekk f’ruħi: id-dinja esterjuri bħal donnha sparixxiet minn quddiem għajnejja. Kollox kien preżenti b’mod interjuri u hekk rajt quddiemi lill-Qaddejja t’Alla. Pruvajt inwarrab dan minn quddiemi u għidt lili nnifsi: ‘Int qed taqa’ fis-superstizzjoni u l-idolatrija’; imma t-tentattivi tiegħi kien ilkoll għalxejn; hi reġgħet lura u ħaddnietni magħha u mbagħad bħal donni smajt il-kelmiet: ‘Dan hu l-mod ta’ kif il-Kattoliċi qaddisa jħobbu lil Ġesù, agħżel it-triq iċ-ċkejkna’.
‘Iva’ weġibt. ‘Ħa nipprova nsegwik, jekk tgħinni’ għax tassew ridt li jirnexxili’.
Aktar tard, Grant sab konsolazzjoni fil-kitbiet ta’ John Henry Newman. Wara li qara l-Apologia Pro Vita Sua, li fiha Newman jiddeskrivi t-triq diffiċli tiegħu biex wasal għall-fidi Kattolika, Grant dar fuq martu u qalilha: ‘Issa qed nemmen dawk il-ħwejjeġ li qatt qabel ma stajt nemmen’. Wara ħafna xhur ta’ tħassib, Grant irriżenja minn pastor Kalvinista fis-sena 1911 u sar Kattoliku. Aktard tard hu ġie msejjaħ sabiex jixhed għall-kawża tal-beatifikazzjoni ta’ Santa Tereża ta’ Lisieux u saħansitra ġie mistieden biex imur jgħix f’Alençon; ix-xogħol tiegħu u ta’ martu kien li jdawru l-pellegrini u t-turisti mad-dar tal-qaddisa Franċiża.
Newman żgur qatt ma immaġina kemm kienet se tkun kbira l-influwenza tiegħu fuq dawk li ġew warajh. Ir-riflessjonijiet tiegħu fuq il-kuxjenza ispiraw studenti Ġermaniżi sabiex jirribellaw kontra t-Tielet Reich ta’ Hitler. L-innu tiegħu Lead, Kindly Light nissel sens ta’ konsolazzjoni lil Mahatma Gandhi fil-mumenti l-aktar suwed ta’ ħajtu. L-Essay in Aid of a Grammar of Assent għen lil Oscar Wilde jersaq lejn il-fidi Kattolika. Hu bidel il-ħajja ta’ eluf ta’ nies; il-kanonizzazzjoni tiegħu se tkompli titrasforma l-ħajja ta’ ħafna oħrajn. Nażżarda ngħid li l-ħatra tiegħu għal mal-lista tal-qaddisin għad tkun il-kawża tal-anniħilazzjonit totali tal-ereżija Anglikana.
Dun Geoffrey G Attard
Riferenzi;
Editorjal The Newman effect f’ Catholic Herald, 11 t’Ottubru 2019, paġna 3.