Ġimgħa ta’ Talb għall-Għaqda
fost l-Insara 2019
“Justice
and only justice you shall
pursue”
(Deuteronomy 16:20)
“Għandek tfittex il-ġustizzja, u
l-ġustizzja biss”
(Dewteronomju 16:20)
18-25 ta’ Jannar 2019
Kummissjoni Ekumenika Djoċesana
Kurja tal-Arċisqof
Malta
Messaġġ mill-President
tal-Kummissjoni Ekumenika
Matul iż-żmien sabiħ u għażiż
tal-Avvent, xi membri
tal-Kummissjoni Ekumenika iħejju
dan il-materjal li għandkom
f’idejkom, u li jinstab ukoll
permezz ta’ verżjoni diġitali
fuq is-siti elettroniċi
tal-Knisja f’Malta. L-Avvent
huwa żmien ta’ stennija, ta’
talb u konverżjoni, u ta’ smigħ
tal-Kelma. L-ekumeniżmu wkoll
għandu dawn il-katatteristiċi.
Dan il-ktejjeb fih materjal
pastorali li l-għan tiegħu hu li
jintuża fil-parroċċi, fi knejjes
oħra, f’komunitaijiet ta’ ħajja
konsagrata jew tal-lajċi. Huwa
materjal li għandu janima t-talb
tagħna biex, flimkien, nitolbu
għall-għaqda fost l-Insara,
speċjalment bejn it-18 u l-25
ta’ Jannar 2019.
It-tema ta’ din is-sena hi
“Għandek tfittex il-ġustizzja, u
l-ġustizzja biss”
(Dewt 16:20). It-tema ġiet
magħżula mill-Insara ta’ Knejjes
differenti ġewwa l-Indonesja.
Dan huwa pajjiż kbir, magħmul
minn numru ta’ gżejjer kbar
(bħal Sumatra u Ġava), u eluf
ta’ gżejjer żgħar. Huwa l-pajjiż
bl-akbar popolazzjoni Musulmana
fid-dinja. Hemm numru sabiħ ta’
Nsara mifruxin fl-Indonesja
kollha. Dawn l-Insara huma
membri ta’ bosta Knejjes. Grupp
ta’ Nsara minn dawn il-Knejjes
ħadmu flimkien biex iħejju
l-materjal għall-Ġimgħa ta’ Talb
għall-Għaqda fost l-Insara ta’
din is-sena.
Kif bosta minnkom jafu,
il-materjal għall-Ġimgħa ta’
Talb għall-Għaqda fost l-Insara
tas-sena d-dieħla (2020) tħejja
minn membri ta’ Knejjes
differenti f’Malta. Aktar
dettalji jingħataw fix-xhur li
ġejjin. Li nista’ ngħid hu li
din it-tħejjija li saret bejn
ix-xhur ta’ Frar u Settembru
2018 kienet esperjenza sabiħa
ħafna. Konna membri mill-Knejjes
li hawn f’Malta u Għawdex:
Kattoliċi, Anglikani, Luterani,
Church of Scotland, Metodisti u
Ortodossi. Il-materjal kien
iffinalizzat meta ġie Malta
grupp internazzjonali
f’Settembru li għadda. Bħalissa
l-materjal qed jiġi tradott
għall-ilsna prinċipali biex,
aktar tard din is-sena,
jintbagħat f’kull pajjiż u
jintuża bħal dan iż-żmien sena.
Inkiteb ukoll innu biex janima
dan it-talb tas-sena d-dieħla.
Kif nagħmel dejjem, jien
inħeġġeġ lilek u l-komunità
tiegħek biex:
(1) titolbu għall-għaqda fost
l-Insara;
(2) tiksbu aktar tagħrif dwar
l-ekumeniżmu, speċjalment kliem
il-Papa Franġisku dwar dan;
(3) iżżuri siti elettroniċi li
jagħtukom tagħrif dwar il-ħidma
ekumenika. Nissuġġerixxi s-sit
il-ġdid u attraenti tal-Kunsill
Pontifiċju għall-Għaqda fost
l-Insara:
http://www.christianunity.va/content/unitacristiani/it.html
Nagħlaq dan il-messaġġ billi
nselli għalik u nixtieqlek kull
ġid fil-Mulej.
Dun Hector Scerri
President
Ħsibijiet għal kull ġurnata
waqt il-Ġimgħa ta’ Talb
għall-Għaqda fost l-Insara
Imħejjija minn Dr Patricia
Micallef
Il-Ġimgħa
18 ta’ Jannar 2019
Illum tibda l-Ġimgħa ta’ Talb
għall-Għaqda fost l-Insara fejn
qed nitolbu, flimkien ma’ Nsara
minn Knejjes oħra, biex
jingħelbu il-firdiet kbar ta’
bejnietna.
Fl-Evanġelju, illum, naraw lil
Ġesù f’Kafarnahum,
u erbgħa min-nies jaqilgħu
s-saqaf biex iniżżlu quddiemu
wieħed mifluġ sabiex ifejqu.
Dawn in-nies raw it-tbatija ta’
dan il-marid u fittxew jagħmlu
li jistgħu biex jgħinuh. Ejjew
illum,
f’dan
l-ewwel jum tal-Ġimgħa ta’ Talb
għall-Għaqda fost l-Insara, fejn
qed niftakru b’mod partikulari
fl-Insara fl-Indonesja, nitolbu
l-grazzja li aħna wkoll inkunu
kapaċi nisimgħu l-karba tal-fqir
u tal-batut u nxammru l-kmiem
biex ngħinuh.
Is-Sibt
19 ta’ Jannar 2019
Il-kittieba u l-Fariżej ma
setgħux jaċċettaw il-fatt li
Ġesù kien jiekol ma’ kulħadd,
anke ma’ dawk,
li bħala Lhudi serju,
ma kellux għalfejn iħares lejhom
u wisq inqas jagħmilha magħhom.
Fit-tieni jum fil-Ġimgħa ta’
Talb għall-Għaqda fost l-Insara,
ejjew niftakru f’dawk l-Insara
li huma vittmi ta’ gruppi
reliġjużi oħra f’pajjiżhom,
b’mod partikolari fl-Indonesja,
li jinsabu mhedda u li ma jsibux
min jaqbeż għalihom quddiem
l-inġustizzji li jsofru.
Il-Ħadd 20 ta’ Jannar 2019
Ninsabu waqt il-Ġimgħa ta’ Talb
għall-Għaqda fost l-Insara.
Illum, l-Evanġelju
jurina lil Ġesù li,
għall-osservazzjoni ta’ Ommu
Marija, iħenn għal koppja ġewwa
Kana u jibdlilhom l-ilma
f’inbid. Fid-dawl ta’ din
il-ġrajja, ejjew ningħaqdu
mal-Insara ħutna mxerrdin
mad-dinja, b’mod speċjali din
is-sena dawk fl-Indonesja, biex
flimkien inkunu xhieda
tal-għemejjel tajba u ta’ ħniena
li Alla jagħmel magħna. Nitolbu
wkoll il-grazzja li bi kliemna u
għemilna, ma nkunu qatt ta’
tfixkil għal min irid jersaq
lejn Alla.
It-Tnejn 21 ta’ Jannar 2019
Is-silta tal-Evanġelju, illum,
tgħidilna
li l-għarus, li hu Ġesù, huwa
magħna. Dan għalina għandu jkun
biżżejjed. F’dinja mmexxija
dejjem iktar mill-ispirtu tar-regħba,
ejjew f’dan ir-raba’ jum ta’
Talb għall-Għaqda fost l-Insara,
niftakru f’ħutna li huma mċaħħda
anke mill-bżonnijiet l-iktar
essenzjali, partikolarment
fl-Indonesja, filwaqt li nitolbu
li
aħna
ninħelsu mill-egoiżmu. Nitolbu
wkoll li aħna nkunu kapaċi
nagħtu sehmna biex nagħmlu
mid-dinja post aħjar
għall-bnedmin.
It-Tlieta 22 ta’ Jannar 2019
Illum, fil-festa ta’ San
Publiju, naraw lill-gvernatur
ta’ Malta jilqa’ lil Pawlu u
jżommu għandu. Pawlu, min-naħa
tiegħu, ixandar il-kelma u
jfejjaq. Aħna wkoll,
bil-magħmudija, għandna sehem
mill-missjoni profetika ta’
Kristu, li nħabbru l-bxara
t-tajba lill-foqra u d-dgħajfa.
F’din il-Ġimgħa ta’ Talb
għall-Għaqda fost l-Insara,
ejjew nitolbu l-grazzja li aħna
wkoll nkunu kapaċi nħabirku
għall-ġustizzja li ġġib il-paċi
u l-ftehim qalb
il-Knejjes mifrudin minn xulxin,
u fost
il-popli.
L-Erbgħa 23 ta’ Jannar 2019
Illum, fl-Evanġelju,
naraw kif lir-raġel b’idu
niexfa, Ġesù tah is-saħħa għax
huwa ġie jġedded kollox: lilna
fuq bażi individwali u bħala
komunità, kif ukoll lid-dinja li
qed issofri l-konsegwenzi
tal-imġieba irresponsabbli
tagħna lejn l-ambjent. Ejjew
f’din il-Ġimgħa ta’ Talb
għall-Għaqda fost l-Insara
nitolbu l-grazzja li din l-aħbar
it-tajba li ġabilna Ġesù, li fih
kollox ikun sħiħ u ġdid,
inwassluha lil kulħadd u
npoġġuha fil-prattika billi
nieħdu ħsieb ukoll
tal-ambjent
li jifforma d-dar
komuni
tagħna.
Il-Ħamis 24 ta’ Jannar 2019
Illum se nisimgħu
fl-Evanġelju
kif il-morda u dawk maħkuma minn
spirti ħżiena kienu jrossu fuq
Ġesu biex hu jeħlishom. Dawn
in-nies kienu l-iktar
vulnerabbli fis-soċjetà. Matul
din il-Ġimgħa ta’ Talb
għall-Għaqda fost l-Insara,
ejjew nitolbu għall-vittmi ta’
abbuż ta’ poter madwar id-dinja
bħat-tfal abbużati, ħaddiema
sfruttati, nisa traffikati lejn
pajjiżi oħra li qed jgħajtu huma
wkoll għall-fejqan u
għall-ħelsien. Niftakru b’mod
speċjali din is-sena fl-Insara
fl-Indoneżja. Ejjew naħdmu
kontra l-inġustizzji li qed
jeqirdu l-ħajja ta’ dawn
in-nies, Insara bħalna.
Il-Ġimgħa 25 ta’ Jannar 2019
Illum, festa tal-konverżjoni ta’
San Pawl
Missierna,
naraw kif Alla daħal fil-ħajja
ta’ dan il-Lhudi li kien
jippersegwita lill-Insara u
għamel minnu dawl għall-ġnus.
F’dan l-aħħar jum ta’ Talb
għall-Għaqda fost l-Insara,
ejjew nitolbu għal ħutna
mxerrdin mad-dinja, b’mod
speċjali fl-Indonesja, li
ħajjithom hija mtaqqla
mill-inġustizzji,
sabiex Alla jkompli jkun id-dawl
u l-qawwa ta’ ħajjithom. Nitolbu
wkoll li jibqgħu jgħixu l-ħajja
b’tama u kuraġġ f’Alla li ġie
jneħħi kull biża’
minn ħajjitna.
TALBIET TA’ MAĦFRA
Imħejjija minn Dun Aurelio Mulè
Stagno S.D.B.
NOTA:
Dawn jistgħu jintużaw waqt l-Att
Penitenzjali tal-Quddiesa, jew
f’mumenti oħra ta’ talb
personali jew komunitarju.
A
Alla ħallieq, għajn tal-ħajja u
tad-dinjità ta’ kull bniedem,
Mulej, ħniena.
Alla ħanin, li bil-grazzja
tiegħek tfejjaq dak li fid-dinja
hu marid u tinfaxxa dak li hu
miksur, Kristu, ħniena.
Alla ġust, li taf twieżen lilna
bnedmin dgħajfa, Mulej, ħniena.
B
Iben Alla magħqud mal-Missier,
li tlabt għall-għaqda fost
id-dixxipli tiegħek, Mulej,
ħniena.
Alla tal-armla, tal-iltim u
tal-barrani, li urejtna t-triq
tal-ġustizzja, Kristu, ħniena.
Ragħaj twajjeb, li bl-għotja ta’
ħajtek ħlaqt dinja aktar ġusta,
Mulej, ħniena.
Ċ
Alla setgħan, li bil-kelma
tiegħek ħlaqt u ġġedded kollox,
Mulej, ħniena.
Feddej qaddis, li taf tbiddel
il-qalb tal-bniedem sabiex ikun
bla tebgħa u ġust quddiemek,
Kristu, ħniena.
Imħabba bla qies, li fil-ħolqien
u fl-istorja tal-fidwa turi
l-glorja u s-sbuħija tiegħek,
Mulej, ħniena.
TALBIET KOMUNITARJI TA’
INTERĊESSJONI
Imħejjija mis-Sur Andrea Pace
NOTA:
Waħda jew aktar minn dawn
it-talbiet jistgħu jiġu miżjuda
mat-Talbiet li normalment
jintużaw waqt iċ-ċelebrazzjoni
tal-Quddiesa jew tal-Liturġija
tas-Sigħat
Alla Missier,
nitolbuk għall-Papa, l-Isqfijiet
u kull min hu f’posizzjoni ta’
tmexxija fil-Knisja, sabiex
dejjem jfittxu jħabirku
għall-għaqda fost l-Insara.
Nitolbu.
Alla Missier, Ibnek
Ġesù,
qalilna li huwa
‘d-dielja vera’. Nitolbuk sabiex
aħna nibqgħu fik, sabiex inti
tibqa’ fina (Ġw 15:4). Agħmel li
l-Insara tad-dinja kollha jkunu
ħaġa waħda
fih,
sabiex id-dinja temmen
f’Ibnek Ġesù
mibgħut biex issalvana. Nitolbu.
Nitolbuk tfejjaq kull forma ta’
diviżjoni u firda fost dawk li
jistqarruk bħala
l-Mulej u s-Sid
tagħna.
Nitolbu.
Mulej, sawwab għatx
għall-ġustizzja u għall-ħarsien
tad-dinjità tal-bniedem fost
l-Insara kollha. Ibgħat
l-Ispirtu tiegħek sabiex
l-Insara kollha jiġu flimkien
fil-promozzjoni tal-ġustizzja u
l-ħniena.
Nitolbu.
Alla Missier,
nitolbu għal
ħutna li qed jbatu
l-persekuzzjoni. Nitolbuk li
timlihom bid-don tal-kuraġġ
sabiex il-perseveranza tagħom
tkun xhieda ħajja li inti
rebbieħ fuq il-mewt u
li Int dejjem
preżenti fil-Knisja tiegħek.
Nitolbu.
ADORAZZJONI EWKARISTIKA
għal matul il-Ġimgħa ta’ Talb
għall-Għaqda fost l-Insara
Imħejjija mis-Sinjura Dorianne
Buttigieg
Jitkanta Innu Ewkaristiku waqt
l-Espożizzjoni
Introduzzjoni
Ninsabu miġbura hawn quddiemek O
Mulej, Alla Wieħed fi Tliet
Persuni, Sid il-Ħajja u Sid
il-Ġustizzja. Filwaqt li
nirringrazzjaw talli tajtna din
l-opportunità biex ningħaqdu
bħala komunità fil-preżenza
qaddisa tiegħek, nixtiequ
nirriflettu fuq is-sitwazzjoni
tagħna bħala Nsara li ninsabu
mifrudin minn Insara oħra.
Mulej, din is-sitwazzjoni ma
ġibnihiex aħna, iżda hija
riżultat ta’ diversi atti ta’
inġustizzja u żbalji li saru
fil-passat. Importanti li
niftakru li l-għaqda fost
l-Insara mhix biss bżonn
tal-Knisja u jridha Kristu, iżda
hi wkoll sitwazzjoni fejn
il-Knisja tista’ biss tkun
xhieda ta’ Kristu fiż-żminijiet
diffiċli tallum billi tkun
Knisja waħda u magħquda. Hekk
biss il-Knisja tkun tista’
titkellem b’vuċi soda u ħajja
il-lingwa tal-Evanġelju. Mulej,
imliena bl-Ispirtu Qaddis, ħaj u
kreattiv tiegħek hekk kif
nitolbuk biex timliena bil-qawwa
tiegħek biex naħdmu għall-għaqda
fost l-Insara.
Skiet
Mulej, nixtiequ nressqu quddiem
il-ħniena divina u nfinita
tiegħek, it-talb
għan-nuqqasijiet tagħna.
Għalkemm m’aħniex ħatja
tal-vjolenza li ġabet firdiet
kbar fil-passat, jekk inħarsu
fil-fond ta’ qalbna, aħna
nindunaw li m’aħniex anqas ħatja
ta’ kemm bi kliemna u b’għemilna
kebbisna l-firda flok l-imħabba
fl-ambjenti ta’ madwarna, kemm
fil-familji tagħna, kif ukoll
fil-komunitajiet tax-xogħol, ta’
studju, eċċ.
Skiet
Mulej, inressqu quddiemek
is-sitwazzjonijiet fejn aħna ma
urejniex ġustizzja ma’ dawk ta’
madwarna. Min jaf kemm-il darba
approfittajna ruħna minn
għajrna, forsi kultant mingħajr
intenzjoni ħażina, iżda li
permezz ta’ din l-azzjoni
weġġajna lil ħaddieħor. Forsi,
fid-dinja mgħaġġla tallum, ma
kellniex wisq ċans naħsbu fuq
kif imxejna mal-oħrajn, iżda
tajjeb li niftakru li aħna
nagħmlu parti minn din
id-dinja. Mulej, għinna
niftakru kemm l-aljenazzjonijiet
ta’ din id-dinja jwasslu biex
ibegħduna minnek, u
b’konsegwenza minn dawk ta’
madwarna.
Skiet, u wara jitkanta Innu
Ewkaristiku
Mulej, nixtiequ nirriflettu fuq
kemm-il darba wrejna nuqqas ta’
sensittività f’sitwazzjonijiet
ta’ inġustizzja li ħutna (kemm
dawk li huma Nsara u kemm dawk
li mhumiex Insara) għaddejjin
minnhom. Forsi s-sitwazzjoni
mwiegħra tagħhom lilna ma
taffettwaniex daqshekk, għalhekk
nonqsu milli nitkellmu u naġixxu
favur dawn ħutna. Mulej,
nitolbuk maħfra talli kemm-il
darba konna Nsara tal-isem ma’
dawn ħutna, minflok ma urejnihom
l-imħabba li jitolbu minna
l-Evanġelji.
Hawn jistgħu jsiru xi Talbiet
ta’ Maħfra minn dawk li hemm
f’paġni 8-9.
Skiet
Mulej, nixtiequ nirriflettu fuq
kemm-il darba sirna lsiera ta’
allat materjali, speċjalment
fejn jidħlu l-flus, mingħajr ma
naħsbu fuq kemm hawn nies li
m’għandhomx il-bżonnijiet
bażiċi. Kemm-il darba
akkwistajna xi ħaġa li kienet
għal qalbna u ftit wara qalbna
terġa’ tħossha vojta. Kemm-il
darba, Mulej, inqasna milli
nħarsu lejk, Alla tal-Ħajjin,
biex indawru ħarsitna lejn
il-ħafna idoli ta’ madwarna.
Skiet
Riflessjoni (mumenti ta’ skiet
bejn il-paragrafi)
Għażiż Missier, Għażiż Iben,
Għażiż Spirtu Qaddis, ninsabu
quddiemek biex nitolbu
għall-Għaqda fost l-Insara.
Aħna lkoll nemmnu li hija
deċiżjoni tiegħek meta din
l-għaqda isseħħ. Imma tajjeb li
niftakru li inti fdajt
il-missjoni tiegħek lilna
l-bnedmin biex inkomplu nxerrdu
l-Aħbar it-Tajba lill-bnedmin
kollha. Għalhekk aħna msejħin
biex inxerrdu l-aħbar ta’ mħabba
lil ħutna, kemm dawk Insara u
kemm dawk li mhumiex Insara.
Forsi aħna m’aħniex imsejħin
biex immorru nipprietkaw biex
nikkonvinċu lin-nies biex iħarsu
lejk, iżda għemilna huwa l-aqwa
xhieda ta’ dan it-twemmin
tagħna. Mulej, kemm aħna
konvinti mit-twemmin tagħna?
Kemm lesti nkunu xhieda ta’ dan
it-twemmin permezz ta’
għemilna? Kemm qed nimitaw
lill-ewwel Insara? Il-ktieb
tal-Atti stess jurina kemm “il-kotra
kbira ta’ dawk li emmnu kienu
qalb waħda u ruħ waħda. Ħadd
minnhom ma kien jgħid li l-ġid
li kellu kien tiegħu, iżda
kellhom kollox flimkien.
B’qawwa kbira l-appostli kienu
jagħtu xhieda tal-qawmien
tal-Mulej Ġesu,’ u kulħadd kien
iġibhom ħafna. Ħadd minnhom ma
kien jonqsu xejn; għax kull min
kellu oqsma jew djar kien
ibigħhom, u l-flus li jdaħħal
minnhom kien imur iqegħdhom
f’riġlejn l-appostli” (Atti
4:32-35). Il-Kelma tal-Mulej.
Irroddu ħajr lil Alla.
Dan ma jfissirx li fi żmien
l-ewwel Insara kollox kien
perfett, iżda hemm bżonn nerġgħu
inħarsu fil-fond ta’ qalbna u
naraw xi tfisser vera l-Aħbar
it-Tajba. Xi trid minna Mulej?
Inti li m’għandek bżonn xejn,
Inti xempju kbir tal-umiltà li
għoġbok tinqeda bix-xejn
tal-bniedem biex tidher aktar
il-glorja tiegħek. Fuq kollox
Mulej, Inti Mħabba. Għinna
nerġgħu infittxu t-tifsira vera
ta’ x’inhi mħabba u, fuq kollox,
ngħixuha.
Forsi nistaqsu, aħna x’nistgħhu
nagħmlu ħlief nitolbu
għall-Għaqda fost l-Insara?
Il-proċess li jwassal
għall-Għaqda fost l-Insara mhux,
jewwilla, xogħol it-teologi?
Apparti t-talb, aħna nistgħu
nagħtu eżempju kbir ta’ mħabba
permezz ta’ għemilna. In-nies
tallum għandhom ħafna aktar
aċċess għall-edukazzjoni iżda
għandhom għatx kbir
għall-imħabba fil-prattika. Kif
qed nuru l-imħabba tagħna, anke
lejn dawk li mhumiex Insara?
Nerġgħu niftakru kemm in-nies
tallum għandhom bżonn ta’ mħabba
kbira, f’dinja fejn
il-konsumiżmu u s-sekulariżmu
għandhom vuċi tassew qawwija u
konvinċenti minkejja l-essenza
qasira tagħhom.
F’dinja fejn huwa faċli ħafna li
nkunu aljenati (min jaf kemm-il
darba aħna stess konna vittmi
ta’ din l-aljenazzjoni!),
l-Evanġelju jistedinna biex
inqumu fuq saqajna u nieħdu
azzjoni. F’dinja fejn kulħadd
jgħid li jrid, u qisu kulħadd
għandu raġun, ma jidhirx dejjem
faċli li nuru l-verità
tal-Evanġelju. Però aħna
m’għandniex naqtgħu qalbna!
Mulej, inti wegħdtna li ser tkun
dejjem magħna. Għall-kuntrarju
tal-ħafna modi li jiġu u jmorru,
Inti Mulej tibqa’ għall-dejjem.
Miskin hu min jispiċċa vittmi
ta’ dawn il-modi mingħajr ma
jara u jgħix il-verità dejjiema
tal-Evanġelju. Mhux ta’ b’xejn
li l-Patrijarka Ortodoss ta’
Konstantinopli, Bartilmew,
ifakkarna fi kliem Kristu, li
aħna għandna nkunu fid-dinja
mingħajr ma nkunu tad-dinja.
Din kienet l-esperjenza li
fittxew il-patrijiet u
l-ommijiet tad-deżert, ħafna
sekli ilu.
Mulej, nistgħu nistqarru li
ż-żmien qed jgħaġġel wisq!
Jewwilla Inti mhux is-Sid
tal-ħajja tagħna? Kif nistgħu
ma nsibux ħin għar-riflessjoni,
fi żmien li jippretendi li
jurina veritajiet differenti?
Mhux ta’ b’xejn li l-Papa
Benedittu XVI kien iwissu kontra
dan il-periklu. U aħna x’ser
nagħmlu? Mulej, għinna nfittxu
dak li vera jiswa, kif għamlet
Marija ta’ Betanja, meta għażlet
li tisma’ l-kelma tiegħek (Lq
10:38-42). Mulej, fi żmien fejn
l-għażliet materjali stess huma
tassew ħafna u varji, għinna
nfittxu dak li vera jiswa.
Il-messaġġ tiegħek jibqa’ għal
dejjem. Għinna ħalli nsammru
ħarsitna fuqek biex hekk inkunu
kapaċi nikkumbattu
l-aljenazzjoni li ma tħalliniex
nagħmlu għażliet għaqlija.
L-aljenazzjoni hija waħda
mill-akbar perikli li toffri
d-dinja ta’ madwarna għax
tagħmilna insensittivi
għall-bżonnijiet tan-nies ta’
madwarna. Għinna ħalli
nikkumbattu l-aljenazzjoni
bil-kontemplazzjoni tal-Imħabba
Divina tiegħek. Ejjew nsammru
ħarsitna fuqek Mulej. Inti biss
tista’ tiggwidana biex ngħixu
t-triq tal-Evanġelju. Spirtu
Qaddis, saħħaħna bil-qawwa
divina tiegħek, biex inkunu
kapaċi nħarsu lejk bħala
direzzjoni għall-ħajja tagħna.
Fuq kollox, Mulej, għinna biex
ninħelsu minn ideat li nibnu
dwarek li jmorru kontra dak li
hu Int: Imħabba.
Hawn jistgħu jsiru xi Talbiet
Komunitarji minn paġna 10.
Il-patri u kittieb Amerikan
Thomas Merton jisħaq kemm
il-kontemplazzjoni
(ir-relazzjoni intima bejn
ir-ruħ u bejnek, Mulej) hija
esperjenza li tqarribna lejn
għajrna. U bir-raġun. Jekk
inħarsu lejn il-Verġni Marija,
li hija x-xempju
tal-kontemplazzjoni
fl-Evanġelju, naraw kemm Marija
li “baqgħet tgħożż f’qalbha dawn
il-ħwejjeġ kollha u taħseb
fuqhom bejnha u bejn ruħha (Lq
2, 19), kienet tassew attenta
għan-nies ta’ madwarna. Hekk
naraw fl-Evanġelju skont San
Ġwann, kapitlu 2, fejn Marija
kienet taf bin-nuqqas tal-inbid
fit-tieġ ta’ Kana u talbet lilek
Ġesù Kristu biex tagħmel xi
ħaġa. Għax ir-relazzjoni tagħna
miegħek, Mulej, tiftaħna
għall-oħrajn. Kif Inti Mulej,
Alla Trinitarju, hekk aħna
l-Insara ngħixu f’komunità li hi
l-Knisja.
Għalhekk ir-relazzjoni tagħna
miegħek tixprunana biex nieħdu
azzjoni fil-konfront ta’
inġustizzji soċjali fejn għajrna
qiegħed ibati. Mulej, fil-ħajja
tiegħek fuq din l-art, kemm-il
darba kont titkellem u taġixxi
favur il-foqra u l-emarġinati.
Inti tfakkarna li l-foqra ser
ikunu dejjem magħna. Mulej,
imliena bl-Ispirtu tieghek, biex
inkunu kapaċi nieħdu azzjonijiet
kontra l-inġustizzji, fosthom
il-foqor.
Huwa permezz ta’ dawn
l-azzjonijiet li nkunu nistgħu
verament ngħidu li qed naħdmu
għall-għaqda fost l-Insara.
Apparti t-talb, l-għaqda fost
l-Insara trid isseħħ permezz
tal-fatti, fuq kollox, permezz
tal-Imħabba.
Mulej, imliena bil-ħeġġa
permezz tal-Ispirtu Tiegħek biex
ngħixu l-imħabba tiegħek
mal-oħrajn b’ferħ u entużjażmu.
Il-fidi tagħna fik hija
esperjenza ta’ ferħ bla qjies.
Agħtina l-ħeġġa, Mulej, biex
inwasslu lil nies oħra biex
igħixu din l-esperjenza.
Skiet
L-Adorazzjoni tiġi konkluża
b’innijiet ta’ radd il-ħajr u
tifħir.
|