|
TISLIMA TAL-QDUSIJA TIEGĦU FRANĠISKU
LILL-IMPJEGATI TAL-VATIKAN
GĦALL-AWGURI TAL-MILIED
Sala Pawlu VI
il-Ħamis, 21
ta’ Diċembru,
2023
Għeżież ħuti, il-jum it-tajjeb!
Dis-sena wkoll il-Milied qed ilaqqgħana flimkilen biex nawguraw lil xulxin. Grazzi li ġejtu bil-familjari tagħkom ukoll!
Aħna u nikkontemplaw flimkien il-Misteru tat-Twelid ta’ Ġesù jkun sabiħ nifhmu l-istil ta’ Alla, li mhuwiex grandjuz, storbjuz, imma, għall-kuntrarju, hu l-istil tas-satra u taċ-ċkunija. Żewġ kelmiet importanti: satra u ċkunija. Dawn juruna l-karatteristika mansweta ta’ Alla li ma jiġix għandna biex ibeżżgħana bil-kobor tiegħu jew biex jiddominana bl-isplendur tiegħu, imma jiġi fostna bl-aktar mod komuni possibbli, billi jsir wieħed minna.
Satra u ċkunija. Alla jinħeba fiċ-ċokon ta’ Tarbija li titwieled fi ħdan koppja miżżewġa – Marija u Ġużeppi – li mhix fl-aħbarijiet, fil-faqar ta’ stalla għax ma kienx hemm post għalihom fil-lukanda. Dawn huma s-sinjali li jiddistingwu lil Iben Alla, li jippreżenta ruħu fid-dinja bħala żerriegħa ċkejkna li tmut moħbija fl-art biex tagħti l-frott. Hu Alla taċ-ċkejknin, Alla ta’ min hu tal-aħħar u, miegħu aħna lkoll nitgħallmu t-triq li għandna nimxu fiha biex nidħlu fis-Saltna t’Alla: mhux reliġjożità tal-qoxra u artifiċjali, imma li nsiru ċkejknin bħat-tfal.
Intom, għeżież, tafuhom sew dawn iż-żewġ kelmiet. Xogħolkom hawn fil-Vatikan fil-biċċa l-kbira tiegħu isir kuljum fis-satra, spiss billi twettqu ħidma li donnha ta’ ftit siwi iżda hi kontribut għas-servizz tal-Knisja u tas-soċjetà. Irroddilkom ħajr għal dan u nawguralkom li tkomplu ħidmietkom bi spirtu ta’ gratitudni, bis-serenità u l-umiltà, u billi fir-relazzjonijiet mal-kollegi tagħkom tagħtu xhieda nisranija. Hawn ukoll, anzi qabel kollox hawnhekk, hemm bżonn – veru? – ta’ dix-xhieda nisranija. Ħarsu lejn is-satra u ċ-ċkunija ta’ Ġesù fil-grotta; ħarsu lejn is-sempliċità tal-presepju li għamiltu, d-dar; u kunu żguri li t-tajjeb, anki meta jkun mistur u inviżibbli, jikber bla ma jagħmel ħoss. It-tajjeb jikber bla ma jagħmel ħoss, jitkattar b’mod mhux mistenni u jifrex il-fwieħa tal-ferħ. Tinsewħx dan: it-tajjeb jikber bla ħoss u jagħti dik il-paċi, dak il-ferħ lill-qalb, li huma tant sbieħ.
Dan l-istil – is-satra u ċ-ċkunija – irrid nawgurah ukoll lill-familji tagħkom u lil uliedkom. Illum qed ngħixu fi żmien “tal-irtokk: kulħadd jirtokkja, mhux biss wiċċu, imma wkoll il-qalb, u dan hu ikraħ ħafna, u jmorru jippużaw fil-vetrina. Id-dehra, speċjalment permezz tal-mezzi soċjali. Xi ftit jew wisq qiesu jridu t-tazzi tal-kristall bla ma jħabblu rashom l-inbid hux tajjeb. L-inbid tajjeb nixorbuh f’tazza komuni. Imma fil-familja, l-apparenzi u l-maskri ma jiswewx – fil-familja kollox hu magħruf -, jew, ftit jew wisq, ftit idumu; jgħodd biss li l-inbid tajjeb tal-imħabba, tat-tenerezza, tal-ħniena reċiproka, qatt ma jkun nieqes.
Dan hu l-istil ta’ Alla: qrubija, ħniena u tenerezza. U l-imħabba – nafuha tajjeb – ma tagħmilx ħoss. Ngħixuha fis-satra u ċ-ċkunija tal-ġesti tal-ħajja ta’ kuljum, fl-attenzjoni li nafu nagħtu lil xulxin. Dan nawguralkom: li tkunu attenti, fi djarkom u fil-familji tagħkom, għall-affarijiet iż-żgħar tal-ħajja ta’ kuljum, fil-ġesti żgħar ta’ gratitudni, fil-premura li tieħdu ħsieb xulxin. Aħna u nħarsu lejn il-presepju nistgħu nimmaġinaw, il-ħerqa, it-tenerezza ta’ Marija u Ġużeppi għat-Tfajjel li tiwieled. Nixtieq nawgura dan l-istil lilkom ilkoll.
Għeżież ħuti, intikom l-isbaħ xewqat għal Milied Qaddis. Huma xewqat li ngħaddi wkoll lit-tfal u liż-żgħażagħ, lill-familjari tagħkom, lill-anzjani li jgħixu magħkom, speċjalment l-għeżież tagħkom li huma morda. Ħuti, niftħu qlubna għall-ferħ: il-Mulej ġej fostna! Il-Milied it-tajjeb lil kulħadd! U, jekk jogħġobkom, itolbu għalija. Grazzi!
Miġjub għall-Malti mit-taljan minn Joe Huber