Il-ĦOLMA TA’ ĠERONZJU
The Dream of Gerontius
Tal-Kardinal John Henry Newman
Miġuba għall-Malti minn Fr Geoffrey George Attard
Ġesu’ Marija, l-mewt issa qed toqrob
u intom qed issejħu, smajtkom jiena,
intbaħt mhux għax in-nifs naqasni sewwa
jew għax il-kesħa daħlet sew, bla sliema,
Ġesu’ jkollok ħniena! Marija itlob għalija
dan il-ħass t’issa, qatt qabel ma ħassejtu;
kun miegħi Mulej f’dan il-mument aħħari,
għax ġismi minn dit-triq ma nafx l’għaddejtu.
Ġo fija qed inħoss bħal abbandun -
Maħbub l-erwieħ, għajnejja jħarsu lejk
waqt li inħoss li mhux sa nibqa’ nkun
u sa nintemm biex nintelaq f’idejk.
Ħbiebi għeżież itolbu isa, għalija,
għax fuq il-bieb qed nisma’ it-taħbit
u dan li ġie, bil-biża’ u bit-twerwir
qed jimla ‘l qalbi b’diqa u tregħid.
Il-mewt, o ħbieb, qed tħabbat issa sew
u bħal qiegħed inħoss li ma jien xejn
jekk naqa’ lura, l-vojt jiblagħni fih
u ngħib bħal min intemm jew qatt ma kien.
Mulej, maħbub, kun tiegħi kenn u tmun
la titlaqnix, għalkemm jeħtieġ ninħall
jeħtieġ li fit-taħsir naqa’, nsir xejn
nintilef fid-dagħbien ta’ qiegħ l-abiss
li minnu ġejt u miegħu għandi d-dejn;
dan hu li qed iseħħ fija tassew
ja biża’ kbir! Itolbu mela ħbieb
għax għandi bżonn u ma nistax
għalija nitlob, fija l-kuraġġ dieb.
ASSISTENTI
Kyrie eleison, Christe eleison, Kyrie eleison
Verġni Mbierka, itlob għalih,
Anġli mqaddsa, itolbu għalih,
Kori tal-ġusti, itolbu għalih,
Imqaddes Abraham, itlob għalih.
San Ġwann Battista, San Ġużepp itolbu għalih
San Pietru, San Pawl, Sant’Andrija, San Ġwann
Appostli kollha, Evanġelisti kollha, itolbu għalih.
Dixxipli mqaddsa tal-Mulej itolbu għalih
Innoċenti kollha itolbu għalih
Martri kollha, konfessuri kollha, itolbu għalih
Eremiti mqaddsa, verġni mqaddsa.
GERONZJU
Fuq tiegħek qum ja ruħ, uri qlubitek
u għalkemm taf il-qosor tal-jiem tiegħek
fuq l-art, tħejja sabiex tiltaqa’ m’Alla
il-Ħallieq, is-Sid illi dal-waqt sa tħaddan miegħek.
Fil-waqt li sa tinfixel w anke tbati
għal tul ta’ żmien qasir
la taħlix ħinek, qum u aħdem sħiħ
matul dan l-intervall żomm ċar it-tir.
ASSISTENTI
Kun ħanin u ieqaf miegħu Mulej
Kun ħanin u eħilsu fis Mulej,
mid-dnubiet li issa għaddew
u mir-rabja tad-Divin;
mill-periklu tal-imwiet
jew tħaddin l-għelt u d-dnubiet
mill-imħabba lejn il-jien
u mill-qerq tal-ħafna kliem;
mill-ħruxija tan-nirien
u mill-eħżen post jew żmien
lill-qaddej il-ħelsien ġib
żommu dejjem tiegħek qrib.
Bi twelidek u s-Salib
lilu eħles mit-telfien
bil-mewt tiegħek, u l-qawmien
roddlu l-ħajja ta’ b;a tmiem
u bir-rebħ fl-għoli u glorjuż
fejn mort tgħammar fis-smewwiet
ġiblu r-rebħa dakinhar
meta tkun it-tromba dwiet.
ĠERONZJU
Sanctus fortis, Sanctus Deus
De profundis oro te,
Misere, Judex meus
Parce mihi, Domine.
Jiena nemmen b’fidi ferma
f’Alla wieħed Trinita’,
u f’Ġesu’ li t’ulied Eva
in-natura fuqu ħa.
Jien nittama u dan bil-qawwa
li Ġesu’ fuq is-Salib
miet, u miegħu jien immewwet
dak li fija d-dnub iġib.
Tiegħu biss id-dawl u l-ħajja
lilu nħobb jien fuq kulħadd
u fuq kollox nagħti qima,
lilu s-Sid li ma jmut qatt.
Sanctus fortis, Sanctus Deus
De profundis oro te
Misere, Judex meus
Parce mihi, Domine.
Għax inħobbu, ħax hu Sidi
Jien inħobb ukoll bil-kbir
lill-Imqaddsa Knisja tiegħu
u tagħlimha bla tnikkir.
Jiena nilqa’ b’ferħ u mħabba
u naċċetta dak li jsir,
waqt li naqta’ l-irbit kollu
mal-qerq li jagħmilni lsir.
‘Qima u glorja, sliem, foħrija
lil Sid l-art, Sid is-smewwiet’
lill-Missier, l-Iben, l-Ispirtu
fost l-arkanġli l-għajta dwiet.
Sanctus fortis, Sanctus Deus,
De profundis, oro te
Misere, Judex meus
Mortis in discrimine.
Ma niflaħx iżjed, qed inħossa nieqsa
dik l-għajja kiefra, agħar mill-agħar uġigħ
dik l-istmerrija, dawk riġlejna jogħtru
bħal meta xejn ma jibqa’ qawwi u sħiħ.
Inħossni fuq l-irdum
qed naqa’ u ma naqax;
ma nafx fejn jien sejjer
bħal nista’ u ma nistax.
Jew agħar minn hekk, jitkisser
il-qafas li jżomm sħiħ
il-ġisem dgħajjef tiegħi
nitnittef qalb ir-riħ.
U agħar u agħar – il-biża’
biża’ mingħajr waqfien
li jimla ruħi u jitla’
sax-xifer qisu flien.
U agħar u agħar il-qilla
ta’ mard il-ġisem sħiħ
li jġorr u jġibu miegħu
bil-ħeffa, fuqi, ir-riħ.
Ġwenħajħ jiftaħ qawwija
li jnittnu kullimkien
li jibdew jidħku bija
jeqirdu fija s-sliem.
Ġesu’ itlob għalija, Marija!
Xi anġlu, Ġesu’ bħal dak li jżurek ġie
f’tiegħek il-agunija. . .
Marija, itlob għalija, Ġużeppi itob għalija
Int Marija.
ASSISTENTI
Eħilsu O Mulej f’din l-eqqel siegħa
Kif dari Int għamilt bil-qawwa tiegħek Amen.
Enok w Elija, minn tagħhom l-agunija. Amen.
Noe mill-ilmijiet għal daru żgura. Amen.
Abram meħlus mnn qerq il-paganiżmu. Amen.
Ġob minn tant inkwiet li waqa’ fuqu. Amen.
Iżakk minn tarf is-sikkina nieżla fuqu. Amen.
Lot minn Sodoma maħruqa f’jum il-ġudizzju. Amen.
Mose mill-art tal-jasar u d-disperament. Amen.
Danjel minn ħalq l-iljuni mġewħa f’darhom. Amen.
U t-tlett żgħażagħ f’nofs it-Tron mixgħul. Amen.
Susanna s-safja mill-mistħija u d-diskors tan-nies. Amen.
David minn Gulija u qillet Sawl. Amen.
U ż-żewġ appostli mill-ħabs kollu dlam. Amen.
Tekla mit-turmenti tagħha. Amen.
- mela biex turi setgħetek
- eħles Mulej lil dan il-qaddej f’din l-eqqel siegħa.
ĠERONZJU
Novissima hora est; issa sa norqod
Ħallieni l-uġigħ . . . . .f’idejk
Mulej nintelaq jiena.
IL-QASSIS
Profiscere anima Christiana, de hoc mundo
Ibda ja ruħ Kristjana l-mixja tiegħek!
Itlaq minn din id-dinja! Itlaq f’isem Alla
il-Missier li jista’ kollox, li ħalqek!
Mur f’isem Ġesu’ Kristu, il-Mulej tagħna
Iben Alla l-Ħaj li żvina għalik!
Itlaq f’isem l-Ispirtu s-Santu, li
ġie msawwab fuqek! Mur f’isem
l-Anġli u l-Arkanġli, f’isem
it-Troni u d-Dominazzjonijiet; f’isem
il-Prinċipati u s-Setgħat; f’isem
il-Kerubini u s-Serafini; itlaq!
Mur, f’isem il-Profeti u l-Patrijarki;
u f’isem l-Appostli u l-Evanġelisti,
il-Martri u l-Konfessuri, f’isem
l-Irħieb qaddisa u l-Eremti; f’isem
il-Verġni u f’isem il-Qaddisin kollha ta’ Alla
irġiel u nisa morru! Aqbdu triqitkom
u jalla ssibu darkom kollha sliem
u jalla darkom tkun il-Għolja Mqaddsa
ta’ Sijon; bl-istess Kristu Sidna.
RUĦ TA’ ĠERONZJU
Jiena mort norqod; u qomt u nħossni sħiħ
tisħiħ ftit stramb, għax fija qed inħoss
bħal ħeffa ġdida, u bħal ħelsien ġdid
li jroddli bħal jien frisk li bħalu qabel
jien qatt ma ħassejt. O x’ħelu rdoss!
M’għadnix qed nisma’ l-ħoss tat-tektik taż-żmien
u lanqas in-nifs għaddej, u mank il-polz
u ebda waqt ma jiġi jew imur.
Jien kelli ħolma; iva - u xi ħadd qal
‘Ħalliena’; u mbagħad bħal nifs ‘il ġew u ieħor
‘il barra li dar mal-kamra.
Imbagħad smajt vuċi ta’ qassis qed tgħid
‘Subvenite’ u kulħadd niżel fuq għarkopptejh.
Bħal donnu għadni qed nisimgħu; imma rqiq, fil-baxx,
u aktar dgħajjef l-aċċent qed nisma’,
u jikber l-intervall bejn wieħed u ieħor.
Ah! Meta qed iseħħ dan? X’inhu dal-qtugħ?
Dan is-silenzju jnissel solitudni
fil-qalba nett ta’ ruħi;
u l-mistrieħ profond, hekk ħelu u hekk ta’ serħ
bħal kellu qtar ta’ diqa u tal-uġigħ.
Ħsibijieti kollha marru lura lejn l-għajn
bħal reġgħu daħlu ġeww’
u rġajt bejt niekol minni stess
x’niekol ma kellix sew.
‘Mma jien mejjet jew ħaj? Mejjet m’inix
għadni fil-ġisem; għax jien għadni nħoss
bħal xi kuraġġ li għadu jaqbad miegħi;
u kull organu fil-ġisem qiegħed hemm
u f’għaqda mal-oħrajn u f’simetrija
li ddur madwari u tagħmilni sħiħ
il-bniedem illi jdur, b’ġisem u demm.
Imma jien ridt, tassew, nitħarrek ftit
u setgħa kelli; għax ħassejtni stramb
la nista’ nħarrek idi u lanqas riġli
u x-xofftejn u s-swaba’ ma jersqux,
u lanqas il-kappell tal-għajn ma
jrid jagħti ftit serħan il-moħħ,
biex bit-taħrik tas-soltu kull ftit ħin
juruni k’inix ħaj inkella le.
Le jien ma nafx fejn jien u x’jien
jekk hux bil-wieqfa fuq riġlejja ndur
inkella qiegħed, jew mal-art mindud
nitħarrek jew għajjien.
Daqstant biss naf – ma nafx lanqas kif nad
jekk huwiex l-univers li fih kont għext
hux hu li qed iħalli lili wrajh
inkella huwie jien qed inħallih.
Jew jien jew hu qed jimraħ fl-għoli sħiħ
fuq ġwienaħ qalb l-irjieħ.
Issa miljuni l-mili bejn it-tnejn,
u vojt jifridna qiegħed minn xulxin,
vojt li nqisuh bl-ispazju naf biċ-ċert
imma tistaqsinix k’nistax nikkalkulah
bil-ħeffa jew biż-żmien?
Jew jien qiegħed immur lil hemm mill-infinit
u nimraħ ‘l hinn mill-qies
li jagħmel il-vjaġġ tiegħi fl-infinit
‘il bogħod mid-dinja, bogħod minn art in-nies?
Dan għaġeb ieħor; xi ħadd qiegħed jaħfinni
fil-palma minn ta’ jdejh; u din mhix bħall-
qabdiet l-oħrajn li jużaw fuq l-art,
imma madwari sħiħ inħossha ddur
bħal kieku kont ballun, u nħoss ukoll li
mhux jien waħdi miexi bir-riġlejn
imma hemm xi ħadd quddiemi juri t-triq.
Xi ħlew! Qed nisma’ l-kant; u dan mingħajr ma naf
jekk hux qed nisma’, jew inkella immiss, jew
forsi ntiegħem l-istess noti li ġejjin.
O x’ħelwa melodija tmiss il-qalb!
ANĠLU
Jien xogħli lest
il-ħidma għamilt
u issa ġej
neħodha lejn id-dar,
għax il-kuruna ntrebħet
Allelulia
għal dejjem.
Missieri tani
raddli f’idejja
dan bin il-art
sa mit-twelid.
Biex naqdi u neħles
Allelulia
u issa salv.
Dan bin it-tafal
lili ġie mogħti
biex inrabbi u nlesti
fl-uġigħ ingħin u nħejji
fit-triq id-dejqa.
Alleluia!
Mill-art lejn is-sema.
RUĦ
Din membru tal-familja
ta’ ħlejjaq kbar tassew, li għalihom l-art inbniet
miljuni ta’ snin ilu, qagħdu maġenb it-Tron Divin; -
hu qatt ma għaraf id-dnub
u f’dawk iċ-ċikli kollha li għaddew
żamm sħiħ il-ħajja pura tas-smewwiet,
u lilu ngħata li ħarstu jitfa’ ’l fuq
lejn wiċċ Alla setgħan
u xorob mill-Għajn ħajja ta’ bla tmiem
u lilu qeda b’ruħu kollha ġmiel
hawn hu jibda mill-ġdid.
ANĠLU
Mulej kemm inti kbir fil-għoli, il-fond
imma aktar fil-bnedmin!
Oh liema mħabba kollha ġmiel u rebħ
wasslet tikseb għalik il-qaddisin.
U ħadu l-post li inti kont ħejjejt
u tilfu l-anġli meta tkabbru sħiħ
u mill-ġenna keċċejt..
Hu qiegħed fl-ewwel ġnien, jitkaxkar fl-art
mimli bl-iskopijiet!
Dak illi fih il-ħażen sħiħ
biex jidħak bil-bnedmin.
U ħaddem moħħu kollu qerq bla ġieħ
biex lill-ewlenin bnedmin jirbaħ bil-kliem
f’qoxortu biss sabiħ.
Kien dakinhar li mis-smewwiet lejn l-art
lil Ibni Jiena bgħatt!
Oh liema ġlieda twila u bla mistrieħ
issieltu biex it-Tajjeb jibqa’ sħiħ!
U fl-aħħar minn ġot-tajn fejn kien jinsab
ħarġu bi ħlas prezzjuż li b’demmu ġab.
Oh liema ħidma kollha qtigħ il-qalb
tinħadem rajt!
Qalb it-tifrik u qalb bosta beżgħat
il-ġrajja kiebja, frott il-fidwa rat
u qalb l-imwieġ li riedu b’ikel ‘l-art
id-dgħajsa fil-ħelsien tal-grazzja ankrat.
O bniedem, kif f’nofs triq bejn sema u art
tul jiemek int baħħart
kull meta ġrejt biex tiekol dak li xtaqt
jien ħlistek mill-velenu li maxtart
dgħjufitek kollha għelt kabbart bid-dnub
sa feġġ il-ħelsien sħiħ f’dawl il-Mislub.
Kif jistgħu s-setgħat minn tas-smewwiet
xi darba jifhmu sew
il-ħwejjeġ li ngħataw lill-wild Adam
li tappnu d-dawl u għammru qalb id-dlam?
Dak li għas-Serafin ma jagħmilx sens
F’idejn l-Anġlu sar il-fidwa tal-ġens.
RUĦ
Issa naf sew li ninsab barra mill-ġisem
u li lid-dinja warajja ħallejt;
li ma kienx hekk kif qatt stajt nisma’ sewwa
il-mużika ta’ Alla kollha ġmiel;
issa ninsab kuntent u kalm u hieni
il bogħod mis-semm tal-qerq u t-tentazzjoni
il-ġabra qed inħoss kull ħin timlieni.
ANĠLU
Lilu tifħir, li għall-kliem tiegħu biss
tal-aħħar jiġu l-ewwel, fuq quddiem
u l-imkabbrin jintefgħu lejn it-tmiem;
għax niżżel minn fuq tronu lis-setgħan
u lil Marija għolla Omm is-Sultan
u lil Luċifru tefgħu f’qiegħ l-abiss.
RUĦ
Jiena sa nkellmu, Sidi, O Mulej
u Anġlu li tħarisni - sliem issa
u għal li ġej!
ANĠLU
Sliem, ibni!
Int ibni u ħija! Sliem
fejn sejjer ħi?
RUĦ
Ma nixtieq xejn għajr ngħidlek ftit tal-kliem
biex ngħidu kelma int u jien flimkien
irrid nagħmillek xi mistoqsijiet
mhux b’kurżita’, ‘mma biex naqtgħu das-skiet
ANĠLU
Inti ma tista’ qatt tixtieq
ix-xewqa li għad trid tinbet mill-qiegħ.
RUĦ
Mela sa nlissen kliemi, kif emmint
li kif ir-ruħ ittemm fid-dinja l-vjaġġ
jewwilla ma taqax f’idejn is-Sid
u terġa’ għandu bħal tax-xemx ir-raġġ?
Għidli x’qiegħed iżommni O Mulej
milli nintelaq fik għaż-żmien li ġej?
ANĠLU
Hekk la taħsibx għax b’ħeffa bla tfissir
int riesaq lejn l-Imħallef, Sidek kbir
għax mank ir-ruħ ma tkun infirdet sħiħ
li terġa’ lejn għeruqha bla tnikkir.
Iż-żmien hawnhekk f’din l-art ’il fuq mill-art
ma jitkejjilx bis-sħana, il-ksieħ, il-kalma, il-bard.
La tippruvax il-ħin taqsam bil-kejl
jekk tifred hawn il-jum mid-dlam tal-lejl,
x’ħin tisma’ s-‘Subvenite’ tal-qassis;
it-talb ikun ġa sar bla tista’ tqis!
Għax bejn l-ispirti u l-art minn tal-bnedmin
bejn il-kejl t’hawn u ż-żmien tad-dinja, il-ħin,
hawn baħar jaqsam li ma jitfissirx
bi kliem il-bniedem żgur ma jintagħżilx.
Ix-xemx u l-qamar hawn ma jinstabux
u l-kwiekeb b’dawlhom lilna ma jdawlux
u l-istaġuni għorba f’dan l-idwar
u l-arloġġ tagħna ħinu għadda u mar.
Għalina mhux meħtieġ il-għadd tal-ħin
il-ħsieb il-kejl bla rbit ma’ ġrajja u snin;
it-tul hawnekk qasir u ċ-ċkejken kbir
u dak li għadda, għadu ġej, ħa jsir;
kulħadd iżomm għalih il-kejl u ż-żmien
u l-qies li għandna hawn, bla bidu u tmiem.
Is-sekli ma jgħaddux, lanqas jibdew
u ħsibijietna biss b’Alla jimtlew.
RUĦ
Għidli ja Anġlu, għidli
għalfejn minn Alla jiena ma nibżax
issa li dħalt f’dil-mixja tas-smewwiet?
Meta kont għadni fl-art kelli l-biżgħat
U meta flejt lil Kristu Kurċifiss
kont inħoss fija ħsus kollha twerwir
mis-setgħa tal-ġudizzju ’l hemm mis-snin.
Imma issa nħossni ħieles mill-biżgħat
lejn Sidi nħares b’hena u rpużat.
ANĠLU
Iva, int għalhekk seren issa u kuntent
għax darba bżajt, issa aktar ma tibżax,
għaliex tal-mewt il-qilla marret, tfiet,
u l-jum tar-ruħ qed jibda qalb is-skiet.
Dak li għad iseħħ għall-bnedmin kollha mbagħad
qed iseħħ issa għalik, hawn f’dan il-waqt;
int riesaq lejn it-Tron, u d-dawl sabiħ
qed jitfa’ r-raġġi tiegħu fuq ir-ruħ,
il-Ġenna bdiet, l-Imħallef qiegħed hawn
sa taħsad dak li żrajt f’tad-dinja r-rjieħ!
RUĦ
Imma bil-mod, bħal donnu qed inħoss
xi ftit tal-biża’. . .x’qed iseħħ malajr
li bħal qed jhedded ftit dal-ħelu rdoss!
ANĠLU
Issa wasalna f’salet l-imħallfin
minn fejn jinstemgħu il-karbiet kesħin
tax-xjaten indannati u mitlufin.
Dan hu r-reġjun tan-nofs, hawn ix-Xitan
jinsab ukoll, jitħalla jkun ħerqan
minn hawn tefa’ lejn l-Art fuq Ġobb miskin
il-provi kollha qilla u mxajtnin.
Dejjem imġewwaħ dan, dejjem qalil
irid isemma’ leħnu bit-tgħajjir.
RUĦ
Oh x’miġja ta’ nuqqas ta’ qbil u mrar!
DEMONJI
Ulied koroh
ta’ din l-art
kemm nixtiequ
kieku sirna bħal allat.
Qrib in-Nar kbir u divin
ma qgħadniex matul is-snin
u minn Alla, għax kburin
sfajna lkoll imkeċċijin.
Bogħod mill-glorja tat-tajbin
sibna rwieħna mehdijin
l-art nilagħqu kollha trab
u nitkawgħġu imdejqin.
ANĠLU
Qed jgħixu ħajja mingħajr kwiet u sliem
bħal annimali jfittxu jitmantnew,
iridu jieklu – dejjem imġewħin
ifittxu li jinħelsu mid-destin.
DEMONJI
Il-moħħ ħieles ;
nagħmlu kuljum
dak li irridu
jum wara jum.
Imsejkna, dgħajfa
il-qaddisin;
le mhumiex ħielsa
imma msallbin.
Haha! Haha!
Tafal maħdum
imsejken bniedem
dejjem jittallab
midneb jew niedem!
Haha! Haha!
Jemmnu u jisimgħu
lill-qassisin
minn imeħirhom
immexxijin!
RUĦ
Kemm huma bla setgħa
u bosta mqarrqin
imma brikkuni
fost il-bnedmin!
ANĠLU
Hekk kif tinsab fil-waqt tal-prova
imxi bil-għaqal, iftaħ għajnejk
segħat il-ħażen ġew bnew l-għamara
qribek u ħdejk!
Kollox sabiħ jippruvaw juru
dawn l-imwaqqgħin
imma x’ħin jilmħu xi Anġlu safi
bosta jinfixlu bħal maħrubin;
eħles mid-dwiefer tal-indannati
kif l-irħieb ħelsu f’kamret it-talb
lejn Alla resqu, u lilU qiemu
l-Imħallef twajjeb, il-ferħ tal-qalb.
DEMONJI
Vizzji u Virtu’
kliem jolqot l-għajn
biża’ min-nar
bjuda flok tajn,
Ha ha! Ha ha!
Miskin il-bniedem
ifittex l-hena
jixtieq li jirbaħ
bi premju l-Ġenna!
RUĦ
Jien ma nixtieqx li x-xjaten nerġa’ nara
imma l-Imgħallem fuq it-Tron tas-Sema
jew li l-kliem tiegħu nisma’ lili jlissen
u jgħidlu biex nidħol f’tiegħu il-ġemgħa!
Kollox kien dlam sa ma ħallejt id-dinja
għidli daqsxejn fejn jien għax qed intiegħem
qed nisma’, qed inħoss u qiegħed nilmaħ
u ma nafx sew dal-post kif sa jiftiegħem.
ANĠLU
Issa xejn aktar m’int sa tħoss u tilmaħ
issa qed tgħix fid-dinja tas-sinjali
ruħek bla ġisem, ma teħtieġx xi sura
ma hemmx iżjed ilbieraħ, issa u dari.
Sa tħossok waħdek bħal mitluf u minsi
sa tħossok dawramejt bil-ħolm imdawwar
dal-ħolm mhux bħal tal-art li jiġi u jgħaddi
dan ħolm tassew li fis-sewwa huwa msawwar.
Sa tħossok qisek għadek tgħix fuq l-art
sa tħoss id-daqs, sa xxomm l-inwar tal-ħajja
sa tisma’ l-mużka u tagħżel waqt minn ieħor
sa tistħajjlek tassew qed tgħix xi ġrajja.
Imma’issa mhux sa tmidd passejn jew timxi
mhux sa titħarrek kif kont tagħmel darba
mhux iżjed tħoss l-uġigħ fl-idejn u r-riġel
mhux iktar tista’ tlissen diq jew karba.
Sa dak il-jum tal-ferħ li għad jitfaċċa
sa tibqa’ b’ġisem fil-moħħ biss jitlajja
sa jerġa’ l-jum tal-qawwa kollu glorja
sa jqumu l-mejtin kollha lkoll għall-ħajja.
Għalissa tilmaħ biss u fil-bogħod tara
dak illi l-qaddisin jilmħu quddiemhom
viżjoni kollha ġmiel f’sura ċelesti
li għad jikkontemplaw l-erwieħ fi żmienhom.
RUĦ
Ħa jsir dak li jrid HU,
ma jitħoqqlix li nerġa’ nara mdawwal
il-jum sabiħ; wisq inqas wiċċu mqaddes
Hu li Hu l-isess xemx. Issa fil-ħajja
li darba għext, stennejt li l-purgatorju
ikun il-post li fih nistenna b’ħerqa
id-dehra għal ftit tas-Sid biex troddli l-ħeġġa!
ANĠLU
La mgħaġġla u anqas vana x-xewqa tiegħek
Iva – għal waqt wieħed tilmaħ ’l Alla Sidek
quddiem it-Tribunal xortik tinqata’
biex fuq il-lemin tiegħu mal-magħżula
tintasab ruħek hienja u ppremjata.
Qalb dlam niggież sa tilmaħ din ix-xena
li tant sa tħobb u trid tidħol ġo fiha
imma mument; kun af ibni ħanini
dak li qed titlob, mela d-dehra hienja,
sa tferrħek koċċ, fil-waqt li b’qawwa tinfdek.
RUĦ
Dan kliemek iebes, Anġlu, u jbeżżgħani
u nibża’ wisq jekk sa jfettilli ngħaġġel.
ANĠLU
Kien hemm xi ħadd; li issa ‘l fuq jinsab
fil-glorja; hu, li meta l-mewt iżżuru ġiet
ingħata li jingħaqad mal-Mislub –
hekk li l-ġerħat tal-pjagi ħallew fih
il-marka tagħhom b’qawwa u żelu sħiħ.
Minn dik il-agunija li lir-ruħ u l-ġisem
ħaddnet waqt li fniet; itgħallem dan,
li l-fjamma kollha nar ma tintefiex
u bidla ġġib fejn tmiss, mil-lejl għan-nhar.
Issemma sew!
Dawn in-noti ħelwin jinstemgħu ċar
l-anġli qed ikantaw, tassew xi ħlew!
L-EWWEL KOR TAL-ANĠLI
Is-Sliem lil Alla l-Għoli, is-Sid
u f’qiegħ il-art, is-sliem,
kull ma jeżisti minnek ġej
ta’ kollox bidu u tmiem.
Lilna uliedu r-rebħa ġab
fis-seigħa tat-tiġrib
sabiex naqduh il-ħelsien radd
għax tiegħu riedna qrib.
Lil Ibnu ried is-sura jtih
bil-ġisem u bir-ruħ
u b’daru tah is-sema u l-art
biex bniedem iqisuh.
Lil Ibnu bierek, lilu bagħat
fid-dinja biex rebbieħ
joħroġ tassew fil-kamp tal-ġlied
u tagħna jsalva l-ġieħ.
ANĠLU
Qbiżn’issa d-daħla u ninsabu ġewwa
d-Dar tal-Ħaqq; u fil-waqt li fuq l-Art
l-imqades u l-palazzi fihom kollha l-partijiet
jiswew il-flus u b’ħafna qsim u ġid;
fid-dinja tal-ispirti xejn minn dan,
u flok il-art u s-saqaf u l-ħitan
u t-tiżjin għoli kollu ġmiel u rħam,
issib lill-qaddisin li jgħannu lkoll
innijiet ħelwa ta’ tifħir ħerqan.
IT-TIENI KOR TA’ ANĠLI
Is-Sliem lil Alla l-Għoli, is-Sid
u f’qiegħ il-art, is-sliem,
kull ma jeżisti minnek ġej
ta’ kollox bidu u tmiem.
Imsejken sewwa wild Adam
li daħal qalb il-ġlied
u tilef wirtu kollu ġmiel
is-saltna tas-smewwiet.
Fuq rasu s-sema irrabjat
madwaru r-ragħad qalil
jinstema’ jkarwat fil-maltemp
u l-beraq bla żegħil!
Mill-bidu nett missier il-qerq
lill-bniedem taħt idejh
mar jaħfen biex jurih it-triq
li tressqu dejjem lejh.
Kultant beżgħan, kultant mifxul
ifittex triq aħjar,
kultant rebbieħ, kultant tellief
ftit li xejn jara ċar.
Bil-mod il-mod iż-żmien għalliem
mexxieh lejn il-Mulej
u beda jagħraf jagħżel sew
it-tajjeb u l-aħjar.
B’qawwet in-Nifs qaddis, mexxej,
u b’fidi fis-smewwiet
il-bniedem fehem liem’hi id-dar
fejn jista’ jgħix fis-skiet.
Imbierek l-Isem tal-Mulej
li għażel ġens għalih
sabiex minn żmien għal żmien jagħtih
il-glorja u t-tifħir.
RUĦ
Dal-ħoss nistħajjel it-tvenvin tar-riħ
ir-riħ tas-sajf qalb is-siġar jistrieħ
nisimgħu bl-eku tiegħu qawwi u sħiħ.
Kultant fil-qrib, kultant fil-bogħod, sabi,
kultant tal-biża’ f’surtu, ma jgħajjiex
ir-riħa tiegħu trodd il-fwejjaħ sbieħ.
TIELET KOR TAL-ANĠLI
Is-Sliem lil Alla l-Għoli, is-Sid
u f’qiegħ il-art, is-sliem,
kull ma jeżisti minnek ġej
ta’ kollox bidu u tmiem.
L-Anġli fil-għoli tas-smewwiet
għaddew mill-prova, u sħaħ
instabu u baqgħu jgħammru loll
qrib Dak li ħadd għadu ma raH!
Għalihom m’hemmx għabex u diq
ix-xemx ma tinżel qatt
fis-saltna li b’dar ingħataw
ma jnikket xejn lil ħadd.
Għar-razza msejkna tal-bnedmin
it-tama feġġet sħiħ
iżernaq jum ta’ dawl u sliem
ta’ hena u ta’ mistrieħ.
O bniedem, liema xorti sibt
f’dan it-tieni twelid
il-ġieħ ta’ qabel lilek tradd
u li ngħatajt mill-ġdid.
‘mma sadattant bejn sema u art
għad hemm il-ġlied għaddej
bħal agunija doppja trid
lill-bniedem tqis b’qaddej.
Jitħallas għad irid id-dejn
għall-maħfra tad-dnubiet
intemmet issa l-mewt u ntfiet
in-nar isaffi tant ħtijiet.
Glorja lil Alla kullimkien
tas-Sewwa s-Sid, Sultan
Hu waħdu jeqred dell id-dnub
Id-Dawl ikeċċi d-dlam.
ANĠLU
Dwar l-agunija bdew issa jkantaw
li dwarha inti kont darba staqsejt
il-Wiċċ ta’ Alla-Bniedem inkarnat
sa jnissel karba u tħoss xi ftit tal-mejt.
Imbgħad x’ħin lilU tilmaħ u tarah
ħlewwet il-qalb jagħtik u dispjaċir
l-indiema li ssaffik tiswielek sħiħ
u ‘l ruħek tehnni w tagħmel ġid qatigħ.
Il-ħarsa tad-Divin sa tidħol fik
u tgħallmek it-triq ħelwa tat-twajbin
u issa li bla dnub tinsab tassew
tistenna it-tgħanniqa tad-Divin.
Bħal dwell qaddis tħoss jibda ġewwa fik
bejn li tixtieq tinħeba f’dak il-waqt
u bejn li trid li tibqa’ tgħammar hemm
għax ħarset Alla tkun għal ftit ħin sraqt
u dan jiswielek purgatorju sħiħ
sakemm mid-dwell toħroġ rebbieħ kif xtaqt.
RUĦ
Tinsab ruħi f’idejja u bla beżgħat
għax issa nħossni mdawwar b’dawl ħanin
bħal nisma friski jfuru l-ilmijiet
inħossni qed nintelaq f’dawl divin.
ANĠLU
Issa konna qbadna it-turġien
li jwasslu ġewwa s-Sala tal-Preżenza
quddiemna qatgħa anġli juru t-triq
u jgħannu ‘l Alla wieħed Trinita’.
ANĠLI TAT-TARAĠ QADDIS
Missier, illi tjubitek ħadd ma jaf
għajr dawk li wiċċ imbwiċċ tiegħek qegħdin;
bil-bniedem fqir inqdejt
biex turi f’dawl ħanin
il-grazzja kollha sliem
li biha l-bniedem midneb kont geżwirt.
Qed nilmaħ l-Anġlu li f’dell il-ġnejna lmaħt
Mulej, mgħejjun bil-bniedem waqt il-hemm
agonnizant minħabba l-Liġi u rajt
li ssielet u sa rebaħ hawnhekk bqajt.
Għax min jista’ t-tifħir mistħoqq jagħtih
jekk mhux min rah fil-ġlied joħroġ rebbieħ?
RUĦ
Iskot! Bil-mod qed jinfetħu il-bibien
tas-Sala tal-Preżenza bla dewmien!
RABA’ KOR TAL-ANĠLI
Is-Sliem lil Alla l-Għoli, is-Sid
u f’qiegħ il-art, is-sliem,
kull ma jeżisti minnek ġej
ta’ kollox bidu u tmiem.
Bir-rabja mtela l-għadu l-kbir
kontra Alla tas-smewwiet
għax lil Adam Hu qiegħed b’sid
ta’ ħlejjaq u artijiet.
Fuq xbieha tiegħu ħalqu u tah
lil Eva b’sieħba w omm
l-ulied li minnu kattru l-art
u kollox tah li jżomm.
U meta għal kelmet martu ħa
mis-siġra tal-għarfien
missier il-qerd qabeż ferħan
għax kiser l-ewwel sliem.
Imbagħad mis-sema Alla bagħat
lil Ibnu il-waħdien
biex jerfa’ l-bniedem minn ġot-tajn
u jeħles lill-ħolqien.
ANĠLU
Hekk kif fuq l-għatba riġlejna qegħdin
Nisimgħu l-anġli jgħannu ferħanin.
ĦAMES KOR TAL-ANĠLI
Is-Sliem lil Alla l-Għoli, is-Sid
u f’qiegħ il-art, is-sliem,
kull ma jeżisti minnek ġej
ta’ kollox bidu u tmiem.
O Mqaddes Għerf li fostna bgħatt
Adam ieħor u ġdid
fis-siegħa tal-battalja rbaħt
u rfist fuq serp imqit.
O Kbira Mħabba, b’liema ferħ
irbaħt fuq il-ħażin;
fejn falla Adam, irnexxejt Int
b’ġisem minn tal-bnedmin.
Sabiex aktar mill-grazzja ġġib
lill-art trodd il-ħelsien,
il-ġisem u id-demm ilbist
għalkemm tiżboq liż-żmien.
Imħabba kbira din tassew
li qerdet l-għadu x-xiħ
li b’għuda nqeda għall-ingann;
biex jerġa’ jieħu r-riħ.
U kif mill-għuda ġie t-telfien
u Adam tilef Ħabib
hekk bl-għuda wkoll il-fidwa ġiet
bid-dawl minn tas-Salib.
ANĠLU
Qed joqrob il-ħaqq tiegħek, hawn qegħdin
taħt ħarset l-Għoli u minnu mdellin.
RUĦ
Qed nisma’ l-vuċijiet li ħallejt fuq l-art.
ANĠLU
Qed nisma’ l-vuċijiet madwar is-sodda
imdawwar b’bosta ħbieb;
qed nisma’ l-Qassis jgħid is-‘Subvenite’
u l-Anġlu tal-Agunija wara l-bieb.
Dak l-istess Anġlu illi waqaf miegħu
u li l-kuraġġ u s-saħħa mar jagħtih
meta fuq għarkopptejh kien minsub waħdu
u d-demm u l-għaraq dlonk xaqqew għalih;
dan l-aħjar anġlu jista’ jitlob ħniena
għall-erwieħ kollha qrib il-mewt w għajjiena.
ANĠLU TAL-AGUNIJA
Ġesu’! f’ġieħ it-tbatija kbira li ġiet fuqek;
Ġesu’! f’ġieħ dik il-kesta tad-deni li fnietek
Ġesu’! f’ġieħ it-taħbit tal-qalb li qabdek;
Ġesu’! f’ġieħ kotret id-dnubiet li ġarrejt fuqek
Ġesu’! f’ġieħ dak it-toqol tal-ħtijiet li erfajt fuqek
Ġesu’! f’ġieħ l-innoċenza li ddawwar persuntek
Ġesu’! f’ġieħ il-qdusija li hija biss tiegħek
Ġesu’! f’ġieħ l-għaqda m’Alla l-Missier tiegħek
Ġesu’! salva l-erwieħ li huma għal qalbek
l-erwieħ li ġewwa l-ħabs kalmi u sereni
qed jistennewk fuq ix-xwiek
ħaffilhom l-aħħar siegħa – lejk iġbidhom
ħalli jiġu jgawduk, għax demmek swewk.
RUĦ
Ħa nidher quddiem Sidi. . . .
ANĠLU
Tifħir lil Ismu!
L-ispirtu tiegħi tar, u ħareġ sħiħ
u bl-enerġija jtir u post jsib
Fir-riġlejn minfudin tal-Emmanwel!
Ruħi ġriet tħaffef lejn Ġesu’ l-Mislub
li minnu xorbot saħħa, barka u ġmiel
u issa ntasbet f’dell Tron il-Maħbub.
RUĦ
Ħudni minn hawn; niżżillni fejn sa nkun
Ħallini hemm;
ħallini ħa nittama l-jum qaddes
ħa nbati ftit, kemm kemm!
F’dal-post inħaddan hieni t-tbatijiet
li naf li jispiċċaw
meta ż-żmien t’issa jgħaddi u jintemm
u wiċċ Alla naraw!
Għad jasal dak il-waqt li lilu rrid
għad jisbaħ jum rebbieħ
meta minn hawn nittella’ ‘l fuq, il fuq
jgħibu d-diqa u l-uġigħ.
ANĠLU
Ħalli issa jinfetħu l-bibien kbar
tal-Ġenna – kollha deheb – u nidħlu ġew
Anġli tal-Purgatorju ħudu r-ruħ
għax tat-tisfija s-snin marru u għaddew.
ERWIEĦ TAL-PURGATORJU
Mulej int kont għalina l-kenn
minn nisel għal nisel.
Qabel ma twieldu l-muntaji
qabel ma tnisslu l-art u d-dinja
minn dejjem ta’ dejjem int O Alla!
Int treġġa’ l-bnedmin lejn it-trab
u tgħidilhom ‘Erġgħu lura intom bnedmin!’
Elf sena huma għalik
bħal jum ta’ lbieraħ li għadda
Jew bħal sahra tal-lejl;
int taħsadhom u jsiru bħal ħolma.
Huma bħal ħaxix li jinbet fil-għodu;
fil-għodu jwarrad u jħaddar
fil-għaxija jidbiel u jinxef.
Ninsabu mifnija bil-qilla tiegħek
mibluha minħabba l-għadab tiegħek.
Inti ġibt quddiem għajnejk ħtijietna
dnubietna l-moħbija fid-dawl ta’ wiċċek.
Dur lejna Mulej kemm se ddum?
ħenn għall-qaddejja tiegħek.
Imliena kmieni bit-tjieba tiegħek
biex nifirħu u nithennew ħajjitna kollha.
Ferraħna daqskemm għakkistna
għas-snin li fihom rajna l-ħsara.
Ħa jidher għamilek quddiem il-qaddejja tiegħek
u l-kobor tiegħek quddiem uliedhom.
Ħa tkun fuqna l-grazzja t’Alla Sidna!
wettqilna inti x-xogħol ta’ jdejna
wettaq iva xogħol idejna.
Glorja lill-Missier u lill-Iben u lill-Ispirtu s-Santu
kif kien mill-bidu, issa u dejjem u jibqa’ għal dejjem
Amen.
ANĠLU
Bl-akbar imħabba u ħlewwa nħaddnek miegħi
ja ruħ għażiża li bid-demm mifdija
ġejt tal-Imsallab, ejja tgħannaq miegħi
għaliex bid-demm prezzjuż int ġejt mixtrija.
U l-ġisem tiegħek ħalli wrajk ja spirtu
fl-ilmijiet jegħreq ta’ din il-għadira
ħallih ħa jinżel, ħallih ħa jitbiegħek
mingħajr ma tibki, jew tfittex tirtira.
L-Anġli li lilkom dan il-ġieħ ingħata
li tindukraw dir-ruħ bl-akbar qlubija
imsieħba mill-quddies u t-talb assidwu
sa lilha twasslu qrib Tron it-Tgawdija.
Is-sliem għalik! Addjo! ‘mma mhux għal dejjem
żomm sod fuq soddtok, qalb in-niket – stabar
għad jgħaddi wkoll, malajr, il-lejl tal-prova
għad niġi biex inqajmek minn ġol-qabar!