Santita,

Wasal il-ħin li tħallina imma l-ispirtu tiegħek jibqa' magħna biex jissokta jkabbrilna l-Fidi għal ħafna żmien.  Fl-Atti tal-Appostli, Luqa jgħidilna li meta wasal il-ħin biex Pawlu u sħabu jitilqu minn Malta, l-abitanti "Tawna minn kull xorta ta' ġid, meta ġejna biex nitilqu, għabbew fuq il-ġifen kull ma konna neħtieġu."  Iżda jkolli ngħid li din id-darba se tkun int, Santita -- li dalwaqt titlaqna - li tajtna l-ġid li neħtieġu, l-għotjiet li r-Ragħaj tagħna biss jista' jagħtina.

Il-barka tiegħek saħħet il-Fidi tagħna, l-imġieba ġentili tiegħek u kliemek ħanin kebbsulna qalbna, l-imħabba paterna tiegħek lejn iż-żgħazagħ tagħna ġagħlithom jersqu lejk, it-tagħlim ispirat tiegħek kien ta' għajnuna lilna lkoll biex nifhmu aħjar il-ġmiel tal-Karita Nisranija.  Il-preżenza tiegħek fostna u triqtek madwar il-parroċċi tagħna, bħala l-Vigarju ta' Kristu u s-Suċċessur ta' Pietru, se jissuktaw jimlew ħajjitna bil-ġid u, kif nittamaw, jagħmluna Nsara u ċittadini aħjar.

Fl-omelija tiegħek ta' dalgħodu, inti ġenerożament irrimarkajt:

L-ebda viżitatur f'Malta ma jista' jonqos li jibqa' mistagħġeb bid-devozzjoni tal-poplu tagħkom, bil-fidi ħajja murija fil-festi tagħkom, bil-ġmiel tal-knejjes u s-santwarji tagħkom.  Imma dan id-don irid jinqasam ma' oħrajn, irid jiġi mxandar.

Santita, inħossni żgur li l-Kattoliċi Maltin se jkomplu jipprofessaw apertament u elokwentement il-Fidi tagħhom u l-valuri Nsara ta' karita u solidarjeta mal-bnedmin u li se jagħmlu ħilithom sabiex jaqsmu dawn id-doni ma' oħrajn, mhux biss f'artna imma wkoll lil hinn minn xtutna bħalma jagħmlu ħafna missjunarji Maltin f'tant pajjiżi madwar id-dinja.

Bis-saħħa taż-żjara Appostolika tiegħek fostna, it-tama tagħna ġġeddet u tqawwejna sabiex niffaċċjaw il-futur b'aktar ċertezza saħansitra f'ħajjitna ta' kuljum.  Kif Inti tgħallimna tant tajjeb fit-tieni enċiklika tiegħek Spe Salvi: "Il-Fidwa tiġi offruta lilna fis-sens li ngħatajna t-tama, tama ta' min jorbot fuqha, li permezz tagħha nistgħu niffaċċjaw il-preżent: il-preżent, anki jekk diffiċli, jista' jingħex u jintlaqa' jekk iwassal għal tragward, jekk inkunu ċerti minn dan it-tragward, u jekk dan it-tragward huwa kbir biżżejjed biex jiggustifika l-isforz tal-vjaġġ".  U tkompli tfissrilna: "Li ssir tagħraf lil Alla - ‘l Alla veru - ifisser li tirċievi t-tama".

Aħna konna kommossi li nsiru nafu llum li Inti ltqajt personalment mal-vittmi tal-abbuż li talbu li jarawk u li sabu faraġ fi kliemek li nittamaw li jħaffilhom xi ftit mill-piż li ilhom iġorru għal bosta snin.  Is-sensibilita tiegħek għan-niket tagħhom timlina bil-hena.

Nittamaw, Santita, li tieħu miegħek tifkiriet sbieħ taż-żjara tiegħek fil-Gżira ta' San Pawl u l-Poplu tagħha u l-Fidi tiegħu u ta' dik l-ospitalita li aħna kburin li tissemma fl-Iskrittura Mqaddsa.

Aħna għalhekk infissru l-gratitudni tagħna lejk, nitolbu l-barka tiegħek u nixtiqulek il-vjaġġ it-tajjeb lejn il-Belt Eterna.