|
Il-Katekiżmu tal-Knisja
Kattolika dwar is-Sogħba ...
1451 Is-sogħba hi l-ewwel att li
jrid jagħmel il-penitent. Hi
“n-niket tar-ruħ u l-istmerrija
tad-dnub flimkien mal-fehma li
ma jidnibx qatt u qatt iżjed”.
1452 Meta din is-sogħba tkun
imqanqla mill-imħabba għal Alla,
maħbub fuq kollox u qabel kollox,
tkun sogħba “perfetta” (sogħba
ta’ mħabba). Din is-sogħba
taħfer id-dnubiet venjali u
taqla’ wkoll il-maħfra tad-dnubiet
mejta, jekk tkun imsieħba ma’
fehma soda li, malli jista’ jkun,
wieħed ifittex li jqerr. |
Maħfra mingħajr saċerdot?
Il-Papa jfakkarna kif nirċevuha
Persuni fit-tarf ta’ ħajjithom
mingħajr kappillani, familji
magħluqa d-dar u ma jistgħux
isibu qassis minħabba l-emerġenza
tal-Covid-19: fl-omelija ta’
Santa Marta, Franġisku jikkwota
l-Katekiżmu u jsemmi l-“indiema”
li taħfer id-dnubiet sakemm
wieħed imur iqerr.
Is-salus animarum, is-salvazzjoni
tal-erwieħ, hija l-ogħla liġi
tal-Knisja, il-kriterju
fundamentali ta’
interpretazzjoni li jiddetermina
x’inhu ġust u mhux. Huwa
għalhekk li l-Knisja tfittex
dejjem, b’kull mod, li toffri l-possibbiltà
biex jirrikonċiljaw ruħhom ma’
Alla lil dawk kollha li jixtiequ
dan, li qed ifittxu, huma
xewqana jew li jintebħu
bil-qagħda tagħhom u jħossu l-ħtieġa
li jiġu milqugħa, maħbuba,
maħfura. F’dawn iż-żminijiet ta’
emerġenza minħabba l-pandemija,
mal-persuni morda serjament jew
iżolati fis-swali ta’ terapija
intensiva, kif ukoll
għall-familji li jiġu mitluba
jibqgħu d-dar biex jevitaw it-tixrid
tal-mard, tajjeb li nfakkru lil
kulħadd l-għana tat-Tradizzjoni.
Hekk għamel Franġisku fl-omelija
tal-Quddiesa f’Santa Marta, nhar
il-Ġimgħa 20 ta’ Marzu.
Il-Papa jitlob għat-tobba u
għall-ħaddiema fil-qasam
tas-saħħa li qed jagħtu
ħajjithom
“Jiena naf li ħafna minnkom,
għall-Għid”, qal il-Papa,
“tmorru tqerru biex
tirrikonċiljaw ruħkom ma’ Alla.
Imma ħafna bħalissa qed jgħiduli:
‘Imma jien fejn nista’ nsib
saċerdot, konfessur, la ma
nistgħux noħorġu mid-dar? U jien
nixtieq nagħmel paċi mal-Mulej,
jiena rrid li hu jħaddanni, li
nirċievi t-tgħanniqa ta’
missieri… Kif nista’ nagħmlu dan
jekk m’iniex insib saċerdoti?’.
Inti agħmel dak li jgħid
il-Katekiżmu”.
“Hu ċar ħafna: jekk int ma ssibx
qassis biex tqerr”, fisser il-Papa,
“tkellem ma’ Alla, huwa
Missierek, u għidlu l-verità:
‘Mulej, għamilt dil-ħaġa, din, u
din… Aħfirli”, u itolbu maħfra
b’qalbek kollha, bl-Att
tal-Indiema u agħmel proponiment:
“Wara ser inqerr, imma int
aħfirli issa”. U minnufih, terġa’
lura fil-grazzja ta’ Alla. Int
stess tista’ tersaq lejh, kif
jgħallimna l-Katekiżmu, lejn
il-maħfra ta’ Alla mingħajr ma
jkollok saċerdot fil-qrib. Aħsbu
ftit intom: issa hu l-waqt! Issa
hu l-waqt it-tajjeb, iż-żmien
opportun. Att tal-Indiema tajjeb,
u hekk ir-ruħ tagħna ssir bajda
bħas-silġ”.
Il-Papa Franġisku qed jirreferi
għan-numri
1451 u 1452 tal-Katekiżmu
tal-Knisja Kattolika, maħruġ
minn San Ġwanni Pawlu II u
miġbur taħt il-gwida tal-Prefett
tal-Kongregazzjoni għad-Duttrina
tal-Fidi, dak iż-żmien Joseph
Ratzinger. Dwar l-“indiema”,
il-Katekiżmu jikkwota l-Konċilju
ta’ Trento u jgħallem li
“s-sogħba hi l-ewwel att li jrid
jagħmel il-penitent. Hi ‘n-niket
tar-ruħ u l-istmerrija tad-dnub
flimkien mal-fehma li ma jidnibx
qatt u qatt iżjed’”.
“Meta din is-sogħba tkun
imqanqla mill-imħabba għal Alla,
maħbub fuq kollox u qabel kollox”,
jissokta l-Katekiżmu, “tkun
sogħba ‘perfetta’ (sogħba ta’
mħabba). Din is-sogħba taħfer
id-dnubiet venjali u taqla’
wkoll il-maħfra tad-dnubiet
mejta, jekk tkun imsieħba ma’
fehma soda li, malli jista’ jkun,
wieħed ifittex li jqerr”.
Għalhekk, fl-istennija li, malli
ċ-ċirkustanzi jippermettu,
inkunu nistgħu nirċievu l-assoluzzjoni
mingħand saċerdot, huwa
possibbli li b’dan l-att niġu
maħfura minnufih. Dan ukoll kien
diġà affermat mill-Konċilju ta’
Trento, fil-kapitlu 4 tad-Doctrina
de sacramento Paenitentiæ,
li jistqarr li l-indiema msieħba
mill-proponiment li wieħed imur
iqerr “tħabbeb mill-ġdid
lill-bniedem ma’ Alla, diġà
qabel wieħed jirċievi realment
dan is-sagrament”.
Din hi triq għall-ħniena ta’
Alla li hi miftuħa għal kulħadd,
li tagħmel parti mit-tradizzjoni
tal-Knisja u li tista’ tkun utli
għal kulħadd u b’mod speċjali
għal dawk li bħalissa jinsabu
qrib tal-morda fid-djar u
fl-isptarijiet.
Ara wkoll ...
Digriet tal-Penitenzerija
Appostolika dwar l-għoti ta’
Indulġenzi speċjali lill-fidili
fil-qagħda attwali ta’
pandemija, 20/03/2020.
Nota
tal-Penitenzerija Appostolika
dwar is-Sagrament tar-Rikonċiljazzjoni
fil-qagħda attwali ta’ pandemija.
20/03/2020.
|
