IL-FURJANA - 18.04.2010 - 10.00

Fuq il-Fosos

Il-Quddiesa

Traduzzjoni mit-test Oriġinali Ingliż

Għeżież Ħuti fi Kristu Ġesù,

Maħbubin uliedi, 

Jien ferħan ħafna li qiegħed hawn magħkom ilkoll illum quddiem il-knisja sabiħa ta’ San Publju biex niċċelebra l-misteru kbir tal-imħabba ta’ Alla muri fl-Ewkaristija Mqaddsa. F’dan iż-żmien, il-ferħ tal-istaġun tal-Għid jimla lil qlubna għaliex qed niċċelebraw ir-rebħa ta’ Kristu, ir-rebħa tal-ħajja fuq id-dnub u fuq il-mewt. Huwa ferħ li jittrasforma ħajjietna u jimliena bit-tama fit-twettiq tal-wegħdiet ta’ Alla. Kristu qam, alleluja!

Jien nagħti merħba lill-President tar-Repubblika u lis-Sinjura Abela, lill-awtoritajiet ċivili ta’ din in-Nazzjoni għażiża, u lill-poplu kollu ta’ Malta u Għawdex. Nirringrazzja lill-Arċisqof Cremona għall-kliem ġentili tiegħu, u nagħti merħba wkoll lill-Isqof Grech u lill-Isqof Depasquale, lill-Arċisqof Mercieca, lill-Isqof Cauchi u lill-isqfijiet l-oħra u s-saċerdoti preżenti, u wkoll lill-fidili Nsara kollha tal-Knisja f’Malta u Għawdex. Sa mill-wasla tiegħi lbieraħ filgħaxija kelli l-esperjenza tal-istess merħba mill-qalb li l-antenati tagħkom taw lill Appostlu Pawlu fis-sena sittin.

Ħafna vjaġġaturi żbarkaw hawn fil-kors tal-istorja tagħkom. L-għana u l-varjetà tal-kultura Maltija huma sinjal li l-poplu tagħkom gawda bil-kbir mill-iskambju ta’ rigali u ospitalità ma’ viżitaturi baħħara. U dan hu sinjal li intom kontu tafu kif tiddixxernu meta ġejtu biex tieħdu l-aħjar ta’ dak li kellhom x’joffrulkom.

Jien inħeġġiġkom li tibqgħu tagħmlu hekk. Mhux kulma tipproponi d-dinja tal-lum jistħoqqlu jkun aċċettat mill-poplu ta’ Malta. Ħafna ilħna jippruvaw jipperswaduna li nwarrbu l-fidi tagħna f’Alla u fil-Knisja tiegħu, u li nagħżlu għalina nfusna l-valuri u t-twemmin li bihom ngħixu. Huma jgħidulna li m’għandniex bżonn ta’ Alla jew tal-Knisja. Jekk inkunu ttentati nemmnuhom, għandna niftakru fl-inċident tal-Evanġelju tal-lum meta d-dixxipli, kollha kemm huma sajjieda ta’ esperjenza, stinkaw il-lejl kollu iżda ma qabdux ħuta waħda.  Imbagħad, meta deher Ġesù fuq ix-xatt, indikalhom biex jistadu għal qabda tant kbira li bilkemm setgħu jtellgħuha. Weħidhom, l-isforzi tagħhom ma swew għal xejn; meta Ġesù kien ħdejhom, qabdu kwantità enormi ta’ ħut.  Ħuti għeżież, jekk inqiegħdu l-fiduċja tagħna fil-Mulej u nsegwu t-tagħlim tiegħu, dejjem naħsdu frott kbir. 

L-ewwel qari li kellna fil-Quddiesa tal-lum hu wieħed li naf li tħobbu tisimgħu, ir-rakkont tan-nawfraġju ta’ Pawlu fuq ix-xtajta ta’ Malta, u l-laqgħa mill-qalb li tah il-poplu ta’ dawn il-gżejjer. Innutaw kif l-ekwipaġġ tal-bastiment, biex isalvaw, kellhom jitfgħu ’l baħar it-tagħbija, it-tagħmir tal-ġifen, u saħansitra l-qamħ li kien l-ikel waħdani tagħhom. Pawlu  ħeġġiġhom biex iqiegħdu l-fiduċja tagħhom f’Alla biss, filwaqt li l-bastiment kien qed jitbandal mal-mewġ. Aħna wkoll irridu nqiegħdu l-fiduċja tagħna fih biss. Tiġina t-tentazzjoni li naħsbu li t-teknoloġija avvanzata tal-lum tista’ tissodisfa l-ħtiġijiet kollha tagħna u tħarisna mill-perikli kollha li jhedduna. Iżda mhux hekk. F’kull mument ta’ ħajjitna aħna niddependu għal kollox minn Alla li fih aħna ngħixu u niċċaqalqu u għandha l-esseri tagħna. Hu biss jista’ jħarisna mid-deni, hu biss jista’ jiggwidana tul il-maltemp tal-ħajja, hu biss li jwassalna f’port fiż-żgur, kif għamel fil-każ ta’ Pawlu u sħabu mitluqin għal riħhom ’il barra mix-xtajta ta’ Malta. Huma għamlu kif ħeġġiġhom Pawlu, u kien għalhekk li “kulħadd qabad l-art qawwi u sħiħ” (Atti 27:44).

Aktar minn kull tagħbija li nistgħu nġorru magħna – f’termini ta’ kisbiet umani, il-propjetajiet tagħna, it-teknoloġija tagħna – hija r-relazzjoni tagħna mal-Mulej li tagħtina ċ-ċavetta għall-kuntentizza tagħna u għat-twettiq uman tagħna. U hu jsejħilna għal relazzjoni ta’ mħabba. Ara l-mistoqsija li għamel tliet darbiet lil Pietru fuq ix-xatt tal-għadira: “Xmun bin Ġwanni, tħobbni?” Fuq il-bażi tat-tweġiba affermattiva ta’ Pietru, Ġesù jassenjalu biċċa xogħol – ix-xogħol li jitma’ lill-merħla tiegħu. Hawn naraw il-bażi tal-ministeru pastorali kollu fil-Knisja. Hija l-imħabba għall-Mulej li għandha ssawwar kull aspett tal-predikazzjoni u t-tagħlim tagħna, iċ-ċelebrazzjoni li nagħmlu tas-sagramenti, u l-kura li nieħdu tal-poplu ta’ Alla. Hija l-imħabba tagħna għall-Mulej li timbuttana biex inħobbu lil dawk li hu jħobb, u li naċċettaw bil-ferħ ix-xogħol li nikkomunikaw l-imħabba tiegħu lil dawk li aħna naqdu.

Waqt il-Passjoni tal-Mulej tagħna, Pietru ċaħdu tliet darbiet. Issa, wara l-Qawmien, Ġesù jistiednu tliet darbiet biex jistqarr l-imħabba tiegħu, u hekk joffrilu fejqan u maħfra u fl-istess ħin jafdalu l-missjoni tiegħu. Il-qabda mirakuluża tal-ħut tenfasizza d-dipendenza tal-appostli fuq Alla għas-suċċess tal-proġetti tagħhom tad-dinja. Id-djalogu bejn Pietru u Ġesù jenfasizza l-ħtieġa tal-ħniena divina biex tfejjaq il-feriti spiritwali tagħhom, il-feriti tad-dnub. 

F’kull qasam ta’ ħajjietna aħna neħtieġu l-għajnuna tal-grazzja ta’ Alla. Miegħu aħna nistgħu nagħmlu kollox: mingħajru ma nistgħu nagħmlu xejn. 

Aħna nafu mill-Evanġelju ta’ San Mark is-sinjali li jakkumpanjaw lil dawk li jqiegħdu l-fiduċja tagħhom f’Ġesù: huma jaqbdu s-sriep b’idejhom u ma jiġrilhom xejn, huma jqiegħdu jdejhom fuq il-morda u dawn ifiqu (ara Mk 16:18). Dawn is-sinjali ntgħarfu mill-ewwel mill-antenati tagħkom meta Pawlu ġie fosthom. Lifgħa qabdet ma’ idu, imma hu sempliċement farfarha fin-nar u ma ġratlu ebda ħsara. Hu ttieħed biex jara lil missier Publju, il-proto tal-gżira, u wara li talab u qiegħed idejh fuqu Pawlu fejqu mid-deni li kellu. Fost ir-rigali kollha li ġew fuq dawn ix-xtut fil-kors tal-istorja tal-poplu tagħkom, ir-rigal miġjub minn Pawlu kien l-akbar fost kollha, u hu mertu tagħkom li kien aċċettat immedjatament u miżmum b’għożża. Għożżu l-fidi u l-valuri li takom l-Appostlu Missierkom San Pawl. 

Komplu esploraw l-għana u l-fond tar-rigal ta’ Pawlu lilkom u kunu żguri li tgħadduh mhux biss lil uliedkom iżda wkoll lil dawk kollha li tiltaqgħu magħhom illum. Ebda viżitatur f’Malta m’għandu jonqos li jkun impressjonat bid-devozzjoni tal-poplu tagħkom, il-fidi vibranti murija fiċ-ċelebrazzjonijiet nhar il-festi tagħkom, is-sbuħija tal-knejjes u s-santwarji tagħkom. Iżda dak ir-rigal jeħtieġ li jinqasam ma’ oħrajn, jeħtieġ li jkun artikolat. Kif Mosè għallem lill-poplu ta’ Iżrael kliem il-Mulej “ikunu fuq qalbek, u int tennihom lil uliedek, u tkellem fuqhom meta tkun f’darek, u meta tkun miexi fit-triq, u meta timtedd u meta tqum” (Dewt 6:6-7). Dan inftiehem tajjeb mill-ewwel Qaddis kanonizzat ta’ Malta, Dun Ġorġ Preca. Il-ħidma kateketika bla waqfien tiegħu, li ispirat żgħażagħ u kbar b’imħabba għad-duttrina Nisranija u devozzjoni profonda għall-Kelma ta’ Alla Inkarnata, kienet ta’ eżempju li nħeġġiġkom li żżommuh. Ftakru li l-iskambju tal-ġid bejn dawn il-gżejjer u l-bqija tad-dinja hu proċess li għandu żewġ toroq. Iżnu b’attenzjoni dak li tirċievu, u żguraw li taqsmu ma’ oħrajn dak li għandkom li hu ta’ valur.   

Nixtieq nindirizza kelma partikolari lis-saċerdoti preżenti hawn, f’din is-sena dedikata għaċ-ċelebrazzjoni tad-don kbir tas-saċerdozju. Dun Ġorġ kien saċerdot ta’ umiltà, tjubija, manswetudni u ġenerożità eċċeżżjonali, mogħti b’mod profond għat-talb u b’passjoni biex jikkomunika l-veritajiet tal-Evanġelju. Ħalluh iservi ta’ mudell għalikom fl-isforz biex twettqu l-missjoni li rċevejtu biex titimgħu l-merħla tal-Mulej. Ftakru wkoll il-mistoqsija li l-Mulej Imqajjem għamel tliet darbiet lil Pietru: “Inti tħobbni?” Dik hi l-mistoqsija li se jistaqsi lil kull wieħed minnkom. Intom tħobbuh? Intom tixtiequ taqduh permezz tad-don ta’ ħajjietkom kollha. Tixxennqu twasslu lil oħrajn biex isiru jafuh u jħobbuh? 

Ma’ Pietru, ikollkom il-kuraġġ twieġbu: “Iva, Mulej, int taf li nħobbok,” u aċċettaw bi qlub grati l-ħidma li assenjalkom. Il-missjoni fdata lis-saċerdoti hija tassew servizz lill-ferħ, lill-ferħ ta’ Alla li jixxennaq li jidħol fid-dinja (ara Omelija, 24 April 2005).

Waqt li nħares madwari issa lejn il-folol kbar miġburin hawn il-Furjana għaċ-ċelebrazzjoni tagħna tal-Ewkaristija, tiġini f’moħħi x-xena desrrkitta fit-tieni qari tagħna tal-lum li fih għexur ta’ eluf u eluf ta’ eluf għaqqdu leħenhom f’għanja kbira ta’ sebħ: “Lil Dak li qiegħed fuq it-tron u lill-Ħaruf, jingħata t-tifħir u l-ġieħ, u l-glorja u l-ħakma, għal dejjem ta’ dejjem”  (Apok  5:13).

Komplu għannu dik l-għanja b’ġieħ il-Mulej Imqajjem u b’radd il-ħajr għad-doni ta’ bosta suriet tiegħu. Fi kliem San Pawl, Appostlu ta’ Malta, jien nagħlaq kliemi lilkom f’din l-għodwa: “L-imħabba tiegħi magħkom ilkoll fi Kristu Ġesù” (1 Kor 16:24).

Ikun imfaħħar Ġesù Kristu!