|
Sensiela ta' tliet
programm audio dwar
il-Qaddej ta' Alla,
Fra Baskal Farrugia. Ħajr
lir-Radju Katidral,
Victoria, Għawdex.
Preżentazzjoni minn
Thomas D'Anastasi.
Tekniku Ġużeppi
Bezzina.
Mistieden Fr Joe
Buttigieg OFM Cap
Omelija
fil-125
anniversarju minn
meta
l-Qaddej ta’ Alla
Fra Baskal Farrugia
daħal mal-Patrijiet
Kapuċċini
Knisja tal-Patrijiet
Franġiskani
Kapuċċini, il-Belt
Victoria
Il-Ħamis 7 ta’ Mejju
2015
L-E.T. Mons. Mario
Grech, Isqof ta’
Għawdex
Baskal Fra Ferħan
Fil-Bibbja naqraw
illi “qalb ferħana
tagħti s-saħħa, ruħ
imnikkta tmewwet
il-ġisem” (Prov
17:22). Ma naħsibx
li din hija xi
verità rivelata minn
Alla, imma l-bniedem
jitgħallimha mill-esperjenza.
Fil-fatt, id-dwejjaq,
in-niket u d-diżgwid
itaqqlulna l-ħajja;
imma meta nkunu
kuntenti, il-ferħ
mhux biss jimliena
bil-ħajja u l-enerġija,
imma jistimulana
biex naqsmu din
il-kuntentizza mal-oħrajn.
Għalhekk nifhem
ukoll għaliex
il-bniedem,
partikularment
il-bniedem tal-lum,
ħafna drabi jinfixel
għax ma jafx
x’jaqbad jagħmel
biex jikseb ferħ li
jtul u mhux itirlu
f’ħakka t’għajn.
Għalhekk għandu
jinżlilna balzmu l-kliem
ta’ Ġesù li
jgħidilna:
“Għidtilkom dan biex
il-ferħ tiegħi jkun
fikom u biex il-ferħ
tagħkom ikun sħiħ” (Ġw
15:11). Din hija
tassew bxara tajba.
L-Iben ta’ Alla sar
bniedem biex jgħinna
nkunu ferħanin. Is-sigriet
ta’ dan il-ferħ li
joffri Ġesù jinsab
f’dak li qalilna –
fi kliem ieħor
fil-Vanġelu. Il-Vanġelu
ta’ Ġesù huwa għajn
ta’ ferħ. Ftit ilu
l-Papa Franġisku
tana kitba
importanti ħafna
bl-isem Il-Ferħ
tal-Vanġelu. Dan
id-dokument tant hu
sabiħ li ma nehdiex
nirrakkomanda lil
kulħadd biex jaqrah.
Fi kliem il-Papa,
il-Vanġelu huwa
“xmara ta’ ferħ”
(5). Dan il-Vanġelu,
li għalina l-Insara
huwa l-ktieb
tal-ħajja tant li
miegħu nikkonfrontaw
l-għemil tagħna,
huwa r-riċetta
tal-ferħ veru.
Dan il-ferħ huwa
garantit, għax min
jifli l-Vanġelu
jasal biex jagħraf
lil Alla u jiltaqa’
mal-persuna ta’ Ġesù
Kristu. Għax kif
jgħid Santu Wistin,
il-qalb tal-bnedmin
ma ssibx mistrieħ
jekk mhux meta ssib
lil Alla. Għalkemm
aħna l-bnedmin
nitħabtu, nieħdu
inizjattivi u
nagħmlu proġetti,
xejn ma hu sejjer
jagħtina
sodisfazzjon li
jibqa’ jekk Alla ma
jkunx parti mill-programmi
ta’ ħajjitna.
Fil-fatt, jekk
tistaqsuni x’inhu l-aktar
li jinkwetani bħala
ragħaj spiritwali,
ngħidilkom li nibża’
li llum ma għadniex
inqajmu d-domanda
dwar Alla: Fejn hu
Alla u min hu Alla?
Ninkwieta meta nara
li l-ġenerazzjoni li
tielgħa qed titlef
il-gost u l-interess
f’Alla u għalhekk
qed tittraskura li
tagħmel mistoqsijiet
dwar Alla. Għal
dawk li ma jistaqsux
dwar Alla u ma
għandhomx interess
f’Ġesù, il-Vanġelu
jsir sett ta’
obbligi li jxekklu
flok jeħilsu, jew
kitba fost l-oħrajn
(u allura naqgħu
fir-relattiviżmu)
jew ittra mejta.
Aħna nġarrbu l-ferħ
tal-Vanġelu meta
nagħmlu l-esperjenza
tal-imħabba; ma
nistgħux inkunu
ferħanin jekk ma
nkunux maħbubin u
jekk ma nafux
inħobbu. Fil-fatt,
il-Vanġelu jurina li
aħna maħbubin minn
Alla u fl-istess
waqt jindikalna
b’liema mħabba
għandna nħobbu
lill-proxxmu tagħna.
Ġesù nnifsu
jgħidilna li jekk
inħarsu l-kmandamenti
tiegħu, nibqgħu fi
mħabbtu u nkunu
ferħanin (ara Ġw
15:10). Dawn
“il-kmandamenti” la
huma l-liġi ta’ Mosè
u lanqas il-mijiet
ta’ preċetti li
ħolqu l-awtoritajiet
reliġjużi, imma huma
tnejn: li wieħed
iħobb lil Alla
b’qalbu kollha,
b’ruħu kollha u
b’saħħtu kollha, u
li jħobb
lill-proxxmu tiegħu
bħalu nnifsu.
Illum qegħdin
infakkru l-mija u
ħamsa u għoxrin
anniversarju minn
meta Fra Baskal
Farrugia daħal fl-Ordni
tal-Patrijiet
Kapuċċini. Fuq
il-bieb taċ-ċella
tiegħu f’dan
il-kunvent, Fra
Baskal kellu miktub
is-sentenza mill-ktieb
tal-Proverbji li
semmejt aktar ’il
fuq, jiġifieri li
“qalb ferħana tagħti
s-saħħa, ruħ
imnikkta tmewwet
il-ġisem”. Meta
nqis li Fra Baskal
għadda l-biċċa l-kbira
mis-sebgħa u erbgħin
sena ta’ ħajja
reliġjuża b’din is-sentenza
ma’ wiċċu, ma nkunx
nesaġera jekk ngħid
li kull darba li
jilmaħha kien
iġedded l-impenn
tiegħu biex irawwam
fiħ il-ferħ
tal-Vanġelu. L-istess
sejħa reliġjuża
tiegħu kienet sejħa
għall-ferħ.
Fil-fatt, kif naqraw
f’Ittra Appostolika
li kiteb dan l-aħħar
lill-persuni
kkonsagrati, il-Papa
Franġisku jgħid li
dawk ikkonsagrati
huma msejħa biex
jagħmlu esperjenza u
biex juru li Alla
kapaċi jimla lil
qalbna u jagħmilna
ferħanin mingħajr ma
jkollna l-ħtieġa li
nfittxu l-ferħ bnadi
oħra (2.1).
Bħal f’kull storja
ta’ persuna
reliġjuża, il-ħajja
ta’ Fra Baskal
kienet mixja wara
Ġesù u ma’ Ġesù.
Baskal mar wara Ġesù
għax ħassu msaħħar
mill-ġmiel tiegħU.
Is-sejħa reliġjuża
offrietlu l-possibbiltà
li permezz
tal-kunsilli
evanġeliċi huwa sar
jixbah lil Kristu
fqir, safi u
ubbidjenti. Din
il-mixja huwa mxieha
bil-ferħ u wasslitu
għall-ferħ għax sab
lil Alla. Fil-fatt,
dawk li kienu midħla
ta’ Fra Baskal,
kienu jaraw fih
il-bniedem ta’ Alla.
Min jafu jgħid li
“is-serenità kienet
tiddi fuq wiċċu”.
Il-qofol tal-ħajja
reliġjuża ma huwiex
l-appostolat imma n-namur
ma’ Ġesù Kristu.
Mhux ta’ b’xejn li
Fra Baskal kien
jgħaddi ħin twil
fil-preżenza ta’
Ġesù Ewkaristija.
Kif jinnota l-Papa
Franġisku, ma jistax
ikun hemm “dixxiplu
mdejjaq”, għax
inkella dan ikun
ifisser li d-dixxipulat
ta’ Ġesù huwa xi
ħaġa tad-dwejjaq;
meta l-verità hija
l-kontra – min
jitwaħħad ma’ Ġesù
Kristu, jaqsam mill-ferħ
divin tiegħU.
Il-Papa Franġisku
jgħid li l-ferħ
tal-Vanġelu jinbidel
fil-ferħ
tal-missjoni. Min
għandu l-ferħ veru (lil
Alla), ma jafx
iżommu għalih imma
jikkomunikah mal-oħrajn.
Dan narawh ukoll
fil-ħajja ta’ Fra
Baskal. Huwa kellu
diversi ħidmiet fl-Ordni
– kien kok,
infermier, purtinar,
sagristan u ċirkatur.
Iċ-ċirka kienet
ħafna għal qalbu, u
sajf u xitwa kien
joħroġ fit-toroq
iħabbat il-bibien
biex jittallab
il-karità. Huwa
kien japprofitta
minn dawn
il-kuntatti kemm
biex jitkellem man-nies
dwar Alla u kemm
biex jagħmel karità
mal-foqra. Il-fantasija
karitattiva tiegħu
kienet kbira, tant
li wieħed minn sħabu,
Patri Ġjaċintu,
jgħid li “mal-morda
Fra Baskal kien veru
omm”.
Bħal Missieru San
Franġisk, Fra Baskal
kien jaf li l-ferħ
perfett (perfecta
lætitia) kien
iġarrbu meta xi ħadd
kien jumiljah imma
hu jibqa’ seren u
kalm. Darba
l-Gwardjan tiegħu
sabu qed jaħsel
ħwejġu f’post fejn
ma kienx suppost
ikun u tah ħasla
mhux ħażin; imma Fra
Baskal baqa’ sieket
u obda.
Filwaqt li nitolbu
lil Alla biex
jagħtina dan id-don
tal-ferħ, nitolbuh
ukoll biex il-Knisja
tagħna tibqa’ tgawdi
l-preżenza
tar-reliġjużi li
huma ikona ħajja ta’
dan is-sigriet: li
l-ferħ veru jiġi
mill-Vanġelu u
l-għaqda tagħna ma’
Alla.
Ħdejn is-siġra
ta’ Fra Baskal
Minn Fr Mario Attard
OFM Cap
Kif tħossok meta
tkun bil-għatx u xi
ħadd ikollu l-qalb
jagħtik tazza ilma
friska? Ejjew ma
mmorrux ‘il bogħod
ħbieb u nilgħabuha
tal-puliti! Għidli
ftit kif tħossok
meta ma tkunx tiflaħ
iżżomm iktar u ssib
toilet ħa
tistrieħ? X’serħan
iġġarrab hux! Hux
veru li jxoqq
l-għaraq għalik
daqskemm tistrieħ!
Ħeħe! Mhux ta’
b’xejn mela li
l-Amerikani dak
l-imbierek post li
fih jilqa’ mill-aqwa
Sultan sal-iktar
persuna minsija
f’din id-dinja (imma
mhux mill-Mulej!)
jgħidulu ir-restroom!
Għalfejn se
tiskrupla? Ma
tħossokx tistrieħ
int ukoll fih?
Daqstant ieħor veru
li int u jien
ninsabu għajjiena
f’ħajjitna. U
għajjiena tort
tagħna tafux! Għax
min qalilna
inwaħħluha f’rasna
li llum ma tista’
tafda lil ħadd? Li
ma nafx ħaddieħor
x’għandu lest
għalija? Li ħadd ma
jgħidli ‘aħsel
wiċċek’ biex ikun
aħjar minnu? Li għax
xi ħadd għamilli
fl-imgħoddi il-bżieq
fuq imnieħri jfisser
li jien fallut/a? Li
għax xi drabi
inġarrejt
mal-kurrenti
tas-soċjetà
‘moderna’ jfisser li
minix kapaċi nżomm
commitments
fil-futur? Min qalli
li għax uliedi
iċċapsu mal-ħażin
ifisser li se
jibqgħu hekk? Li
m’hu se jinqalgħu
qatt minnu? Għalfejn
se nħalli dawn
il-preokupazzjonijiet
jgħajjuni u
jkissruni bil-bosta?
Mhux ta’ b’xejn li
ħafna nies jgħiduli
bid-dmugħ
f’għajnejhom: “Patri
għejjejt! Ma niflaħx
iktar! Waħda wara
l-oħra!”
Il-Patri għandu qalb
bħal tiegħek. U
jifhem il-weġgħat
tiegħek għaliex
f’ħajtu għandu xi
jtaqqlu wkoll. Mela,
kif kont qiegħed
bilqiegħda fuq
wieħed mis-siġġijiet
sbieħ li għandna
fil-kjostru
tal-kunvent tagħna
tal-Madonna
tal-Grazzja
f’Għawdex,
għall-ħabta
tal-ħamsa u nofs ta’
filgħaxija, waqt li
x-xemx kienet bdiet
sewwa l-mixja tagħha
biex tmur u iddawwal
popli oħra,
fil-ħemda ta’
filgħaxija, fettilli
indawwar rasi lejn
in-naħa tax-xellug
tiegħi u aqta’
x’nilmaħ? Is-siġra
ta’ Fra Baskal!
Mela! Dik il-famuża
siġra li tant tagħti
larinġ mill-itjeb
għax imbierek!
Kemm nies dari kienu
jiġu l-kuvent tagħna
l-Kapuċċini
f’Għawdex biex
jieħdu dik
il-larinġa mis-siġra
li għadha imħawla
sallum taħt it-tieqa
ta’ kamret Fra
Baskal! Ma niskantax
li anki grazzji kbar
inqalgħu meta
l-persuna kielet
b’fidi dik
il-larinġa! U mela
lil Alla se
nikkontrollawh aħna,
daqxejn ta’ ħniex,
kif se jaħdem!
Kif kont mixħut
ixxamplat fuq dan
l-imbierek ta’ siġġu
fil-kjostru ħelu
tal-kunvent ġie
x’jgħidli biex
nibda’ nitlob
b’qalbi kollha
lill-Mulej bit-talb
tal-umli Fra Baskal
għall-ħtiġijiet
tan-nies li l-Mulej
beda’ jġibli
quddiemi f’dak
il-waqt. Tassew li
lill-Mulej ma
toħodlux kopja. Kos
hux! Anki meta nkunu
ixxamplati jinqeda
bina! Basta dik
il-qalb li għandna
midfuna fil-qafas
ta’ sidirna tkun
ixxamplata fih!
Miftuħa ktieb
quddiemu! X’Alla hu
hux! Kif tridek ma
tħobbux!
Hekk kif temmejt
talbi l-Ispirtu ta’
Alla wrieni biex
nikteb dan il-
messaġġ u nibgħatu
lil diversi nies.
“Qiegħed ħdejn
is-sigra tal-Qaddej
ta’ Alla Fra Baskal.
Qiegħed nitlob
għalik u
għall-familja
tiegħek bit-talb
tiegħu. Ibierkek
Alla li jista’
kollox fl-Isem
tal-Missier,
tal-Iben u
tal-Ispirtu s-Santu.
Amen”. U bgħattu!
Ir-ruxxmata messaġġi
li rċevejt lura
ħallitni b’ħalqi
miftuħ! Il-mowbajl
tiegħi ma waqafx
jirċievi messaġġi
ta’ gratitudni minn
nies li
irringrazzjawni
talli tellajt
it-talba tagħhom
quddiem il-Mulej
bit-talb ta’ Fra
Baskal! Ma’ kull
messaġġ li bdejt
nirċievi beda’
jqabbiżli d-dmugħ
minn għajnejja! Gzuz
kienu dawk li
qalhuli biex nitlob
għalihom! Minn dawk
il-messaġġi kollha
stajt nara iqattar
id-dmugħ ta’ min
lill-Mulej riedu
f’ħajtu! X’jimporta
f’liema sitwazzjoni
kien? U tgħid Fra
Baskal se joqgħod
jagħmel xi
differenza għal min
jitlob? Mhux għalina
ilkoll talab?
Li naf żgur hu li
biswit is-siġra
l-Fra umli u qaddis
kien ferħan se jtir
li sewa ta’ ġid kbir
għal għajru! Għax hu
wkoll ġarrab minn
ħutu miskin! Imma
t-tweġiba tiegħu
kienet dejjem
l-istess:
“Għall-imħabba ta’
Alla kollox
inġarrab!” Din hija
t-tweġiba għalik u
għalija minn ħdejn
is-siġra ta’ Fra
Baskal!
Patri Mario Attard
OFM Cap
|
