Il-Papa Franġisku minn Dar Santa Marta Il-bieb tat-tama jinfetaħ bl-imħabba mhux bil-ħarsien strett tal-liġi Ġimgħa, 31 ta' Ottubru 2014
Fil-quddiesa ta’ dalgħodu fid-Dar Santa Marta l-Papa tkellem dwar dawk l-Insara li huma tant marbutin mal-liġi li jinsew il-ġustizzja u dwar l-Insara li huma marbutin mal-imħabba li jwasslu l-liġi għall-milja tagħha.
Fil-Vanġelu tal-lum Ġesù jistaqsi lill-Fariżej hux sewwa jew le tfejjaq nhar ta’ Sibt, imma huma ma jweġbux. Allura Hu jaqbad raġel marid minn idejh u jfejqu. Il-Papa nnota li meta l-Fariżej sabu l-verità ma wiċċhom, baqgħu siekta, imma kienu jseksku minn wara u jfittxu kif jistgħu iwaqqgħuh. Ġesù jċanfar lil dawn in-nies li tant kienu marbutin mal-liġi, li kienu nsew il-ġustizzja tant li kienu jiċħdu l-għajnuna anki lil-ġenituri anzjani bl-iskuża li kienu jkunu taw kollox lit-Tempju.
Imma min hu l-aktar importanti, staqsa l-Papa?, ir-raba’ kmandament jew it-Tempju? Dan il-ħarsien strett tal-liġi, kien ibegħedhom mill-imħabba u mill-ġustizzja. Kienu jieħdu ħsieb il-liġi u jinjoraw il-ġustizzja. Kienu josservaw il-liġi u jinjoraw l-imħabba.
Kienu mudelli: il-mudelli ta’ żmienhom. Għal dawn in-nies Ġesù kellu kelma waħda: ipokriti. Min-naħa ddur id-dinja biex tagħmlu d-dixxipli. Imbagħad? Tagħlqu l-bieb. Bnedmin tal-għeluq, tant marbutin mal-liġi, mal-irqaqat tal-liġi, mhux mal-liġi li hi l-liġi tal-imħabba; imma mal-irqaqat tal-liġi. Kienu dejjem jagħlqu l-bibien għat-tama, għall-imħabba, għas-salvazzjoni. Nies li ma kienu jafu jagħmlu xejn aktar ħlief jagħlqu l-bibien.
Il-mixja biex inkunu fidili lejn il-liġi mingħajr ma nittraskuraw il-ġustizzja u l-imħabba, kompla jgħid il-Papa Franġisku bi kwotazzjoni mill-ittra ta’ San Pawl lill-Filippin, hija l-maqlub ta’ dan: mill-imħabba lejn l-integrità: mill-imħabba lejn id-dixxerniment; mill-imħabba lejn il-liġi.
Din hi t-triq li jgħallimna Ġesù, li hija għal kollox l-oppost ta’ dik tad-dutturi tal-liġi. Din it-triq mill-imħabba lejn il-ġustizzja tressaqna lejn Alla. Iżda t-triq l-oħra, dik tal-ħarsien tal-liġi waħdeha, tal-ħarsien tal-irqaqat tal-liġi. tressaqna lejn l-għeluq, lejn l-egoiżmu.
It-triq li mill-imħabba tieħu lejn l-għarfien u d-dixxerniment, lejn il-milja, tressaqna lejn il-qdusija, lejn is-salvazzjoni, lejn il-laqgħa ma’ Ġesù. Filwaqt li t-triq li tressaqna lejn l-eġoiżmu, lejn is-suppervja li ġġegħelna nħossuna ġusti, lejn dik il-qdusija tad-dehra biss mhix it-triq it-tajba, mhux hekk? Lil dawn in-nies Ġesù jgħidilhom: Intom tħobbu tidhru mal-poplu bħala nies ta’ talb, ta’ sawm…. Imma biex tidhru. Tant li lin-nies Ġesù jgħidilhom: Agħmlu dak li jgħidulkom imma mhux dak li jagħmlu huma.
Dawn huma ż-żewġ toroq, osserva l-Papa. Imbagħad hemm il-ġesti żgħar ta’ Ġesù li jgħinuna nifhmu t-triq tal-imħabba li teħodna lejn l-għarfien u d-dixxerniment. Ġesù jaqbadna minn idejna u jfejjaqna. Ġesù jersaq qribna. Din il-qrubija hija eżattament il-prova li aħna mexjin fit-triq it-tajba, għax hi propju t-triq li għażel Alla biex isalvana: il-qrubija. Hu resaq qribna , sar bniedem. Il-laħam; il-laħam ta’ Alla huwa s-sinjal tal-ġustizzja vera. Alla li sar bniedem bħalna u aħna li rridu nsiru bħall-oħrajn, bħal min hu fil-bżonn, bħal min jeħtieġ l-għajnuna tagħna.
Il-laħam ta’ Ġesù, afferma l-Papa, huwa l-pont li jqarribna lejn Alla.. mhux l-iraqaqt tal-liġi, le! Fil-laħam ta’ Alla l-liġi ssib il-milja tagħha u huwa laħam li jaf isofri, li ta ħajtu għalina.
Jalla dawn l-eżempji, dan l-eżempju ta’ qrubija ta’ Ġesù, mill-imħabba glen il-milja tal-liġi jgħinuna biex ma naqgħux fl-ipokrisija: qatt, temm il-Papa Franġisku. Hu tant ikraħ in-Nisrani ipokrita, tant ikraħ. Jalla l-Mulej jeħlisna minn dan.
|
