Il-Papa Franġisku minn Dar Santa Marta Ix-xitan mhux ħrafa, irid ikun miġġieled bl-arma tal-verità. Ħamis, 30 ta' Ottubru 2014
Il-ħajja Nisranija hija ġlieda kontra x-xitan, id-dinja u l-passjonijiet tal-ġisem. Hekk afferma l-Papa Franġisku waqt il-quddiesa ta’ dalgħodu fil-kappella tad-Dar Santa Marta. Hu u jikkummenta l-qari meħud mill-ittra ta’ San Pawl lill-Efesin, il-Papa saħaq għal darb’oħra li x-xtan jeżisti u aħna rridu niġġildulu bl-armatura tal-verità.
“Forza u kuraġġ”. Il-Papa Franġisku bena l-omelija fuq il-kliem ta’ San Pawl li, meta kien qed jindirizza lill-Efesin “jesprimi l-ħajja Nisranija b’lingwaġġ militari”. Il-Qdusija Tiegħu qal li rridu niddefendu l-ħajja tagħna f’Alla u jeħtiġilna nissieltu biex immexuha ‘l quddiem. Għalhekk huma meħtieġa l-forza u l-kuraġġ biex nirreżistu u biex inħabbru. Biex nimxu ‘l quddiem fil-ħajja spiritwali irridu nissieltu. Mhux konfront sempliċi, le, imma hija ġlieda kontinwa. Franġisku fakkar li l-għedewwa tal-ħajja nisranija huma tlieta: id-demonju, id-dinja u l-ġisem, jew aħjar il-passjonijiet tagħna, li huma l-feriti li writna mid-dnub oriġinali. Ċertament, osserva l-Papa, is-salvazzjoni Ġesù tahielna b’xejn, imma rridu niddefednuha.
Minn min irridu niddefedni ruħi? X’irrid nagħmel? Nilbes l-armatura ta’ Alla, jgħidilna Pawlu, jiġifieri li dak li hu ta’ Alla jiddefendina biex nirreżistu n-nasses tax-xitan. Ċara din? Ċara, tenna l-Papa? Ma nistgħux naħsbu fil-ħajja spiritwali, f’ħajja nisranija, mingħajr ma nirreżistu t-tentazzjonijiet, mingħajr ma nissieltu max-xitan, mingħajr ma nilbsu din l-armatura ta’ Alla li ttina l-forza u tiddefendina.
San Pawl, kompla jgħid il-Papa, jinsisti li l-battalja tagħna mhix kontra affarijiet żgħar, imma kontra l-prinċipati u l-qawwiet, jiġifieri kontra x-xitan u sħabu. Imma lil dil-ġenerazzjoni, u anki lil ġenerazzjonijiet oħra, ġegħeluhom jemmnu li x-xitan hu ħrafa, figura, idea, l-idea tal-ħażin. Imma x-xitan jeżisti u aħna rridu niġġieldu kontrih.
Dan jgħidu Pawlu, mhux qed ngħidu jien, qal Franġisku. Dan tgħidu l-Kelma t’Alla. Imma aħna ma tantx aħna konviniti minnu. U mbagħad Pawlu jgħidilna kif inhi din l-armatura ta’ Alla u liema huma l-armaturi differenti li jingħaqdu flimkien biex jiffurmaw din l-armatura l-kbira ta’ Alla. U jgħid: Kunu sodi għalhekk imħażżmin bil-verità. Din hi armatura ta’ Alla: il-verità.
Ix-xitan, kompla l-Papa, huwa l-giddieb, missier il-giddibin, missier il-gideb. U flimkien ma’ San Pawl irid ikollna ġenbejna mħażżmin bil-verità u nkunu libsin il-kurazza tal-ġustizzja.
Għalhekk, ma nistgħux inkunu Nsara mingħajr ma naħdmu l-ħin kollu biex inkunu ġusti, ma nistgħux! Ħaġa li tkun tista’ tgħinna ħafna tkun jekk nistaqsu lilna nfusna jekk nemmnux jew le.
Jiena nemmen xi ftit iva u xi ftit le? Jien xi ftit tad-dinja u nemmen sa fejn jaqbilli? Mingħajr il-fidi, qal il-Papa Franġsiku, ma nistgħux nimxu ‘l quddiem, ma nistgħux niddefendu s-salvazzjoni li ġabilna Ġesù.
Għandna bżonn din il-kurazza ta’ fidi għax ix-xitan, lejna ma jixħittx il-fjuri imma vleġġeġ jikwu, biex joqtolna. Għalhekk il-Papa ħeġġiġna biex naqbdu l-elmu tas-salvazzjoni u x-xabla tal-Ispirtu li hija l-Kelma t’Alla u stedinna nitolbu l-ħin kollu, u ngħassu bit-talb u s-suppliki.
Ħajjitna hija milizja. Il-ħajja nisranija hija ġlieda, ġlieda sabiħa, għax meta l-Mulej jirbaħ f’kull pass ta’ ħajjitna, jagħtina ferħ kbir: dak il-ferħ li l-Mulej rebaħ fina bis-salvazzjoni gratwita li tana. Hu minnu li lkoll aħna xi ftit għażżenin fil-ġlieda, mhux veru?, u nħallu l-passjonijiet u t-tentazzjonijiet imexxuna. Dan għaliex aħna lkoll midinbin, ilkoll!
Imma taqtgħux qalbkom, kuraġġ u forza għax il-Mulej magħna, temm il-Papa.
|
