Il-Papa Franġisku minn Dar Santa Marta Hemm aktar Insara persegwitati llum milli kien hemm fl-ewwel sekli tal-Knisja. It-Tnejn, 30 ta’ Ġunju 2014
Hemm aktar Insara persegwitati llum milli kien hemm fl-ewwel sekli tal-Knisja, tenna l-Papa Franġisku waqt il-quddiesa fid-Dar Santa Marta. Illum il-Knisja tfakkar lill-Qaddisin Protomartri tal-Knisja Rumana li kienu nqatlu b’mod krudili fuq l-Għolja tal-Vatikan b’ordni ta’ Neruni, wara l-ħruq ta’ Ruma, fis-sena 64.
It-talba tal-bidu tal-quddiesa tfakkarna li l-Mulej “saqqa bid-demm tal-martri l-ewwel żerriegħa tal-Knisja ta’ Ruma”. Qed nitkellmu dwar it-tkabbir ta’ pjanta, afferma l-Papa Franġisku waqt l-omelija, u dan ifakkarna dak li kien jgħid Ġesù: “Is-Saltna tas-sema hi bħal dak il-bniedem li tefa’ ż-żerriegħa mbagħad telaq lura lejn daru, u, rieqed jew imqajjem, iż-żerriegħa tikber u twarrad mingħajr ma jkun jaf kif hu.” Din iż-żerriegħa hi l-Kelma t’Alla li tikber u ssir is-Saltna t’Alla, issir Knisja bil-ħidma tal-Ispirtu s-Santu u bix-xhieda tal-Insara.
Nafu li mingħajr l-Ispirtu ma jistax ikun hemm tkabbir; Hu jagħmel il-Knisja, Hu jgħinha tikber, Hu jlaqqa’ flimkien il-komunità tal-Knisja. Imma hi meħtieġa wkoll ix-xhieda tal-Insara. U meta din ix-xhieda tasal fl-aħħar, meta ċ-ċirkostanzi storiċi jitobu minna xhieda qawwija, hemmhekk insibu l-martri, l-akbar xhieda. U dik il-Knisja tissaqqa’ bid-demm tal-martri. Dan hu s-sabiħ tal-martirju. Jibda’ bix-xhieda, jum wara ieħor, u jista’ jintemm bħalma ntemm Ġesù, l-ewwel martri, l-ewwel xhud, ix-xhud fidil: bid-demm.
Iżda hemm kundizzjoni biex din ix-xhieda tkun waħda vera, żied il-Papa, trid tkun mingħajr kundizzjonijiet. Smajna fl-Evanġelju li dak ir-raġel ried imur wara l-Mulej, imma jagħmillu kundizzjoni: ried imur isellem ‘il-missieru u jidfnu…… Il-Mulej iwaqqfu: “Le!” Ix-xhieda hija mingħajr kundizzjonijiet, trid tkun soda, deċiża, irid ikollha l-lingwaġġ tant qawwi li jgħidilna bih Ġesù: “il-lingwaġġ tagħkom irid ikun iva, iva,le, le. Dan hu l-lingwaġġ tax-xhieda.
Illum, kompla l-Papa Franġisku, inħarsu lejn din il-Knisja ta’ Ruma li qed tikber imsoqqija bid-demm tal-martri. Imma hu xieraq ukoll, kompla jgħid, li llum naħsbu f’tant martri ta’ żmienna, tant martri li jagħtu ħajjithom għall-fidi. Hu minnu li kien hemm ħafna Nsara persegwitati fi żmien Neruni, imma llum – saħaq il-Papa – mhumiex b’anqas.
Illum hemm tant martri fil-Knisja, tant Insara persegwitati. Niftakru fil-Lvant Nofsani, l-Insara jkollhom jaħarbu mill-persekuzzjonijiet, tant Insara maqtulin mill-persekuturi. Anki dawk l-Insara li jitkeċċew ‘il barra b’mod aktar diplomatiku, bl-ingwati bojod: anki dik hi persekuzzjoni.
Illum hemm ħafna aktar xhieda, aktar martri fil-Knisja milli kien hemm fl-ewwel sekli. U waqt din il-quddiesa, li fiha qed infakkru lill-antenati glorjużi tagħna, hawn f’Ruma, naħsbu wkoll dwar dawn ħutna li jgħixu fil-persekuzzjoni, li jbatu, u li b’demmhom isaqqu u jkabbru ż-żerriegħa ta’ tant Knejjes żgħar li jinbtu. Nitolbu għalihom u għalina, temm il-Papa.
|