Il-Papa Franġisku minn Dar Santa Marta In-Nisrani ma jħabbarx lilu nnifsu iżda lill-Mulej. It-Tlieta, 24 ta’ Ġunju 2014
In-Nisrani ma jħabbarx lilu nnifsu iżda lill-Mulej qal il-Papa Franġisku waqt l-omelija tal-quddiesa fid-Dar Santa Marta dalgħodu, fis-solennità tat-Twelid ta’ San Ġwann il-Battista. Il-Papa spjega l-vokazzjoni ta’ dak li kien l-akbar fost il-profeti: ħejju, iddixxernu, iċċekknu.
Inħejju l-miġja tal-Mulej, niddixxernu min hu l-Mulej, niċċekknu biex jitkabbar il-Mulej. Il-Papa Franġisku qal li f’dawn it-tliet verbi niġbru l-vokazzjoni ta’ Ġwanni l-Battista, mudell dejjem attwali għal kull Nisrani. Ġwanni, qal il-Papa, kien iħejji t-triq għal Ġesù mingħajr ma jżomm xejn għalih. Kien bniedem importanti: in-nies kienet tfittxu, tmur warajh għax kliemu kien qawwi. Kliemu kien jirfed il-qlub. Minħabba f’dan, osserva l-Papa, forsi hu kellu t-tentazzjoni li jemmen kemm kien bniedem importanti, imma ma waqax f’din in-nassa. Infatti, meta resqu lejh id-dutturi tal-liġi biex jistaqsuh jekk kienx hu l-Messija, Ġwanni wieġeb: Jiena leħen, leħen biss imma ġejt biex inħejji t-triq għall-Mulej.
Din hi l-ewwel vokazzjoni tal-Battista, osserva l-Papa: Iħejji l-poplu, iħejji l-qalb tal-poplu biex jiltaqa’ mal-Mulej. Imma l-Mulej min hu? Din hija t-tieni vokazzjoni ta’ Ġwanni: id-dixxerniment, fost tant nies twajbin, dwar min kien il-Mulej. L-Ispirtu rrivelalu dan u hu kellu l-kuraġġ jgħid: Dan hu. Dan hu l-Ħaruf t’Alla, dak li jneħħi d-dnubiet tad-dinja.
Id-dixxipli ħarsu lejn dan il-bniedem li kien għaddej u ħallewh sejjer. L-għada ġara l-istess: “Dak hu! Dak akbar minni”. Id-dixxipli marru warajH. Meta kien qed iħejji l-poplu, Ġwanni kien jgħidilhom: Warajja ġej wieħed…… Fid-dixxerniment, kien jaf jiddixxerni u juri lill-Mulej. “Hemm dan qabli……”!
It-tielet vokzzjoni ta’ Ġwanni, kompla l-Papa, hu li ċċekken. Minn dak il-waqt, osserva l-Qdusija Tiegħu, ħajtu bdiet tinħeba, tiċkien biex jikber il-Mulej, baqa’ jiċċekken sa ma xejjen lilu nnifsu. Hu jrid jikber, filwaqt li jien irrid niċċekken, warajja, quddiemi, bogħod minni”!
Din kienet l-aktar ħaġa diffiċli għal Ġwanni għax il-Mulej kellu stil li l-Battista ma kienx immaġinah, sal-punt li fil-ħabs, għax dak kien iż-żmien li fih kien il-ħabs, kien bata’ mhux biss id-dlam taċ-ċella imma wkoll id-dalma f’qalbu. U jistqasi lilu nnifsu” Imma dan hu? Forsi ħadt żball?
Għax il-Messija tant għandu stil sempliċi… li ma jinftihemx. U billi kien bniedem ta’ Alla, Ġwanni jibgħat lid-dixxipli tiegħu għand Ġesù biex jistaqsuh: Imma int verament dak li qed nistennew, jew irridu nistennew li xi ħadd ieħor? L-umiljazzjoni ta’ Ġwanni, innota l-Papa, kienet doppja: l-umiljazzjoni ta’ mewtu, prezz ta’ kapriċċ, imma wkoll l-umiljazzjoni tad-dalma tar-ruħ. Ġwanni, li kellu ħila jistenna lil Ġesù, li għaraf jiddixxerni, issa qed jara lil Ġesù mill-bogħod. Dik il-wegħda, tenna l-Papa, tbegħedet minnu. U jispiċċa waħdu, fid-dlam, fl-umiljazzjoni.
Jibqa’ waħdu għax ixxejjen ħafna biex jitkabbar il-Mulej. Ġwanni, osserva Franġisku, jara l-Mulej bogħod minnu u hu, umiljat, imma b’qalbu fil-paċi. Tliet vokazzjonijiet fi bniedem: iħejji, jiddixxerni, iħalli lill-Mulej jikber u jċekken lilu nnifsu. Hu sabiħ li naħsbu li l-vokazzjoni tan-Nisrani hija din. In-Nisrani ma jħabbarx lilu nnifsu, iħabbar lil ħaddieħor, iħejji t-triq għal xi ħadd ieħor: għall-Mulej.
In-Nisrani għandu jkun jaf jiddixxerni, għandu jagħraf kif jiddixxerni l-verità minn dak li jidher li hu l-verità, iżda li mhuwiex. In-Nisrani hu bniedem ta’ dixxerniment. U n-Nisrani għandu jkun bniedem li jaf jiċċekken hu biex jikber il-Mulej fil-qalb u fir-ruħ tal-oħrajn, temm il-Papa Franġisku.
|